Sils el Diak ke Bo Dobes

Rodam ma rodos er ngak, a reksi er a Ikelesia er a Jesus Kristo er tial uriul klebesei a mui er a chedaol tekoi lolecholt el kmo ng mekera Rubak a longitikaik er a Ikelesia er Ngii. Eng di, nga er ngii er a chelsel a teruich el rak er a reksi er kid a mle tara taem, el kmal mle chemolt el ungil er a ikel bebil er a rak—tia sel teruich el rak er a 1820 el mo ra 1830. Ngulemulech er sel teletael el Profet Joseph Smith a mlo chemau er ngii er a Sacred Grove sera spring er a 1820, el ngii a milsang a Dios el Chedam me a Ngelekel, el Jesus Kristo, el melemolem el molmuut er a April 6, 1830, el ngii el teruich el rak a kmal diak a mo uai ngii.

Momtab aika el kmal mle meang el teletael dilubech! Ngkal kekerei el chad el profet a milngedecheduch er a anghel Moroni, uleiuid a ikel kolt el babier, e ultebeddii a llecheklel a Babier er a Mormon! Ngii a mle dongu me sel Aaronic me a Melchizedek Priesthood a mlo luut, e ngii a mlo toketekii a Ikelesia! Oliver Cowdery a kmal mle ungil smodii el kirel tial taem: “A ika ikel sils el diak ke bo dobes.” Mengasireng el teletael a melemolem el me er chelechal taem.

Msall e di bok bleketakl el kmo chelechal rak e kede mla omuchel el melisiich er a berekel a ikelesia el muut el ngaruchei er a ika el mereko el rak.

Msall ek sodii. Delongelel er chelechal 2024, me a 2034, e kede mo remuul a teletael el ngii a mo uchul a techall el mo mesiou, e mo dmak lobengterir a rechedal a ikelesia me a resechelei, e mo ochotii a Ikelesia er a Jesus Kristo er a Uriul-klebesei el Santo el mo er a lmuut el betok el rechad.

Kede direke mle sioning er sel sils el diak ke bo dobes er ngii sera doldeu a rengud lobengterir a re teruich el milion el kirel a dart el rak el tansiobi ra President Russell M. Nelson el mlo dart a rekil.

Sel louchais er a tansiobi er a President Nelson, ea Newsweeka lilechesii a dai el donguiu er ngii el kmo, “Kot el Chuodel el Merredel er a Klechelid er a Beluulechad a mo Dart a rekil.” Mete ouchais er tirkel teruich el kot el chuodel el merredel er a klechelid—er a beluulechad —el President Nelson a mle kot a ngklel el llechukel luldimukl er a Pope Francis me a Dali Lama.

Tial llechukl el mlara New York Times a olechotel a teletael er a ikrel a Merikel: “Ngara [Merikel] e sel temel a senkyo el kirel a President el rechad a meringel lomdasu el kirel a cheleuodel me a omerredel. A Nelson a bai olechotel a kmo, ngbai chelsel a ikelesia er ngii, ea rekil el ua le ngarngii chelisois el ledei tansiobi a bai diak el simbai el kirel. Ng bai melemolem el merael a chisel chad er a delongelir a rechedal a ikelesia, el osengir el kirel ngkal president er tir a diak el dil kirel a omerredel e bai profet, chad er a ues, me a chad ra ocholt.’”

Kede mereng a saul eleng bai tial tansiobi er a President Nelson a milskid a techall el mo ochotii el mo er a beluulechad a profet er a Dios, el lungil klebesei el diak dobes er ngii.

Ser a uchelel a spring, a mla lmuut el mekedmokl el basio el ngara Temple Square—el olecholt a banderang er a bek bedengel a beluu el Ikelesia a ngarngii—a lulechotii. A siseball er tial basio a ngarngii a bad el blotk er ngii a ikakid el tekoi er a ulaoch: “A ngar medad el sils e sel rois el le dechor er ngii a blil a Rubak a kot el mo metongakl er a rokui el rois; ng betok el beluu a mei el lomaoch el mo er ngii.”

