Vajtswv Paub thiab Hlub Nej

Lub neej no yeej muaj kev cov nyom tiag. Neeg coob heev poob siab, nyob lawv ib leeg xwb, tsis muaj phooj ywg li, los yog qaug zog. Thaum txhua yam nyuaj, tej zaum peb yuav xav tias peb ua loj leeb los sis poob qab. Thaum ib tug neeg twg paub tias peb sawv daws yog Vajtswv cov me nyuam thiab nyob hauv Nws tsev neeg nyob mus ib txhis li, qhov no yuav ua rau peb muaj lub ntsiab ua neej thiab xav tias peb muaj feem tiag.²

Thawj Tswj Hwm Ballard hais tias: “Yeej muaj ib yam tseem ceeb uas peb muaj ua ke nim no thiab mus ib txhis li. … Hais tias nej yog thiab yeej los ua Vajtswv ib tug tub los sis ib tug ntxhais. … Qhov uas yus paub qhov tseeb no—to taub tiag thiab ntseeg huv tib si—yeej hloov yus lub neej.”³

To taub zoo heev thiab saib rau nqi hais tias nej tseem ceeb rau nej Leej Txiv Saum Ntuj Ceeb Tsheej npaum li cas. Nej tsis yog lam tau lam tsim, tsis yog tub ntsog tub ntsuag ntawm lub ntuj lub teb, los sis ib qho uas muaj los vim yog sij hawm thiab kev pheej hmoov. Qhov twg muaj txheej txheem, ces muaj ib tug uas tsim tus txheej txheem ntawd.

Nej lub neej yeej tseem ceeb thiab muaj ntsiab tiag. Txoj kev txum tim Yexus Khetos txoj moo zoo coj qhov kaj thiab qhov kev nkag siab hais txog saib nej yog leej twg ntawm sab ntsuj plig. Nej yog Leej Txiv Saum Ntuj Ceeb Tsheej ib tug me nyuam uas Nws hlub. Nej yog lub ntsiab ntawm tag nrho tej dab neeg piv txwv thiab tej lus qhuab qhia ntawd. Vajtswv hlub nej ntau npaum li tias Nws xa Nws Leej Tub kom kho, cawm dim, thiab txhiv dim nej.⁴

Yexus Khetos pom tias txhua tus neeg los saum ntuj los thiab muaj nuj nqi nyob mus ib txhis li.⁵ Nws piav saib ob txoj lus txib loj tshaj plaws kom hlub Vajtswv thiab hlub peb tus neeg zej zog yog lub hauv paus ntawm tag nrho Vajtswv cov lus txib.⁶ Peb ib txoj hauj lwm los saum ntuj los yog kom saib xyuas cov neeg txom nyem.⁷ Yeej yog vim li no peb cov uas ua Yexus Khetos cov thwj tim, peb “ib leeg txaus siab ris ib leeg tej nra, … txaus siab nyuaj siab nrog cov uas nyuaj siab … , thiab nplij cov uas xav tau kev nplij siab.”⁸

Kev ntseeg teev tsis yog hais txog peb nrog Vajtswv sib raug zoo li cas; yeej yog hais txog peb txoj kev sib raug zoo ib leeg nrog rau ib leeg. Txwj Laug Jeffrey R. Holland piav hais tias lo lus Askiv hais tias religion los ntawm lo lus Latin religare, uas txhais tau tias kom “khi” los yog, hais ncaj dua, kom “rov qab khi.” Yog li ntawd, “txoj kev ntseeg teev tseeb [yog] txoj kev khi uas khi peb rau Vajtswv thiab ib leeg nrog rau ib leeg.”⁹

Qhov uas peb ua zoo rau lwm tus neeg tseem ceeb heev. Thawj Tswj Hwm Russell M. Nelson qhia hais tias, “Tus Cawm Seej zaj lus yeej meej heev: Nws cov thwj tim tseeb yuav txhawb nqa, yaum, hais lus zoo, thiab tshoov neeg lub siab.”¹⁰ Ua li no haj yam tseem ceeb thaum peb cov neeg xav tias lawv poob zoo, nyob lawv ib leeg xwb, tsis muaj leej twg nco qab txog lawv, los sis raug tshem tawm.

