អាពាហ៍ពិពាហ៍ គ្រួសារ និងកូនៗ
អែលឌើរ នែល អិល អាន់ឌើរសិន ៖ ពួកយើងទាំងអស់គ្នាមានការរំជួលចិត្តយ៉ាងខ្លាំងចំពោះសារលិខិតរបស់ប្រធាន អូក នៅក្នុងសន្និសីទទូទៅចុងក្រោយនេះ ។ លោកបានមានប្រសាសន៍ដោយអំណាចដ៏អស្ចារ្យអំពីគ្រួសារ អាពាហ៍ពិពាហ៍ និងកូនចៅ ។ បងប្អូនចាំនៅពេលលោកមានប្រសាសន៍ថា « ពេលខ្លះ សាសនាចក្រនៃព្រះយេស៊ូវគ្រីស្ទ ត្រូវបានស្គាល់ច្បាស់ថាជាសាសនាចក្រដែលផ្ដោតលើក្រុមគ្រួសារ ។ ហើយវាជាការពិត ! » សូមទស្សនាវីដេអូខ្លីនេះ និងការពិភាក្សារបស់យើងជាមួយយុវមជ្ឈិមវ័យ ។
ប្រធាន ដាល្លិន អេក អូក ( ឆ្នាំ២០២៥ ) ៖ ទំនាក់ទំនងរបស់យើងជាមួយព្រះ និងគោលបំណងនៃជីវិតរមែងស្លាប់របស់យើងគឺត្រូវបានពន្យល់នៅក្នុងពាក្យថា ក្រុមគ្រួសារ ។ … វាជាការសំខាន់ណាស់ដែលពួកបរិសុទ្ធថ្ងៃចុងក្រោយ នឹងមិនបាត់បង់ការយល់ដឹងរបស់ខ្លួនអំពីគោលបំណងនៃអាពាហ៍ពិពាហ៍ និងតម្លៃនៃកូនចៅ ។ នោះគឺជាអនាគតដែលយើងខិតខំព្យាយាមរក្សា ។
គោលលទ្ធិនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយផ្ដោតលើក្រុមគ្រួសារ ។
យើងជាសាសនាចក្រដែលផ្តោតលើគ្រួសារ ។
ប្រធាន ដាល្លិន អេក អូក ( ឆ្នាំ២០២៣ ) ៖ អាពាហ៍ពិពាហ៍គឺជាចំណុចសំខាន់នៃគោលបំណងនៃជីវិតរមែងស្លាប់ និងអ្វីដែលមានបន្ទាប់មកទៀត ។ យើងជាបុត្រាបុត្រីនៃព្រះវរបិតាសួគ៌ដែលពេញដោយក្តីស្រឡាញ់ ដែលបានបង្កើតយើងឲ្យមានសមត្ថភាពដើម្បីធ្វើតាមព្រះបញ្ញត្តិរបស់ទ្រង់ គឺការបង្កើតកូនឲ្យចម្រើនជាច្រើនឡើង ឲ្យមានពេញពាសលើផែនដី ។ ព្រះចេស្តានៃការបង្កបង្កើតនោះគឺជាអំណោយទានដ៏មានតម្លៃបំផុតមួយដែលយើងមាននៅក្នុងជីវិតរមែងស្លាប់ ។ ប៉ុន្តែចំណុចសំខាន់នៃអំណោយទាននោះគឺច្បាប់ព្រហ្មចារីភាព ដែលជាបទបញ្ញត្តិដែលអំណាចនៃការបង្កកំណើតរបស់យើងត្រូវបានបង្ហាញតែក្នុងចំណងអាពាហ៍ពិពាហ៍រវាងបុរសម្នាក់ និងស្ត្រីម្នាក់ប៉ុណ្ណោះ ។ …
