ពលិកម្មរបស់ព្រះយេស៊ូវគ្រីស្ទ គឺ សម្រាប់បងប្អូន
ការប្រជុំធម្មនិដ្ឋានសមាគមសង្គ្រោះ ឆ្នាំ២០២៦ ៖ ការប្រមូលផ្តុំស្ត្រីនៅទូទាំងពិភពលោក
ថ្ងៃអាទិត្យទី៨ ខែមីនា ឆ្នាំ២០២៦
ជូនចំពោះបងប្អូនស្រីជាទីស្រឡាញ់ ខ្ញុំតែងតែមានអំណរគុណដែលបាននៅជាមួយបងប្អូន ។ មិនថាខ្ញុំបាននៅដោយផ្ទាល់ ឬដោយវិញ្ញាណនោះទេ ភាពស្មោះត្រង់ និងសេចក្តីល្អរបស់បងប្អូនជ្រោតជ្រាប និងបំផុសគំនិតដល់ខ្ញុំ ។ សូមឲ្យបងប្អូនបានព្រះពរសម្រាប់ការនាំយកសេចក្តីស្រឡាញ់ និងសេចក្ដីសង្រ្គោះរបស់ព្រះអង្គសង្គ្រោះដល់អ្នកដែលនៅជុំវិញបងប្អូន ។ ពួកយើងស្រឡាញ់បងប្អូន ហើយពួកយើងអធិស្ឋានសម្រាប់បងប្អូន ។
កាលពីប៉ុន្មានឆ្នាំមុន ខ្ញុំបានទៅមើលថ្នាក់ទារកដ្ឋានមួយ ។ អ្នកដឹកនាំថ្នាក់ទារកដ្ឋានមិនបាននៅទេនៅថ្ងៃនោះ ហើយខ្ញុំបានដឹងថាមិនមានមេរៀនដែលបានរៀបចំសម្រាប់បង្រៀននោះទេ ។ ខ្ញុំបានចាក់សោមើលក្នុងទូ ហើយបានឃើញសៀវភៅមេរៀនមួយក្បាល ហើយបានជ្រើសរើសមេរៀនមួយអំពីសេចក្ដីស្រឡាញ់របស់ព្រះ ។ វាមានរូបភាពរបស់កុមារមកពីជុំវិញពិភពលោក ដែលតំណាងឲ្យសេចក្តីស្រឡាញ់របស់ព្រះចំពោះមនុស្សគ្រប់រូប ។ ខ្ញុំបានសួរក្មួយៗតូចៗថា តើសេចក្ដីស្រឡាញ់របស់ព្រះអាចទៅដល់ពួកគេទាំងអស់គ្នាបានដោយរបៀបណា ។ ក្មេងប្រុសដ៏ស្វាហាប់ម្នាក់ដែលមានឈ្មោះថា ឆាលី បានលើកដៃទាំងពីរឡើង ហើយបន្លឺសំឡេងខ្លាំងៗថា « សេចក្តីស្រឡាញ់របស់ព្រះគឺ ធំ ណាស់ ! » ត្រឹមត្រូវណាស់ ឆាលី ។ សេចក្តីស្រឡាញ់របស់ព្រះគឺពិតជា « ធំ » ណាស់ ។ សេចក្តីស្រឡាញ់របស់ទ្រង់ « មកដល់យើងពេល [ យើង ] ឈោងទៅរកវា » ហើយជាប់លាប់សម្រាប់បុត្រាបុត្រីរបស់ទ្រង់ម្នាក់ៗ ។ គ្មាននរណាម្នាក់មិនអាចទទួលបានសេចក្តីស្រឡាញ់របស់ទ្រង់នោះទេ ។ ដូចដែលសាវកប៉ុលបានបង្រៀន ៖
« ត្បិតខ្ញុំជឿជាក់ថា ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី
