Mongoeas a Rais, e a Rachel a Duubech

A rak er a 2024 a meang el rak er ngak. Ng olengchelel a okeuid me a eim el rak er ak metecholb e moterekokl el chedal a Ikelesia er a Jesus Kristo er a Uriul-klebesei el Santo er a Zwickau, Germany.

A klechad er ngak er a Ikelesia er a Jesus Kristo a kmal mekreos er a renguk. Sel kulcherangel el teloi er a rechedal a Dios er a telbiil, lobengkemiu, a rodam ma rodos, a tara klou el chetengakl ra klengar ngak.

Sel kulbedebek ra tial omerollek loltirakl, ea uldesuek a blechoel mo melbedebek ra chuodel basio ra Zwickau, el kblara sacrament miting er ngii ra Ikelesia ra Jesus Kristo ra kngalek. Tiaikdi el basio a ulemuchel a ulekerulel a kekerei el klaumera er ngak.

Tial ikelesia a mlarngii a mechut el organ er ngii. Bek el Sandei a ngeasek el chad loungerachel a oltamt aikal klekedelel meng mo sebechel loureor. Bebil ra taem ea kuk olngeseu er ngii.

Sel longitakl a rechad, e ngak a merenguk lomomb er tial organ meng diak bolak a eolt er ngii. Tial kdengchokl er ngii, e a kmal ungil mes a meang el siasing el bereked ra mado, a chimong a Osobel el Jesus Kristo e a chimong a Joseph Smith el ngara Chedaol Chereomel.

Ak dirk dobedebekii sel chedaol kulmelchesiu er ngii sel kumes el bedul aikal mado e kurrenges a chisel a klaumera er a Resanto e kungitakl a chelitakl er a Zion.

Tiaikid el chedaol basio, e a Reng ra Dios a mle sioning ra uldesuek ma renguk el uase ng klemerang: a Jesus Kristo Osobelel a beluulechad. Tia Ikelesia er Ngii. A Profet Joseph Smith a milsang a Dios el Chedam ma Jesus Kristo e rirenges a Ngerir.

Uchelel chelechal rak, ra kureor el mora Europe, mlarngii a techellek el mora Zwickau. Mekngit a renguk, le tial chuodel ikelesia a mla mo diak. Mla mo betok el rak ra lemeteruud e chelecha ng dechor a klou lengiil blai er ngii.

Ng meral mekngit a renguk el medengei el uase tial omekedecheraol ra kngeasek a di ngara uldesuek er chelechang. Ng mle chedaol basio el me er ngak. E di mle omekedecheraol.

Ngdi, a chedaol sioning el kngiluu ra Chedaol Reng ra betok el rak ra memong a dirkak el riid. A mera er ngii, ngbai mla mo mesisiich. Aikel ksiluub ra kngeasek el kirel a uchelel osisechakl ra ebangkelio ra Jesus Kristo a mesisiich el dodai ra chelsel a klengar ngak. A telbiil kngara chelsel lobengkel a Demak ra Babelaudes ma Betik ra rengul Ngelekel a di kulab ruriul ra lemeteruud a ikelesia ra Zwickau ma ikel mado el mla modiak.

“A eanged ma chutem a mo nguemed,“ ng millekoi a Jesus, “ng di tekingek a diak el ngemed.”

“A rois a mo diak, ma ked a mengukl; ngdi blekokouii er ngak a diak bol cheroid er kau, ma telbilek ra budech meng diak el ngemed, ng millekoi a Rubak.”

A tara kot el klou a belkul suobel el desubii ra tial klengar a klekakerous ra ikel diak a ulebengelel tekoi ma diak. Sel dodengelii tiang ea rokui el tekoi a mengodech— deleuill er kid, ikel dolilt el meruul, ma omerelled el mora rechad.

A dodengei ikel diak a ulebengelel ma ikel diak a smisichii a klaumera er kid ra Jesus Kristo ma Ikelesia er Ngii.

A mla moluut el ebangkelio ra Jesus Kristo, ng mle olisechakl a Profet Joseph Smith, a “odekdak a rokui el klemerang.” Di diak el belkul a kmo a rokui klemerang a di osisiu a teletelel. Bebil ra klemrang a uchelel, meklou a belkul, ra uchelel a klaumera er kid. A bebil a tebechedel a lechub eng rachel—meklou a belkul, alsekum eng ulak el mora ikel uchelel.

