E Tangiria Tamam are i Karawa ni Kan Taetae Nakoim
Onimaki bwa e na taetae nakoim Tamam are i Karawa. E mena ikekei ao n tangiriko nakon riki ae kona n taekinaki.
Ngaira bon naati mwaane ao naati aine iroun te Atua, ti botaki i aon te aba ae raroa ma mwengara are i karawa. Te maiu ae mamate, bon te tai ni karekei rabwatara, n rinea te raoiroi man te buakaka, ni karikirakea ara onimaki iroun ara Tia Kamaiu Iesu Kristo ao Ana Mwakuri ni Kamaiu, ao ni butimwaea ana babaire ni kakukurei te Tama.
Ti, maroa, n tabetai, ibukina bwa ti aki kona n uring arora imwain te maiu aei. E anganiira Tamara bwaintangira n tamnei bwa ti aonga n teimatoa n nim ma Ngaia ao ni karekea te boaaki, te kairaki, ao te rau n nano mai Irouna. Ti kina te bwaintangira aio; n arana ae te tataro.
For Those Who Will Believe in Me (Ibukiia Naake A Na Kakoauaai), iroun Dan Wilson
Tataro nakon Tamam are i Karawa
E tua te anera nakon Atam ao Ewa ma taan iririia ni kangai “raira nanom ao ni wetea te Atua n aran te Nati n aki toki.” (Mote 5:8).
E reirei Iesu:
-
“Bubuti, ao ane kam na anganaki; kam na ukeuke, ao ane e na reke iroumi; kam na karebwerebwe, ao ane e na kaukaki nakoimi” (Mataio 7:7).
-
“Ngkana ko tataro, … tataro nakon Tamam … ae raba” (Mataio 6:6).
-
Ma ngaia ae kama na tataro ni kangai: Tamara are i Karawa, E na tabuaki aram” (Mataio 6:9).
E reitinako n tataro Iesu Kristo nakon Tamana (taraa Ruka 6:12; Mareko 6:46). E taku nakoia ana reirei, i Ketetemwane, “Kam na tekateka ikai, bwa N na tataro” (Mareko 14:32). Ngke mena i aon te kaibangaki, ao e tataro ibukia tautia ake a tauria: “Tamau, Ko na kabara aia bure; ba a aki ata ae a karaoia” (Ruka 23:34).
Ti reireiaki bwa ti na “tataro n tainako.” Ngkana ti “reitaki ma te Uea n [ara] waaki ni kabane, … ao e na [kairiira] nakon ae raoiroi” (Aramwa 37:37). Ni kairia, ma ara “kaaitau ma kamoamoa ni kabane ake a reke [nakoira] ao kam angan te Atua are e a tia ni karikingkami” (Motiaea 2:20).
Te bwai ae rangi ni mimitong, bwa e kaekai ara tataro Tamara are i Karawa! Te titiraki nakoira bwa ti na kanga n ataia bwa te kaeka, te kairi, ke te rau n nano a roko mai iroun te Tama?
Karekean te kaeka nakon ara tataro e bon moa man te onimaki iroun te Tama are i Karawa ao Natina, Iesu Kristo. Ti onimakina te Tama, ao ni kabanea ara kona ni kawakin tua, ao n ukora baina ni ibuobuoki (taraa Reirei ao Berita aika Tabu 59:21).
E na tei irarikim Tamam are i Karawa, ni kakorakorako, n karaua nanom, ao n “onea karawawatam nakon taian kakabwaia ibukim” (2 Nibwaai 2:2) ngkai ko wewete nakoina.
Ongo Ana Taeka
Ngkana ti kamwakura ara onimaki iroun te Atua ao ni kawakin Ana tua, ti na kona n ongo n Ana taeka.
N 1993, Beretitenti James E. Faust (1920–2007), ngke te membwa n aia Kooram n Abotoro n te Tengaun ma Uoman, e kaoai ma kainabau ae, Kathy, bwa ti na iri ma ngaia nakon te bwabwaro are karaoaki n te Bringham Young University. N te tai aei ao a bon tuai ni kabonganaki taian tareboon, bwaai n reitaki, ao te intanete.
N ana marooro, Beretitenti Faust ao e kauring: “N am roro ao ko na kaitara ma bwana aika uanao ake a na tuangko arom ni waaki inanon maium, arom n tabeakina rawawatam, ao arom ni karekea are ko kantaningaia.” Ma “ko riai n kina bwanaan te Tamnei ae Raoiroi.” Ti na kina, “ngkana ti … kauki taningara, ma n kakaonimaki n ukora te kairi mai i karawa.”
Ririki ake imwiina, e reirei Beretitenti Russell M. Nelson, “Ngkana ko tabeakin riki bwana aika nako man bwaai ni kaongora nakon ana wirikiriki te Tamnei ae Raoiroi, ko bon uotiko nakon kamamaran tamneim.”
E na roko bwanaan te Tamnei iroura n ara iango ao n ara namakin. “N na bon tuangko n am iango ao inanom, rinanon te Tamnei ae Raoiroi, are e na roko i aom ao are e na maeka inanom” (Reirei ao Berita aika Tabu 8:2). Kakauongo nakon bwanaan nanom—anne bon te moan mwaneka ni karekean te kaotioti.
Tataro ma Nanom ni Koaua
A bon aki kairoro kaeka ake mai iroun te Atua. Ti tataro ao n tataninga ma nanora n onimaki. A kona n aki roko kaeka n te maiu aei, ma nakoia aika raoiroi, e na teimatoa te Uea anganiia Ana rau (taraa Ioane 14:27). A roko taian kaeka, inanon taina “teutana imwiin teutana, te reirei teuana imwiin teuana” (Reirei ao Berita aika Tabu 98:12).
E kona n roko te bwana mai karawa n taai aika aki kantaningaki n taabo aika mabu ao man tabu. I kunei kakabwaia kamimi, ngkana I tataro n te moaningabong ao n karaurau n iango. Ara kamatebwai n koroboki aika tabu, i bon iroura, ni katoa bong, e kona n uota bwanaan te Tamnei ae Raoiroi nako nanora ao ni kakorakoraira.
Ngkai ti katobibiaki ma bwana ao kamangaongaon te aonaba, e tua te Uea nakon Ana burabeti bwa e na katei tembora aika mwaiti. N ana auti te Uea aika tabu aikai, ngkana ti katikui ara kanganga i tinaniku ao n rinnako ma ara tataro ao tabeaiangara, ti na bon reiakin koaua n te maiu are akea tokina. Te ririki ae nako, e berita Beretitenti Nelson bwa ngkana ti nebonebo n te tembora, “Akea te bwai ae na kauka rikikarawa. Akea!”
A bon roko naba kakabwaia aika mwaiti man taian maungatabu ni kabuta. N te namwakaina ae Eberi, ti na manga kaitibo naba n te maungatabu ni kabuta ao n ongora ni bwanaan te Uea. I berita bwa ngkana ko roko n tauraoi ao tataromwaaka imwain te maungatabu ni kabuta, ko na kunei kaekaan am raraoma ao n ataia bwa ko mwaneaki “mai karawa”.
Onimaki bwa e na taetae nakoim Tamam are i Karawa. E na bon! Am onimaki Irouna ma natina ae Tangiraki e na buokiko inanon ana mwakuri ao ni kina bwanaan te Tama. I kakoauaa bwa E mena ikekei ao n tangiriko ma nanona ni kabane.