8:52

សេចក្តីស្រឡាញ់ និងពន្លឺរបស់ព្រះមិនសាបសូន្យ មិនផ្លាស់ប្តូរ និងមិនប្រែប្រួល

ការប្រជុំធម្មនិដ្ឋានសមាគមសង្គ្រោះ ឆ្នាំ២០២៦ ៖ ការប្រមូលផ្តុំស្ត្រីនៅទូទាំងពិភពលោក

ស៊ីស្ទើរ ចេ អាណែត ដិននីស

ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ

ថ្ងៃអាទិត្យ ទី៨ ខែមីនា ឆ្នាំ២០២៦

បងប្អូនស្រីជាទីស្រឡាញ់របស់ខ្ញុំ មិនថាបងប្អូនរស់នៅទីកន្លែងណានៅក្នុងពិភពលោកនេះឡើយ សូមដឹងថាពួកយើងស្រឡាញ់បងប្អូន ហើយព្រះវរបិតាសួគ៌និងព្រះអង្គសង្គ្រោះរបស់បងប្អូនស្រឡាញ់បងប្អូន ។ ខ្ញុំដឹងថា ពេលខ្លះវាអាចលំបាកនៅក្នុងការទទួលអារម្មណ៍នៃសេចក្តីស្រឡាញ់របស់ទ្រង់ទាំងទ្វេ ។ ខ្ញុំផ្ទាល់ក៏ធ្លាប់មានអារម្មណ៍បែបនោះផងដែរ ។ ប៉ុន្តែខ្ញុំសូមធ្វើទីបន្ទាល់ដល់់បងប្អូនថា សេចក្តីស្រឡាញ់របស់ទ្រង់ទាំងទ្វេ មិនដែល ផ្លាស់ប្តូរឡើយ ។ សេចក្តីស្រឡាញ់នេះ តែងតែ មាននៅទីនោះជានិច្ច សូម្បីតែក្នុងអំឡុងពេលដ៏ងងឹតនៅក្នុងជីវិតរបស់បងប្អូន ជាពេលដែលអាចនឹងពិបាកក្នុងការទទួលដឹងពីអារម្មណ៍នោះក្តី ។

ពួកយើងភាគច្រើនចូលចិត្តថ្ងៃដ៏ស្រស់ស្អាតដែលមានមេឃស្រឡះព្រះអាទិត្យចែងចាំងមែនទេ ! ពណ៌ទាំងអស់នៃធម្មជាតិកាន់តែភ្លឺស្រស់ស្អាតនៅពេលព្រះអាទិត្យបញ្ចេញពន្លឺ ។ នៅថ្ងៃណាដែលត្រជាក់ ពួកយើងចូលចិត្តអារម្មណ៍ដែលព្រះអាទិត្យចាំងចំមុខរបស់យើង ។ វាធ្វើឲ្យយើងពោរពេញដោយភាពកក់ក្ដៅ និងស្រស់ស្រាយ ។ ប៉ុន្តែបន្ទាប់មក វាជារឿងចៀសមិនផុតនោះទេ ថ្ងៃដែលមានពពកដេរដាស មេឃខ្មៅ ធ្លាក់ភ្លៀងក៏មកដល់ នៅពេលដែលយើងមិនអាចមើលឃើញព្រះអាទិត្យ ឬមិនទទួលអារម្មណ៍កក់ក្តៅពីព្រះអាទិត្យបាន ហើយពណ៌នៃធម្មជាតិទាំងអស់បានបិទបាំង និងចុះស្រអាប់ ។ នៅថ្ងៃដែលមានពពកដេរដាស ឬព្យុះបក់បោក ឬនៅក្នុងពេលដែលមានយប់ដ៏ងងឹត តើយើងមានសង្ស័យថា ព្រះអាទិត្យមានវត្ដមានឬអត់នោះ ? តើយើងខ្លាចថា ព្រះអាទិត្យនឹងមិនបញ្ចេញពន្លឺទៀតដែរឬទេ ? ប្រាកដណាស់ យើងមិនមានការគិតទាំងនោះទេ ! យើងដឹងថា នៅពេលដែលព្យុះ ឬពេលយប់កន្លងទៅ នៅពេលដែលពពកបានរសាត់បាត់ទៅ នោះយើងនឹងអាចមើលឃើញពន្លឺរស្មីដ៏ចែងចាំងរបស់ព្រះអាទិត្យ ហើយនឹងទទួលអារម្មណ៍នៃភាពកក់ក្ដៅរបស់វាម្ដងទៀតជាមិនខាន ។ ព្រះអាទិត្យគឺតែងតែមានដដែល មិនផ្លាស់ប្តូរ និងមិនប្រែប្រួលឡើយ ។ វាគឺមានជានិច្ច ។

