22:38

ការថ្លែងសុន្ទរកថាបើកកម្មវិធី

បទបង្ហាញនេះអស្ចារ្យ ល្អ និងគួរឲ្យចាប់អារម្មណ៍ណាស់ ។ ហើយខ្ញុំគិតត្រង់នេះនូវរូបភាពដ៏ស្រស់ស្អាតរបស់ព្រះអង្គសង្រ្គោះ Christus [ រូបចម្លាក់របស់ព្រះគ្រីស្ទ ] ហើយខ្ញុំដឹងថាព្រះហស្ដរបស់ទ្រង់ គឺលាតទៅរកបងប្អូនទាំងអស់គ្នា ។ សូមអរគុណចំពោះការបង្ហាញអារម្មណ៍ដ៏ស្រស់ស្អាតនៃសេចក្តីស្រឡាញ់របស់ព្រះអង្គសង្រ្គោះ ។ អរគុណខ្លាំងណាស់ ។

បងប្អូនប្រុសស្រីជាទីស្រឡាញ់របស់ខ្ញុំនៅទូទាំងពិភពលោក ខ្ញុំសូមផ្ញើសេចក្តីស្រឡាញ់របស់ខ្ញុំទៅដល់បងប្អូន ហើយខ្ញុំសូមពាំនាំនូវសេចក្តីស្រឡាញ់របស់គណៈប្រធានទីមួយនៃសាសនាចក្រ ដែលបានរៀបចំឡើងវិញមកដល់បងប្អូនផងដែរ ដែលមាន—ប្រធាន ដាល្លិន អេក អូក ប្រធាន ហែនរី ប៊ី អាវរិង ប្រធាន ឌី ថត គ្រីស្តូហ្វឺសិន ។

ប្រាកដណាស់ ខ្ញុំក៏សូមពាំនាំមកនូវសេចក្តីស្រឡាញ់របស់កូរ៉ុមនៃពួកសាវកដប់ពីរនាក់ផងដែរ ។ ខេធី និងខ្ញុំ—ពួកយើងមានអំណរគុណខ្លាំងណាស់ដែលបានចូលរួម នៅក្នុងមជ្ឈមណ្ឌលអ្នកទស្សនាព្រះវិហារបរិសុទ្ធ វ៉ាស៊ីនតោន ឌី.ស៊ី. នៅជិតនឹងដំណាក់ដ៏ស្រស់ស្អាតរបស់ព្រះអម្ចាស់ ។

ខ្ញុំរីករាយណាស់ដែលបាននៅជាមួយបងប្អូន យុវមជ្ឈិមវ័យដ៏អស្ចារ្យរបស់យើង ទាំងមានវត្តមាននៅទីនេះ និងនៅជុំវិញពិភពលោក ។ យើងស្រឡាញ់បងប្អូន ។ យើងមានអំណរគុណយ៉ាងខ្លាំងចំពោះការលះបង់របស់បងប្អូនចំពោះព្រះយេស៊ូវគ្រីស្ទ និងសម្រាប់ការធ្វើជាសិស្សរបស់ទ្រង់ ។

ខ្ញុំអធិស្ឋានដោយស្មោះសរសូមឲ្យនៅអំឡុងពេលមួយម៉ោងបន្ទាប់នេះ ព្រះវិញ្ញាណនៃព្រះអម្ចាស់នឹងគង់នៅជាមួយនឹងយើង ហើយថាសេចក្តីជំនឿរបស់យើងទៅលើព្រះអង្គសង្គ្រោះ និងនៅក្នុងដំណឹងល្អដែលបានស្ដារឡើងវិញរបស់ទ្រង់នឹងត្រូវបានពង្រឹង និងបញ្ជាក់ ។ នៅយប់នេះ យើងនឹងនិយាយអំពីព្យាការី និងព្រះវិហារបរិសុទ្ធ និងរបៀបដែលព្យាការី និងព្រះវិហារបរិសុទ្ធតម្រង់ទិសយើងទៅកាន់ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។

ប៉ុន្តែ ជាដំបូង មានការបង្ហាញពីសេចក្តីស្រឡាញ់ចំពោះប្រធាន អូក មកពីយុវមជ្ឈិមវ័យដែលរស់នៅឆ្ងាយពីទីនេះ ។

យុវមជ្ឈិមវ័យមកពីភាគខាងជើងនៃប្រទេសកាណាដា ៖ ជម្រាបសួរ ប្រធាន អូក ។ ពួកយើងចង់ជម្រាបជូនប្រធានថា ពួកយើងគិតអំពីប្រធាន និងស៊ីស្ទើរ អូក ជានិច្ច ។ ពួកយើងអធិស្ឋានជូនប្រធាន និងស៊ីស្ទើរ អូក និងផ្ញើសេចក្តីស្រឡាញ់ពីភាគខាងជើងនៃប្រទេសកាណាដា ។ ជម្រាបលា !

យុវមជ្ឈិមវ័យមកពីមហាវិទ្យាល័យ Ensign ៖ ប្រធាន អូក ពួកយើងពិតជាមានអំណរគុណណាស់ចំពោះគំរូ និងការបង្រៀនរបស់ប្រធាន ។ ពួកយើងទន្ទឹងរង់ចាំរៀនសូត្រពីប្រធាន ។

យុវមជ្ឈិមវ័យមកពីអាហ្រ្វិកខាងត្បូង ៖ ជម្រាបសួរមកពីចូហានណេសប៊ឺក នៃអាហ្រ្វិកខាងត្បូង ។ ពួកយើងស្រឡាញ់លោក ប្រធាន អូក !

យុវមជ្ឈិមវ័យមកពីប្រទេសហ្វីលីពីន ៖ ជម្រាបសួរប្រធាន អូក មកពីប្រទេសហ្វីលីពីន ។ ពួកយើងរំភើបណាស់ដើម្បីរៀនពីសារលិខិតរបស់ប្រធាន ។

អែលឌើរ នែល អិល អាន់ឌើរសិន ៖ នៅជុំវិញពិភពលោក ។ ខ្ញុំចង់ចាប់ផ្ដើមដោយចែកចាយដល់បងប្អូនពីបទពិសោធន៍ដ៏ពិសិដ្ឋដែលខ្ញុំទើបតែមានពីរបីថ្ងៃកន្លងទៅ កាលពីថ្ងៃអង្គារ ទី១៤ ខែតុលានេះ ។

