Oltirakl er a Kristo

A kot el teletelel a mo oltirakl er a Kristo a mo olengesenges er sel Ngii ouchais el “llach el kot el ngarbab er ngii el rokui”:

“Ng kirel betik a rengum er a Rubak el Dios er kau loba rengum el rokir, me a rokir el klengar kau, me a uldesuem el rokir.

“Tiakid a kot el ngarbab el llach e kot el klou a belkul.

“E a ongeru el klou a belkul a di uai ngii, Bo le betik a rengum er a ngar bita er kau el ua le betik a rengum er kau.

“A cherrengelel a llach me a osisechakl er a re profet a ultuil er a ikal eru el llach.”

A llechul a Dios a meskid a ulekrael me a ultebechel el klisiich er a chelsel a klengar er kid. A teletael el dechau er tial klengar a di uai a kekerei el buik me a demal lolsebek a kedam sel meses a iolt. Tial kedam lorael el morbab, ea iolt a mo mengurs er sel rekodoll el ngara chimal ngkal kekerei el buik. Meng diak lungil medengelii a klisichel a iolt, e ngulengit mel tekur a okul me bol sebechel tial kedam el lmuut el morbab. Ngkal mellomes a rengul demal a milelach el kmo ngdiak, e silodii el kmo tial rekodoll a orreked er tial kedam sel lomtok er a iolt. A lsekum ke de choitii malechub e kede orkedii tial rekodoll e tial kedam a diak el sebechel merael morbab. Me a iolt a mo dokeuii meng suebek el mo el mechoit el meriou er a chutem.

A lechet olechotel a telbiled el lomak er kid el mo er a Dios, el Demad er a Babeluades, me a Ngelekel, el Jesus Kristo. Me sel dongull a ikel telbiil sel doltirakl a Llecherir me a Uldesuir er a mo suobel, ea klengeltengat el Tir a mla yaksok a ngosukid el morbab el mo er a ngarbab el renged.

A Babier er a Mormon a blechoel ouchais el kmo a Kristo “a llomes er a beluulechad.” Sera le bo el dum er a re Nephites, ea mla mokiis el Rubak a uluchais er tial osisechakl sera lolekoi er tir el kmo: “Ak mla chotii er kemiu a okesiu.” “Ngak a llomes el kiriu loldars er ngii—ra ikel bla mesekak el meruul.” Ngii ea okesiu el doltirakl er ngii. Kede mesuub a ikel Ngii a mla melekoi e meruul sel dosuub a chedaol llechukl e oltirakl a osisechakl er a ulaoch, el President Russell M. Nelson a, mla olengit er kid el mo meruul. Ngara chedaol ruoll er a chedaol belsoil, e kede tibir er a bek el Chedaol sils el kmo kede mo “blechoel melatk er ngii e oltirakl a llechul.”

Ngara Babier e ra Mormon—el chedaol llechukl er chelechal taem—ea Rubak a milskid a meklou a belkul osisechakl el Ngii a omekedong el “osisecheklel a Kristo.” A ikang a klaumerang er a Rubak el Jesus Kristo, ouchel el reng, techolbechelid, nguu a sengk er a Chedaol Reng, melemolem el mora ulebongel, e mo ua remekekerei el ngalek,el belkul a mo oumerang er a Rubak e meruul a rokui el Ngii a soal a doruul.

A llechul a Dios a ngarngii a teblong el bedengel, di melemolem el ngarngii el uai a osisecheklel a Kristo, me a di ngarngii el kedeb el taem. Di kedeb a temel el llach a ikel meklou a ultutelel el kirel a ulsbechelel a Ikelesia er a Rubak ma lechub eng klaumerang el ngara omeruul di kedeb a temel, e mo diak a ulsbechelel sel bol merek a omerelel. A olechotel a di kedeb a temel tekoi a ikel ulekrael er a Rubak el mo er a mle kot el omerredelel a Ikelesia el mo mellukl er a Santo ra New York el mora Ohio, e mora Missouri, e mora Ilinois, ea ulebongel a tirkel rucheled a milrael el mo er delongelel a rois er a Diluches. Meng locha di mle kedeb el taem, engdi aikal omellach a mildung me bo lolngesenges.

