Di Chelsel a Diak el Betok el Rak
Alsekum eng diak el blak a rengud e dolengesenges, eng sebeched el mult a ngara Dios-el klengeltengat er a ungil besul el mo kldidai el reng er a delbeakl el tucheklid e osengkid.
Betik er a renguk el rodam me a rodos er ngak, sel kdengchokl er ngar tial medal, eng mla mo edei el taem el kisang tial Conference Center el mui, er sel kot taem er a uriul er a lomuchel a COVID. Kemiu a meral ngarngii a rengmiu loltirakl er a Jesus Kristo e semeriar el mo mesuub. Ak chemat er kemiu er a mui el klaumerang er kemiu. E ngak betik a renguk er kau.
A Ezra Taft Benson a mle mesiou el President er a Ikelesia er a Jesus Kristo er a Uriul-klebesei el Santo er sera November 1985 el mo er a May 1994. Ak mle 33 a rekik sera President Benson a bol President er a Ikelesia e mle 42 er sera le mad. A osisecheklel me a klaumerang er ngii a uldbechak er a dmolech e mesisiich el teletael.
A tara chetengakl lurerel a President Benson er a osisecheklel a osengel delalem er a moktek me a sel klou el ultutelel a Babier er a Mormon. Ng betok el taem lomelekl el kmo “a Babier er a Mormon a ngii a uchetemel a klechelid er kemam—uchetemel a klaumerang, uchetemel a osisecheklam, e uchetemel a sioning er a Rubak el Osobelam.” Ng dirrek el mle melisiich osisecheklel me a uleklatk el kirel a klengit me a keldidai el reng el ngii a debetik er a chelesl tial uriul-klebesei el sioning er a Jesus Kristo.
A tara osisecheklel a President Benson a klou a rirellii el mer ngak e melemolem el odbechel a omesubek er a Babier er a Mormon. Ng millekoi:
“A Babier er a Mormon … a melluches el kirel chelechal dengar ngii el klebesei. A re Niphite a dimlak el oba tial babier; me a dirrek a re Lamanite er a ngara mong el taem. Tiang a mle kirel el mei er kid. A Mormon a milluches er a mochu ulebongel el belurir a re Nephite. Mle ulekrael er a Dios, el ngii a mes a rokui el tekoi er a uchelel, ea [Mormon] a mlo oldekdak a betok el dart el rak el rekord, el millilt a cheldecheduch, tekingir a rechad, me a dilubech el tekoi el ngii a kmal mo ngosukid el rokui.”
President Benson a milemolem el kmo: “A derta er tirkel meklou a ultutelir el milluches er a Babier er a Mormon a mle ouchais el kmo ngii a meluches el mora telecheroll el ngar medad el merael mei. … A lsekum me te milsa sils er kid, e ngmilt aikel tekoi el ngii a kot el meklou a ultutelel el merkid, e tiang diak el seikid a rolel dosuub er a Babier er a Mormon? Ng kired el blechoel el oker er kid, ‘Ngera me a Rubak a ulmekrael er a Mormon … meng mlo uldimukl er [tial tekoi] er tial rekord er ngii? Ngeral suobel a sebechek el subii er tia el [omellach] el mo ngosukak el kiei er chelechal taem ma sils?’”
A tekingel a President Benson a ngosukid el mo ungil medengelii el kmo a Babier er a Mormon a diak el dil rekord er a reksi el omes er a mla memong. Ng bai, tial buk er a chedael llechukl a omes el mo er medad e ngarngii a meklou a belkul el llach, uleklatk, me a suobel el ngii a moktek a mora ikel ngarngii el teletael me a chetituokel er chelechal sils el de ngarngii. Uaisei, a Babier er a Mormon a hong el kirel a ngarmedad el klebesei er kid me a chelechal taem el de kiei ma ike el merael mei el bode kiei er a chelsel el sils.