នៅថ្ងៃនោះគឺជាថ្ងៃដែលយើងបានជួបជុំគ្នាជាសាវក១៤នាក់ ដែលបានតែងតាំង ដោយការតមអាហារ និងអធិស្ឋានយ៉ាងក្លៀវក្លាដើម្បីទូលសូមពរជ័យរបស់ព្រះអម្ចាស់ ក្នុងការរៀបចំគណៈប្រធានទីមួយថ្មីឡើងវិញ ។ វាគឺជាពេលវេលាដែលស្ថានសួគ៌ និងផែនដីភ្ជាប់គ្នា ។

ខ្ញុំមានអំណរគុណយ៉ាងខ្លាំងចំពោះសាក្សីខាងវិញ្ញាណដ៏មានអានុភាព និងមិនអាចបំភ្លេចបាន និងការបញ្ជាក់ដែលបានជ្រោតជ្រាបដល់ខ្ញុំ និងយើងម្នាក់ៗ ជាបុគ្គលម្នាក់ៗ និងជាសមូហភាព ។ សាវកទាំង១៣នាក់ដាក់ដៃនៅលើក្បាលរបស់ប្រធាន ដាល្លិន អេក អូក ។ ប្រធាន ជែហ្វ្រី អ័រ ហូឡិន បានធ្វើពិធីញែកចេញសាវករៀមច្បងរបស់ព្រះអម្ចាស់ ឲ្យធ្វើជាប្រធាននៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

ខ្ញុំសូមផ្ដល់ដល់បងប្អូននូវសាក្សីដ៏ឧឡារិក និងរាបទាបរបស់ខ្ញុំថា លោកគឺជាព្យាការីរបស់ព្រះអម្ចាស់នៅលើផែនដីនេះ ។ លោកស្គាល់ព្រះសូរសៀងរបស់ព្រះអម្ចាស់ ។ លោកនឹងដឹកនាំយើងនៅក្នុងសេចក្តីពិត និងតម្រង់ទិសយើងឆ្ពោះទៅរកព្រះអម្ចាស់ ព្រះយេស៊ូវគ្រីស្ទ ។ នៅពេលយើងស្ម័គ្រចិត្ត កាលយើងទទួលយកការបង្រៀន នោះគំនិត និងវិញ្ញាណរបស់យើងនឹងកើនឡើង ហើយអំណាចនៃស្ថានសួគ៌នឹងផ្ដល់ពរដល់ជីវិតរបស់យើង ។

កូនសោនៃបព្វជិតភាពរបស់ព្រះឥឡូវនេះមានពេញលេញ ដោយមាននូវសិទ្ធិអំណាចដើម្បីអនុវត្តកូនសោទាំងនោះ ដែលបានកាន់ដោយប្រធាន ដាល្លិន អេក អូក ។ បងប្អូននឹងចងចាំព្រះបន្ទូលរបស់ព្រះយេស៊ូវទៅកាន់ពេត្រុស ដែលជាសាវករបស់ទ្រង់ ។

ទ្រង់បានមានបន្ទូលថា « ខ្ញុំនឹងឲ្យកូនសោនៃនគរស្ថានសួគ៌ដល់អ្នក បើអ្នកនឹងចងទុកអ្វីៗនៅផែនដី នោះនឹងត្រូវចងទុកនៅលើស្ថានសួគ៌ដែរ ហើយបើអ្នកនឹងស្រាយអ្វីៗនៅផែនដី នោះនឹងត្រូវស្រាយនៅស្ថានសួគ៌ដែរ » ។

ព្រះអម្ចាស់បានមានបន្ទូលអំពីព្យាការីយ៉ូសែប ៖ « ដ្បិតពាក្យសម្ដីរបស់លោកនោះហើយ អ្នកនឹងបានទទួល ហាក់ដូចជាបានមកពីព្រះឱស្ឋរបស់យើងផ្ទាល់ ដោយសេចក្ដីអត់ធន់ និងសេចក្ដីជំនឿគ្រប់យ៉ាង » ។ ពាក្យសម្តីទាំងនេះក៏ពិតសម្រាប់ព្យាការីរបស់យើង គឺប្រធាន ដាល្លិន អេក អូក ផងដែរ ។ សូមគិតពីរឿងនេះ ។

អស់រយៈពេល៤១ឆ្នាំ បម្រើនៅក្នុងការហៅដ៏ពិសិដ្ឋរបស់លោក នោះប្រធាន អូក បានថ្លែងទីបន្ទាល់ក្នុងនាមជាសាក្សីពិសេសម្នាក់របស់ព្រះអម្ចាស់ ព្រះយេស៊ូវគ្រីស្ទ ។ សូមយើងមើលទាំងអស់គ្នា ។

ប្រធាន ដាល្លិន អេក អូក ( ឆ្នាំ១៩៨៤ ) ៖ សន្និសីទពាក់កណ្តាលឆ្នាំនេះគឺជាឱកាសដំបូងរបស់ខ្ញុំ ដើម្បីថ្លែងទៅកាន់សមាជិកភាពទូទៅនៃសាសនាចក្រ ដើម្បីបង្ហាញពីការទទួលយកការហៅរបស់ខ្ញុំទៅកាន់ក្រុមប្រឹក្សាដប់ពីរនាក់ ។ … ខ្ញុំនឹងលះបង់អស់ពីចិត្ត អស់ពីពលំ អស់ពីគំនិត ហើយអស់ពីកម្លាំងរបស់ខ្ញុំ ចំពោះសេចក្តីទុកចិត្តដ៏ធំធេងដែលដាក់នៅលើខ្ញុំ ជាពិសេសចំពោះទំនួលខុសត្រូវរបស់សាក្សីពិសេសនៃព្រះនាមរបស់ព្រះយេស៊ូវគ្រីស្ទនៅទូទាំងពិភពលោក ។

ប្រធាន ដាល្លិន អេក អូក ( ឆ្នាំ១៩៨៧ ) ៖ យើងស្រឡាញ់ព្រះអម្ចាស់ ព្រះយេស៊ូវគ្រីស្ទ ។ ទ្រង់គឺជាព្រះមែស៊ី ជាព្រះអង្គសង្គ្រោះរបស់យើង និងជាព្រះប្រោសលោះរបស់យើង ។ ទ្រង់គឺជាព្រះនាមតែមួយគត់ដែលយើងអាចទទួលបានការសង្រ្គោះ ។