A Profet Joseph a ulisechakl: “Sel dodai ra ikel llach e ra klechelid er kid aikel ngara tekingir ra ikel klaumerang er a re Apostol me a re Profet, el melekoi el kirel a Jesus Kristo, el Ngii a mlad, e mildakl, e liluut el milkiis er a kodall er a ongedei el sils, e ngukokl el soiseb er a babeluades; e dirrek el bebil er a osisechakl e ra klechelid er kid a di melutk e ra diosisiu el tekoi.”

Ng belkul a kmo, a Jesus Kristo ma tngakireng er Ngii a risel a klaumera er kid. Ea rokui el tekoi a rechelel.

Tia diak el belkul a kmo a rachel a diak el meklou a belkul. A kerrekar a kirel ngarngii a rechelel. Diua tekingel Osobel el mora rultirakl er Ngii, A rachel a diak dilngii loltobed a rodech, a lak lobengkel a risel. A lak deleuill lobengkel Osobel, ma klisiich el mengai ra rais, ea rachel a mo merat e mad.

Sel dongoeas a klaumera er kid ra Jesus Kristo, ak melbedebek el kmo bebil ra taem ekede locha mecheuid ra rachel ma rais. Tiang a mle cheleuid el Jesus a miltebengar ra re Pharisees er sel taem. Te kmal mle meringel lomtab a mekekerei el tekoi ra llach meng dimlak lomtab ra osischeklel Osobel el kmo “ngarngii a meklou a belkul”—el uchelel osisechakl el uaia “llemalt ma chubechub ma klaumerang.”

A lsoam el mengoeas ra kerrekar, eng diak molchubel a ralm ra rechelel. Ke melubs a risel. Osisiu, alsoam a rechelel a klaumera rkau el modubech e mo mesisiich, e mongoeas a risel. A lsekum eng rrau a rengum ra kmo ngera el osisechakl a lechub a omeruul ra reksi ra Ikelesia, e mosiik a klemerang lultuil er a klaumera er kau ra Jesus Kristo. Mosiik el mo medengelii a tngakireng er Ngii el kirem, beltikelreng er Ngii el kirem, ma sel Ngii a soal kirem. Moltirakl er Ngii loba ngariou el reng. A rechelel a klaumera kau a mo meisiich sel bol dolech a klaumera er kau ra Chedam ra Babeluades me a Ngelekel.

Okesiu, alsoam a mesisiich el klaumera ra Babier ra Mormon, e multuil ra sioning er a Jesus Kristo. Momtab ra Babier ra Mormon louchais el Kirel, aikel lolisechakl Kirel, e siotai e omekrael er kau el mei er Ngii.

A mosiik a lmuut el ungil omeruul ra ikel miting ra Ikelesia a lechub a templo, e molasm losiik ra Osobel ra ikel chedaol ruoll el dengai ra chelsel. Mosiik er a Rubak er a chelsel chedaol Blil.

Alsekum e ke mla mesaul e oberedang ra ngerchelem ra Ikelesia, e molasm el ngmai omesiungem el bedul a Jesus Kristo. Mrelii el mo olchotel a beltkil a rengum el mo er Ngii.

Mongoeas a rais, e a rachel a duubech. E cherengel a taem, eng mo ourodech.

A mesisiich el klaumerang ra Jesus Kristo a diak dil kiul duubech. Ng diak, tial beluulechad, a mui ra ringel ma cheliseksikd ra rraureng el morngii. A mesisiich, e bekerredel klaumerang a kirel blak a rengud er ngii. Ea klou el telengtengil a blakelreng a kired el mesisiich el medalm ra Kristo.

Okesiu: A kot, nglocha soad a ebangkelio ra Osobel ma Ikelesia leng mechas a rengud ra ungil blekerdelir a rechedal a ikelesia a lechub a ungil bisop a lechub a ungil ues ra ikelesia. Aika meklou a belkul kirel okerulel a Ikelesia.

Ngdi, alsekum a risel a klaumera er kid a diak el dolech, e ngera duubech alsekum e kede melukl el kuk mora tara ward el diak el sal uangera ikelsia rngii, ma rechad a diak el sal bekokouii, ea bisop a dmu ngerang el chetim el tekoi?

A kuk tara okesiu: Ng diak el bai ungil a di doltirakl a llach e bla de moak ra templo, e kede ngeltengat ra klou, e ungil telungalek, ma remellomes e olngesenges a tekoi el ngalek, e rokui el mesisiich ra Ikelesia, mla ngara mision, teloi ra rechedal a chelitakl, e olngeseu el mengedmokl ra ikelesia sel bek el tutau ra Sabadong?