Peb tsis tas nrhiav mus deb kom thiaj nrhiav tau cov neeg uas raug txom nyem. Peb pib pab ib tug hauv peb tsev neeg, pawg ntseeg, los sis koog zej zog. Peb kuj pab daws tau tej kev txom nyem tshaib nqhis ntawm 700 lab tug neeg uas ua neej nyob pluag heev¹¹ los sis pab cov neeg thoj nam 100 lab tug neeg uas khiav tawm ntawm lawv lub teb chaws vim yog kev tsim txom, kev kub ntxhov, los sis kev lwj kev liam.¹² Yexus Khetos yog tus yam ntxwv zoo tag nrho rau txoj kev saib xyuas cov neeg txom nyem—cov tshaib plab, tus neeg txawv, tus neeg mob, tus pluag, tus raug kaw qhov taub. Nws txoj hauj lwm yog peb txoj hauj lwm.

Txwj Laug Gerrit W. Gong qhia tias “peb txoj kev rov qab mus cuag Vajtswv yog ua ke mus.”¹³ Ua li ntawd, peb tej pawg ntseeg yuav tsum yog ib qho chaw tiv thaiv rau tag nrho Vajtswv cov me nyuam. Peb puas lam tau lam koom lub koom txoos los puas tsim tej koog zej zog uas lub ntsiab yog kom teev tiam, nco qab txog tus Khetos, thiab pab lwm tus neeg?¹⁴ Peb mloog tau Thawj Tswj Hwm Nelson cov lus qhuab qhia kom txiav txim tsawg dua, hlub ntau dua, thiab muab Yexus Khetos txoj kev siab hlub dawb huv rau lwm tus neeg dhau ntawm peb cov lus thiab tej yam peb ua.¹⁵

Txoj Kev Theej Txhoj ntawm Yexus Khetos yog qhov uas qhia zoo tshaj plaws tias peb Leej Txiv Saum Ntuj Ceeb Tsheej hlub Nws cov me nyuam.¹⁶ Lo lus atonement hais txog qhov uas tso “ua ib lub siab ua ke” cov uas tau nyob nrug deb los sis cais tawm.

Peb tus Cawm Seej txoj hauj lwm yog npaj ib txoj kev rov qab mus cuag Leej Txiv Saum Ntuj Ceeb Tsheej thiab pab daws peb tej kev txom nyem thaum rov qab mus li ntawd. Qhov ntawm qhov uas muaj los rau Nws, tus Cawm Seej paub yuav tsum ua li cas txhawb nqa peb kom ntxeem mus dhau lub neej no tej kev cov nyom.¹⁷ Tsis txhob yuam kev: Khetos yog tus cawm peb dim thiab tus kho peb tej ntsuj plig.

Thaum peb muab siab rau ntseeg, Nws pab peb nyiaj mus tom ntej kom dhau tej yam nyuaj heev. Nws yeej meem caw peb nrog kev hlub thiab kev siab hlub tshua hais tias:

“Nej cov uas sab sab vim ris nra hnyav, nej cia li los cuag kuv, kuv yuav cia nej so.

“Nej cia li los kwv kuv tus quab thiab kawm tej uas kuv qhia; … nej thiaj yuav tau so.”¹⁸

Qhov piv txwv hais txog tus quab yeej muaj hwj chim. Ib yam li Thawj Tswj Hwm Howard W. Hunter piav hais tias: “Tus quab yog ib rab twj uas cia lub zog ntawm lwm tus txiaj txhu muab khi rau tus tsiaj thib ib, es pab ris lub nra hnyav heev. Ib lub nra uas hnyav heev los yog loj heev rau ib tug ris yuav yog ib lub nra uas ob tug khi ua ke ris taus koom tus quab ntawd.”¹⁹

Thawj Tswj Hwm Nelson qhia hais tias: “Nej los cuag Khetos kom thiaj nrog Nws ris tus quab thiab txais Nws lub hwj chim, kom nej thiaj tsis ris lub neej no lub nra nej ib leeg xwb. Nej nrog tus Cawm Seej thiab tus Txhiv Dim ntawm lub ntiaj teb no ris lub neej no lub nra.”²⁰

Peb yuav ua li cas muab peb tus kheej quab los sis khi nrog rau tus Cawm Seej? Txwj Laug David A. Bednar piav hais tias:

“Qhov uas peb ua thiab ua raws li tej kev khi lus dawb huv ua rau peb kwv tus quab nrog tus Tswv Yexus Khetos. Tiag tiag, tus Cawm Seej caw peb khaub zig Nws thiab nrog Nws ris lub nra mus ua ke. …