E meral, sel klou a belkul teletael el mo er ngii ra chelsel a ikel mei el teruich el rak a ngarngii a tal olechotel tial ulochel a Isaia el toutang.

Ka momdasu aikel betok el open house er a templo ma oterkeklel locha mo er ngii er a chelsel a ikel mei el teruich el rak, el locherangel el 164 el tempo e di merael mo betok. Ka momdasu el teruich el milion el kemiu me a resechelimiu el merael er a chelsel a blil a Rubak. Sel olengchelel aika el teletael a lmuut el mo olterekokl er a Salt Lake Temple me a lmuut el bebil er a telengetengil. A ika meral ikel sils el diak bodobes.

Sel rak ra 2030 a mo mesterir a techall a beluulechad el chedolii sel mong meng erul dart el rak er a le meteketek a Ikelesia. Me tia dirk uchelel meng diak dodengei el kmo a Ikelesia ngera bo loruul el kirel tial bakes, ngdi bleketakl el kid a mo siotai ra telungalek, resechelid, rechad el dodengelterir, me a tokubets el okiak el “mei e mesang,” me bo lungil medengelii sel klisiich el blal rellii er a chelsel a klengar er a rechedal a Ikelesia.

Sel 2034, betok er a retelael el ngarbab el chad, re oldingel, me a rechad er a klekoul el meliuekl er a beluulechad a mo osekedii a ikal rael er a Salt Lake City, el ngii a basio el kirel a Winter Olympic Games. Ng locha diak a ngodech lungil lolechotel a kltalreng ra beluulechad el uai sel ngarngii a klekool er a Olympic. A osengel a beluulechad a mo bedul a Ikelesia me a rechedal, otebedel a betok el techall el mo olngeseu, mesiou, e ouchais a ungil chais lokiu a ungil omeruul—me a teletael el diak dobes.

A ikal merael mei el tekoi el mo dubech a mo mesterir a rechedal a Ikelsia a betok el techall el mo ouchais a ungil chais er a ebangkelio er a Jesus Kristo lokiu a tekoi ma omeruul, el teruich el rak el diak bo dobes.

Ngara miting el di sesei el sandei ruchei er a sils ra cherellel, ea President Nelson a ulechais el kmo ngera uchul meng kmal soal sel tekoi el “ungil chais.” Ng bleketakl, ng millekoi, tial tekoi a uchul a deurreng me a ungil reng. Engdi a “ungil chais” a ngarngii a lmuut el bebil er a belkul. Ng ouchais el kmo tial tekoi a mlengai er a tekoi er a Greek el euangelion, el meral belkul a “ungil chais” a lechub eng “ebangkeklio.” Ungil reng me a deurreng er tial klengar ma sel merael mei el klengar a blechoel el ulech er a ebangkelio er a Jesus Kristo. Ma le uaisei e tial tekoi el “ungil chais” a ngarngii a teblong lungil belkul.

“Resechal [me a redil] a ngarngii, meng mo sebechel morngii a deurreng er a rengrir.” A Chedam er a Babeluades a mla chotii a klou el uldasu er a deu el reng me luchul el bo rengii a deurreng lokiu a klengeltengat er Ngii. A ikang a uldimukl er ngii a kiei er a Rengedel el mo er a diak a ulebengelel klengar el telungalek. A Tngakireng er a Jesus Kristo a chedul a sel uldesuel a Dios el mo olsobel er kid. A mo nguu sel diak a ulebengelel klengar, eng kired el mo ra Kristo. Me sel doruul “e olngeseu er a rebebil meruul a osisiu, e kid a meruul a urerel a Dios er a mo suobel me a diak a ulebengelel klengar.”

Tial klemechel a ungil chais er a ebangkelio er a Jesus Kristo a kot el klou a ultutelel el klumech el ngara beluulechad. E tiakid sel rengeasek me a mekekerei el chad er a Ikelesia a mei.