ប្រធាន ដាល្លិន អេក អូក ( ឆ្នាំ១៩៩៤ ) ៖ សេចក្តីជំនឿទៅលើព្រះអម្ចាស់ព្រះយេស៊ូវគ្រីស្ទ រៀបចំបងប្អូនសម្រាប់អ្វីៗដែលមានក្នុងជីវិត ។ សេចក្ដីជំនឿប្រភេទនេះរៀបចំបងប្អូនឲ្យប្រឈមមុខទៅនឹងឱកាសក្នុងជីវិត—ដើម្បីទាញយកប្រយោជន៍ពីអ្វីដែលបានទទួល ហើយតស៊ូឆ្លងកាត់ការបាក់ទឹកចិត្តនៃអស់អ្នកដែលបាត់បង់ ។

ប្រធាន ដាល្លិន អេក អូក ( ឆ្នាំ២០០០ « ព្រះគ្រីស្ទដ៏មានព្រះជន្មរស់ » ) ៖ ក្នុងនាមជាពួកសាវករបស់ទ្រង់ដែលបានតែងតាំងឡើងដោយត្រឹមត្រូវ យើងសូមថ្លែងជាសក្ខីភាព—ថា ព្រះយេស៊ូវគឺជាព្រះគ្រីស្ទដ៏មានព្រះជន្មរស់ និងជាព្រះរាជបុត្រាអមតភាពរបស់ព្រះ ។ ព្រះអង្គគឺជាព្រះរាជាអេម៉ាញូអែលដ៏មហិមា ដែលសព្វថ្ងៃនេះគង់នៅខាងស្ដាំព្រះហស្ដនៃព្រះវរបិតារបស់ទ្រង់ ។ ព្រះអង្គគឺជាពន្លឺ ជាជីវិត ហើយជាសេចក្ដីសង្ឃឹមនៃពិភពលោក ។

ប្រធាន ដាល្លិន អេក អូក ( ឆ្នាំ២០០៦ ) ៖ ខ្ញុំសូមថ្លែងទីបន្ទាល់អំពីព្រះយេស៊ូវគ្រីស្ទ ជាព្រះអង្គសង្គ្រោះរបស់យើង ដែលទ្រង់អញ្ជើញយើងទាំងអស់គ្នាឲ្យមករកទ្រង់ ហើយបានល្អឥតខ្ចោះនៅក្នុងទ្រង់ ។ ទ្រង់នឹងព្យាបាលរបួសរបស់យើង ហើយទ្រង់នឹងសម្រាលបន្ទុកដ៏ធ្ងន់ ។

ប្រធាន ដាល្លិន អេក អូក ( ឆ្នាំ២០១៣ ) ៖ ការដើរតាមព្រះគ្រីស្ទពុំមែនជាការប្រព្រឹត្តដោយឥតខ្វល់ ឬម្ដងម្កាលនោះទេ ប៉ុន្តែជាការតាំងចិត្តឥតឈប់ឈរ ហើយអនុវត្តក្នុងមាគ៌ាជីវិតនៅគ្រប់ពេល និង គ្រប់ទីកន្លែង ។

ប្រធាន ដាល្លិន អេក អូក ( ឆ្នាំ២០២៥ ) ៖ « ខ្ញុំសូមថ្លែងទីបន្ទាល់ពីព្រះអម្ចាស់ព្រះយេស៊ូវគ្រីស្ទដែលជាព្រះរាជបុត្រាតែមួយគត់របស់ព្រះវរបិតាដ៏នៅអស់កល្បជានិច្ច ។ ទ្រង់អញ្ជើញយើងឲ្យដើរតាមមាគ៌ានៃសេចក្ដីសញ្ញា ដែលនាំទៅរកការជួបជុំគ្រួសារនៅស្ថានសួគ៌ ។ អំណាចបព្វជិតភាពនៃការផ្សារភ្ជាប់ដោយកូនសោទាំងឡាយដែលបានស្ដារឡើងវិញនៅក្នុងព្រះវិហារបរិសុទ្ធខឺតឡង់ នាំឲ្យក្រុមគ្រួសារជួបជុំសម្រាប់ភាពអស់កល្បជានិច្ច ។ បច្ចុប្បន្ននេះ កូនសោទាំងនោះកំពុងត្រូវបានអនុវត្តនៅក្នុងព្រះវិហារបរិសុទ្ធរបស់ព្រះអម្ចាស់ជាច្រើននៅលើទូទាំងពិភពលោក ។ ដំណឹងល្អនេះគឺពិត ។ សូមឲ្យយើងក្លាយជាផ្នែកមួយនៃដំណឹងល្អនេះ ។

ប្រធាន ដាល្លិន អេក អូក ( ឆ្នាំ២០២៥ ) ៖ ខ្ញុំដឹងយ៉ាងច្បាស់ជាងអ្វីៗទាំងអស់នៅក្នុងជីវិតរបស់ខ្ញុំថា នេះគឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ខ្ញុំសូមថ្លែងទីបន្ទាល់អំពីព្រះយេស៊ូវគ្រីស្ទ ដែលជាព្រះសិរសានៃសាសនាចក្រនេះ ហើយសូមឲ្យពរជ័យរបស់ទ្រង់មានដល់យើងទាំងអស់គ្នាដែលខិតខំបម្រើទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។

អែលឌើរ នែល អិល អាន់ឌើរសិន ថ្ងៃនេះ យើងចង់ពិភាក្សាអំពីការបង្រៀនដ៏មានអានុភាពមួយចំនួន ដែលយើងបានទទួលពីប្រធាន អូក ហើយយើងចង់គិតអំពីរបៀបដែលការបង្រៀនទាំងនេះអាចផ្តល់ពរជ័យដល់ជីវិតរបស់យើង ។ ហើយនៅក្នុងកន្លែងដ៏ពិសិដ្ឋនៃព្រះវិហារបរិសុទ្ធនេះ យើងក៏ចង់ពិភាក្សាអំពីរបៀបដែលដំណាក់របស់ព្រះអម្ចាស់នាំមកនូវអំណាច សេចក្តីសុខសាន្ត និងវិវរណៈនៅក្នុងពេលវេលាដ៏សំខាន់បំផុតនៃជីវិតរបស់បងប្អូន ។

ខេធី មានបទពិសោធន៍មួយនៅពេលនៃការប្រកាសសាងសង់ព្រះវិហារបរិសុទ្ធ វ៉ាស៊ីនតោន ឌី.ស៊ី. ដែលខ្ញុំចង់ឲ្យបងប្អូនស្ដាប់ពីគាត់ ។ សូមអញ្ជើញ ខេធី !

