Camille N. Johnson

Si Camille N. Johnson “kanunayng mobati nga komportable” diha sa Relief Society.

“Akong nakaplagan ang panag-igsoonay taliwala sa kababayen-an kinsa lahi kay kanako,” siya misulti bahin sa iyang kasinatian diha sa Relief Society, lakip na sa sobra sa 30 ka tuig nga pamilya nga mga ward sa Estados Unidos ug sa Peru. “Ganahan ko sa kalagsik ug kaalam sa kababayen-an diha sa Relief Society.”

Siya nakakaplag og mga magtutudlo ug mga higala diha sa Relief Society, lakip na niadtong pipila nga mas magulang ug mas manghod pa niya.

“Kitang tanan managsoon nga adunay managsamang kasinatian diha sa atong tinguha nga mobalik sa atong langitnong panimalay apan adunay managlahing mga kasinatian nga atong magamit aron sa pagtabang sa usag usa,” si Sister Johnson miingon.

Si Sister Johnson nagserbisyo isip Kinatibuk-ang Presidente sa Primary sa miaging tuig. Magsugod siya sa iyang pagserbisyo isip Kinatibuk-ang Presidente sa Relief Society karong Agosto 1.

Usa sa iyang paborito nga mga calling mao ang pagtudlo diha sa Relief Society.

“Ganahan ko sa oportunidad nga iapil ang mga sister ug matudloan sa Espiritu ug sa usag usa atol nianang sagradong oras diha sa Relief Society. Dinhi niini maghisgot kami bahin ni Kristo ug magmaya diha ni Kristo ug hatagan og pagtagad ang mahinungdanong mga butang.”

Si Camille Neddo natawo niadtong Septyembre 1963 ngadto nila ni Hal ug Dorothy Neddo sa Pocatello, Idaho, USA. Naminyo siya kang Douglas R. Johnson niadtong Hulyo 31, 1987, sa Salt Lake Temple. Sila adunay tulo ka anak nga lalaki ug lima ka apo.

Migradwar siya sa University of Utah sa English niadtong 1985 ug sa University of Utah S. J. Quinney College of Law niadtong 1989. Nagtrabaho siya og sobra sa 30 ka tuig isip usa ka abogada ug nahimong presidente sa Snow Christensen & Martineau law firm.

Kanhi presidente sa Young Women sa ward, si Sister Johnson nakaserbisyo usab isip sakop sa kapangulohan sa Relief Society ug sa Primary sa ward ug isip magtutudlo sa Doktrina sa Ebanghelyo ug sa Relief Society. Siya nagserbisyo usab uban sa iyang bana gikan sa 2016 ngadto sa 2019 samtang ang iyang bana nagdumala sa Peru Arequipa Mission.