នេះគឺជាការប្រៀបប្រដូចដ៏មានតម្លៃមួយចំពោះពន្លឺ និងសេចក្តីស្រឡាញ់របស់ព្រះអង្គសង្រ្គោះរបស់យើងចំពោះយើង ។ ពន្លឺរបស់ទ្រង់ផ្តល់នូវតថភាព និងអត្ថន័យចំពោះអ្វីគ្រប់យ៉ាងនៅក្នុងជីវិតរបស់យើង ។ សេចក្តីស្រឡាញ់របស់ទ្រង់ធ្វើឲ្យព្រលឹងរបស់យើងមានភាពកក់ក្តៅ និងផ្តល់ឲ្យយើងនូវសេចក្តីសង្ឃឹមសម្រាប់អនាគត ។ ប៉ុន្តែដូចជាថ្ងៃមានពពកដេរដាស ព្យុះ និងថ្ងៃដ៏ងងឹត នៅពេលដែលយើងមិនអាចមើលឃើញព្រះអាទិត្យដែរ នៅពេញដំណើរជីវិតរមែងស្លាប់របស់យើង នោះនឹងមានថ្ងៃដែលមានពពកដេរដាស ព្យុះ និងថ្ងៃងងឹត ជាពេលដែលអាចនឹងពិបាកនៅក្នុងការទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះ ឬមើលឃើញពន្លឺរបស់ទ្រង់ ។ ប្រហែលជាមានពេលខ្លះនៅពេលដែលព្រះវរបិតាសួគ៌ និងព្រះអង្គសង្រ្គោះរបស់យើងហាក់ដូចជា មិនមានវត្តមាន នៅក្នុងជីវិតរបស់យើង ហើយយើងមានអារម្មណ៍ភ័យខ្លាចខ្លាំងថា ទ្រង់ទាំងទ្វេបានបោះបង់យើងចោល ថាទ្រង់ទាំងទ្វេមិនស្រឡាញ់យើង ហើយថាយើងគ្រប់គ្នានៅឯកាតែម្នាក់ឯង ។ សូម្បីតែ យ៉ូសែប ស្ម៊ីធ និងព្រះអង្គសង្គ្រោះផ្ទាល់ក៏បានភ្លក់នូវអារម្មណ៍ថាត្រូវបានព្រះបោះបង់ចោលផងដែរ ១ ។

ប៉ុន្តែបងប្អូនស្រីរបស់ខ្ញុំអើយ ខ្ញុំសូមធ្វើទីបន្ទាល់ដល់បងប្អូនថា គ្មានអ្វី ដែលអាចបំបែកយើងចេញពីសេចក្តីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទបានឡើយ ! ពន្លឺ និងសេចក្តីស្រឡាញ់របស់ទ្រង់ទាំងទ្វេមានសម្រាប់យើងជានិច្ច មិនផ្លាស់ប្តូរ និងមិនប្រែប្រួលឡើយ ប្រៀបដូចជាពន្លឺ និងភាពកក់ក្តៅនៃព្រះអាទិត្យដូច្នោះដែរ ។ យើងមិនចាំបាច់ភ័យខ្លាចថា ទ្រង់ទាំងទ្វេបោះបង់យើងចោលនោះទេ ពីព្រោះទ្រង់ទាំងទ្វេនឹងមិនបោះបង់យើ់ងចោលឡើយ ។ ការធ្វើដូច្នេះមិនមែនជាចរិតលក្ខណៈរបស់ទ្រង់ទាំងទ្វេឡើយ ។

