Ua Tim Khawv txog Yexus Khetos Los ntawm Peb tej Lus thiab tej Yam Peb Ua

Thaum peb ua kev cai raus dej peb cog lus tias peb txaus siab ris Yexus Khetos lub npe. Kuv lub hom phiaj hnub no yog kom peb nco qab tias peb muaj peev xwm qhia Vajtswv tias peb ris Nws Leej Tub lub npe thaum peb ua tim khawv los ntawm peb tej lus thiab tej yam peb ua, thiab ntau npaum li peb ua tau, ua tim khawv tias Yexus yog tus Khetos.

Thaum tus Cawm Seej txhawb pab thiab qhia cov neeg nyob hauv Amelikas tom qab Nws Sawv Rov Los, Nws hais tias:

“Puas yog lawv tsis tau nyeem tej vaj lug kub, uas hais tias nej yuav tsum ris Khetos lub npe, uas yog kuv lub npe? Vim thaum txog hnub kawg yuav muab nej hu ua lub npe no;

“Thiab tus uas ris kuv lub npe, thiab nyiaj mus kom txog thaum kawg, tus ntawd yuav txais kev cawm dim thaum txog hnub kawg.”¹

Thawj Tswj Hwm Russell M. Nelson tau qhia peb tias “Qhov uas peb ris tus Cawm Seej lub npe txhais tias peb tshaj tawm thiab ua tim khawv rau lwm tus tias Yexus yog tus Khetos—los ntawm tej yam peb ua thiab hais.”²

Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb tau koob hmoov thiab cib fim kom ua tim khawv txog tus Tswv thiab Nws lub npe nyob txhua qhov chaw uas peb mus.³ Thaum peb siv zog ua peb lub neej kom sib haum nrog Yexus Khetos txoj moo zoo, qhov uas peb coj yam ntxwv li cas yuav ua tim khawv txog peb tus Txhiv Dim thiab Nws lub npe. Tsis tas li ntawd xwb, peb ua tim khawv txog Yexus Khetos thaum peb qhia lwm tus txog tej yam uas peb ntseeg, xav, los yog paub txog Nws.

Thaum peb txo hwj chim ua tim khawv txog tus Tswv los ntawm tej yam peb hais thiab ua, tus Vaj Ntsuj Plig Dawb Huv pom zoo⁴ tej yam ntawd rau cov neeg uas mob siab, qhib siab, thiab txaus siab xav paub tias Yexus yeej yog tus Khetos.⁵

Kuv xav qhia ob zag txog ob tug mej zeej uas tshoov kuv lub siab thiab qhia rau Vajtswv tias nkawd txaus siab ris Yexus Khetos lub npe thaum nkawd hais txog Nws thiab ua tim khawv txog tus Tswv nyob hauv lub Koom Txoos tej kev sib ntsib.

Zaj thib ib: Thaum kuv tus poj niam, Elaine, thiab kuv mus rau Spain nyob rau xyoo 2022, wb tau mus rau Hnub Caiv tej kev sib ntsib nyob hauv ib ceg ntseeg me me ntawm lub Koom Txoos nyob ntawd. Thaum kuv zaum saum sam thiaj thiab kuv tus poj niam nrog pawg neeg nyob ntawd, kuv pom tias nws zaum ze ib tug poj laug. Thaum kev sib ntsib txais lub cim nco txog tas lawm, kuv tau mus rau Elaine thiab thov kom nws qhia tias nws tus phooj ywg tshiab yog leej twg. Nws qhia kuv thiab hais tias tus poj niam no, uas tsis yog ib tug mej zeej hauv lub Koom Txoos, tau tuaj xyuas lub Koom Txoos ntev li ob xyoos lawm. Thaum kuv hnov li ntawd, kuv thov kom tus poj niam uas hwm Vajtswv no seb yog vim li cas nws tuaj rau peb tej kev sib ntsib ntev npaum li no. Tus poj niam muaj lub siab hlub teb hais tias, “Kuv nyiam tuaj no vim nej hais txog Yexus Khetos nyob hauv nej tej kev sib ntsib.”

Cov mej zeej ntawm lub Koom Txoos nyob hauv ceg ntseeg ntawd yeej tau hais txog, qhia, thiab ua tim khawv txog Yexus Khetos nyob hauv lawv tej kev sib ntsib.

Zaj thib ob: Tom qab kuv ua hauj lwm hauv Cheeb Tsam Brazil, kuv txais kev txib mus ua hauj lwm hauv lub Koom Txoos lub hauv paus. Thaum wb tsiv tsev tuaj rau Salt Lake City, nyob rau lub Xya Hli Ntuj xyoo no, wb tau koom Hnub Caiv kev sib ntsib hauv wb pawg ntseeg tshiab. Ib txoj kev sib ntsib yog kev sib ntsib yoo mov thiab hais lus pov thawj. Tom qab sawv daws txais lub cim nco txog, cov mej zeej tau sawv thiab mob siab hais lus tim khawv txog tus Cawm Seej ib tug dhau ib tug. Kev sib ntsib ntawd twb tsom ntsoov rau Yexus Khetos, thiab wb hnov tus Ntsuj Plig muaj hwj chim heev. Wb txoj kev ntseeg muaj zog ntxiv thiab wb txais kev txhawb pab. Yog tias cov phooj ywg ntawm lub Koom Txoos, uas ua siab ncaj nrhiav qhov tseeb, tau tuaj rau kev sib ntsib ntawd, lawv yeej yuav paub tias nov yog Yexus Khetos lub Koom Txoos.