« ទីមានកំពស់ ទីជម្រៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើងចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅ បានឡើយ » ។
សេចក្តីស្រឡាញ់ដ៏មហិមារបស់ព្រះត្រូវបានបើកសម្តែងតាមរយៈអំណោយទានដ៏មេត្តាករុណានៃព្រះរាជបុត្រាទ្រង់គឺព្រះយេស៊ូវគ្រីស្ទ ។ សេចក្តីសញ្ញារបស់យើងភ្ជាប់យើងទៅនឹងទ្រង់ និងព្រះចេស្ដាដ៏ធួនរបស់ទ្រង់ ។ ដោយសារទ្រង់ យើងអាចប្រែចិត្ត ហើយផ្លាស់ប្តូរ ។ ដោយសារទ្រង់ យើងអាចទទួលបានកម្លាំង និងសមត្ថភាពហួសពីអ្វីដែលយើងមាន ។ ដោយសារទ្រង់ យើងអាចស្វែងរកសេចក្តីសុខសាន្ត និងការធានាថា « អ្វីៗទាំងអស់នឹងធ្វើឲ្យទៅជាត្រូវ » ។
ព្រះយេស៊ូវគ្រីស្ទបានយាងមកដើម្បីជួយសម្រាលបន្ទុករបស់យើង ហើយជួយរែកពន់អ្វីដែលយើងមិនអាចរែកពន់ និងមិនមែនសម្រាប់ឲ្យយើងរែកពន់តែម្នាក់ឯង។ ខ្ញុំសូមចែកចាយឧទាហរណ៍ផ្ទាល់ខ្លួនមួយ ។
មួយរយៈមុននេះ ខ្ញុំបានឆ្លងកាត់កាលៈទេសៈដែលនាំឲ្យខ្ញុំមានអារម្មណ៍មិនសុខស្រួល និងមិនមានតម្លៃ ។ ស្ថានភាពនេះបានធ្វើឲ្យខ្ញុំបាក់ទឹកចិត្ត និងអស់ថាមពលរលីង ។ ខ្ញុំបានងឿងឆ្ងល់ថា ហេតុអ្វីបានជាវារំខានខ្ញុំខ្លាំងម្ល៉េះ ។ ខ្ញុំបានព្យាយាមជួយគេ មានចិត្តល្អ និងច្បាស់លាស់ ប៉ុន្តែហាក់ដូចជាគ្មានអ្វីផ្លាស់ប្តូរនោះទេ ។ ខ្ញុំមានអារម្មណ៍ថាជាប់គាំង ហើយចង់ទទួលបានភាពធូរស្រាល និងសេចក្តីសុខសាន្តជាខ្លាំង ។
នៅកណ្ដាលនៃភាពច្របូកច្របល់របស់ខ្ញុំ ខ្ញុំបានលុតជង្គង់ក្បែរគ្រែរបស់ខ្ញុំនៅល្ងាចមួយ ហើយចាប់ផ្ដើមអធិស្ឋានទៅព្រះវរបិតាដែលគង់នៅស្ថានសួគ៌ ។ ខ្ញុំមិនអាចប្រឈមនឹងស្ថានភាពនេះតទៅទៀតទេ ។ ខ្ញុំបានស្រក់ទឹកភ្នែក ហើយពោលពាក្យថា « ខ្ញុំម្ចាស់មិនអាចរែកពន់បន្ទុកនេះតទៅទៀតបានទេ វាធ្ងន់ណាស់ បន្ទុកនេះគួរតែជារបស់ទ្រង់ ។ សូមទ្រង់ដកយកបន្ទុកនេះពីខ្ញុំម្ចាស់បានទេ ? ខ្ញុំម្ចាស់សូមថ្វាយបន្ទុកនេះទៅទ្រង់ ។ សូមជួយខ្ញុំម្ចាស់ផង » ។ ខ្ញុំបានទូលសុំជំនួយតាមរយៈសេចក្តីមេត្តាករុណានៃព្រះរាជបុត្រារបស់ទ្រង់ ។ ខ្ញុំចាំពីគ្រាដែលព្រះយេស៊ូវគ្រីស្ទបានរងទុក្ខសម្រាប់ ខ្ញុំ ហើយបានទ្រាំទ្ររាល់អស់ទាំងសេចក្តីឈឺចាប់ សម្រាប់ខ្ញុំ ហើយថា តាមរយៈទ្រង់ បន្ទុកនេះអាចត្រូវបានសម្រាល ។ ខ្ញុំបានមានអារម្មណ៍ថាមានក្តីសង្ឃឹមមួយរំពេច ស្រដៀងទៅនឹងបទពិសោធន៍របស់អាល់ម៉ាជាកូន ដែលចងចាំពីអំណាចនៃដង្វាយធួនរបស់ព្រះអង្គសង្គ្រោះ បានថ្លែងថា « នៅពេលដែលឪពុកនឹកគិតទៅលើរឿងនេះ នោះឪពុកបានយំនៅក្នុងចិត្តថា ៖ ឱព្រះយេស៊ូវអើយ ព្រះអង្គជាព្រះរាជបុត្រានៃព្រះ សូមព្រះអង្គមានសេចក្ដីមេត្តាករុណាមកលើទូលបង្គំផង ដែលជាអ្នកនៅក្នុងប្រមាត់ល្វីងជូរចត់ » ។
នៅថ្ងៃបន្ទាប់ សេចក្តីសុខសាន្តបានចាប់ផ្តើមមកជំនួសក្ដីទុក្ខព្រួយ ។ ជាសេចក្តីសុខសាន្តដែលហួសពីការយល់ដឹងរបស់ខ្ញុំប្រាកដណាស់ ។ ជាសេចក្តីសុខសាន្តដែលថាស្ថានភាពនេះគឺស្ថិតនៅក្នុងព្រះហស្ដរបស់ព្រះវរបិតា និងព្រះរាជបុត្រា ហើយមិនមែនជាបន្ទុកដែលខ្ញុំត្រូវរែកពន់នោះទេ ។ នៅពេលដែលខ្ញុំជ្រើសរើសទុកចិត្តថ្វាយបន្ទុករបស់ខ្ញុំទៅទ្រង់ទាំងទ្វេ ខ្ញុំទទួលអារម្មណ៍ថាទទួលបានសេចក្តីស្រឡាញ់ និងការធូរស្រាលរបស់ទ្រង់ទាំងទ្វេ ហើយត្រូវបានណែនាំឲ្យដឹងពីរបៀបទទួលបានការគាំទ្រដែលខ្ញុំត្រូវការ ។
ទស្សនៈដ៏ទូលំទូលាយជាងមុនបានចូលមកក្នុងដួងចិត្ត និងគំនិតរបស់ខ្ញុំផងដែរ នៅថ្ងៃ និងសប្តាហ៍បន្ទាប់ ។ ខ្ញុំមិនបានដឹងនោះទេថា ទស្សនៈដែលស្រដៀងនឹងរបៀបដែលព្រះទតឃើញ អាចជាអំណោយទានដ៏មានអានុភាពដើម្បីជួយយើងឆ្លងកាត់ឧបសគ្គដែលយើងជួបប្រទះ ។ វាបានជួយដាក់ស្ថានភាពនេះទៅក្នុងកន្លែងត្រឹមត្រូវរបស់វា ។ វាបានក្លាយដូចអ្វីដែលព្រះអម្ចាស់បានពិពណ៌នាថា « គ្រាន់តែ [ មួយ ] តំណក់ » ប្រៀបធៀបទៅនឹង « សេចក្ដីដែលមានទម្ងន់ជាងឬ ? »