ស៊ីស្ទើរ ខេធី អាន់ឌើរសិន ៖ ព្រះវិហារបរិសុទ្ធ វ៉ាស៊ីនតោន ឌី.ស៊ី. គឺពិសេសណាស់ចំពោះខ្ញុំ ។ កាលខ្ញុំនៅក្មេង ខ្ញុំធំដឹងក្តីឡើងនៅរដ្ឋផ្លរីដា ដែលស្ថិតនៅភាគខាងត្បូងសហរដ្ឋអាមេរិក ហើយព្រះវិហារបរិសុទ្ធដែលនៅជិតយើងបំផុតមានចម្ងាយ ៣,៧០១ គីឡូម៉ែត្រ នៅក្នុងទីក្រុង សលត៍ លេក។

នៅពេលខ្ញុំមានអាយុបួនឆ្នាំ គ្រួសារខ្ញុំបានធ្វើដំណើរទៅទីក្រុង សលត៍ លេក ដើម្បីយើងអាចបានផ្សារភ្ជាប់ជាមួយគ្នាជាគ្រួសារ ។ នៅពេលខ្ញុំមានអាយុ១២ឆ្នាំ ព្រះវិហារបរិសុទ្ធ វ៉ាស៊ីនតោន ឌី.ស៊ី. ក៏ត្រូវបានប្រកាសពីការសាងសង់ ។ យើងរំភើបចិត្តខ្លាំងណាស់ដែលដឹងថា ឥឡូវនេះព្រះវិហារបរិសុទ្ធនៅឆ្ងាយពីយើងតែ ១,៤៤៨ គីឡូម៉ែត្រប៉ុណ្ណោះ ។

ខ្ញុំចាំបានយ៉ាងច្បាស់ថា នៅថ្ងៃអាទិត្យមួយនៅពេលប៊ីស្សពបានសុំឲ្យឪពុកម្តាយទាំងអស់ កុំអាលទៅផ្ទះបន្ទាប់ពីព្រះវិហារ ហើយមានការជួបប្រជុំគ្នាពិសេសមួយជាមួយគាត់ ។ ហើយកាលនៅក្មេង ខ្ញុំគ្រាន់តែងឿងឆ្ងល់—ហើយក៏រាងភ័យខ្លាចបន្តិច ខ្ញុំគិតថា ហេតុអ្វីបានជាប៊ីស្សពចង់ជួបជាមួយឪពុកម្តាយទាំងអស់ ។

ហើយនៅពេលពួកគាត់ចេញពីការប្រជុំ យើងបានឡើងឡានដើម្បីជិះទៅផ្ទះវិញ ហើយម៉ាក់ និងប៉ាខ្ញុំបានមាននិយាយមកកាន់ខ្ញុំថា « ប៊ីស្សពបានសុំ ហើយថ្នាក់ដឹកនាំសាសនាចក្របានស្នើសុំឲ្យបរិច្ចាគប្រាក់ដ៏ច្រើន សម្រាប់ការសាងសង់ព្រះវិហារបរិសុទ្ធ វ៉ាស៊ីនតោន ឌី.ស៊ី » ។

គ្រួសាររបស់ខ្ញុំពុំមានលុយច្រើនទេ ហើយការស្នើសុំឲ្យបរិច្ចាគនោះហាក់ដូចជាមានចំនួនច្រើនណាស់ ។ ប៉ុន្តែម៉ាក់ និងប៉ាបានមានប្រសាសន៍ថា « យើងនឹងត្រូវលះបង់របស់ខ្លះៗជាគ្រួសារទាំងមូលដើម្បីអាចបរិច្ចាគបាន ។ ប៉ុន្តែតើបងប្អូនអាចស្រមៃបានទេថា យើងនឹងមានពរខ្លាំងណាស់ដែលមានព្រះវិហារបរិសុទ្ធមួយ ដែលមានចម្ងាយត្រឹមតែ ១,៤៤៨ គីឡូម៉ែត្រពីយើងប៉ុណ្ណោះ ? ព្រះវិហារបរិសុទ្ធនេះជាកន្លែងមួយដ៏ពិសេសខ្លាំងណាស់ក្នុងចិត្តខ្ញុំ និងសម្រាប់គ្រួសារខ្ញុំ ។

អែលឌើរ នែល អិល អាន់ឌើរសិន ៖ សូមអរគុណ ! ល្អណាស់ ! អរគុណ ខេធី ។

ព្យាការី និងព្រះវិហារបរិសុទ្ធតម្រង់ទិសយើងឆ្ពោះទៅកាន់ព្រះអង្គសង្រ្គោះ ។ នៅក្នុងពិភពនៃភាពច្របូកច្របល់ ភាពភាន់ច្រឡំ និងមានការរំខានជាច្រើន ព្យាការី និងព្រះវិហារបរិសុទ្ធ រក្សាយើងឲ្យឈរនៅលើមូលដ្ឋានខាងវិញ្ញាណរបស់យើង ។

នៅពេលដែលពិភពលោកងាកចេញពីកន្លែងសម្រាកខាងវិញ្ញាណរបស់ខ្លួន ព្រះអម្ចាស់បញ្ជូនអំណាចជាជំនួយមកបងប្អូន ដែលជាសិស្សរបស់ទ្រង់ ។ ពរជ័យជាជំនួយដ៏អស្ចារ្យបំផុតចំនួនពីរសម្រាប់បុគ្គលសុចរិតគឺជាការបង្រៀនរបស់ព្យាការី និងអំណោយនៃដំណាក់របស់ព្រះអម្ចាស់ ។

ប្រធាន ដាល្លិន អេក អូក ត្រូវបានរក្សាការពារ រៀបចំ និងចម្រាញ់ជាងប្រាំបួនទសវត្សរ៍មកហើយ ។ នៅក្នុងសន្និសីទទូទៅមួយខែមុននេះ លោកបានមានប្រសាសន៍អំពីទុក្ខសោកដ៏ធំរបស់លោកកាលនៅអាយុ៧ឆ្នាំ នៅពេលដែលឪពុករបស់លោកបានទទួលមរណភាព ។ លោកធំឡើងដោយការចិញ្ចឹមបីបាច់ពីម្តាយមេម៉ាយ ដែលជាគ្រូបង្រៀននៅសាលារដ្ឋក្នុងមូលដ្ឋានមួយ ។

នៅក្នុងយុវវ័យរបស់លោក គំនិត និងស្មារតីរបស់លោកបានរីកដុះដាល ហើយលោកត្រូវបានទទួលឲ្យចូលរៀននៅក្នុងសាកលវិទ្យាល័យច្បាប់ដ៏មានកិត្តិនាមមួយនៅសហរដ្ឋអាមេរិក គឺសាកលវិទ្យាល័យ ឈីកាហ្គោ ។ លោកពូកែរហូតដល់ប្រធានតុលាការកំពូលរបស់សហរដ្ឋអាមេរិក ចៅក្រម អ៊ើល វ៉រិន ដែលកាន់ការិយាល័យតុលាការកំពូលនៅក្នុងប្រទេសទាំងមូលបានជ្រើសរើស ដាល្លិន អេក អូក ចេញពីសាលាច្បាប់ដើម្បីធ្វើជាជំនួយការ និងជាស្មៀនរបស់គាត់ ។

