Kirtland Temple

Noong Disyembre 1832, iniutos ng Panginoon sa mga Banal sa Kirtland, Ohio, na magtayo ng “isang bahay ng Diyos” (Doktrina at mga Tipan 88:119). Ito ay dapat maging isang “bahay ng panalanginan, isang bahay ng pag-aayuno, isang bahay ng pananampalataya, isang bahay ng pagkakatuto, isang bahay ng kaluwalhatian, isang bahay ng kaayusan, isang bahay ng Diyos.” Ang mga Banal sa Kirtland ay nagbigay ng kanilang oras at pera upang maitayo ang bahay ng Panginoon. Nanampalataya sila na tutulungan sila ng Panginoon na magawa ang Kanyang kalooban. Ang templo ay natapos noong huling bahagi ng 1835 at inilaan noong ika-27 ng Marso 1836 (Doktrina at mga Tipan 109).

Ang pananampalataya ng mga Banal ay ginantimpalaan sa pamamagitan ng pagbuhos ng mga espirituwal na manipestasyon sa natapos na Kirtland Temple. Sa paglalaan, sinabi ng ilang taong naroon na nakakita sila ng mga anghel. “Walang salitang makapaglalarawan sa mga pagpapakita ng langit sa di-malilimutang araw na iyon,” isinulat kalaunan ni Eliza R. Snow, na naroon sa paglalaan ng templo. “Nagpakita ang mga anghel sa ilan, habang ang lahat ng naroon ay nakadama ng kabanalan, at bawat puso ay ‘may galak na di-masayod at puspos ng kaluwalhatian.’”¹ Ang ilan sa labas ng templo ay iniulat na “[nakarinig ng kakaibang ingay sa loob ng templo], at [nakakita ng] maningning na liwanag tulad ng isang haligi ng apoy na nanahan sa ibabaw ng templo.”²

Noong ika-3 ng Abril 1836, isang linggo matapos ang paglalaan, halos isang libong Banal sa mga Huling Araw ang nagtipon para sambahin ang Panginoon sa Kirtland Temple. Matapos pangasiwaan ang sakramento, nagtungo sina Propetang Joseph Smith at Oliver Cowdery sa mga pulpito ng Melchizedek Priesthood at ibinaba ang tabing o kurtina para magdasal nang pribado. Matapos yumukod sa “taimtim at tahimik na panalangin,” isang pangitain ang nabuksan kung saan dinalaw sila ni Jesucristo, na nagpahayag na tinanggap Niya ang bahay na kanilang itinayo. Pagkatapos ay dinalaw sina Joseph at Oliver ng tatlong karagdagang sugo: sina Moises, Elias, at Elijah. Ibinigay sa kanila ni Moises “ang mga susi ng pagtitipon sa Israel” (Doktrina at mga Tipan 110:11), ibinigay ni Elias sa kanila “ang karapatang ipagkaloob ang mga natatanging pagpapala ng tipang Abraham,”^“3 at ibinigay sa kanila ni Elijah ang kapangyarihang magbuklod “upang ibaling ang mga puso ng mga ama sa mga anak, at ang mga anak sa kanilang mga ama” (Doktrina at mga Tipan 110:15).

Sa loob ng ilang dekada, iningatan at pinangalagaan ng Community of Christ ang Kirtland Temple. Noong Marso 2024, ang pangangalaga sa napakahalagang lugar na ito ay inilipat sa Ang Simbahan ni Jesucristo ng mga Banal sa mga Huling Araw.

Basahin pa ang tungkol sa Kirtland Temple sa kabanata 21 ng Mga Banal, Tomo 1.

---

1. Edward Tullidge, Women of Mormondom, 95.
2. History, 1838–1856, volume B-1 (1 Setyembre 1834–2 Nobyembre 1838), addenda, 4; www.josephsmithpapers.org
3. Russell M. Nelson, “Ang Walang Hanggang Tipan, Okt. 2022, 9; https://folky.shop/study/liahona/2022/10/04-the-everlasting-covenant?lang=tgl

Ano ang Aasahan

Ang mga guided tour sa Kirtland Temple ay nagsisimula sa Kirtland Temple Visitors’ Center at aabutin ng humigit-kumulang isang oras. Malilibot ng mga bisita ang lahat ng tatlong palapag ng templo upang matutuhan pa ang tungkol sa pagtatayo at paggamit nito noong dekada ng 1830.