សូមពិចារណាអំពីអ្វីដែលពួកបរិសុទ្ធថ្ងៃចុងក្រោយវ័យក្មេងខកខាន នៅពេលពួកគេពន្យារពេលរៀបអាពាហ៍ពិពាហ៍ ដោយចេតនាក្នុងរយៈពេលដ៏សំខាន់នេះ ៖ បាត់បង់ឱកាស ហើយពរជ័យត្រូវបានពន្យារពេល ។ ការណ៍នេះមានន័យថា ការលូតលាស់ផ្ទាល់ខ្លួនដ៏សំខាន់ដែលកើតឡើងនៅក្នុងចំណងអាពាហ៍ពិពាហ៍រវាង បុរស និងស្រ្តី ស្វាមី និងភរិយាត្រូវបានពន្យារពេល ការរីកចម្រើនក្នុងគុណសម្បត្តិដូចជាការលះបង់ និងការបន្ទាបខ្លួនជាដើម ។ វាមានន័យថា បានកាត់បន្ថយឱកាសដើម្បីធ្វើការរួមគ្នាដើម្បីស្ថាបនានគររបស់ព្រះ ។ ហើយការណ៍សំខាន់បំផុត នោះមានន័យថា មានក្មេងៗតិចតួចដែលកើតមកហើយធំឡើងដោយពរជ័យទាំងឡាយនៃដំណឹងល្អ ។
សូមចាំថា ព្រះវរបិតាសួគ៌ដែលពេញដោយក្តីស្រឡាញ់មានផែនការមួយសម្រាប់យុវមជ្ឈិមវ័យរបស់ទ្រង់ ហើយផ្នែកមួយនៃផែនការនោះគឺអាពាហ៍ពិពាហ៍ និងកូនៗ ។
អែលឌើរ នែល អិល អាន់ឌើរសិន ៖ តើបងប្អូនអាចជឿទេថា នេះគឺជាកន្លែងដ៏ស្រស់ស្អាតនៅចំទេសភាពដ៏ល្បីបំផុតនៃព្រះវិហារបរិសុទ្ធ វ៉ាស៊ីនតោន ឌី.ស៊ី. ? ហើយយើងនៅទីនេះដើម្បីនិយាយអំពីក្រុមគ្រួសារ អំពីអាពាហ៍ពិពាហ៍ និងអំពីកូនចៅ ។
ហើយយើងអញ្ជើញ ម៉ាក និង នីកូល ដែលបានរៀបការហើយឲ្យចូលរួមជាមួយយើង ។ ហើយយើងក៏មាននៅខាងនេះ គ្រីស និង លីនស៊ី ដែលបានរៀបការហើយផងដែរ ។ តើបងប្អូនបានគិតដល់អ្វី នៅពេលបងប្អូនបានស្ដាប់ប្រធាន អូក មានប្រសាសន៍នៅសន្និសីទចុងក្រោយនេះ ?
ម៉ាក ៖ ខ្ញុំមានអំណរគុណយ៉ាងខ្លាំងចំពោះប្រធាន អូក និងការបង្រៀនរបស់លោកអំពីសារៈសំខាន់នៃគ្រួសារ ។ ខ្ញុំគិតថា សម្រាប់ខ្ញុំផ្ទាល់ និងសម្រាប់នីកូល ការរៀបការជាមួយនីកូល គឺជាពរជ័យដ៏មានតម្លៃបំផុតនៅក្នុងជីវិតរបស់ខ្ញុំ ។ និងការមានគ្រួសារផងដែរ ។ យើងមានកូនប្រុសអាយុបីឆ្នាំម្នាក់គឺ ហេណុក ។
នីកូល ៖ ខ្ញុំមានអំណរគុណយ៉ាងខ្លាំងចំពោះការបង្រៀនរបស់ព្យាការី និងពួកសាវកអំពីសារៈសំខាន់នៃគ្រួសារ ។ ខ្ញុំគិតថា នៅក្នុងកិច្ចការប្រចាំថ្ងៃរបស់យើង វាអាចជាការលំបាកក្នុងការព្យាយាមគិតមើល ថាតើជីវិតរបស់យើងជាមួយអាជីព និងគ្រួសារនោះមានលក្ខណៈបែបណាផងដែរ ។ ខ្ញុំដឹងសម្រាប់ខ្ញុំ ខ្ញុំដឹងថាខ្ញុំចង់បន្តការសិក្សាថ្នាក់បណ្ឌិត