J. Anette Dennis

Human sa paggahin sa iyang pagkabata didto sa nagkalainlaing mga dapit sa tibuok Estados Unidos, si Sister Jeannie Anette Dennis naghunahuna nga ang iyang mga pangandoy natuman sa dihang ang iyang pamilya namalhin ngadto sa Cottonwood Heights, Utah.

“Naghunahuna ko nga ang tanan sa Utah mga miyembro sa Simbahan ug nga nindot nga dalangpan didto,” siya miingon.

Atol sa iyang unang pipila ka adlaw sa grade nine, naghinamhinam siya nga dapiton sa usa ka party. Apan ang usa ka batang babaye nga nahimo niyang suod nga higala mipasidaan niya nga ang mga tawo sa party mogamit og drugas.

“Akong nakat-onan dihadiha dayon nga ang daotan anaa bisan asa,” siya miingon. Ang iyang pagpamatuod ug ang nakasentro sa ebanghelyo nga panimalay, hinoon, ang nakapalig-on niya sa tibuok pag-eskwela sa high school.

Natawo sa Provo, Utah, niadtong Hunyo 1960, si Jeannie Anette Herrin mao ang kinamagulangan sa pito ka anak nila ni Curtis Lamar ug Patricia Joanne Herrin. Ang trabaho sa iyang amahan ang nagdala sa pamilya ngadto sa Mississippi, Tennessee, Iowa, Nebraska, ug Utah.

Nag-eskwela siya sa pagkamaestra sa elementarya sa Brigham Young University ug nag-minor sa Kinatsila. Atol sa biyahe sa klase paingon sa Mexico, nahimamat niya si Jorge Dennis, ug ang duha nagkagustohay.

Sa dihang mibalhin ang lalaki sa Siyudad sa Salt Lake usa ka tuig ang milabay aron magtuon og Iningles, nagsugod sila sa pagdeyt. Sulod sa pipila ka bulan, na-engage sila. Nagminyo sila sa Salt Lake Temple niadtong Septyembre 4, 1980. Sila adunay upat ka anak ug siyam ka apo. Sila nagpuyo sa Bountiful, Utah.

Si Sister Dennis, nga gipaluyohan pagka-Abril 2, mosugod sa pagserbisyo isip Unang Magtatambag sa Kinatibuk-ang Kapangulohan sa Relief Society inigka-Agosto 1. Nagserbisyo siya sa Primary general advisory council ug uban sa iyang bana diha sa Davis County communications council.

Gikan sa 2013 ngadto sa 2016 nagserbisyo siya uban sa iyang bana nga nagdumala sa Ecuador Guayaquil West Mission. Siya nagserbisyo usab isip assistant sa matron sa Guayaquil Ecuador Temple, secretary sa Relief Society sa stake, presidente sa Primary sa ward, magtatambag sa kapangulohan sa Relief Society ug Young Women sa ward, magtutudlo sa Relief Society, ug ordinance worker sa templo.