Yeej yog ib txoj koob hmoov uas peb pom tias peb lub Koom Txoos tej kev sib ntsib yog tej lub cib fim zoo rau peb ua tim khawv txog Yexus Khetos thiab qhia rau Vajtswv tias peb zoo siab ris Nws Leej Tub lub npe.

Nim no, cia kuv hais txog ib tug yam ntxwv uas muaj hwj chim heev txog kev ris Yexus Khetos lub npe thaum peb ua tim khawv txog Nws los ntawm tej yam peb ua.

Lub Yim Hli Ntuj tas los, kuv tau nrog Txwj Laug Johnathan S. Schmitt mus rau kev qhib tsev ntawm lub Tuam Tsev Feather River California nyob hauv Yuba City. Nyob ntawd, kuv tau coj tej pawg neeg mus ncig saib lub tuam tsev. Ib pawg neeg ntawd muaj ib tug mej zeej ntawm lub Koom Txoos, Virgil Atkinson, thiab xya tus phooj ywg uas tsis koom peb txoj kev ntseeg. Thaum yuav luag tas lawm, nyob hauv lub tuam tsev chav sib khi, Tij Laug Atkinson los kua muag thaum nws hais tias nws hlub nws cov phooj ywg uas tau nrog nws tuaj rau hauv lub tuam tsev hnub ntawd. Tom qab kiag nws ua li ntawd, ib tug poj niam nyob hauv pawg neeg ntawd sawv thiab hais tias, “Peb txhua tus hlub Virgil heev. Nws yeej tsis tau yuam peb kom ntseeg li nws. Tiam sis nws yeej tsis txaj muag hais txog qhov ntawd. Nws cia li ua raws li nws ntseeg xwb.”

Ntau xyoo lawm Tij Laug Atkinson txoj kev ua neej raws li Yexus Khetos tau ua tim khawv rau nws cov phooj ywg. Nws tus yam ntxwv yog kev puav pheej hais tias nws twb tau ris Yexus Khetos lub npe.

Yog li ntawd, cia kuv hais zaj lus uas kuv tau kawm txog qhov uas yuav ua li cas kom ris Khetos lub npe thiab ua tim khawv txog Nws thaum siv lub Koom Txoos lub npe uas raug lawm.

Thawj Tswj Hwm Nelson, Vajtswv tus yaj saub, nyob hauv ib zaj lus ntawm lub tuam rooj sab laj nyob rau xyoo 2018 hu ua “Lub Koom Txoos lub Npe uas Raug Lawm,” hais tias: “Qhov peb ua no yog kev kho kom raug. Yeej yog tus Tswv txoj lus txib. Joseph Smith tsis tau muab lub npe no rau lub Koom Txoos; Maumoos kuj tsis tau muab lub npe no thiab. Yog tus Cawm Seej uas tau muab lub npe no thaum Nws hais tias, ‘Vim yuav tsum hu kuv lub koom txoos li no nyob hauv hnub nyoog kawg, uas twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg’ [Lus Qhuab Qhia thiab Kev Khi Lus 115:4].”⁶

Thaum lub tuam rooj sab laj ntawd tas lawm peb txhua tus yeej tau cog lus thiab txiav txim siab tias peb yuav coj raws li tus yaj saub hais thiab siv lub Koom Txoos lub npe uas tus Tswv tau muab tshwm sim lawm. Kuv saib xyuas kuv tus kheej kom ua tib zoo siv lub Koom Txoos lub npe uas raug lawm. Thawj ob peb zaug kuv twb ua tib zoo hais lus kom kuv thiaj li tsis rov qab hais zoo li qub. Tom qab ob peb zaug, ua yooj yim rau kuv me ntsis siv lub Koom Txoos lub npe uas tus Tswv tau muab tshwm sim lawm. Kuv lees hais tias ntau zaus, kuv twb hais lub Koom Txoos lub npe nrawm heev. Kuv txhawj tias tib neeg yuav tsis tsom ntsoov rau lub Koom Txoos lub npe thiab lawv yuav xav tias lub npe ntawd ntev dhau.

Tiam sis, tom qab ntawd kuv twb kawm tias qhov uas kuv ua tib zoo hais lub npe ntawm lub Koom Txoos tag nrho yeej ua rau kuv muaj cib fim hais Yexus Khetos lub npe thiab ua tim khawv txog tus Cawm Seej thaum kuv hais Nws lub npe nyob hauv Nws lub Koom Txoos lub npe. Kuv kuj kawm tias thaum kuv hais lub npe ntawm lub Koom Txoos uas raug lawm rau lwm tus, kuv yeej nco ntsoov Yexus Khetos thiab muaj Nws lub hwj huam hauv kuv lub neej.

Yog peb coj raws li tus yaj saub, peb txhua tus kawm tau ntxiv kom ua tim khawv txog Yexus Khetos thaum peb siv lub Koom Txoos lub npe uas raug lawm, yog li ntawd peb thiaj li muaj peev xwm ris tus Tswv lub npe dua.

Hnub Caiv sawv ntxov no, kuv zoo siab ua tim khawv tias Thawj Tswj Hwm Nelson yog Vajtswv tus yaj saub thiab tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Yexus Khetos lub Koom Txoos uas tau muab txum tim rov qab los. Kuv txo hwj chim ua tim khawv txog Vajtswv Leej Tub thiab Nws txoj kev ua li Vajtswv. Nws yog Vajtswv Tib Leeg Tub thiab Thawj tus Tub, peb tus Cawm Seej thiab tus Txhiv Dim, Emanu-ees.⁷ Los ntawm Yexus Khetos lub npe, amees.