ខ្ញុំអាចចាំបានពីអារម្មណ៍ឯកោខ្លាំងណាស់នៅពេលដែលពួកយើងបានផ្លាស់ទៅរស់នៅប្រទេសម៉ិកស៊ិកបន្ទាប់ពីស្វាមីរបស់ខ្ញុំ និងខ្ញុំបានរៀបការរួច ។ ជាលើកដំបូងនៅក្នុងជីវិតរបស់ខ្ញុំ ដែលខ្ញុំបានរស់នៅឆ្ងាយពីផ្ទះ និងគ្រួសាររបស់ខ្ញុំ ។ ខ្ញុំមិនទាន់ចេះនិយាយ ឬយល់ភាសានោះបានល្អនៅឡើយ ខ្ញុំកំពុងពរពោះកូនដំបូងរបស់យើង ហើយភាគច្រើនស្វាមីរបស់ខ្ញុំបានចេញទៅធ្វើការ និងទៅសាលារៀនពេញមួយថ្ងៃ ។ ខ្ញុំចាំថា ខ្ញុំមានអារម្មណ៍ឯកោ ច្របូកប្របល់ និងភ័យខ្លាចខ្លាំង ។ ខ្ញុំពិបាកក្នុងការទទួលអារម្មណ៍ថា ព្រះវរបិតាសួគ៌ទ្រង់ជ្រាបដឹងអំពីខ្ញុំ ។ ខ្ញុំមិនអាចទទួលបានអារម្មណ៍កក់ក្តៅ និងពន្លឺនៃសេចក្តីស្រឡាញ់របស់ព្រះអង្គសង្រ្គោះរបស់ខ្ញុំបានឡើយ ។ ខ្ញុំបានចាប់ផ្តើមមានអារម្មណ៍នៃភាពងងឹត បាក់ទឹកចិត្ត និងអស់សង្ឃឹម ។

ប៉ុន្តែមានបងប្អូនស្រីមួយចំនួនក្នុងសមាគមសង្គ្រោះរបស់ខ្ញុំបានមកជួយសង្គ្រោះខ្ញុំ ។ ពួកគាត់បានឱបក្រសោបខ្ញុំ និងជួយខ្ញុំឲ្យទទួលអារម្មណ៍ថាខ្ញុំមិននៅឯកោនោះទេ ។ ពួកគាត់បានផ្តល់ការលើកទឹកចិត្ត និងការគាំទ្រដល់ខ្ញុំ តាមរយៈស្នាមញញឹម ទឹកមុខអាណិតអាសូរ និងសេចក្តីស្រឡាញ់ដ៏ទន់ភ្លន់ ទោះបីជាខ្ញុំមិនអាចយល់ពាក្យសម្តីរបស់ពួកគាត់ ហើយពួកគាត់មិនអាចយល់ពីពាក្យសម្តីរបស់ខ្ញុំក៏ដោយ ។ ប៉ុន្តែដោយសារខ្ញុំអាចទទួលបានអារម្មណ៍នៃសេចក្តីស្រឡាញ់ និងការទទួលស្គាល់របស់ពួកគាត់ដែលមានចំពោះខ្ញុំ នោះវាបានបណ្ដេញពពកនៃភាពងងឹតដែលកំពុងគ្របលើខ្ញុំ ហើយខ្ញុំបានចាប់ផ្តើមទទួលអារម្មណ៍នៃសេចក្តីស្រឡាញ់ និងការគាំទ្រ របស់ព្រះវរបិតាសួគ៌ ចំពោះខ្ញុំជាថ្មីម្តងទៀត ។