Ak meluluuch el olengit er a Chedaol Reng meng molngeseu sel bo domes a suobel el ngii a chemolt el kired er chelechal sils el ngara hong er a Helaman er a Babier er a Mormon.
A re Nephite me a re Lamanite
A rekord er a Helaman me a rengelekel sechal a mesaod er a rechad el tir a mle mad el tmuil el mengiil er a cherellel a Jesus Kristo. Sel tedobech er a dart el rak a mesaod er tial rekord el ngara chelsel a chedaol llechukl sel beltir me a re melemalt e kedung el rua Lamanite me a delngerngerir, bosech ra chedaol tekoi, me a delbeklir a re Nephite.
Betok el bedengel a klaisisiu me a klekakerous er a delongelir a re Nephite me a re Lamanite el ngartial chuodel rekord el ngii a kmal osisechekiil el merkid er chelechal sils.
A re Lamanite a mla mo, mekedung a rebetok er tir, te melemalt el chad, me a kldung er tir a mla mo rebab er a re Nephite, e leng sel klisichir me a diak el mesim el klaumera er tir.
[E] te betok el Nephites a mla mo medecherecher a rengrir, meringel mouchel e ngara mekikiongel klengit, el uaisei me te mlo oldngakl a tekingel a Dios me a rokui el osisechkal ma odingel el mlo er tir.
Me kede mesa el kmo a re Nephite a mo a muchel el merael mo diak loumerang, e merael mo mui er a delngerenger me a delbeakl, e a kuk re Lamanite a milrael el mo ulis el klou a klemedengei er tir er a Dios; oi, te mo a muchel el oltirakl a tekingel me a llechul, e merael er a klemerang me a llemalt er a medal a Dios.
Me ke de mesa el kmo a Reng er a Rubak a milrael el mo diak el ngara re Nephite, e le a delngerngerir me a keldidai el reng.
Me kede mesa el kmo a Rubak a ulemuchel el mengubel er a Reng er ngii el mo ra re Lamanite, e le tir el mle beot e sorir el mo oumerang a tekingel.
Sel locha kot el mechas e mekngit a rengud er ngii er a rebetir el soiseb er a bosech er a reng a re Nephite a tiakid el tekoi el kmo a kngterir a mlorngii er a di chelsel a diak el betok el rak
A re Nephite a mlo Ikrii a Dios
Ng mekera ea re mle tal mekedung el chad bochal medecherecher a rengrir e medengerenger er a di chelsel a kedeb el taem? Ng mekera sebechir a rechad el di merechel el obes er a Dios el ngii mla mesterir a betok el klengeltengat?
Ng mesisiich e dmolech el teletael, tial mekngit el okesiu er a re Nephi el ngii a suobel el merkid er chelechal sils.
Keldidai el reng … omechelal soiseb … er a rengrir a rechad el tir a leko te chedal a ikelesia er a Dios … e le uchul tir el kmal mla mo merau e ungil beserir er a beluu.
[Te] mla ngmai a [rengrir] el bedul a udoud me a diak a belkul tekingel a beluulechad el le a keldidiul a [rengrir] … a le bilechei meng soiseb er a [chelsel a rengrir], el ngii … a mla [kmider] el morbab limiit er sel ngii a ungil eleng [tir] el kmal mla mo imis el merau!
A ngerir a rechuodel el delkull ra chutem a olengit er kid er chelechal sils el mo subii tial diak a ulebengelel suobel: ungil besul, klalou, me a betengel a sel bol modak eng sebechel mekrolii a chad ngii mesel kedung el mo ngilmii sel dok er a reng el ngii a keldidai el reng.
A mechei a keldidai el reng meng soiseb er a chelsel a rengud a sebechel rullid el mo oltuub aikel ngii a chedaol; e diak loumerang er a reng er a ulaoch me a ocholt; merderd lolab ochid a llechul a Dios; oldngakl a tekingel a Dios;mengoit, oltuub; e omtok er a re profet; e obes er a Dios er kid e “diak el soad a Dios er [kid], el ngii a ulemeob er [kid], el mo oungerachel e mengedereder er [kid].”
