Si Jesucristo ang Pinakamagandang Darating
Ang kagalakan na ibinibigay ni Jesucristo ay palagi mong maaaring makamtan.
Isipin mo na lang ang panahon na akala mo ay magwawakas na ang mundo. Oo nga, seryoso! Naranasan mo na ba ang isang bagay na napakahirap na akala mo ay hindi mo ito malalampasan?
OK, siguro hindi mo naisip na magwawakas na ang mundo. Pero nadama mo bang ang mundo mo ay parang nagwakas na? Maaaring ganito ang pakiramdam mo sa anumang bagay mula sa pagbagsak sa isang mahalagang test, sa paglipat ng matalik mong kaibigan, o nang ang isang mahal sa buhay ay pumanaw nang hindi inaasahan.
Hindi mahalaga kung paano mo hinarap ang mga nakaraang pakikibaka, tingnan ang sarili mo ngayon: nakarausan mo ito! Ang mas mabuti pa, ipinapaalala sa atin ng mga propeta at apostol na higit pa ang magagawa natin kaysa makaraos lang sa mga hirap ngayon at sa hinaharap. Magkakaroon tayo ng kaligayahan sa gitna ng mga ito.
“Darating pa ang Pinakamainam”
Ang Tagapagligtas ay nagdusa nang higit pa kaysa sa inaakala natin sa Getsemani at sa krus. Ang pagtitiis sa mga sakit, karamdaman, at kasalanan ng buong mundo (tingnan sa Alma 7:11–13) ay magiging mahirap, sa madaling salita! Ngunit napagtagumpayan Niya ang lahat.
Itinuro ni Elder Patrick Kearon ng Korum ng Labindalawang Apostol, “Oo, pagnilayan natin ang mga pagdurusa at kawalang-katarungan na dinanas ng ating Tagapagligtas para sa ating mga kasalanan, at iyan ay maghihikayat ng taimtim na pagninilay. Ngunit minsan ay dito lang tayo nakatuon—sa halamanan, sa krus, at sa loob ng libingan. Hindi natin nagagawang pagtuunan ng pansin ang kagalakan ng pagbubukas ng libingan, ang pagkagapi ng kamatayan, [at] ang tagumpay ni Cristo!”
Dahil kay Jesucristo, hindi natin kailangang manatili sa ating sariling pagdurusa. Maaari tayong sumulong at umasa pa sa hinaharap nang may kagalakan at pananampalataya.
Kaya, bagama’t tila mas mahirap ang buhay kaysa sa inaakala nating kaya nating harapin, alalahanin ang itinuro kamakailan ni Pangulong Russell M. Nelson: “Ang pinakamainam ay darating pa!” Napakagandang pangako! Marami ang nalalaman ni Pangulong Nelson tungkol sa hirap at sakit-ng-kalooban na nararamdaman ng mundo araw-araw. Ngunit maaari pa rin niyang sabihin na “ang pinakamahusay ay darating pa!”
Paano magbabago ang iyong pananaw kung talagang alam mo na ang pinakamahusay ay darating pa? Paano nito mababago ang paraan ng pagharap mo sa mga hamon sa buhay?
Panatilihing Kasama si Cristo sa Larawan
Ang isang pangyayaring inanyayahan tayo ni Pangulong Nelson na buong kagalakan nating asahan ay ang Ikalawang Pagparito ni Jesucristo.
Bago mo ituro na “ang mga tao ay manlulupaypay” (Lucas 21:26) at ang matinding pagkawasak ay darating sa masasama, parang hindi naman ito “ang pinakamahusay [na parating pa lang],” linawin natin ang isang bagay: ito ang Ikalawang Pagparito ni Jesucristo. Hindi natin nauunawaan ang mahalagang punto kung aalisin natin Siya sa larawan. Siya ang “pinakamahusay” na darating—Siya ang dahilan ng ating kagalakan! Tulad ng sinabi ni Pangulong Nelson, “Ang pinakamahusay ay darating pa … sapagkat ang Tagapagligtas ay muling darating!”
Tingnan ang mga Nephita, halimbawa. Kahit nasa ibang kontinente sila, nang mamatay ang Tagapagligtas, nalampasan nila ang ilang kalamidad na katulad ng sa Ikalawang Pagparito: kamatayan, pagkawasak, mga natural na kalamidad. Buong lungsod ang nangahulog sa dagat (tingnan sa 3 Nephi 8).
Pero matapos ang lahat ng kaguluhang iyon, alam ng mga naniwala sa Tagapagligtas na ang mga kalamidad ay tanda ng kamatayan ng Tagapagligtas. Sa sandaling pinag-uusapan nila ang tungkol kay Jesucristo at ang mga palatandaan na nakita nila, nagpakita sa kanila ang Tagapagligtas (tingnan sa 3 Nephi 11:1–11).
Isipin kung gaano kalaki ang kagalakan na nadama ng mga Nephita! Matapos ang matinding pagkawasak, pinaglingkuran sila ng Tagapagligtas at pinagaling sila. Matapos ang lahat ng pangamba at takot, nagalak ang mga Nephita at pinuri ang Diyos dahil nakilala nila ang kanilang Tagapagligtas (tingnan sa 3 Nephi 11:14–17).
Maaaring hindi ka pisikal na dalawin ng Tagapagligtas sa buhay na ito tulad ng ginawa Niya sa mga Nephita. Pero makikilala mo Siya sa pamamagitan ng pagbabasa ng mga banal na kasulatan, pakikibahagi sa sakramento, pagsunod sa mga tipan, at marami pang iba. Matutulungan ka Niya na makadama ng kagalakan ngayon at sa hinaharap, anuman ang iyong kalagayan.
Habang Naghihintay Kami …
Ang Ikalawang Pagparito ng Tagapagligtas ay maaaring mangyari sa iyong buhay, o maaaring hindi. Anuman ang mangyari, may kagalakan kay Jesucristo ngayon.
Itinuro ni Pangulong Nelson ang sumusunod na nakasisiglang katotohanan na tumutulong sa atin habang hinihintay natin ang pagbabalik ng Tagapagligtas: “Mahal kong mga kapatid, napakaraming magagandang bagay na mangyayari. Sa mga darating na araw, masasaksihan natin ang mga pinakadakilang pagpapakita ng kapangyarihan ng Tagapagligtas na hindi pa nasasaksihan ng mundo kailanman. Mula ngayon hanggang sa oras ng Kanyang pagbalik ‘na may kapangyarihan at dakilang kaluwalhatian,’ magkakaloob Siya ng napakaraming pribilehiyo, pagpapala, at mga himala sa matatapat.”
Sa madaling salita, makakatagpo tayo ng kapayapaan at kagalakan kay Cristo ngayon, hanggang sa Kanyang pagbabalik, at magpakailanman. Si Jesucristo ang ilaw sa dulo ng bawat tunnel. Siya ang kagalakan sa personal na paghihirap. Siya ang nagbibigay ng kaginhawahan mula sa takot. Siya ang iyong Tagapagligtas. Kapag ikaw ay nakatuon sa Kanya, ang kapayapaan at kagalakan ay makakamit mo dito, ngayon, at sa tuwina.