បងប្អូនស្រី ពួកយើងអាចធ្វើបែបនោះចំពោះគ្នាទៅវិញទៅមកបាន ។ យើង ទាំងអស់គ្នា គឺជាបុត្រីរបស់ព្រះមាតាបិតាសួគ៌ ហើយយើង ត្រូវការ គ្នាទៅវិញទៅមក ។ មិនថាយើងរស់នៅទីកន្លែងណា មិនថាកាលៈទេសៈរបស់យើងម្នាក់ៗយ៉ាងណានោះទេ យើង មិន គួរមានអារម្មណ៍ថាយើងនៅម្នាក់ឯង ឬឯកោឡើយ ។ យើងត្រូវបានហ៊ុមព័ទ្ធទៅដោយបងប្អូនប្រុសស្រីខាងវិញ្ញាណរបស់យើង ។ យើងទាំងអស់គ្នាបានមកដល់ផែនដីនៅក្នុងពេលនេះជាមួយគ្នា ហើយយើងពិតជាត្រូវការគ្នាយ៉ាងខ្លាំង ។ ការល្បួងឲ្យប្រៀបធៀប និងវិនិច្ឆ័យគ្នាទៅវិញទៅមកគឺមានមកពីអារក្ស ។ វាចង់បំបែកយើង ពីព្រោះវាដឹងពីកម្លាំងដ៏អស្ចារ្យដែលនឹងកើតឡើងនៅពេលដែលយើងមានសាមគ្គីភាព សេចក្តីស្រឡាញ់ និងគាំទ្រគ្នាទៅវិញទៅមក ។ យើងអាចជួយគ្នាឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះរបស់យើង នៅពេលយើងព្យាយាមរួបរួមគ្នាក្នុងនាមជាបុត្រីរបស់ព្រះ ។ ចូរយើងស្រាក់ដៃគ្នា ជួយគ្នា ហើយដើរទៅផ្ទះ ជាមួយគ្នា ។

ខ្ញុំជឿថា ព្រះវរបិតាសួគ៌ និងព្រះអង្គសង្រ្គោះរបស់យើងតែងតែផ្ញើសារនៃសេចក្តីស្រឡាញ់ និងសារគាំទ្រមកកាន់យើង ប៉ុន្តែជាច្រើនដងយើងមិនស្គាល់សារទាំងនោះ ពីព្រោះយើងប្រហែលជាមិនស្វែងរកសារទាំងនោះទេ ។ ការមើលឃើញសត្វចាបហើរនៅខាងក្រៅបង្អួចរបស់ខ្ញុំ ការឃើញថ្ងៃលិចដ៏អស្ចារ្យ ឬគ្រាន់តែការកត់សម្គាល់ឃើញនូវភាពស្រស់ស្អាត និងភាពអស្ចារ្យរបស់ធម្មជាតិ ជាញឹកញាប់ជួយឲ្យខ្ញុំទទួលបានអារម្មណ៍នៃសេចក្តីស្រឡាញ់របស់ទ្រង់ទាំងទ្វេ ។ នៅពេលជួបរឿងពិបាក ហើយខ្ញុំមានអារម្មណ៍បាក់ទឹកចិត្ត នោះពេលខ្លះខ្ញុំបានសម្គាល់ដឹងពីសារនៃសេចក្តីស្រឡាញ់ និងសារគាំទ្ររបស់ទ្រង់ទាំងទ្វេតាមរយៈខគម្ពីរជាក់លាក់ណាមួយដែលប៉ះដួងចិត្តរបស់ខ្ញុំ នៅពេលខ្ញុំកំពុងអាន ឬដោយតាមរយៈការសន្ទនាដ៏បំផុសគំនិតជាមួយនរណាម្នាក់ ឬអ្វីមួយដែលខ្ញុំទទួលបានអារម្មណ៍ នៅពេលស្តាប់ទំនុកបទនៃទំនុកតម្កើងដ៏ពីរោះ ឬបទចម្រៀងលើកទឹកចិត្ដ ។

ខ្ញុំស្រឡាញ់ពាក្យពេចន៍ទាំងនេះនៅក្នុងទំនុកតម្កើងថ្មីមួយរបស់យើង ៖ « His Eye Is on the Sparrow ( ទ្រង់ជ្រាបពីសត្វចាប ) » ឃ្លាដំបូងចែងថា ៖