ហើយខ្ញុំក៏ចង់មានគ្រួសារមួយផងដែរ ។ ហើយផ្លូវដើម្បីធ្វើរឿងទាំងពីរនេះមិនងាយសម្រាប់ខ្ញុំទេ ។ ហើយ ម៉ាក និងខ្ញុំបានចំណាយពេលជាច្រើនតមអាហារ និងអធិស្ឋាន ហើយទៅព្រះវិហារបរិសុទ្ធ ដើម្បីព្យាយាមរៀនពីរបៀបធ្វើឲ្យរឿងទាំងពីរមានតុល្យភាព ។ ហើយយើងបានទទួលអារម្មណ៍បំផុសគំនិតថា ប្រសិនបើយើងរើសគ្រួសារជាចម្បង នោះអ្វីៗនឹងដំណើរការទៅមុខ ។
ហើយយើងមិនដឹងថាពេលខ្លះ ពីមួយខែទៅមួយខែ ថាតើរឿងទាំងនោះនឹងទៅជាយ៉ាងណានោះទេ ប៉ុន្តែវាបានដំណើរការទៅមុខ ។ ហើយខ្ញុំមានទីបន្ទាល់យ៉ាងមុតមាំអំពីសារៈសំខាន់នៃគ្រួសារ និងរើសគ្រួសារធ្វើជាអាទិភាព ។
អែលឌើរ នែល អិល អាន់ឌើរសិន ៖ អ៊ីចឹង លីនស៊ី សូមប្រាប់យើងអំពីការរៀបការជាមួយ គ្រីស ។
លីនស៊ី ៖ ពួកយើងបានរៀបការនៅព្រះវិហារបរិសុទ្ធនេះ ។ ហើយការអាចផ្សារភ្ជាប់ជាមួយគ្រីស មនុស្សម្នាក់ដែលអស្ចារ្យ និងផ្អែមល្ហែមដូចជាគ្រីស គឺជាពរជ័យដ៏អស្ចារ្យដែលគ្រាន់តែដឹងថា យើងនៅជាមួយគ្នា ប៉ុន្តែវាក៏មិនមែនត្រឹមតែយើងពីរនាក់ដែរ ថាយើងគឺជាគ្រួសារមួយ ហើយយើងផ្តោតលើព្រះគ្រីស្ទ ហើយទោះជាបញ្ហាអ្វីក៏ដោយដែលកើតឡើងចំពោះយើង មិនថាការសងប្រាក់កម្ចីសិស្ស ឬស្វែងរក ឬបង្កើតអាជីពនោះទេ ពួកយើងដឹងថា យើងធ្វើកិច្ចការនេះជាមួយគ្នាដោយមានព្រះគ្រីស្ទគង់នៅជាមួយ ។
គ្រីស ៖ ប្រហែលជាយើងរៀបការនៅពេលអាយុច្រើន ប៉ុន្តែខ្ញុំគិតថា វាមិនមែនដោយសារយើងមិនចង់រៀបការនោះទេ ។ ខ្ញុំគិតថា ព្រះអម្ចាស់មានពេលវេលាសម្រាប់អ្វីៗគ្រប់យ៉ាង ហើយខ្ញុំគិតថាយើងទាំងពីរនាក់ស្មោះត្រង់ និងមានទំនុកចិត្តថា ព្រះអម្ចាស់មានផែនការសម្រាប់ពួកយើង ។ ហើយប្រសិនបើយើងខិតខំកាន់តាមបទបញ្ញត្តិរបស់ទ្រង់ នៅទីបំផុត នោះពេលវេលារបស់យើងនឹងមកដល់ ។
អែលឌើរ នែល អិល អាន់ឌើរសិន ៖ យើងអញ្ជើញ អ៊ីថិន, ចយ, អូលីវ៉ា, ហ្សេក, ស៊ូមីតា, លីនស៊ី និង ខេសុន ចូលរួមជាមួយយើង ។ ហើយយើងនឹងនិយាយបន្តិចអំពីពាក្យទាំងបីនេះ ៖ គ្រួសារ អាពាហ៍ពិពាហ៍ កូនចៅ ។
