Sawmill

Nang iutos sa mga Banal sa Kirtland, Ohio, na magtayo ng templo, kakaunti lamang ang kanilang mga mapagkukunan. Ang isang paraan para malutas nila ang problemang ito ay sa pamamagitan ng pagtatayo ng isang sawmill upang mabilis silang makagawa ng mga tabla na gagamitin sa pagtatayo ng templo. Noong 1833, isang sawmill ang itinayo sa Kirtland Flats sa dakong timog lamang ng Tindahan ni Newel K. Whitney. Labing-anim na ektarya ng lumang kagubatan ang binili rin upang makakuha ng mga troso. Si Joel H. Johnson, isang convert at millwright, ang inatasang mamahala sa lagarian.

Ang mga tabla mula sa sawmill ay ginamit para sa mga bubong, kabalyete, at tore ng Kirtland Temple. Ang mga pulpito ng priesthood ay malamang na ginawa sa woodshop sa sawmill bago inilagay sa templo. Gumamit ang mga karpintero ng katam na pinagagana ng tubig na nasa sawmill para putulin ang mga madetalyeng hulma na makikita sa mga gawa na yari sa kahoy sa templo. Marami sa mga lalaking nagtatrabaho sa sawmill ang nagbigay ng kanilang oras at trabaho sa proyektong pagtatayo ng templo. Matapos makumpleto ang templo, ginamit ang sawmill para makatulong sa pagkakaroon ng kita upang mabayaran ang utang para sa pagtatayo ng templo.

Ang sawmill sa Makasaysayang Kirtland ay isang gumaganang replika na itinayo sa lokasyon ng orihinal. Para sa mga kadahilanang pangkaligtasan, hindi namin pinapaandar ang sawmill. Ang mga bisita sa Makasaysayang Kirtland ay maaaring puntahan ang sawmill bilang opsiyonal na bahagi sa kanilang paglilibot. Ang tour ay magsisimula sa Historic Kirtland Visitors’ Center.

360° Walkthrough

Ano ang Aasahan

Ang palagarian o sawmill ay opsiyonal na bahagi ng guided tour na iniaalok ng mga missionary sa Makasaysayang Kirtland. Ang maikling landas (0.1 milya) na humahantong sa sawmill at ashery ay medyo padalisdis at natatakpan ng mga wood chips. Ang mangilan-ngilang mga ugat ng puno, hindi patag na daan, at iba pang mga balakid sa paglalakad ay maaaring magpahirap sa mga bisita na may mga limitasyon sa pagkilos.