Ng meral urungulek el kmo kid rokui bo el sebeched el mesang tiang er a chelesel a klengar er kid. Ea kuk lak el duubech? Kede locha melemolem el bereked ra Osobel el diak el iior ra teletael dengara chelsel —loumera er Ngii ma Temel?

Kired loker kid: A klaumera er ngak ngultuil ra ikel soak a ldubech ra klengar ngak? A lechub ngultuil ra omerellir ma blekerdellir a rebebil ra rechad? A lechub eng delalm ra Jesus Kristo, “el teleketek er ngii,” el diak el iior ra ngeldechel a teletael ra klengar?

A Babier ra Mormon ouchais el kirir a rechad el “mle mesisiich loltirakl a chedaol ruoll ra Dios” Ea mengesuseu el chad el Korihor a dilum, loltuub ra ebangkelio er a Osobel, el kmo “klebelung“ e “diak a belkul uldelid el teletael ra recheuodel.” A Korihor a “mlengesuseu ra rebetok, e rirelterir el mo mekedidai a rengrir el meruul a mekngit.” Engdi a rebebil a dimlak lemecheblad, le tir el mle medengei, el kmo a ebangkelio ra Jesus Kristo a lmuut el ngaruchei ra uldelid el teletael er a recheuodel.

A klaumerang a mesisiich sel dolech a risel ra ikel duubech el me er kid, blakelreng er kid loltirakl ra Jesus Kristo, lileakl ra uldelid el teletael a lechub aikel lolekoi ma loruul a rebebil.

A klaumerang er kid a bo lolasem er ngii. A klaumerang a diak el klaumerang alsekum eng diak lolasem er ngii. A klaumerang a diak el mesisiich alsekum ng diak omtok er ngii. Me lak bol mesaul a rengum alsekum ngarngii a melasm er a klaumerang er kau malechub ngarngii a kerim.

Ng diak el kired el omdasu el di medengei a rokui a uchei er a doruul a tekoi. Tia diak el klaumerang. A Alma ulisechakl, “A klaumerang a diak el belkul a kmo ke medengei a rokui el tekoi“ A dongiill momeruul ruriul ra dengai a rokui el nger, ekede tomer a klungiaol el sebeched el remuul, e tomer a klisichel a klaumera er kid.

A klaumerang a klebokel leng melemolm molmuut aikel taem el klengeltengat a mei el dimlak ikel muluureng. Ng diak desa ngarmedad, diak dodengei rokui el nger, ngdi sebeched loumera ra Jesus Kristo sel dolemolem el merael bedul uchei le Ngii a Osobeled e Olsobel er kid.

A klaumera otekangel a ringel ma diak dodengei el tekoi el duubech le ngii el mesisiich el delalm ra Kristo ma Osischeklel. Jesus Kristo, me a Demad er a Babeluades el Uldureklii, a dmak el diak el mengodech, el cherrungel el klaumerang er kid.

A klaumerang a diak dil tang el momkeroul er ngii, el mesisiich el mo cherechar. Ng di ua kerekar kirem el blechoel mengoeas er ngii. Sel melalm er a tekingel a Rubak er a chelsel a rengum a kot. Sel le bo er ngii a kalumerang er kau, ea meral ureor a omuchel! Seikid e kau a “mengoeas er ngii loba ulekerreu, meng morngii a risel, e duubech e mo ourodech.“ Ng oba “klou el blak el reng“ me a “kllouelreng er a tekingel.“ Ngdi yaksok ra Rubak a mo tmaut: Komo ngmai a ngkedel a klaumera er kemiu, blakelreng er kemiu, kllouelreng, me a telkangel, el mengiil a rdechel a ureriu.

Rodam ma rodos er ngak, resechelik, ngarngii a telkib er ngak loureng er a chuodel ikelesia ra Zwickau ma ikel dechudech el mado er ngii. Ngdi ikal mereko el okeuid ma eim el rak, ea Jesus Kristo mla omekrael ra omerollek ra klengar el ngii a lmuut el kmal mechas a renguk el kirel. Ng mla chemolodak ra ringel, ngosukak el mo medengei a chelitechetuk, omekungil ra renguk, e melisiich ra klaumera er ngak.

Nglunguchek e oureng ma kid bo deblechoel mengoeas a klaumera er kid ra Osobel, ma Osischeklel, ma Ikelesia er Ngii. A ikang a kuuchais loba chedaol ngklel a Osobeled, e mo Olsobel er kid, el Mastang er kid—el ngara ngklel a Jesus Kristo, amen.