កាលៈទេសៈលំបាកមិនបានទៅណាទេ ប៉ុន្តែវាមិនធ្វើឲ្យខ្ញុំឈឺចាប់ដូចពីមុនទេ ហើយស្ថានភាពនោះលែងគ្រប់គ្រងគំនិតរបស់ខ្ញុំទៀតហើយ ។ វាពិតជាអព្ភូតហេតុណាស់ ។ មានតែទ្រង់ទេដែលអាចធ្វើឲ្យបន្ទុកដែលញាំញីដល់ព្រលឹងបែបនេះបាន « ស្រាល » បាន ។
នៅកណ្តាលនៃការទទួលបានការសង្គ្រោះនេះ ខ្ញុំបានអានខគម្ពីរមួយពីព្យាការី ស៊ីណូស ដែលពិពណ៌នាអំពីបទពិសោធន៍របស់ខ្ញុំ ៖ « ហើយព្រះអង្គបានឮទូលបង្គំ ដោយសារសេចក្ដីទុក្ខវេទនាទាំងឡាយរបស់ទូលបង្គំ និងចិត្តស្មោះរបស់ទូលបង្គំ ហើយគឺដោយសារ ព្រះរាជបុត្រារបស់ព្រះអង្គ … ទ្រង់បានមេត្តាករុណាដល់ទូលបង្គំយ៉ាងនេះ ហេតុដូច្នេះហើយ ទូលបង្គំនឹងអំពាវនាវដល់ព្រះអង្គនូវគ្រប់សេចក្ដីទុក្ខវេទនាទាំងឡាយរបស់ទូលបង្គំ ព្រោះនៅក្នុងព្រះអង្គ គឺជាសេចក្ដីអំណររបស់ទូលបង្គំ ព្រោះព្រះអង្គបានបង្វែរសេចក្ដីជំនុំជំរះចេញពីទូលបង្គំ ដោយសារព្រះរាជបុត្រារបស់ព្រះអង្គ » ។
បងប្អូនស្រី សូមឲ្យយើងជ្រើសរើសជឿលើព្រះយេស៊ូវគ្រីស្ទ និង ទូលសុំ ជំនួយដែលយើងត្រូវការតាមរយៈព្រះចេស្ដានៃដង្វាយធួនរបស់ទ្រង់ ។ ពេលខ្លះយើងអាចឃើញថាខ្លួនយើងកំពុងស្ថិតនៅម៉ូដ « ស្វ័យប្រវត្តិ » ដែលជាទូទៅយើងជឿថាព្រះនឹងជួយយើង ប៉ុន្តែយើងមិនមានគោលបំណងទូលសួរទ្រង់ដោយសេចក្តីជំនឿ ដោយជ្រើសរើសជឿថាទ្រង់ពិតជាអាចធ្វើបាន ហើយនឹងជួយយើងនោះទេ ។ ខ្ញុំគិតថា ព្រះវរបិតារបស់យើងដែលគង់នៅស្ថានសួគ៌ សង្ឃឹមថាបងប្អូន ហើយខ្ញុំនឹងទូលសុំជំនួយដែលយើងត្រូវការដោយស្មោះអស់ពីចិត្ត និងដោយជឿថា ការពលិកម្មរបស់ព្រះយេស៊ូវគ្រីស្ទគឺ សម្រាប់ បងប្អូន ទាំងពីមុន និងពេលឥឡូវនេះ ។ ដង្វាយធួនរបស់ទ្រង់ ការឈឺចាប់របស់ទ្រង់គឺសម្រាប់បងប្អូនទាំងពេលមុន និងពេលឥឡូវនេះ ។ ទ្រង់ស្រឡាញ់បងប្អូន ហើយមានព្រះទ័យចង់ព្យាបាល និងប្រទានពរដល់បងប្អូន ដោយនូវជំនួយដែលបងប្អូនត្រូវការសម្រាប់ពេលនេះ និងជារៀងរហូតតទៅ ។ ហើយទ្រង់មានព្រះចេស្ដាដើម្បីធ្វើដូច្នេះ នៅពេលយើងអនុវត្តសេចក្តីជំនឿរបស់យើង រស់នៅតាមសេចក្តីសញ្ញារបស់យើង ហើយជ្រើសរើសជឿលើទ្រង់ ។