“Peb yeej tsis tas nyob peb ib leeg nkaus xwb.”²¹

Rau tus neeg twg uas ris ib lub nra, uas poob zoo, uas ntxhov siab: Nej tsis tas nyob nej ib leeg xwb.²² Dhau ntawm Khetos txoj Kev Theej Txhoj thiab Nws tej kab ke nej yuav nrog Nws kwv tau tus quab thiab muab nej tus kheej khi rau Nws. Khetos yuav muab lub dag zog thiab kev kho siab uas nej xav tau kom mus lawm tom ntej. Nws tseem yog qhov chaw nkaum ntawm tej nag xob nag cua.²³

Rov qab hais txog kuv tus tub, Jasper yeej txawj ntse, txawj hlub, nyiam tso dag ua si, thiab ib nyuag txhoj puab. Tiam sis qhov tseem ceeb yog nws yog kuv li. Nws yog kuv leej tub, thiab kuv hlub nws ntau tshaj nws yuav paub. Yog tias ib leej txiv ntiaj teb uas tsis zoo tag nrho xav txog nws tus me nyuam li no, nej puas xav tias ib Leej Txiv Saum Ntuj Ceeb Tsheej uas zoo tag nrho yuav hlub nej zoo dua ntais?

Rau kuv cov phooj ywg ntawm tiam neeg tuaj no, Gen Z thiab Gen Alpha: Thov to taub zoo hais tias yuav tsum rau rau siab ua hauj lwm kom tau ib lub siab ntseeg.²⁴ Peb ua neej nyob hauv ib lub sij hawm uas rau neeg coob lawv “ntseeg thaum pom tau.” Qee zaum kev ntseeg nyuaj heev thiab yuav tsum xaiv qhov yog. Tiam sis cov kev thov txog Nws, Vajtswv yeej teb li.²⁵ Thiab cov lus teb no yus hnov tau tiag.²⁶ Yeej muaj tej yam hauv lub neej no uas muaj tiag tiam sis pom tsis tau; tej no yus hnov tau hauv nruab siab, paub tau li ntawd, thiab muaj tiag los rau yus. Tej no muaj tiag.

Yexus Khetos xav kom nej paub nej Leej Txiv Saum Ntuj Ceeb Tsheej thiab nrog Nws sib raug zoo.²⁷ Nws qhia hais tias, “Nej leej twg, uas muaj ib tug tub, thiab nws nyob nraud, ces nws hais tias, Txiv, qhib koj lub tsev rau kuv los noj hmo nrog koj, es nej yuav tsis hais tias, Los tsev, kuv tus tub; vim kuv li yog koj li, thiab koj li yog kuv li?”²⁸ Puas yog qhov no qhia tias peb tus Vajtswv Leej Txiv Nyob Mus Ib Txhis yeej hlub peb thiab paub peb?

Nej yog Nws cov me nyuam. Yog tias nej xav tias nej poob zoo, yog tias nej muaj lus noog los sis tsis paub thoob, yog tias nej muaj kev txom nyem vim yog qhov chaw puag ncig los sis vim yog kev ntxhov siab ntawm sab ntsuj plig, tig mus rau Nws. Thov txog Vajtswv kom tau kev nplij siab, kev hlub, lus teb, thiab kev coj qhia. Txawm nej xav tau dab tsi thiab txawm nej nyob qhov twg, nthuav nej lub siab lub ntsws rau nej Leej Txiv Saum Ntuj Ceeb Tsheej. Rau nej ib txhia, tej zaum nej yuav xav ua raws li Thawj Tswj Hwm Nelson txoj lus caw thiab “Thov nws kom qhia nej tias Nws puas nyob tiag tiag—thov seb Nws puas paub nej. Thov Nws seb Nws xav li cas txog nej. Ces cia li mloog.”²⁹

Cov kwv tij thiab cov muam:

• Kawm paub txog nej Leej Txiv Saum Ntuj Ceeb Tsheej. Nws zoo tag nrho thiab nws hlub nej.

• Cia li kawm paub saib Yexus Khetos yog leej twg tiag.³⁰ Nws yog peb tus Cawm Seej thiab tus Txhiv Dim. Muab nej tus kheej thiab lawv cov uas nej hlub khi rau Nws.

• Thiab kawm paub saib nej yog leej twg tiag. Paub saib nej yog leej twg tiag ntawm sab ntsuj plig. Vajtswv txoj kev zoo siab nyob ib ncig ntawm nej. Nej yog Nws tus me nyuam muaj nqi heev suav tsis txheeb. Nws paub thiab hlub nej.

Kuv ua tim khawv txog tej hauv paus tseeb li no tiag los ntawm Yexus Khetos lub npe zoo, amees.