ខេសុន ៖ ខ្ញុំគិតថាមានមនុស្សជាច្រើនដែលមានស្ថានភាពគ្រួសារខុសៗគ្នា ។ ហើយខ្ញុំមានអារម្មណ៍ថា មានពរជ័យដោយផ្ទាល់ ដែលមានគ្រួសារដែលបានផ្តល់ឲ្យខ្ញុំនូវការណែនាំជាច្រើន ទិសដៅជាច្រើន គោលបំណង អត្តសញ្ញាណ អារម្មណ៍សុវត្ថិភាព ។
ខ្ញុំចូលចិត្តគិតពិចារណាពីពរជ័យទាំងអស់ ដែលខ្ញុំបានទទួលក្នុងការធ្វើជាផ្នែកនៃគ្រួសារខ្លួនឯង ហើយបានឃើញបងប្អូនប្រុសស្រីខ្ញុំ និងក្រុមគ្រួសាររបស់ពួកគេ ហើយថាតើជីវិតគ្រួសារអាចអស្ចារ្យប៉ុនណា ។ ខ្ញុំស្គាល់មនុស្សជាច្រើន ។ ខ្ញុំដឹងថាគ្មានគ្រួសារណាល្អឥតខ្ចោះនោះទេ ប៉ុន្តែមានច្រើន—នៅពេលដែលបងប្អូនបានភ្លក់នូវភាពរីករាយដែលអាចមាននៅក្នុងគ្រួសារ វាអាចជំរុញបងប្អូនឲ្យចង់មានគ្រួសារផងដែរ ។
ស៊ូមីតា ៖ ខ្ញុំមិនទាន់រៀបការទេ ប៉ុន្តែខ្ញុំចង់ការរៀបការនៅព្រះវិហារបរិសុទ្ធ ។ ខ្ញុំដឹងថា អាពាហ៍ពិពាហ៍គឺសំខាន់ចំពោះផែនការរបស់ព្រះ ហើយដំណឹងល្អនោះផ្ទាល់បង្រៀនយើង វាផ្តល់ពរដល់យើង ហើយលើកតម្កើងយើងដ៏នៅអស់កល្បជានិច្ច ។ ពេលខ្លះយើងចង់ឲ្យអ្វីៗដំណើរការទៅមុខ ប៉ុន្តែវាមិនបានសម្រេច ។
ប៉ុន្តែអ្វីដែលខ្ញុំបានរៀននៅក្នុងជីវិតរបស់ខ្ញុំ គឺការមានសេចក្តីជំនឿលើពេលវេលារបស់ព្រះ ។ ហើយខ្ញុំដឹងថា ទ្រង់មានផែនការសម្រាប់យើងម្នាក់ៗ ហើយទ្រង់ស្គាល់យើង ហើយស្រឡាញ់យើងម្នាក់ៗ ។ ហើយមិនថាវាត្រូវចំណាយពេលយូរប៉ុនណានោះទេ សូមទុកចិត្តលើទ្រង់ ។
ហើយរឿងទីពីរដែលខ្ញុំបានរៀន គឺរៀបចំខ្លួនខ្ញុំខាងវិញ្ញាណ និងផ្ទាល់ខ្លួន ។ ការរៀបចំខ្លួនសម្រាប់អាពាហ៍ពិពាហ៍ដ៏នៅអស់កល្បជានិច្ច មិនចាប់ផ្ដើមនៅពេលដែលបងប្អូនរកឃើញដៃគូនោះទេ ។ បងប្អូនអាចចាប់ផ្តើមដំណើរផ្ទាល់ខ្លួនរបស់បងប្អូនឥឡូវនេះ ។
អែលឌើរ នែល អិល អាន់ឌើរសិន ៖ ឥឡូវនេះ ចយ ខ្ញុំសង្ឃឹមថាប្អូនមិនប្រកាន់នឹងខ្ញុំនិយាយអំពីរឿងនេះទេ ។ ប្អូនបានចូលរួមសាសនាចក្រកាលពីប៉ុន្មានឆ្នាំមុន បន្ទាប់ពីបានឆ្លងកាត់អាពាហ៍ពិពាហ៍ដ៏សោកសៅមួយ ។ តើប្អូនគិតអំពីគ្រួសារ និងអាពាហ៍ពិពាហ៍យ៉ាងណាដែរឥឡូវនេះ ? តើប្អូនមានទស្សនៈយ៉ាងណាដែរក្នុងនាមជាសមាជិកនៃសាសនាចក្រ ?