ការណ៍នេះបានចាប់ផ្តើមផ្លូវមួយដែលនឹងបង្ហាញដល់យុវជនដែលមានភាពវៃឆ្លាត និងសមត្ថភាពរូបនេះនូវឱកាសដ៏ធំនៅក្នុងពិភពលោក ។ ប្រធាន អូក មិនបណ្ដោយភាពចម្រុងចម្រើនផ្នែកហិរញ្ញវត្ថុ និងការសាទរខាងលោកិយនាំលោកចាកចេញពីផែនការរបស់ព្រះឡើយ ។

ផ្ទុយទៅវិញ លោកបានធ្វើតាមការបំផុសគំនិតដ៏ស្ងប់ស្ងាត់ៗទាំងនោះ នៅពេលដែលព្រះអម្ចាស់បានដឹកនាំលោក ។ លោកបានមានប្រសាសន៍ថា « ពេញមួយជីវិតរបស់ខ្ញុំ គ្រូបង្រៀនដ៏សំខាន់បំផុតរបស់ខ្ញុំ គឺជាព្រះសូរសៀងតូចរហៀង និងអារម្មណ៍ដែលទាក់ទងដោយព្រះវិញ្ញាណរបស់ព្រះអម្ចាស់ » ។ នៅអាយុ៣៨ឆ្នាំ លោកត្រូវបានហៅជាប្រធាន សាកលវិទ្យាល័យ ព្រិកហាំ យ៉ង់ ។

ខ្ញុំផ្ទាល់បានរៀនសូត្រ ទទួលការបង្ហាត់ និងទទួលឥទ្ធិពលពីប្រធាន អូក និងការបង្រៀនរបស់លោកអស់រយៈពេលជាង ៥០ ឆ្នាំមកហើយ ។ ទំនាក់ទំនងដំបូងរបស់ខ្ញុំជាមួយប្រធាន អូក បានកើតឡើងនៅពេលដែលខ្ញុំត្រឡប់ពីបេសកកម្មរបស់ខ្ញុំ ហើយពេលនោះលោកគឺជាប្រធានសាកលវិទ្យាល័យដ៏សកម្ម និងមានចក្ខុវិស័យរបស់ ប៊ី.វ៉ាយ.យូ. ។ លោកមានភាពកក់ក្តៅ និងជាមនុស្សរួសរាយរាក់ទាក់ និងជាទីគោរពស្រឡាញ់របស់និស្សិតទាំងឡាយ ។

នេះគឺជាឃ្លីបខ្លីមួយពីសុន្ទរកថាដែលលោកបានថ្លែងនៅឆ្នាំដែលខ្ញុំបានបញ្ចប់ការសិក្សា ។

ប្រធាន ដាល្លិន អេក អូក ( ឆ្នាំ១៩៧៥ ) ៖ ក្នុងកំឡុងឆ្នាំនោះ ខ្ញុំតែងតែទៅកន្លែងអាហារដ្ឋានមួយនៅក្នុងសាកលវិទ្យាល័យរបស់យើង យកថាសមួយ ហើយទទួលទានអាហារថ្ងៃត្រង់របស់ខ្ញុំដោយក្តីរីករាយជាមួយក្រុមនិស្សិតដែលគួរឲ្យភ្ញាក់ផ្អើលមួយចំនួន ។ ខ្ញុំយល់ឃើញថា នេះគឺជាឱកាសដ៏ល្អបំផុតមួយរបស់ខ្ញុំ ដើម្បីស្វែងយល់ពីអ្វីដែលនិស្សិតរបស់យើងគិត ។ កាលពីប៉ុន្មានឆ្នាំមុននារដូវស្លឹកឈើជ្រុះមួយ ខ្ញុំបានចូលទទួលទានអាហារជាមួយនិស្សិតចូលថ្មីម្នាក់នៅមជ្ឈមណ្ឌល ខេនណុន ។ ដោយពុំបានណែនាំខ្លួនខ្ញុំ ខ្ញុំចាប់ផ្តើមសួរក្រុមនោះអំពីបទពិសោធន៍ និងទស្សនៈរបស់ពួកគេចំពោះ ប៊ី.វ៉ាយ.យូ. ។ មិនយូរប៉ុន្មាន យុវជនម្នាក់ក្នុងចំណោមនោះ ហាក់ដូចជាមានការខឹងសម្បាបន្តិចជាមួយនឹងការស៊ើបសួរនេះ ពីមនុស្សចម្លែកម្នាក់បាននិយាយថា « តើលោកធ្វើការនៅទីនេះ ឬអី ? » ពេលខ្ញុំឆ្លើយថាខ្ញុំធ្វើការនៅទីនេះ គាត់បានសួរសំណួរមួយចំនួនរបស់គាត់ថា « តើលោកធ្វើអ្វី ? » ខ្ញុំបានឆ្លើយថា « ខ្ញុំជាប្រធាន » ។ ដោយមិនខ្វល់ពីអ្នកអង្គុយជិតកេះកួយដៃគាត់ទេ គាត់បានបន្តសួរទៀតថា « តើលោកជាប្រធានផ្នែកអ្វី ? » ខ្ញុំបានពន្យល់ ហើយយើងទាំងអស់គ្នាសើចក្អាកក្អាយជាមួយគ្នា ។ ក្រោយមកគាត់បានបន្ថែមមតិនេះថា ខ្ញុំមិនអាចបំភ្លេចបានឡើយ ។ គាត់បាននិយាយថា « អូ ខ្ញុំបានចូលរួមការប្រជុំទាំងអស់ ហើយខ្ញុំបានឃើញលោកនៅទីនោះ ប៉ុន្តែលោកនៅឆ្ងាយពេក ខ្ញុំមើលមិនឃើញមុខលោកទេ » ។