ប្រធាន ដាល្លិន អេក អូក បានបង្រៀន ៖ « ដោយសារបទពិសោធន៍ដ៏ធួនរបស់ទ្រង់នៅក្នុងជីវិតរមែងស្លាប់ នោះព្រះអង្គសង្គ្រោះអាចលួងលោម ព្យាបាល និងចម្រើនកម្លាំងដល់បុរស និងស្ត្រីគ្រប់រូបនៅគ្រប់ទីកន្លែង ប៉ុន្តែខ្ញុំជឿថាទ្រង់ធ្វើការណ៍នេះ ចំពោះ អស់អ្នកដែលស្វែងរកទ្រង់ ហើយ សុំជំនួយពីទ្រង់តែប៉ុណ្ណោះ ។ … យើងមានភាពស័ក្ដិសមដើម្បីទទួលពរជ័យនោះ នៅពេលយើងជឿលើទ្រង់ ហើយអធិស្ឋានទូលសុំជំនួយរបស់ទ្រង់ » ។
យើងមិនត្រូវបានឲ្យមកដើម្បីតស៊ូនឹងឧបសគ្គ និងការឈឺចាប់របស់យើងដោយខ្លួនឯងនោះទេ ។ យើងត្រូវបានឲ្យមកដើម្បីមានព្រះអង្គសង្គ្រោះមួយអង្គ ជាអង្គដែលមានព្រះចេស្ដា សេចក្ដីស្រឡាញ់ និងការសង្គ្រោះដ៏ទេវភាពសម្រាប់យើងដោយផ្ទាល់ ។ ទ្រង់មានព្រះទ័យចង់បំពេញចិត្ត និងលួងលោមដល់ព្រលឹងដែលឈឺចាប់ ។
តើបងប្អូនអាចឮទ្រង់មានបន្ទូលមកកាន់បងប្អូន ដូចជាទ្រង់មានបន្ទូលទៅកាន់ប្រជាជនអាលម៉ាដែលកំពុងជួបការលំបាកដែរឬទេ ?
« ចូរងើបក្បាលឡើង ហើយចូរក្សាន្តចិត្តចុះ ព្រោះយើងដឹងនូវសេចក្ដីសញ្ញា ដែលអ្នករាល់គ្នាបានធ្វើជាមួយនឹងយើង ហើយយើងនឹងធ្វើសេចក្ដីសញ្ញាជាមួយនឹងរាស្ត្រយើង ហើយនឹងដោះពួកគេឲ្យរួចផុតពីសេវកភាព ។
« ហើយយើងនឹងសម្រាលបន្ទុកទាំងឡាយ … ដាក់នៅលើស្មាអ្នកផង ហើយសូម្បីតែរូបអ្នកក៏នឹងមិនអាចចាប់អារម្មណ៍ថា មានបន្ទុកទាំងនោះនៅលើខ្នងអ្នកឡើយ ទោះនៅពេលអ្នកជាប់នៅក្នុងសេវកភាពក្ដី ហើយយើងនឹងធ្វើការនេះ ដើម្បីឲ្យអ្នករាល់គ្នា អាចឈរជាសាក្សីដល់យើងពីអំណឹះតទៅ ហើយដើម្បីឲ្យអ្នករាល់គ្នាអាចដឹងជាពិតប្រាកដថា យើងជាព្រះអម្ចាស់ដ៏ជាព្រះ មករករាស្ត្រយើងក្នុងពេលគេស្ថិតក្នុងសេចក្ដីវេទនា » ។
ចំណងជើងនៃផ្ទាំងគំនូរដែលខ្ញុំបានចែកចាយនៅក្នុងសារលិខិតរបស់ខ្ញុំនៅក្នុងសន្និសីទទូទៅចុងក្រោយគឺ « ហើយយើងបានទទួលទាន » ។ វាជាព្រះបន្ទូលរបស់ព្រះអង្គសង្គ្រោះដោយផ្ទាល់ នៅក្នុង គោលលទ្ធិ និងសេចក្ដីសញ្ញា នៅពេលទ្រង់ពិពណ៌នាអំពីការឈឺចាប់របស់ទ្រង់នៅក្នុងសួនច្បារគែតសេម៉ានី ៖
