Elder Isaac K. Morrison

Si Elder Isaac K. Morrison miingon nga siya ug ang iyang asawa wala kaayo makatulog sukad nga si Presidente Russell M. Nelson mihatag sa tawag ngadto ni Elder Morrison nga moserbisyo isip Kinatibuk-ang Awtoridad nga Seventy.

“Kami nasayod nga kini usa ka panaw alang namo,” siya miingon. “Kami mosalig sa Ginoo sa pagpakita namo sa unsay kinahanglan namong buhaton.”

Si Elder Morrison gitawag isip presidente sa stake niadtong 2014, Area Seventy niadtong 2018, ug presidente sa Ghana Cape Coast Mission niadtong 2020.

“Ang matag buluhaton miabot sa panahon nga wala nako gidahom,” siya miingon. “Apan mosalig ko sa Ginoo ug dili sa akong kaugalingong mga abilidad.”

Si Elder Morrison adunay master of science degree sa strategic management and leadership gikan sa Kwame Nkrumah University of Science and Technology didto sa Ghana. Nagtrabaho siya sa Simbahan sa lainlaing mga posisyon sukad niadtong 2004, bag-ohay lang isip leader and member support manager alang sa West Africa.

Si Isaac Kofi Morrison natawo niadtong Nobyembre 25, 1977, sa Takoradi, Ghana, ngadto nila ni Joseph Kojo Morrison ug Mary Efua Obua Sarfo.

Isip usa ka bata, si Elder Morrison ug ang iyang pamilya mitambong sa mga miting sa simbahan sa laing relihiyon. Sa dihang mibalhin siya sa pamilya sa iyang uyoan aron moeskwela og high school, siya mitambong sa mga miting sa mga Santos sa Ulahing mga Adlaw kuyog nila ug dayon sa mga miting sa iyang simbahan. Ang usa ka magtutudlo sa sayo sa buntag nga seminary midapit niya sa pagtambong sa seminary, diin iyang nahimamat si Hannah Nyarko.

“Siya intelihente kaayo ug mohatag og nindot nga mga komentaryo,” miingon siya. “Mao gayod kini ang nakahatag nako og kadasig nga magtuon pa og dugang.” Human sa pagtuon sa Basahon ni Mormon nianang tuiga, siya miingon, “Andam na ko alang sa bunyag.”

Niadtong Disyembre 18, 2004, siya ug si Hannah naminyo didto sa Takoradi ug nasilyo paglabay sa tulo ka adlaw didto sa Accra Ghana Temple. Sila adunay tulo ka anak nga lalaki.

Agi og dugang sa iyang uban pa nga mga callling, si Elder Morrison nakaserbisyo isip magtatambag sa kapangulohan sa stake, bishop, magtatambag sa bishopric, presidente sa korum sa mga elder, magtutudlo sa Doktrina sa Ebanghelyo, magtutudlo sa seminary, ug full-time nga misyonaryo sa Nigeria.