A bebil er a ikel melemolem el di ngarngii el llach a ousbech ra klou el taem el lomes el kirel. El uai tiakid el okesiu, sel osisecheklel a President Lorenzo Snow el kirel a llach er a ongeltacher a melisiich er sel llach el mildung ruchei engdi a rechedal a Ikelesia a dirrekak bo loruul er ngii. Ng kirel lmuut el mo ungil bleketakl a omsodel e modars el mora medal a Ikelesia me a rechedal. A okesiu er a lmuut el bleketakl lomesodel a dimla usbechall el teletael er a klengar er a Ruriul-klebesei el Santo er a Ikelesia a uchul. Tia uldimukl er ngii a chais el kirel a telungalek, el mlotobed lokiu a President Gordon B. Hinckley ruchei, ea President Russell M. Nelson’ a direke ultebedii a tekoi me a Ikelesia bo lokedongall er sel meral ngklel el, Ikelesia er a Jesus Kristo er a Uriul-klebesei el Santo.

A dirrek el bebil ra osisecheklel a Osobel a ousbech el lmuut elmo bleketakl a omsodel el kirel a ikel omeruul er chelechal taem.

Tia sel taem el betok el meringel ma mekngit el tekoi a medung er a buai ma chelsel a telungalek er kid sel bebil er a taem. Kakerous el uldasu el kirel a tekoi el buai a blechoel mekdubech a mekngit el teletael—me a ouketui—er a buai ma lechub a chelsel a deliongel. Tial mekngit el teletael a rulii meng mo meringel er a rechad el meruul a llach el lolib el kirel a meklou a ututelel tekoi el betok el rechad a mesang e lorechudel a usbechelel ra bebil e ra blekeradel ra tekoi el buai.

Te mekerang a roltirakl er a osisecheklel a Kristo a lolsisechakl ra uai tial taem e le ngarngii a mekngit el omelekoi? Ngera mle ikel Osisecheklel me a okesiul?

Ng klou a belkul sel kot el osisechakl el Jesus ulsisechakl er ngii sera bol dum el mo er tirkel Nephites el mlo mengeroid a klautok. Ma lolsisechakl e ra re ngar tial mondai el kirel a osisecheklel a klechelid, ma uchul a ikel Ngii a lulekoi a sebechel lousbech el kirel a le chadecheduch me a deleuill er a tekoi ra balatiks, tekoi el buai, me a deleuill er a telungalek. A Jesus a ulsisechakl:

“Ngikel loba reng er a klautok a diak el ngar ngak, e bai ngara diablong, el demal a klautok, e ngii a olsiu a rengrir el kirel a tang me a tang me te mo kautok.

“Tiang a diak losisecheklek el mo olengasech a rengrir a rechad el kirel a tang me a tang; ngbai tiakid a osisecheklek el kmo, ou uai ka el tekoi a kirel mo diak.”

A ikel uriul klebesei er Ngii er a losisechakl el mo ra re Nephite, ea Jesus a ulsisechakl a bebil er a llach el telengtengil a Teletelel a dorrob a klautok. Ngara Biblia el kmo Ngii a mla olisechakl ra re derta er a ikal llach er a le ngara Rois, e ulusbech a osisiu el tekoi sera longedecheduch er a re Nephite. Ak mo melekoi a osisiu el tekoi el ngara Biblia.

“Bo le betik a rengum er a re cherrouem, e momekngeltengat er tirkel melemall er kau, e moruul a ungil mo er tirkel diak el sorir kau, e moluluuch el kirir a diak lungil ousbechelir el mo er kau, me a lomekringel er kau.”