នៅពេលដែលនិស្សិតចូលថ្មីរូបនេះបានបញ្ចេញមតិនោះ ខ្ញុំបានសម្រេចចិត្តថា ពេលណាមួយខ្ញុំនឹងព្យាយាមជួយនិស្សិតរូបនោះឲ្យមើលឃើញមុខរបស់ខ្ញុំ ។ ការតាំងចិត្តនោះកាន់តែជាក់ច្បាស់នៅពេលក្រោយមក នៅពេលដែលខ្ញុំបានប្រាប់និស្សិតរូបនោះថា ភរិយា និងកូនៗខ្ញុំ និងខ្ញុំបានបោះជំរុំជាច្រើន ហើយជាក់ស្តែងបានដេកនៅក្នុងតង់របស់យើង ដោយដេកនៅលើដីនៅក្នុងរដ្ឋម្ភៃប្រាំផ្សេងគ្នារបស់សហរដ្ឋ ។ គាត់មិនជឿឡើយ ! គាត់បានសួរថា « តើលោកពិតជាធ្វើអ៊ីចឹងមែនឬ ? ខ្ញុំមិនអាចស្រមៃថា ប្រធានមួយរូបធ្វើអ្វីបែបអ៊ីចឹងទេ » ។

ជាថ្មីម្តងទៀត ខ្ញុំត្រូវបានរំឭកថា តួនាទីជាប្រធាន និងចម្ងាយនៃការិយាល័យគឺឆ្ងាយខ្លាំងណាស់ ដែលមនុស្សភាគច្រើនមិនជឿថា គ្រួសារខ្ញុំ និងខ្ញុំអាចធ្វើបាននោះទេ ។ សូម្បីតែកូនៗរបស់ខ្ញុំក៏មានអារម្មណ៍ថាឆ្ងាយដែរ បន្ទាប់ពីពួកគេបានឃើញខ្ញុំអង្គុយនៅលើវេទិកាឡើងថ្លែងសក្ខីភាពរបស់ខ្ញុំ ។ កូនស្រីច្បងម្នាក់ក្នុងចំណោមកូនស្រីច្បងទាំងពីររបស់ខ្ញុំបាននិយាយថា « ប៉ា ប៉ាមើលទៅមុខក្រញូវណាស់ ។ បើកូនមិនបានស្គាល់ប៉ាទេ កូនគិតថា ប៉ាខឹងហើយ » ។ ពាក្យនេះរំឭកខ្ញុំថា មានតែអ្នកដែលជិតស្និទ្ធនឹងខ្ញុំបំផុតប៉ុណ្ណោះដែលបានឮខ្ញុំសើច ឬដឹងថាខ្ញុំមានភាពសប្បាយរីករាយដែលមានចរិតល្អ ទោះបីជាស្ថិតក្នុងស្ថានភាពដែលមានភាពតានតឹងខ្លាំងក៏ដោយ ។ ខ្ញុំចង់ដោះស្រាយបញ្ហានេះតាំងពីខ្ញុំនៅជាគ្រូបង្រៀនមកម្ល៉េះ ហើយវាមិនមែនជារឿងឈ្លាសវៃទេសម្រាប់គ្រូបង្រៀនដែលមិនសូវមានភាពជិតស្និទ្ធជាមួយនឹងសិស្សនោះ ។ វាជាការសំខាន់ណាស់ដែលបងប្អូនមើលឃើញមុខខ្ញុំ ដូចខ្ញុំព្យាយាមមើលមុខបងប្អូនដែរ ។

អែលឌើរ នែល អិល អាន់ឌើរសិន ៖ ខណៈនៅ ប៊ី.វ៉ាយ.យូ. តាមរយៈព្រឹត្តិការណ៍ជាបន្តបន្ទាប់មួយ ខ្ញុំអាចមានទំនាក់ទំនងដោយផ្ទាល់ជាមួយនឹងលោក ។ ខ្ញុំបានដកពិសោធសេចក្តីជំនឿរបស់លោក និងអារម្មណ៍នៃភាពយុត្តិធម៌ ការគិតគូរ និងចំណាប់អារម្មណ៍របស់លោកចំពោះបុគ្គលម្នាក់ៗ ។ លោកនឹងចូលរួមពិធីមង្គលការរបស់និស្សិតជាច្រើននៅសាកលវិទ្យាល័យ តាមដែលលោកអាចធ្វើបាន ។

លោកបានចូលរួមជាមួយស៊ីស្ទើរ ជូន អូក នៅឯពិធីទទួលទានអាហារនៅពិធីមង្គលការរបស់យើង ។ គួរឲ្យចាប់អារម្មណ៍ ការណ៍នេះបានកើតឡើងនៅពីរបីសប្តាហ៍ពីមុនកូនទីប្រាំមួយរបស់ប្រធាន អូក បានកើត គឺជេននី អូក បាកឃឺ ជាអ្នកលេងវីយូឡុងដ៏មានប្រជាប្រិយភាពម្នាក់ ។

បន្ទាប់ពី ប៊ី.វ៉ាយ.យូ. ខ្ញុំបានរៀនពីសុន្ទរកថា និងការបង្រៀនរបស់លោក ។ ប៉ុន្តែ១៦ឆ្នាំក្រោយមក ក្នុងឆ្នាំ១៩៩១ ក្នុងនាមជាសមាជិកម្នាក់ក្នុងកូរ៉ុមនៃពួកដប់ពីរនាក់ ការចាត់តាំងរបស់លោកបាននាំលោកទៅទីក្រុងបូរដូ ប្រទេសបារាំង ជាកន្លែងដែលខ្ញុំកំពុងបម្រើជាប្រធានបេសកកម្ម ។

ក្នុងរយៈពេល៣២ឆ្នាំរបស់ខ្ញុំ ក្នុងនាមជាអ្នកមានសិទ្ធិអំណាចទូទៅ ខ្ញុំក៏ដូចជាបងប្អូនប្រុសរបស់ខ្ញុំដែរ បានទទួលពរដោយសារឆន្ទៈរបស់លោកក្នុងការបង្រៀនខ្ញុំ ស្តាប់ខ្ញុំ និងចែកចាយប្រាជ្ញាដ៏អស្ចារ្យរបស់លោកជាមួយខ្ញុំ ។ នេះគឺជារូបថតរបស់ប្រធាន និងស៊ីស្ទើរ គ្រីស្ទិន អូក ជាមួយ ខេធី និងខ្ញុំនៅអាមេរិកឡាទីនកាលពីប៉ុន្មានឆ្នាំមុន ។