ហេតុ​អ្វី​ខ្ញុំ​គួរ​បាក់​ទឹកចិត្ត ?
ហេតុ​អ្វី​បាន​មាន​ពេល​លំបាក ?
ហេតុ​អ្វី​ចិត្ត​ខ្ញុំ​ឯកា
ហើយ​ចង់​បាន​ស្ថានសួគ៌ និង​ផ្ទះ
ពេលណា​ព្រះយេស៊ូវ​ជា​ចំណែក​របស់​ខ្ញុំ ?
ទ្រង់​ជា​មិត្ត​ខ្ញុំ​ជានិច្ច ៖
ព្រះនេត្រ​ទ្រង់​ផ្តោត​លើ​សត្វចាប
ហើយ​ខ្ញុំ​ដឹង​ទ្រង់​មើលថែ​ខ្ញុំ ។

ខ្ញុំសូមធ្វើទីបន្ទាល់ដល់បងប្អូនថា ព្រះនេត្ររបស់ទ្រង់មិនត្រឹមតែសម្លឹងលើសត្វចាបប៉ុណ្ណោះទេ ប៉ុន្តែគឺសម្លឹងមកលើបងប្អូនម្នាក់ៗ និងគ្រប់រូបផងដែរ ។ បងប្អូន គឺជាបុត្រីជាទីស្រឡាញ់របស់ព្រះ ហើយខ្ញុំសូមធើ្វទីបន្ទាល់ថា បងប្អូននឹងមិនត្រូវបានបំភ្លេចឡើយ ។ បងប្អូនត្រូវបានទទួលស្គាល់ បានស្រឡាញ់ ហើយសំឡេងរបស់បងប្អូន មាន សារៈសំខាន់ ជាពិសេសចំពោះព្រះវរបិតាសួគ៌របស់បងប្អូន និងចំពោះព្រះរាជបុត្រាសំណព្វតែមួយរបស់ទ្រង់ ។ ទ្រង់ទាំងទ្វេជ្រាបយ៉ាងច្បាស់ពីការខូចចិត្ដរបស់បងប្អូន ទឹកភ្នែករបស់បងប្អូន ទុក្ខព្រួយរបស់បងប្អូន និងការឈឺចាប់របស់បងប្អូន ។ ការអធិស្ឋានរបស់បងប្អូនតែងតែត្រូវបានស្តាប់ឮដោយព្រះវរបិតាសួគ៌ដ៏ជាទីស្រឡាញ់របស់បងប្អូន ។

ដំណើរនៃជីវិតរមែងស្លាប់នេះគឺពោរពេញទៅដោយបញ្ហា និងការលំបាក រួមទាំងការបាត់បង់ជាច្រើនប្រភេទ—ការបាត់បង់មិត្តភ័ក្តិ ឬមនុស្សជាទីស្រឡាញ់ ការបាត់បង់សុខភាពផ្លូវកាយ ឬផ្លូវចិត្ត ការបាត់បង់ហិរញ្ញវត្ថុ និងសូម្បីតែការបាត់បង់សមត្ថភាព និងទំនុកចិត្តផងដែរ ។ ខ្ញុំស្រឡាញ់អ្វីដែលអែលឌើរ យ៉ូសែប ប៊ី វ៉ឺតលីន បានមានប្រសាសន៍អំពីការបាត់បង់ថា ៖ « ព្រះអម្ចាស់ តបស្នងដល់អ្នកស្មោះត្រង់សម្រាប់រាល់ការបាត់បង់ទាំងអស់ ។ អ្វីដែលបានដកយកចេញពីអស់អ្នកដែលស្រឡាញ់ព្រះអម្ចាស់ នឹងត្រូវបានបន្ថែមទៅឲ្យពួកគេទៅតាមរបៀបផ្ទាល់របស់ទ្រង់ ។ ខណៈដែលការណ៍នេះអាចនឹងមិនមកដល់នៅពេលដែលយើងចង់បានក្តី ក៏អ្នកស្មោះត្រង់នឹងដឹងថា រាល់ទឹកភ្នែកនៅថ្ងៃនេះនឹងត្រូវបានសងមកវិញមួយរយដងជាមួយនឹងទឹកភ្នែកនៃសេចក្តីអំណរ និងការដឹងគុណ » ។