Tiang sel tara kot el llechul a Kristo el lodengelii—el kmal ngodech e kmal meringel a otireklel. Eng di ng kmal klou a ultutelel telengtengil a siotai er Ngii elmo ra rokui el mo oltirakl er Ngii. A President David O. McKay a ulsisechakl el kmo, “Ng diak a ungil lolechotel a beltikerreng el mora Dios ra bai lolechotel a beltikerreng el mora rebebil er a rechad.”

Tiakid a tara klou a belkul Osisecheklel el lokesiul: “Te ngeltengat a re meruul a budech: le te mo okedongall el ngelekel a Dios.”

Rechad er a budech! Ng kmal ngarngii a rellii er a deleuill a lsekum tirkel loltirakl er a Kristo a chemoit a mekngit e omekringel el tekoi er a chelsel a omelkinged.

Sera klou el ongdibel er tial mlomerek el rak, ea President Russell M. Nelson a milskid a ikakid el tekoi:

“A tara kot el beot el rolel e kede mesekid el meral loltirakl er a Jesus Kristo a sel chubechub er a chad el kirir a rebebil….

“… A re meral loltirakl er a Jesus Kristo a chad er a budech.

“… A tara kot el ungil rolel e kede mengull er a Osobel a sel bo dechad er a budech.“

Ng mecha merek osisecheklel: “A ultok a dolilt el kirel. A budech a dolilt el kirel. Kau a ngarngii a lemeltem el melilt el lomtok malechub e ko mekbudech. Ak mengelechel er kemiu el me melilt el mo chad er a budech, er chelechang el mong.”

A re ngara ultok a sebechir el kot el omuchel a tekingir losiik a osisiu el tekoi el tir a kongei el kirel.

Ma leuaisei, e sel dotireklii ngkel Lungil Doltirakl e Lokesiu me a profet er Ngii, eng kired el meruul er sel Ngarbab el Llach: “Moruul el mor a rechad a ikel somiu a loruul el lekor kemiu, tiakid a loeak ngii a llach ma re profet.” Ng kired el mo oubeltikerreng e meruul a ungil mora rokui. Ng kired el mengeroid er kid ra klautok e mo chad er a budech er a chelsel a rokui el cheldechedechad. Tiang a diak el belkul a kmo ke mo mengeuid a osisechekled me a ikel meklou a belkul tekoi ng bai mo diak mou mekngit el mora rebebil. Tiakid sel luruul er ngii ngkel Lungil Doltirakl er Ngii Lokesiu er sera le temel mesiou. Tiakid sel okesiu el Ngii a ulechotii el me er kid e lolengit er kid el mo oltirakl er Ngii.

Sel klou el ongdibel er a eua rak er a mla memong, ea President Neslon a mileskid a ulaoch el kirel tial temed.

“Ekauke semeriar el mecherei a Dios el mo mesisiich er a chelsel a klengar kau? Ngarngii ra rengum el nguu a Dios el mo kot el klou a ultutelel er a klengar kau? Ke mechei a Tekingel, Llechul, me a Telbilel meng mo omekrael er kau er a bek el sils? Ke kongei a Lolekoi meng mo klou a ultutelel er a rokui el tekoi?”

Me sel doltirakl er a Kristo, e dolsisechakl e douchais el kirel a Jesus Kristo, el Lungil Doltirakl er Ngii Lokesiu. Bo doltirakl er ngii el choroid a klautok. E sel doruul a ikel llach er a tekoi buai el soad, e bai bol sebeched el nguu a klengeltengat er Ngii sel dousbech a tekoi ma omerellel a chad er a budech. Ngara chelsel a telungalek er kid me a bebil er a deleuill e dongeroid er kid e ra ikel mekngit ma omelemall el tekoi. Bo dolasem el mo chedaol, el uai a Osobeled, el ngklel a chedaol el kuuchais er ngii e meskemiu a klengeltengat er Ngii mel ngosukid el mo Santo. Loba ngklel a Jesus Kristo, amen.