Nakomai, Iriirai
Reirei ao Berita aika Tabu 18–28
Kaubwai aika Karabaaki
Kunei bwaai aika mwaiti inanon booki aika tabu.
A kamatataki kaotioti aika boou inanon booki aika tabu.
Reirei ao Berita aika Tabu 19 kabwarabwarai uoua taekan te Tia Kamaiu.
E taekina maonon te Uea n te nne onaroka are i katetemane Ruka bwa “ai aron timtim n rara” (Ruka 22:44). “Ai aron” bon te taeka ae mwaiti nanona.
E kamatata Iesu. E taekinna bwa Karawawatakina e karika te “wawanako te rara man bwangabwangan kuniu” (Reirei ao Berita aika Tabu 19:18). E aki taetae ni karariki. E korakora marakina n te aro bwa e bwaro maonona ae te rara.
E kabwarabwaraki, inanon booki aika tabu bwa “te burimton ae te kammarakaki n aki totoki” ao “te katuaeaki ae akea tokina.” E taekinna Aramwa bwa e “kammarakaki n te karawawataki ae akea tokina” (Aramwa 36:12). Ma e bon ti karawawataki inanon teniua te ngaina ao teniua te bong (taraa Aramwa 36:16). E na kanga anne n “akea tokina”?
E a manga, kamataata riki Iesu. Ngkai bon akea tokiia ao akea tiaia Tamara are i Karawa ao Iesu Kristo, te rekenikai are a na anga, bon rekenikai aika “akea tokina” ke “akea tiana” ao, n akea taina (taraa Reirei ao Berita aika Tabu 19:6‑12). E reitinako n aki toki karawawatakiia natin betetion (taraa Reirei ao Berita aika Tabu 76: 30–38).
E rang tau naba teuana te Bwabetito—irouia are iai irouia te kariaiakaki.
A titiraki naake a rairaki nakon te ekaretia nakoia mitinare:Ngkana aron bwa I a tia ni bwabetitoaki n te Ekaretia teuana? N na manga bwabetitoaki riki?
E kabwarabwaraki n Reirei ao Berita aika Tabu bwa ngkana akea—te kariaiakaki n te nakoanibonga ni karaoa ana mwakuri te Atua—“e ngae ngkana e bwabetitoaki te aomata tebubua te tai bon akea manenana nakoina” (Reirei ao Berita aika Tabu 22:2).
Te kaeka bon: “Am bwabetito are mai imwaina bon te mwakuri ae raoiroi nakoim ae ko ataia n te tai anne. E a bati riki ngkai iroum te ataibwai, ao e tangriko te Uea bwa ko na mwakuria te atatai anne.”
Akea te aomata ae e a bon rabakau naba karaoan bwaai ni kabane. Ao e tikiraoi anne.
Akea rabakaun te Burabeti Iotebwa Timiti i aon te karikirake ke karikirakean kaubwain te aba. N taekana teuana, bon akea ana konabwai.
E tuangaki iroun te uea e na bon rinanon te kawai anne: “Ni mwakurin aon te aba a na akea te korakora iroum, bwa tiaki aio weteakim” (Reirei ao Berita aika Tabu 24:9).
Are a na roko ni kuura aika rietata raoraom ma raom n reirei, ni karekei nakoa aia rietaata, ao n rianako aia konabwai nakoim.
Tai katabea nanom iai?
Te maiu aei bon tiaki te tai ni kaiangatoa. Eng, karaoa am kabanea n tamaroa. E na tai nako nanom irouia naake ko noriia bwa a rimoam ni kawain te maiu aei. A na bon aki roko n te tia are e uaiakinaki! Karaoa te bwai ae tangiria te Uea bwa ko na karaoia—kakaonimaki n weteakim”—ao n aki raraoma n ana babaire ibukira n tatabemaniira.
E baireaki raoi ana auti te Atua.
E kauring te Tia Kamaiu nakon te Burabeti Iotebwa Timiti bwa a riai ni “baireaki raoi” bwaai ake a na karaoaki (taraa Reirei ao Berita aika Tabu 20:68; 28:13; 58:55; 107:84). Ko tangira te tua ke te mangaongao.
Ma tiaki nanona bwa e na aki reke arom. Te katooto, e tua te Uea nakon Iotebwa Timiti bwa “e aki kakawaki bwa tera ae kam na kanna ke tera ae kam na nimma ngkana kam kana te toa”—ti ngkana kam karaoia bwa kauringan Karawawatakiu ao au Mwakuri ni Kamaiu (Reirei ao Berita aika Tabu 27:2).
Bon akea te kaokoro, ni kairan ana waaki te Ekaretia. E kona temanna ni karekea te kaotioti ibukin te Ekaretia; te moan bon Iotebwa Timiti (taraa Reirei ao Berita aika Tabu 28:2); bon te Uea na rinea ana aomata “ae na karekei tua ao kaotioti” (Reirei ao Berita aika Tabu 28:7)—Bringham Young, John Taylor, ni karokoa ara burabeti ni bong aikai.
A kona naba taan kairiiri n te Ekaretia n taetae, n anga reirei, ke n kaungai nanoia aomata (taraa Reirei ao Berita aika Tabu 28: 4–5). Ma bon ti ana Beretitenti te Ekaretia ae iai irouna te kariaiakaki mairoun te Atua bwa e na kaira te Ekaretia ni kabane.