សុន្ទរកថាបញ្ចប់
អែលឌើរ នែល អិល អាន់ឌើរសិន ៖ ខ្ញុំរីករាយខ្លាំងណាស់ដែលបាននៅជាមួយបងប្អូន ដែលបានចូលរួមក្នុងការពិភាក្សាទាំងនេះ ហើយបានស្ងើចសរសើរយ៉ាងខ្លាំងចំពោះការតាំងចិត្តរបស់បងប្អូន និងភាពជាសិស្សរបស់បងប្អូន ។ សម្រាប់បងប្អូនដែលចង់មើលការសន្ទនាទាំងនេះបន្ថែមទៀត ការសន្ទនានេះនឹងភ្ជាប់ទៅកំណែអេឡិចត្រូនិចនៃការប្រជុំធម្មនិដ្ឋាននេះ ។
បងប្អូនប្រុសស្រីជាទីស្រឡាញ់របស់ខ្ញុំ ខេធី និងខ្ញុំរីករាយណាស់ដែលបាននៅជាមួយបងប្អូននៅយប់នេះ ។ ខេធី តើអូនចង់ចែកចាយគំនិតខ្លះៗសម្រាប់ការបញ្ចប់ដែលអូនអាចជាមាន នៅពេលយើងមានការប្រជុំធម្មនិដ្ឋាននេះដែរឬទេ ?
ស៊ីស្ទើរ ខេធី អាន់ឌើរសិន ៖ អរគុណ ! ខ្ញុំមានអំណរគុណយ៉ាងខ្លាំងចំពោះឯកសិទ្ធិ ក្នុងការនៅទីនេះជាមួយស្វាមីរបស់ខ្ញុំនៅល្ងាចនេះ និងជាមួយនឹងបងប្អូនទាំងអស់គ្នា ។ រាត្រីនេះគឺជារាត្រីដ៏ពិសេសមួយ ហើយយើងជ្រោតជ្រាបយ៉ាងខ្លាំងនៅក្នុងដួងចិត្តរបស់យើង ។
ខ្ញុំពិតជារំភើបខ្លាំងណាស់សម្រាប់ឱកាសនៅថ្ងៃខាងមុខ មិនថានៅក្នុងសន្និសីទស្តេក ឬមើលសន្និសីទទូទៅ ដើម្បីអាចលើកដៃខ្ញុំ និងគាំទ្រប្រធាន ដាល្លិន អេក អូក ជាព្យាការី ជាអ្នកមើលឆុត និងជាអ្នកទទួលវិវរណៈ និងជាប្រធានសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនោះទេ ។
ហើយទំរាំដល់ពេលនោះមកដល់ នៅពេលដែលខ្ញុំអាចលើកដៃរបស់ខ្ញុំបានខ្ពស់បំផុតនៅក្នុងដួងចិត្តរបស់ខ្ញុំ និងនៅក្នុងការអធិស្ឋានរបស់ខ្ញុំ ខ្ញុំសូមអរគុណព្រះវរបិតាសួគ៌របស់ខ្ញុំសម្រាប់បុរសជាទីស្រឡាញ់រូបនេះ ដែលឥឡូវនេះគឺជាព្យាការីរបស់ព្រះ ។ មានបទគម្ពីរមួយដែលស្វាមីខ្ញុំ និងខ្ញុំបាននិយាយជាញឹកញាប់ ពេលយើងគិតដល់ប្រធាន អូក ។ វាគឺជាបទគម្ពីរនៅក្នុងគោលលទ្ធិ និងសេចក្តីសញ្ញា កាលដែលព្រះអម្ចាស់កំពុងមានព្រះបន្ទូលអំពី ហៃរុម ស្ម៊ីធ ។
ទ្រង់បានមានព្រះបន្ទូលថា « យើង … ស្រឡាញ់គាត់ មកពីសេចក្ដីស្មោះនៃចិត្តរបស់គាត់ និងមកពីគាត់បានស្រឡាញ់នូវអ្វីដែលត្រឹមត្រូវចំពោះយើង » ។ ហើយអ្វីដែលខ្ញុំគិតថាយើងបាននិយាយជាច្រើនដងក្នុងជីវិតរបស់យើង គឺជាបេះដូងរបស់ប្រធាន ដាល្លិន អេក អូក ។