ចយ ៖ មែនហើយ ខ្ញុំពិតជាចូលចិត្តរបៀបដែលប្រធាន អូក បានមានប្រសាសន៍ទៅកាន់មនុស្សគ្រប់គ្នា ហើយខ្ញុំចូលចិត្តរបៀបដែលលោកទទួលស្គាល់ថា មិនមែនគ្រប់ស្ថានភាពទាំងអស់សុទ្ធតែសប្បាយរីករាយនោះទេ ។ ហើយខ្ញុំពិតជាចូលចិត្តរបៀបដែលលោកមានប្រសាសន៍ទៅកាន់ម្តាយទាំងឡាយ ព្រោះខ្ញុំក៏ជាម្តាយមួយរូបចេញពីអាពាហ៍ពិពាហ៍បែបនោះដែរ ហើយមានកូនប្រុសអាយុ៤ឆ្នាំម្នាក់ ។
ហើយខ្ញុំចូលចិត្តរបៀបដែលលោកបានមានប្រសសាសន៍ដូចជា ទោះបីជាបងប្អូនមិនទាន់បានរៀបការនៅពេលនេះក៏ដោយ ក៏បងប្អូននៅតែអាចបង្រៀនកូនៗរបស់បងប្អូនឲ្យមើលទៅកាន់ពរជ័យនៃគ្រួសារ និងការផ្សារភ្ជាប់ក្នុងព្រះវិហារបរិសុទ្ធបានផងដែរ ។ ខ្ញុំគ្រាន់តែមានអារម្មណ៍ថាលោកយល់គ្រប់កាលៈទេសៈ សូម្បីតែក្នុងស្ថានភាពដែលមិនតាមទម្លាប់ ឬដូចម្តាយដែលមិនបានរៀបការ ។
អែលឌើរ នែល អិល អាន់ឌើរសិន ៖ មានប្រសាសន៍បានត្រឹមត្រូវណាស់ ។
អ៊ីថិន ៖ រឿងមួយដែលប្រធាន អូក បានមានប្រសាសន៍ពីមុននៅ ប៊ី.វ៉ាយ.យូ. គឺថាបងប្អូនមិនអាចបង្ខំកិច្ចការខាងវិញ្ញាណបានទេ ។ ហើយខ្ញុំបានអានឃ្លានោះ ហើយខ្ញុំពិតជាទទួលឥទ្ធិពលពីប្រសាសន៍នោះណាស់ ដោយសារយើងចង់បានអាពាហ៍ពិពាហ៍ខាងវិញ្ញាណ យើងចង់បានគ្រួសារខាងវិញ្ញាណ ។ យើងចង់បានគ្រួសារមួយដែលផ្តោតលើព្រះគ្រីស្ទ ។ យើងចង់បានដៃគូមួយដែលមានសេចក្តីជំនឿថា យើងអាចបម្រើបាន ដែលយើងអាចជួយបាន ។ ហើយវាមាននៅពេលយើងផ្ដោតជីវិតរបស់យើងទៅលើព្រះយេស៊ូវគ្រីស្ទតែប៉ុណ្ណោះ ។ ហើយខ្ញុំគិតថា ពេលខ្លះមានការស្មុគស្មាញនៅពេលដែលយើងនៅក្មេងថា « អូ ខ្ញុំអាចធ្វើវាបាន » ឬរឿងនេះ ឬរឿងនោះ ឬអ្វីក៏ដោយ ។ ហើយជាក់ស្តែង យើងមិនអាចបង្ខំរឿងខាងវិញ្ញាណបានទេ ។