« គឺជាសេចក្ដីរងទុក្ខវេទនា ដែលបណ្ដាលឲ្យយើង គឺជាព្រះដ៏មហិមាលើអ្វីៗទាំងអស់ ត្រូវញ័រដោយសារតែការឈឺចាប់ ហើយត្រូវច្រួចលោហិតចេញពីគ្រប់រន្ធញើស ។ …
« ទោះជាយ៉ាងណាក៏ដោយ សូមព្រះវរបិតាបានសិរីល្អ ហើយ យើងបានទទួលទាន និងសម្រេចការរៀបចំរបស់យើងចំពោះកូនចៅមនុស្ស » ។
ព្រះអង្គសង្គ្រោះបានទទួលទានដើម្បីឲ្យយើងអាចប្រែចិត្ត ហើយត្រូវបានសម្អាត ។ ទ្រង់បានទទួលទានដើម្បីឲ្យយើងអាចត្រូវបានពង្រឹង ជួយសង្គ្រោះ និងជាសះស្បើយ ។ ទ្រង់បានទទួលទានដើម្បីលើកបន្ទុករបស់យើងឡើង ហើយប្រទានឲ្យយើងមានសេចក្តីសុខសាន្ត ។ ទ្រង់បានទទួលទាន ដើម្បីឲ្យយើងអាចត្រឡប់ទៅទីវត្តមាននៃព្រះវរបិតា ហើយរស់នៅជាមួយនឹងអ្នកដែលយើងស្រឡាញ់ជារៀងរហូត ។ ទ្រង់បានទទួលទានចេញពីសេចក្តីស្រឡាញ់សម្រាប់បងប្អូន និងខ្ញុំ ។
អត្ថន័យនៃរូបគំនូរនេះបានផ្លាស់ប្តូរបន្តិចម្តងៗ ព្រោះខ្ញុំបានផ្លាស់ប្តូរ ។ ទំនាក់ទំនង និងការយល់ដឹងរបស់ខ្ញុំអំពីព្រះអង្គសង្គ្រោះរបស់ខ្ញុំ និងអ្វីដែលទ្រង់បានធ្វើសម្រាប់ខ្ញុំកាន់តែជ្រាលជ្រៅ ។
របៀបដែលយើងមើលឃើញទ្រង់នៅក្នុងជីវិតរបស់យើងនឹងផ្លាស់ប្តូរ នៅពេលយើងជ្រើសរើសជឿលើទ្រង់ រៀនអំពីទ្រង់ ប្រែចិត្ត ហើយអនុញ្ញាតឲ្យភាពពិតនៃដង្វាយធួនរបស់ទ្រង់ឈោងទៅដល់គ្រប់ផ្នែកនៃជីវិតរបស់យើង ។
ខ្ញុំដឹងថា ព្រះវរបិតាសួគ៌របស់យើង និងព្រះអង្គសង្រ្គោះស្រឡាញ់បងប្អូន ។ ខ្ញុំដឹងថាព្រះយេស៊ូវគ្រីស្ទមានព្រះជន្មរស់ ទ្រង់គឺជាព្រះប្រោសលោះនៃពិភពលោក ។ ដង្វាយធួនរបស់ទ្រង់គឺសម្រាប់បងប្អូន ។ សូមឲ្យយើងទូលសុំដោយសេចក្តីជំនឿសម្រាប់អ្វីដែលយើងត្រូវការ បន្ទាប់មក « ឈប់សិន ចាំ [ ដើម្បី ] មើលសេចក្ដីសង្គ្រោះរបស់ព្រះយេហូវ៉ា » ។ នេះគឺជាការអធិស្ឋានរបស់ខ្ញុំ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។