Kabongana te Kairi
Aiti Kuriim, Te Rao ae Tamaroa, ao Tangiria Kain Rarikim
E bebete kawakinan te kauoua ni korakora n tua.
Tamnei iroun Valentina Vinci
Ngkana a rinanon te karawawataaki raoraom ke am utu, ko tabeaianga ibukin kakaean tokin aia kangaanga? Bon te iango ae raoiroi buokaia aomata ni kakaea tokin aia kangaanga.
Ma iangoia bwa a raure ana karo raoraom. Ke mwanem ae uarereke ae bwainikirinaki n ana reirei. Ke tibum te unimwaane ae inimaki ma rawawatana. Tera am anga n ibuobuoki i aon anne?
Te kaeka ae uarereke bwa ko bon aki kona. Ao e raoiroi anne. N te tai naba anne, ao, ko kona n tainako n ibuobuoki. Ko na bon kubanako n am ibuobuoki ae bon tau bwa ngaia e kanakoraoi bwaai.
Te Kangaanga ae Bubura, Te Akoi ae bon Tau
E ikawairake Foni P. n te mwenga ae tararuaki iroun te tina n tii ngaia. Ngke te ataei ngaia ni karokoa ae e a ataeinaine, e noora kainnanon tinana ni kaikawaia natina aika teniman n tii ngaia. N tokina, ao e a rikirake ni buakaka ana taratara Foni i aon tamana. E aki maan imwiina, ngke e a koro 19 ana ririki, e moana ana reitaki tamana nakoina.
“I aki kukurei,” e taku Foni. “I bon irou, ‘E aki te roko n mena irarikiu inanon 19 te ririki. E aera bwa ngkai?’” E ngae n tataro ao n karaurau n iangoia, ma e teimatoa Foni n aki kunea te rau. E ibuobuoki teutana ana marooro ma tinana ao ai tinana, ma e teimatoa n aki raoiroi nanona. Imwiina ao e riki te bwai ae tamaroa (ae bon tau): E a kaoaki Foni iroun raoraona bwa a na nako n aiti kuriim ao ni bobwai.
“E na bon taraa n akea nanona irouia aomata,” e taku Foni, “ma e bon rangi ni bubura nanona irou! I namakina kabuebuen taai i aon kuniu. Ti nakonako i tinaniku, ao I noori aroka. I namakina te ang, ao n namakina naba te Tamnei ae Raoiroi. E bon rangi ni kamimi.”
Te mwananga ni bobwai ae aki kantaningaia Foni aio e katoka ana kanganga? Eng, e bon aki. E ataia Foni bwa ana reitaki ma tamana e bon rangi ni kanganga. Ma ana mwakuri n akoi ae bon tau raoraona e buoka Foni n namakina te Tamnei ae Raoiroi. E a kona riki ni kaitarai ana kanganga ma te korakora ae raka riki. “I ataia bwa e bon wirikirikinaki iroun te Tamnei ae Raoiroi bwa e na kaotinakoai mai iaan au auti,” e tibwaia Foni.
Antai ae Kainnanoiko n te Bong Aei?
N te Ibukin Kakorakoraia Kairake kairi, ti kaoaki bwa ti na “anga baiira nakoia ake a maroaa, n tionako, ke n bwarannano. Buokiia n namakina ana tangira Tamaia are i Karawa rinanom” (Ibukin Kakorakoraia Kairake: Te Kairi ibukin Karaoan Rinerine [2022], 12). Karaoan te mwakuri n akoi ae bon tau aio e buoka Foni n namakina ana tangira te Atua nakoina n ana tai n rawawata. Antai ae ko kona ni buokiko n namakina te tangira ae ai aron anne ngkai?