អែលឌើរ នែល អិល អាន់ឌើរសិន ៖ ខ្ញុំចូលចិត្តអ្វីដែលប្អូននិយាយ ។ ខ្ញុំគ្រាន់តែនឹងចង់ជំរុញដល់ប្អូនត្រង់នេះបន្តិច ។ ប្អូនមិនអាចបង្ខំរឿងខាងវិញ្ញាណបានទេ ប៉ុន្តែប្អូនអាចអញ្ជើញឲ្យមានការប្រាស្រ័យទាក់ទងជាមួយយុវនារីបន្ថែមទៀតបាន ។ តើប្អូនធ្វើបានយ៉ាងណាដែរចំពោះរឿងនេះ ?
អ៊ីថិន ៖ មែនហើយ ប្រធានដឹងហើយ ថាមានវិធីសាស្រ្តជាច្រើននៅទីនេះ ។ ខ្ញុំតែងតែប្រើកែវភ្នែកសម្លឹងមើលជុំវិញបន្ទប់ ។ ហើយក៏មើលនៅក្នុងកម្មវិធីណាត់ជួបមួយពីរដែរ ។ ប៉ុន្តែជាក់ស្តែង ខ្ញុំគិតថា វាជារឿងសំខាន់បំផុតក្នុងការយល់ថា ការខិតខំប្រឹងប្រែងគឺជារឿងដ៏សំខាន់បំផុតដែលយើងអាចមាន ។
ការដាក់ខ្លួនយើងនៅក្នុងស្ថានភាពនោះ ហើយមានទំនុកចិត្តក្នុងការនិយាយថា ខ្ញុំគឺជាកូនរបស់ព្រះ ខ្ញុំមានរឿងល្អជាច្រើនសម្រាប់បងប្អូន ។ ខ្ញុំនឹងចេញទៅក្រៅ ហើយណែនាំខ្លួនឯងទៅដល់នរណាម្នាក់ ហើយគ្រាន់តែរៀនអំពីពួកគេ ហើយរៀនបន្ថែមទៀតថា ពួកគេជានរណា និងអ្វីដែលពួកគេជឿ និងអ្វីដែលពួកគេកំពុងធ្វើក្នុងជីវិតរបស់ពួកគេ ។ នៅពេលយើងយកចិត្តទុកដាក់ចំពោះអ្នកដទៃ នោះយើងអាចរៀនអំពីខ្លួនឯងបន្ថែមទៀតកាន់តែច្រើន ។
អែលឌើរ នែល អិល អាន់ឌើរសិន ៖ អូលីវ៉ា ! នៅពេលប្អូនគិតពីមនុស្សដែលប្អូនអាចរៀបការជាមួយ តើប្អូនចង់បានគុណសម្បត្តិអ្វីខ្លះ ?