ខ្ញុំស្រឡាញ់ព្រះវរបិតាសួគ៌របស់ខ្ញុំ ហើយខ្ញុំស្រឡាញ់ព្រះអង្គសង្គ្រោះព្រះយេស៊ូវគ្រីស្ទរបស់ខ្ញុំ ។ ខ្ញុំនឹងថ្លែងទីបន្ទាល់របស់ខ្ញុំនៅក្នុងពាក្យពេចន៍នៃតន្ត្រីដ៏សែនពិរោះនេះ ដែលយើងបានស្ដាប់នៅយប់នេះពីក្រុមចម្រៀងនេះ ៖ « ថ្វាយពរព្រះអម្ចាស់ដ៏អស្ចារ្យ ជាស្តេចនៃការបង្កើត » ។ ហើយបន្ទាប់មកឃ្លាមួយទៀតនិយាយថា ៖ « ថ្វាយពរដល់ព្រះអម្ចាស់ ។ ឱ សូមឲ្យខ្ញុំបានសព្វព្រះទ័យ » ។ ខ្ញុំស្រឡាញ់ទ្រង់ ខ្ញុំសព្វព្រះទ័យទ្រង់អស់ពីដួងចិត្ត និងអស់ពីព្រលឹងរបស់ខ្ញុំ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
អែលឌើរ នែល អិល អាន់ឌើរសិន ៖ បងនឹងជូនអូនទៅកន្លែងអង្គុយ ។
បងស្រឡាញ់អូន ។
យើងអរសប្បាយនឹងសេចក្ដីល្អរបស់បងប្អូន និងសេចក្ដីជំនឿរបស់បងប្អូនទៅលើព្រះអម្ចាស់យេស៊ូវគ្រីស្ទ ។ យើងចូលចិត្តជួបជាមួយប្អូនៗ និងជាមួយមនុស្សគ្រប់គ្នានៅទូទាំងពិភពលោក—ទាំងបុរស និងស្ត្រី បុត្រា និងបុត្រីរបស់ព្រះ បុត្រនៃសេចក្ដីសញ្ញា សិស្សរបស់ព្រះយេស៊ូវគ្រីស្ទ ។ យើងស្ងប់ស្ងែងចំពោះការលះបង់របស់បងប្អូនចំពោះព្រះអង្គសង្គ្រោះ ហើយយើងអរគុណព្រះដែលបងប្អូនចូលរួមជាមួយយើង នៅពេលយើងរៀបចំសម្រាប់ការយាងមកជាលើកទីពីររបស់ព្រះអម្ចាស់ ។
យើងរស់នៅក្នុងគ្រាដ៏គ្រោះថ្នាក់—ជាគ្រាដែលការល្បួងមានច្រើន ជាពេលដែលបទដ្ឋាននៃពិភពលោកខុសគ្នាខ្លាំងពីបទដ្ឋាននៃដំណឹងល្អរបស់ព្រះយេស៊ូវគ្រីស្ទ ។ យើងរស់នៅក្នុងគ្រាមួយដែលយើងមិនអាចរស់នៅតាមធម្មតាអំពីភាពជាសិស្សរបស់យើងផ្ទាល់បានទេ ។ នៅពេលខ្ញុំនៅអាយុស្របាលបងប្អូន ព្យាការីរបស់ព្រះបានមានប្រសាសន៍ថា « [ សមាជិកម្នាក់ៗ ] គឺជាជញ្ជាំងបម្រុងនៃសេចក្តីជំនឿ … ត្រូវតែឈរការពារសេចក្តីជំនឿរបស់គាត់ [ ឬនាង ] » ។ ខ្ញុំដឹងថា នេះជាការពិត ។
ព្យាការីម្នាក់ទៀតរបស់ព្រះបានមានប្រសាសន៍ថា « មនុស្សម្នាក់មិនបានប្រែចិត្តជឿពិតប្រាកដឡើយ ទាល់តែគាត់មើលឃើញព្រះចេស្ដានៃព្រះសណ្ឋិតលើថ្នាក់ដឹកនាំនៃសាសនាចក្រនេះ ហើយរហូតទាល់តែវាជ្រាបចូលទៅក្នុងដួងចិត្តគាត់ [ ឬនាង ] ដូចជាភ្លើង » ។ នេះក៏ជាការពិតដែរ ។
ព្យាការី និងព្រះវិហារបរិសុទ្ធតម្រង់ទិសយើងទៅកាន់ព្រះយេស៊ូវគ្រីស្ទ ។ ក្នុងនាមជាសិស្សរបស់ទ្រង់នៅថ្ងៃចុងក្រោយនេះ សូមរៀបចំខ្លួនសម្រាប់ការយាងមកវិញរបស់ទ្រង់ យើងរឹងមាំតាមរបៀបដែលមិនអាចគណនាបានតាមរយៈសាក្សីរបស់យើងអំពីព្យាការីរបស់ព្រះអម្ចាស់ និងដំណាក់នៃព្រះអម្ចាស់ ។