Chelechang, a ikel merael mei el teruich el rak a mui er a sils el diak dobes el mo er a rebek el chedal a Ikelesia, e tiang a dirrek el klemerang el mo er kemiu el merael mei el telecheroll. Kemiu a ngar tial beluulechad er chelechang e le ko milengilt el mei er a chelechang. Ngarngii a klisichiu me a duch er kemiu el mo oltirakl er a Kristo el ngara teletael dirrekak el meruul.

A President George Q. Cannon a ulisechakl: “A Dios a ulematek er a rengelekel el kirel tial uriul klebebesei el ngarngii a dechal a rengrir me a blakerreng er tir el mo chemau ra beluulechad, me a ikel rokui el klisichel ngkel mekngit, [e mo] … toketekii a Zion er a Dios er kid el diak el medakt er a ngii di el mo duubech.”

E leng uchul tiang, eng soak el mo mengedecheduch er kemiu el merael mei el telecheroll, e mo olengit er kemiu me momdasu el kmo ng meral mo ungil a ikal merael mei el teruich el rak, el diak bo mobes, a sebechel mo er kemiu. Ng dirrek el soak el mo dmung a bebil er a tekoi el mo mellach e omekduch a rengmiu mebo lolisiich er kemiu er a ikal merael mei el teruich el rak.

Ng di ua betok er kemiu, ngarngii a dengua er ngak, a le bebil el diak oldubech er ngak, e ak ngmai a siaisng lolechotel a ikel kuruul er sel sils. Ng meral blechoel mo mechas a renguk sel kumes a ikel tekoi el mla mengodech el kirek ma telungalek er ngak er a di chelsel a sesei el rak.

Ka di momdasu a ikel siasing el dengua er kemiu a mo olecholt er a cheslel a teruich el rak ruriul er chelechal taem! Kom locha mesekemiu sera omtobed er a high skuul ma lechub a daingak, mo nguu a endowment er kemiu, mora mision, mo bechiil, e mo ngarngii a kot el ngelekiu. Mora kuk di kemiu, e tiang sel teruich el rak el diak mobes er ngii. Eng di sebechel dochelir a lsekum e kemiu a blak a rengmiu el mo llomes er a beluulechad el mekera ea ungil chais er a ebangkelio er a Jesus Kristo a olngeseu e mukeroul el diak dil klengar er kemiu ng bai dirrek tirkel telungalek er kemiu, me a resechelimiu, ma roltirakl er kemiu er a social media.

Kom locha omtab el kmo ng mekerang omoruul er tiang.

A re profet er a Dios a mla osisecheklid el kmo tiang a meruul lokiu a eua el beot el omeruul, lomekedong er ngii el chedaol el mla metutk el ngerachel: kot, oltirakl er a ebangkelio er a Jesus Kristo; ongerung, omekerreu er a rengesool; ongedei, siotai er a rokui el mo nguu a ebangkelio; ea ongeuang, oldak er a re telungalek el mo cherechar. Meral ungil, a ikang a sebechel mekedmokl sel di beot e mera el teletael.

Ak yaksok er kemiu el kmo tiang sel teruich el rak el diak bo dobes er ngii el kiriu a lsekum kemiu a oltirakl a ikang el klounag el chedaol mla metutk el ngerachel. Msall e domtab el kmo tia ngera belkul.

Kot, oltirakl er a ebangkelio er a Jesus Kristo. Mosuub a tekingir a re profet, e mosuub el mo oubeltikerreng el mora Demam er a Babeluades. A rengmiu le bo er Ngii, e molasem el merael er a Rolel. Bom mekider lokiu a “menglou a reng el telbiil” el Elder Ulisses Soares a silodii. Tial klou el reng a morngii sel moruul a telbiil el mo oltirakl er a Jesus Kristo, el medengei el kmo a Osobel a mo melisiich e olngeseu er kemiu.

A resechelimiu bol ues a deurreng el molab sel moltirakl er a ebangkelio, e kemiu a bai mo kot el ungil klemechel a ebangkelio el tir a mo nguu.