អូលីវ៉ា ៖ ខ្ញុំគិតថា ជាដំបូង ខ្ញុំចង់បាននរណាម្នាក់ដែលគោរពសេចក្តីសញ្ញារបស់ពួកគេជាមួយនឹងព្រះ ។
អែលឌើរ នែល អិល អាន់ឌើរសិន ៖ ហ្សេក ប្អូនដឹងទេអ្វីមួយដែលប្រធាន អូក មានប្រសាសន៍ជាញឹកញាប់គឺការប្រកាសអំពីក្រុមគ្រួសារ ។ តើប្អូនគិតអំពីគោលការណ៍ខុសៗគ្នានៅក្នុងនោះយ៉ាងណាដែរ ? ហើយតើប្អូនបានគិតអំពីវានាពេលថ្មីៗនេះដែរឬទេ ?
ហ្សេក ៖ ខ្ញុំគិតថា ខ្ញុំមានគំនិតពីរ ។ ហើយទីមួយគឺថា វាអាចពិបាកក្នុងការស្តាប់ថ្នាក់ដឹកនាំសាសនាចក្រ ឬអានការប្រកាសអំពីក្រុមគ្រួសារ ហើយមើលថាជីវិតរបស់ខ្ញុំអាចនឹងមិនអាចវាស់វែងបាននៅពេលនេះ ហើយវាអាចជាការលំបាកជាខ្លាំង ។ ប៉ុន្តែដោយសារតែវាពិបាក ឬយ៉ាប់យឺន មិនមែនមានន័យថា វាមិនពិត ឬពិតនោះទេ ។ ហើយខ្ញុំគិតថាគំនិតទីពីរ ដូចដែលយើងបានស្តាប់នៅក្នុងវីដេអូ ប្រធាន អូក បានមានប្រសាសន៍ថា ការរីកចម្រើនដ៏ធំបំផុតកើតឡើងនៅក្នុងអាពាហ៍ពិពាហ៍ និងទំនាក់ទំនងអាពាហ៍ពិពាហ៍ ហើយការដឹងថា នោះជាការពិត—ការជឿ ការទុកចិត្តថា នោះជាការពិត—មិនដោះសាឲ្យខ្ញុំ ក្នុងនាមមនុស្សមិនទាន់រៀបការ ពីការផ្តោតលើសេចក្ដីសញ្ញាដែលខ្ញុំបានធ្វើ ហើយព្យាយាមរីកចម្រើនដូចព្រះគ្រីស្ទតាមគ្រប់របៀបដែលខ្ញុំអាចធ្វើបាន ។
អែលឌើរ នែល អិល អាន់ឌើរសិន ៖ ត្រឹមត្រូវណាស់ ! អរគុណសម្រាប់ទស្សនវិស័យដ៏ល្អ ។
តើយើងអាចមានការបង្ហាញសេចក្តីស្រឡាញ់ចុងក្រោយមួយទៀតចំពោះប្រធាន អូក មុននឹងនិយាយអំពីប្រធានបទទីបីរបស់យើងបានដែរឬទេ ?
យុវមជ្ឈិមវ័យមកពីតុងហ្គា ៖ ពួកយើងអធិស្ឋានជូនប្រធានពីកោះតុងហ្គាដ៏ស្រស់ស្អាតនេះ ។
យុវមជ្ឈិមវ័យមកពីកូរ៉េ ៖ សូមផ្ញើសេចក្តីស្រឡាញ់ពីប្រទេសកូរ៉េ ! ពួកយើងស្រឡាញ់លោក ប្រធាន អូក !
យុវមជ្ឈិមវ័យមកពីសាកលវិទ្យាល័យ ព្រិកហាំ យ៉ង់–អៃដាហូ ៖ វាជាអភ័យឯកសិទ្ធិរបស់ពួកយើងដែលបានគាំទ្រប្រធាន ជាព្យាការីក្នុងអំឡុងពេលរដូវកាលនៃថ្នាក់ដឹកនាំរបស់សាសនាចក្រនេះ ។ ពួកយើងទន្ទឹងរង់ចាំធ្វើតាមប្រធាន ហើយរីករាយដើម្បីគាំទ្រប្រធានក្នុងនាមជាយុវមជ្ឈិមវ័យមកពីជុំវិញពិភពលោក ។