ព្រមជាមួយនឹងព្រះចេស្ដានៃព្រះវិញ្ញាណរបស់ទ្រង់ ព្យាការី និងព្រះវិហារបរិសុទ្ធ គឺជាពរជ័យដ៏ជាជំនួយដ៏មានអានុភាពពីរ ដែលព្រះអម្ចាស់បានប្រទានដល់យើង នៅក្នុងពិភពលោកដ៏រញ៉េរញ៉ៃរបស់យើង ដើម្បីញែកសេចក្តីល្អចេញពីសេចក្តីអាក្រក់ ដើម្បីយល់ពីគោលបំណងពិតរបស់យើងនៅក្នុងជីវិតរមែងស្លាប់របស់យើង និងដើម្បីធ្វើជាសិស្សរបស់ទ្រង់យ៉ាងពិតប្រាកដ ។
ខ្ញុំសូមថ្លែងជាសាក្សីអំពីប្រធាន ដាល្លិន អេក អូក ។ លោកត្រូវបានរៀបចំ និងចម្រាញ់នៅក្នុងភ្លើងនៃសេចក្តីលំបាក ដោយបានបន្តនៅក្នុងរូបកាយ និងដួងចិត្តរបស់លោក ដើម្បីដឹកនាំយើងនៅពេលនេះ ដើម្បីមានប្រសាសន៍នៅក្នុងព្រះនាមរបស់ព្រះអម្ចាស់ ។
ខ្ញុំសូមថ្លែងជាសាក្សីថា ព្រះវិហារបរិសុទ្ធដែលនៅចំពោះមុខយើងនេះ ហើយនឹងគ្រប់ដំណាក់ដ៏ពិសិដ្ឋរបស់ព្រះអម្ចាស់ គឺពោរពេញដោយព្រះចេស្តា សេចក្តីសុខសាន្ត ការលួងលោម និងវិវរណៈ ដែលបង្កប់ដោយកូនសោនៃបព្វជិតភាពដែលអនុញ្ញាតឲ្យកិច្ចការទាំងនោះដែលត្រូវបានផ្សារភ្ជាប់នៅលើផែនដី ត្រូវបានផ្សារភ្ជាប់នៅស្ថានសួគ៌ ។ យើងមានអំណរគុណយ៉ាងខ្លាំងចំពោះចំនួនព្រះវិហារបរិសុទ្ធជាច្រើនដែលកំពុងសាងសង់ពាសពេញផែនដី ។
វាជាពេលវេលាដ៏អស្ចារ្យដើម្បីរស់នៅ ជាពេលវេលានៃការរំពឹងទុក និងការរៀបចំខ្លួនសម្រាប់ការយាងមកវិញរបស់ព្រះអង្គសង្គ្រោះ ។ ហើយទ្រង់បានលើកទឹកចិត្តយើងថា ៖ « ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។
នៅក្នុងសិទ្ធិអំណាចនៃសាវករបស់ខ្ញុំ ខ្ញុំសូមផ្ដល់ពរដល់បងប្អូន នៅពេលបងប្អូនព្យាយាមរៀបចំខ្លួនរបស់បងប្អូន សម្រាប់ការយាងមកវិញរបស់ព្រះអង្គសង្គ្រោះរបស់យើង ថាបងប្អូននឹងត្រូវបានផ្តល់ជាសាក្សីបញ្ជាក់អំពីព្យាការីរបស់ព្រះអម្ចាស់ និងអំពីអំណាចដ៏ពិសិដ្ឋនៃដំណាក់ដ៏បរិសុទ្ធរបស់ទ្រង់ ។ ខ្ញុំសូមសន្យានឹងបងប្អូនថា ទេវតានៃស្ថានសួគ៌នឹងប្រទានពរដល់បងប្អូន នៅពេលបងប្អូនខិតខំធ្វើជាសិស្សដ៏ពិតរបស់ព្រះយេស៊ូវគ្រីស្ទ ។
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រានៃព្រះ ជាព្រះអង្គសង្រ្គោះ និងជាព្រះប្រោសលោះនៃមនុស្សលោកទាំងអស់ ។ នេះគឺជាទីបន្ទាល់របស់ខ្ញុំ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