Ma le uaisei, alsekum eng diak el blak a rengud e dolengesenges, eng sebeched el mult a ngara Dios-el klengeltengat er a ungil besul el mo keldidai el reng er a delbeakl el tucheklid e osengkid el choroid a ikel diak a ulebengelel klemerang me a meklou a ultutelel el chedaol tekoi el ngii a kot el ngaruchei. Ng kired el kerekikl el kirel a odbechel-a keldidai el reng me a belkuuk el rengud el llekong klou a ultuteled, cheleuid el osenged er kid-el sebeched el di kid, e osiik er a mo kired e diak dosiou er a rebebil.
Sel dil kid el kedidai a rengud el di chemau kid, e kid a dirrek el mo metemall el mo meuiku er a chedaol klengar e metom a betok, el kmeed el rokui, malechub a rokui el ngii a dubech er a bita er kid ma lechub eng iliuekl er kid. Ng diak el sebeched el ngmai a moktek er kid el bedul a Jesus Kristo el ngii a “olangch” alsekum ke er di omes el bedul kid.
Tial mikou el ues er a chedaol klengar a dirrek el sebechel el rullid el mo ikrii a rael er a llemalt, ruebet er a mekull el rael, e mo remiid. Sel lak domes e “dobult el mora kuk di [roled]” e oltirakl a melemall el techukill, e kid a mocha ultuil er a klemedengei er a kuk di kid, ousimang er a klisiched, e ultuir er a llemesed.
A Samuel ngkel Lamanite a ulechais er sel mlo cheroid er a Dios lokiu a re Nephite: “Ko mla choitii a klengar er kemiu losiik er a diak el sebechemiu el nguu; le ko mulsiik a deulreng, el meruul a mekngit, el ngii omtok er a teletelel sel klemerang el ngii a nga er ngikel klou el Diak a ulebengelel Btelud.”
A profet Mormon ulemes, “Me a betok er a rechad a [dirke] nga er a keldidai el reng me a delngerenger, edi mle mekesai er tir a [mirrael] lultebechel er medal a Dios.”
A re Lanamite a Ulebult el mora Dios
Ngara Hong er a Helaman, a re Lamanite el di milrael morbab el melemalt el chad a meskid a klou el klekakerous er a reua Nephite er a rechederir el ngilanget er a chedaol klengar.
A re Lamanite a ulebult el mora Dios me te mlo medengei a klemerang el oumerang osisecheklel a chedaol llechukl me a re profet, kiei el ngara klaumerang er a Rubak el Jesus Kristo, ouchel a kngterir, e nguu a klou el bult er a rengrir.
“Meng uaisei, el betok a mla mei er tial teletael, e ke medengelkau el mesisiich e diako mesim er a klaumerang, el ngii a mla rullau el mo mimokl.”}
“Le ka mosang a re oumesingd [el Lamanite] a ngara rael er a ngerchelir, e mirrael ultebechel er a medal a Dios, e ngara omengull el mora Dios e kerekikl loltirakl a llechul me a tekingel. …
“… Te mle blak a rengrir me bol sebechir el ngoititerir a rebebir er a rodam er tir el mo medengei a klemerang.”
Sel mlo urebetellel, e a re “melemalt [el reua Lamanite] a mlo betok e ra rua Nephite, e leng klisichir me a diak el mesim el rengrir er a klaumerang.”
Uleklatk me a Yaksok
A Moroni a millekoi: “Mesang, a Rubak a mla ocholt el merngak a ungil tekoi el ngii a kirel a merael mei el di kme dung, seikid el sils ea aikal tekoi a me tuobed er a delongeliu.
“Momes, ak mengedecheduch er kau el di uai om ngar medak, e ng di a lechub e ng diak. Engdi momes, a Jesus Kristo a mla ochotau el mer ngak, me ak medengei a omoruul.”