ហើយព្យាការី យ៉ូសែប ស៊្មីធ បានមានប្រសាសន៍ថា « គ្រប់អ្វីៗទាំងអស់ដែលបងប្អូនបាត់បង់នឹងត្រូវបានសងវិញដល់បងប្អូននៅក្នុងការរស់ឡើងវិញ ដរាបណាបងប្អូននៅបន្តមានភាពស្មោះត្រង់ » ។ តាមរយៈចក្ខុវិស័យនៃព្រះអម្ចាស់ដ៏មានមហិទ្ធិឬទ្ធិ ខ្ញុំបានមើលឃើញវា » ។

ខ្ញុំសូមធ្វើទីបន្ទាល់ថាការសន្យាទាំងនោះគឺពិត ដោយសារតែព្រះអង្គសង្រ្គោះជាទីស្រឡាញ់របស់យើង និងដោយសារពលិកម្មដ៏ធួនរបស់ទ្រង់ ។ ប្រសិនបើបងប្អូននៅតែស្មោះត្រង់ចំពោះព្រះ នោះ រាល់ ការបាត់បង់ទាំងអស់នឹងត្រូវសងទៅឲ្យបងប្អូនវិញ ហើយបងប្អូននឹងស្រក់ទឹកភ្នែកនៃសេចក្តីអំណរ និងការដឹងគុណដាក់ព្រះវរបិតាសួគ៌របស់បងប្អូនចំពោះពរជ័យទាំងឡាយដែលបានទូទាត់សងរបស់ទ្រង់ ។

ខគម្ពីរនេះនៅក្នុងគម្ពីរវិវរណៈបាននាំមកនូវការលួងលោម និងបានជួយខ្ញុំឲ្យមានអារម្មណ៍នៃសេចក្តីស្រឡាញ់របស់ព្រះ « ព្រះទ្រង់នឹងជូតអស់ទាំងទឹកភ្នែកពីភ្នែកគេចេញ និងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ ដ្បិតសេចក្ដីមុនទាំងប៉ុន្មានបានកន្លងបាត់ទៅហើយ ។ សូមចងចាំនូវការសន្យា នេះ ផងដែរ ៖ « គ្រប់ការណ៍ទាំងអស់ផ្សំគ្នាសម្រាប់សេចក្តីល្អដល់ពួកអ្នកដែលស្រឡាញ់ព្រះ » ។ ឱនេះជាពាក្យដ៏ពីរោះ និងលួងលោមខ្លាំងណាស់ ! ព្រះយេស៊ូវគ្រីស្ទជាពន្លឺ និងជាជីវិតនៃពិភពលោកនេះ ហើយទ្រង់បានសន្យាថា នៅពេលដែលយើងធ្វើតាមទ្រង់ នោះយើងនឹងមិនដើរក្នុងសេចក្តីសូន្យសុងឡើយ ។

ខ្ញុំសូមធ្វើទីបន្ទាល់ដល់បងប្អូនថា ព្រះវរបិតាសួគ៌ និងព្រះអង្គសង្គ្រោះរបស់បងប្អូននឹង មិន បំភ្លេចបងប្អូនឡើយ មិនថាបងប្អូនជានរណា មិនថាបងប្អូនរស់នៅទីណា មិនថាកាលៈទេសៈបច្ចុប្បន្នរបស់បងប្អូនយ៉ាងណា និងមិនថាអតីតកាលរបស់បងប្អូនយ៉ាងណានោះទេ ។ ពន្លឺ និងសេចក្តីស្រឡាញ់របស់ទ្រង់ទាំងទ្វេចំពោះបងប្អូនគឺមានជានិច្ច មិនផ្លាស់ប្តូរ និងមិនប្រែប្រួលឡើយ ។ ហើយនៅពេលដែលពពក និងព្យុះទាំងឡាយនៅក្នុងជីវិតរបស់បងប្អូនរសាត់ចេញទៅ នោះបងប្អូននឹងដឹងថា ទ្រង់ទាំងទ្វេ តែងតែ គង់នៅជាមួយបងប្អូនជានិច្ច សូម្បីតែនៅក្នុងអំឡុងថ្ងៃដ៏ងងឹតបំផុតរបស់បងប្អូនក្តី ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