នៅក្នុងជន្មាយុ៩៣ឆ្នាំនៃជីវិតរបស់ប្រធាន អូក លោកសម្រេចសមិទ្ធផលដ៏មហិមាជាច្រើន ហើយក៏ជួបនូវទុក្ខលំបាក និងការខកចិត្តជាច្រើនដែរ ។ ខ្ញុំស្គាល់លោកកាលខ្ញុំនៅក្នុងក្រុមចិតសិបនាក់ ហើយលោកនៅក្នុងក្រុមដប់ពីរនាក់ នៅពេលភរិយារបស់លោក គឺស៊ីស្ទើរ ជូន អូក បានទទួលមរណភាពកាលពី ២៧ ឆ្នាំមុន ។ ខ្ញុំបានមើលឃើញការឈឺចាប់ និងទុក្ខលំបាករបស់លោកអស់ជាច្រើនខែបន្ទាប់ពីនោះ ។ ដើម្បីគោរពដល់ ជូន ជាទីស្រឡាញ់របស់លោក លោកបានសរសេរសៀវភៅដ៏គួរឲ្យចាប់អាមរ្មណ៍មួយអំពីជីវិតរបស់គាត់ និងសេចក្តីស្រឡាញ់ និងការឆ្លុះបញ្ចាំងពីគាត់ ដើម្បីចែកចាយជាមួយក្រុមគ្រួសាររបស់លោក ។

រហូតដល់ពីរឆ្នាំក្រោយមក ដែលលោកបានបើកបេះដូងរបស់លោក ហើយបានជួបនឹងស៊ីស្ទើរ គ្រីស្ទិន ម៉ាកម៉េន ។ គាត់បាននាំមកនូវក្តីស្រឡាញ់ និងសុភមង្គលដ៏ធំដល់ជីវិតរបស់លោកអស់រយៈពេល២៥ឆ្នាំមកហើយ ។ ខេធី តើអូនចង់បន្ថែមអ្វីអំពីស៊ីស្ទើរ គ្រីស្ទិន អូក ដ៏អស្ចារ្យដែរទេ ?

ស៊ីស្ទើរ ខេធី អាន់ឌើរសិន ៖ ខ្ញុំចង់និយាយអ្វីមួយអំពីស៊ីស្ទើរ អូក ។ ខ្ញុំស្រឡាញ់ស៊ីស្ទើរ គ្រីស្ទិន អូក ។ ហើយបើបងប្អូនមិនស្គាល់គាត់នៅឡើយទេ បងប្អូនក៏នឹងស្រឡាញ់គាត់ដែរ ។ ស្វាមីខ្ញុំបានមកផ្ទះពីរបីថ្ងៃមុន ហើយខ្ញុំបាននិយាយថា « តើបងមានបានឃើញវីដេអូរបស់ប្រធាន និងស៊ីស្ទើរ អូក ឬទេ ? »

ហើយគាត់ថា—ខ្ញុំមិនដឹងថាតើបងបានប្រាប់ខ្ញុំ ឬអត់នោះទេ—ប៉ុន្តែខ្ញុំបាននិយាយថា « មែនហើយ វាអស្ចារ្យណាស់ ហើយយុវមជ្ឈិមវ័យនឹងចូលចិត្តវីដេអូនេះណាស់ » ។ ហើយគាត់បាននិយាយថា « មែនហើយ យុវមជ្ឈិមវ័យប្រហែលជាបានឃើញវីដេអូនេះហើយ » ។

ខ្ញុំបាននិយាយថា « វាមិនសំខាន់ទេ ។ ពួកគេនឹងចូលចិត្តមើលវីដេអូនេះម្តងទៀត ព្រោះខ្ញុំចូលចិត្តមើលវាជារៀងរាល់ថ្ងៃ ។ វាល្អណាស់ » ។ ដូច្នោះគាត់ក៏បានឯកភាព ។

ប្រធាន ដាល្លិន អេក អូក ៖ តើអូនឲ្យពួកគាត់និយាយរឿងនេះមែនទេ ?

ស៊ីស្ទើរ គ្រីស្ទិន អូក ៖ ខ្ញុំមិនបានឲ្យពួកគាត់និយាយរឿងនេះទេ ។

ប្រធាន ដាល្លិន អេក អូក ៖ នៅថ្ងៃខួបកំណើតរបស់អូន បងចង់អរគុណអូនដែលធ្វើឲ្យបងសប្បាយរីករាយ ធ្វើឲ្យបងក្លាយជាបុរសល្អជាងមុន និងជាអ្នកដឹកនាំសាសនាចក្រដែលមានការយល់ដឹងកាន់តែប្រសើរ និងជាជីតា និងជីតាទួត និងជីតាលាដែលប្រសើរជាងមុន ។ យើងមានចៅ២៩នាក់ និងចៅទួត៧៥នាក់ ហើយមានចៅលាពីរតែនៅពេលឆាប់ៗនេះ—នឹងមានចៅលាចំនួនបីនាក់ ។ នេះគឺជាស្រ្តីដែលកាលពីនៅអាយុ២៨ឆ្នាំ ដឹកនាំក្រុមមនុស្សជាច្រើន ។

ស៊ីស្ទើរ ស៊ីស្ទើរ គ្រីស្ទិន អូក ៖ ហើយខ្ញុំមានអភ័យឯកសិទ្ធិខ្លាំងណាស់ ។ ខ្ញុំគិតថាអ្វីដែលអស្ចារ្យបំផុតសម្រាប់ខ្ញុំ គឺការដែលអាចមានគ្រួសារ និងមានគ្រួសារដ៏ស្និទ្ធស្នាលមួយ និងធ្វើជាភរិយារបស់បង ។

ប្រធាន ដាល្លិន អេក អូក ៖ អរគុណ !

ស៊ីស្ទើរ គ្រីស្ទិន អូក ៖ ខ្ញុំតែងតែប្រាប់គាត់ថា គាត់គឺជាមនុស្សដែលខ្ញុំចូលចិត្តបំផុតនៅក្នុងពិភពលោកនេះ ។

ប្រធាន ដាល្លិន អេក អូក ៖ ហើយគាត់ជាកម្មសិទ្ធិរបស់ខ្ញុំ ។

ស៊ីស្ទើរ ខេធី អាន់ឌើរសិន ៖ តើបងមិនចូលចិត្តទេឬអី ? តើវាមិនល្អទេឬ ? ស៊ីស្ទើរ គ្រីស្ទិន គឺជាសិស្សរបស់ព្រះយេស៊ូវគ្រីស្ទដ៏ស្មោះស្ម័គ្រ ។ ជីវិតរបស់គាត់ពោរពេញដោយសេចក្តីជំនឿ និងសេចក្តីស្រឡាញ់ ។ គាត់មានចិត្តទន់ភ្លន់ ហើយខ្ញុំគិតថា គាត់គឺជាទេវតាដ៏គួរឲ្យស្រឡាញ់នៅលើផែនដី ។