Ongerung, modars a klechubechub el mo omekerreu er tirkel ngesool. Tial telecheroll er kemiui a kmal ungil melatk er tirkel ngesool. Sel ngarngii a kereior ea rechedal a Ikelesia a mereched el mo olngeseu e mengelaod er tirkel ngara ringel, ea betok er tirkel loubail a ikel chelchedal bail el llechukl a “Helping Hands[chim Lolngeseu]” a rengeasek el me a ra lluich ma derengir a rekrir. Ng teleteliu el mo “oltekau a chelngelel a tang” e “mengelaod ra re ngara klengitelreng.” Mesel doruul er tiang e kede “otutii a llechul a Kristo.”

A Evan, el kekerei el buik er a Primary, a tilbir el mo ousbech er sel taem lolenguul er a skuul sel summer el mo mengudel aikel lousbech el kirel a bata binats me a jelly sandwich e mo melai el mora blil a kall. Ng miltik er tial omeruul el ngarsel JustServe website. Ngkal Evan a ulengit er a rokui el ngalek er a skulel el mo melai a euid el dart el Jelly! Bechititerir a rechad el mosiou er tir me bo lodengei el kmo a kerekikl el kirir a udelalm er a beltkil a rengum el mo er a Dios e soal el lungil el mo ra re kmeed er ngii.

Ongedei, siotai er a rokui el monguu a ebangkelio. Chelechal rak e aki milok a 36 el beches el mision el meliuekl er a beluulechad el kirir tirkel rokui el sorir el mo cherrungel mesiou el misionari. Chelsel tial taem el betok el ngeasek a sorir el tuobed er a tekingel a klechelid, e tiang a kmal ungil leng mochotii a meang el teletelel a klaumera er kemiu. Me ke locha mesiou el cherrungel misionari ma lechub eng diak, e bo modengei a klisichiu a sebechel ngarngii a rellii el mo er a resechelimiu me msiotai er tir el mo mesuub er a ebangkelio ra Jesus Kristo.

Ongeuang, oldak a re telungalek el mo cherechar. Sel kuldingel a templo el meliuekl er a beluulechad, e ak chemat er a rengeasek el meseked er sel blil a techolbechelid me a mekekere el chad mesiou el meruul a chedaol ruoll. Ng direke mlarngii el cheldebechel er a rengeasek el betok er a elolem el dart er a Scotland me a Ireland a mlo er a Preston England Templo, e riruul a betok er a eua el telael el chedaol ruoll, el betok er tir a mle kirir tirkel rebeldekir! A kulengit er kemiu me bo moureor el kirel a reksi er a telungalek, e bora templo, e bo mungil mengedmokl er kemiu el mo ungil sechal ma lechub eng redil el keldmokl el mo bechiil el klikiid el ua kldemel er a chelsel a templo. Mrelii a teletael moltirakl er ngii er a klengar er kau er a chelechang el mo rullii a templo mebol tebechedel a klengar er kemiu.

Betik er a renguk el rodam me a rodos er ngak, me a rengeasek el sechelik, ng mo ngarngii a ringel el merkid er a merael mei el sils. Engdi, sel desiseb er a ikal merael mei el teruich el rak el diak a teletael uai ngii, e bo douchais a ungil chais lokiu a beot el omeruul er a klengar, omekerreu, siotai, me a kltareng. Me sel doruul, a Rubak a mo omekngeltengat er kid lolab a teletael el diak bo mobes.

A kuuchais el kmo tirkel mo er a Rubak loba blakerreng e ngarngii er a rengrir, tirkel louchais el kirel a Osobel e obang a Chedaol Reng, tirkel mo er tial klou el omerael, a mo metik e meruul a betok el klengeltengat er a celestial e mo nguu a sioning el kmo a Dios a rongesemiu, medengelkemiu, e betik a rengul er kemiu. Kemiu a mo chemau a sils el diak bo mobes. Loba ngklel a Jesus Kristo, amen.