Kulengit e bo modengei el kmo a Babier er a Mormon a omes el bedul medad e olab a meklou a belkul llach, uleklatk, me a suobel el ngii a kirel merngak me a kemiu er a teletael el ngarngii me a metacherbesul er a ikal sils er kid.
A bosech ra reng a duubech lokiu eru el teletael —cheldebechel me a derta el chad. Ngar er a sel terebel el ngarngii a recheldebechel, ea Ikelesia er a Jesus Kristo er a Uriul-klebesei el Santo a diak el bol riid lokiu a bosech ra tekingel a Dios malechub el mengai er a beluulechad.
A Profet Joseph Smith a ulechais: “A Teletelel a Klemerang a mla moteketek; ng diak a diak el chedaol el chim el mo torbengii a berekel tial ureor … ; a klemerang er a Dios a di melemolem el merael el mesiich, e chetengakl, e mimokl, di merekmo bolsiseb er a bek el meklou el beluu, oldingel a bek el cheltel a beluu, merius a bek el basio, e oderngesall el mo er a bek el ding el di merekmo a moktek er a Dios a mo mekedmokl, ea Ngarbab el Jehovah a mo dmu el uasei a ureor a mla mo merek.”
A denguu er a dersta el chad, derta er kid a kired el mo “kerekikl er a keldidai el reng, e le [kede] mo ua rua Nephite er a ngara mo el taem.”
Me kuuchais el kmo alsekum me kau me a ngak a oumerang el kmo kede ungil mesisich e meduch el chemiis a keldidiul a ngarbab el reng, e kede locha chormang er tial lomekoad el rektel a reng. A beot el lomesodel, alsekum me kau me a ngak a diak doumerang el kmo ke de metemall er tial keldidai el reng, e kid a mechitechut e ngara chelsel a kengaol reng. Di chelsel a diak el betok el klebesei, sandei, buil, rak, e ke de locha chemoit a llemelted er a cheroll el chedaol klengar e mtechir er a diak a ultutelel tekoi.
Eng di, a lsekum, kau a lechub e ngak a oumerang el kmo ngsebeched el metemall er a keldidai el reng, e seikid e kid a mo blechoel el meruul aike el mekekerei e beot el tekoi el ngii a mo mesebechakl e ngosukid el merael el di “mo ua ngalek, beot el mengai, medemedemek, ngariou a rengul, oba klouel reng, mui er a beltikelreng, e soad el soiseb er a rokui el tekoi el Rubak a mes el ngii a chatter el ringel er mei er [kid].” “Te ngeltengat tirkei el ditir el meriou a rengrir el diak el morimel el ngmai a rengrir el meriou.”
Me se el doltirakl er a osisecheklel a President Benson el mo oker er kid el kmo ngera uchul me a Rubak a ulemekrael er a Mormon el mo olsiseb er a chelsel a Hong er a Helaman a cheldecheduch, omellach, me a uleklatk el ngii a riruul, e ak yaksok el kmo kede mo meduch lomes a otutel aikal osisechakl el mora bebil er a teletael er a klengaer er a derta er kid me a telungalek er cheledal taem. Me sel bo dosuub e domdasu er tial ulekrael el rekord, e kede mo mukngeltengat er a mad el mo omes, ding el mo orrenges, uldesued el mo ungil bleketakl, me a rengud el mo ungil medengei a osisechakl el kired el subii el kmo “bom klekar er a keldidai el reng, e le [ko mol] soiseb er a ngibesereng.”
Ak ngara deurreng el sioning el kmo a Dios el Diak a Ulebengelel Chedam a Demad. A Jesus Kristo a Di tang e Betik a Rengul Ngelekel Sechal. Ngii a Osebeled. E ak ouchais el kmo sel dorael er a delmedemek el ngara Reng er a Rubak, e kid a mo ochib e mo mesisiich er a keldidai el reng e nguu a budech el mla er Ngii. A kuuchais loba chedaol ngklel a Rubak el Jesus Kristo, amen.