អែលឌើរ នែល អិល អាន់ឌើរសិន ៖ ខ្ញុំមានអំណរគុណខ្លាំងណាស់ដែលព្រះអម្ចាស់បានការពារថែរក្សា ដាល្លិន ហារីស អូក ឆ្លងកាត់ជាច្រើនទសវត្សរ៍មកនេះ ដោយបង្រៀនលោក បង្ហាត់លោក និងរៀបចំលោកសម្រាប់ឆ្នាំចុងក្រោយនៃជីវិតរបស់លោក ។

កាលពីលោកនៅក្មេង លោកបានបង្កើតបាវចនាផ្ទាល់ខ្លួនមួយ ដែលថា ៖ « ចូរស្វែងរកនគរនឹងសេចក្ដីសុចរិតនៃព្រះជាមុនសិន ទើបគ្រប់របស់ទាំងនោះ នឹងបានប្រទានមកអ្នករាល់គ្នាថែមទៀតផង » ។

ការណ៍នេះលោកបានធ្វើដោយមិនគិតពីកិត្យានុភាព ឬទ្រព្យសម្បត្តិនៃលោកិយនោះទេ ។ ព្រះអម្ចាស់បានផ្លាស់ប្តូរដួងចិត្តរបស់លោក ហើយនឹងប្រើលោកដើម្បីជួយផ្លាស់ប្តូរយើងម្នាក់ៗ នៅពេលលោកបម្រើជាព្យាការីរបស់ព្រះនៅលើផែនដី ។

ដើម្បីជួយបងប្អូនយល់ពីព្យាការីរបស់យើង រូបគំនូរដ៏ទាក់ទាញនេះដែល មេណើដ ឌីហ្សុន បានព្យួរនៅក្នុងការិយាល័យរបស់គាត់អស់ជិត៤០ឆ្នាំ ។ ចំណងជើងរបស់វាគឺ « Forgotten Man [ បុរសដែលគេបំភ្លេចចោល ] » ។

ផ្ទាំងគំនូរនេះបង្ហាញពីបុរសម្នាក់កំពុងអង្គុយបាក់ទឹកចិត្តនៅលើខឿនផ្លូវ ។ មនុស្សនៅជុំវិញគាត់មិនបានចាប់អារម្មណ៍ទៅលើគាត់ឡើយ ។

ប្រធាន អូក ស្រឡាញ់បុត្រា និងបុត្រីរបស់ព្រះគ្រប់ៗរូប ហើយរូបគំនូរនេះបានរំឭកលោកថា លោកត្រូវតែទៅជួយដល់អស់អ្នកដែលមានអារម្មណ៍ឯកោ បាក់ទឹកចិត្ត ដែលត្រូវការដឹងពីតម្លៃផ្ទាល់ខ្លួនរបស់ពួកគេ និងសេចក្តីស្រឡាញ់របស់ព្រះវរបិតាសួគ៌របស់ពួកគេ ។

ប្រធាន អូក បានចង្អុលបង្ហាញថា ខណៈដែលបុរសនៅក្នុងរូបគំនូរនេះមានអារម្មណ៍ត្រូវគេបំភ្លេច តែព្រះអាទិត្យដែលកំពុងរះលើក្បាលរបស់គាត់បញ្ជាក់ថា ព្រះវរបិតាសួគ៌ទ្រង់ជ្រាបពីការពុះពាររបស់គាត់ ។ ប្រធាន អូក បានមានប្រសាសន៍ថា រូបគំនូរនេះមានសារៈសំខាន់ណាស់ចំពោះលោក ហើយរំឭកលោកអំពីអ្វីដែលលោកត្រូវចងចាំ ។ ខ្ញុំស្រឡាញ់ដួងចិត្តរបស់ប្រធាន ដាល្លិន អេក អូក ។

ជាមួយយុវមជ្ឈិមវ័យរបស់យើងនៅទីនេះនៅក្នុងទីក្រុង វ៉ាស៊ីនតោន ឌី.ស៊ី. យើងបានពិភាក្សាអំពីប្រធានបទសំខាន់ៗចំនួនបី ដែលប្រធាន អូក បានលើកឡើងជាញឹកញាប់ ។ ប៉ុន្តែជាដំបូង សូមស្វាគមន៍ចំពោះការបង្ហាញសេចក្ដីស្រឡាញ់មួយទៀតចំពោះប្រធាន អូក មកពីយុវមជ្ឈិមវ័យនៅជុំវិញពិភពលោក ។

ក្រុមយុវមជ្ឈិមវ័យមកពីហាវៃ ៖ អាឡូហា ប្រធាន និងស៊ីស្ទើរ អូក ! យើងមានអំណរគុណយ៉ាងខ្លាំងចំពោះគំរូដែលលោកទាំងពីរបង្ហាញដល់ពួកយើង និងសាសនាចក្រ ។ ពួកយើងស្រឡាញ់ និងគាំទ្រប្រធាន ។

ក្រុមយុវមជ្ឈិមវ័យមកពី អ័ហ្គឌិន យូថាហ៍ ៖ ជម្រាបសួរពីអ័ហ្គឌិន យូថាហ៍ ។ ប្រធាន អូក ពួកយើងមានអំណរគុណយ៉ាងខ្លាំងចំពោះដំបូន្មានរបស់លោក ជាពិសេសអំពីភាពតម្កើងឡើងដែលទាក់ទងនឹងគ្រួសារ ។ ពួកយើងស្រឡាញ់ប្រធាន និងគាំទ្រប្រធាន ។

យុវមជ្ឈិមវ័យមកពីរ៉ូម អ៊ីតាលី ៖ ជម្រាបសួរប្រធាន អូក ។ ពួកយើងសូមផ្ញើសេចក្តីស្រឡាញ់របស់យើងពីទីក្រុងរ៉ូម ប្រទេសអ៊ីតាលី ។ ពួកយើងស្រឡាញ់ការបង្រៀនរបស់លោកអំពីគ្រួសារដ៏នៅអស់កល្បជានិច្ច ហើយពួកយើងទន្ទឹងរង់ចាំជួបប្រធាននៅទីនេះក្នុងទីក្រុងអ៊ីធើណល ។ ជម្រាបលា ! ពួកយើងស្រឡាញ់បងប្អូន !

អែលឌើរ នែល អិល អាន់ឌើរសិន ៖ ប្រធានបទរបស់យើងនៅថ្ងៃនេះគឺទីមួយ ការឈរការពារសេចក្តីពិត ។ ទីពីរ គ្រួសារ អាពាហ៍ពិពាហ៍ និងកូនចៅ ហើយទីបី គឺជាវិវរណៈ ។