Makasaysayanong Dapit sa Sagradong Kakahoyan

Usa ka adlaw sa tingpamulak niadtong 1820, ang 14 anyos nga si Joseph Smith nag-inusarang miadto niining kakahoyan duol sa iyang panimalay ug nag-ampo. Nabalaka sa iyang kaugalingong kahimtang atubangan sa Dios ug naglibog mahitungod sa daghan kaayong nagkalainlaing mga pagpangangkon sa lainlaing mga relihiyon sa iyang panahon, si Joseph nangayo og kaalam nga sa iyang pagtuo ang usa ka Dios lamang ang makahatag. Agig tubag sa iyang mapainubsanong pag-ampo, mipakita kang Joseph ang Dios nga Amahan ug si Jesukristo. Ang tubag nga Ilang gihatag ni Joseph niana nga adlaw nakapausab sa iyang kinabuhi, ug nagpadayon sa pag-usab sa kinabuhi sa minilyon ka tawo sa tibuok kalibotan.

Ang Makasaysayanong Dapit sa Sagradong Kakahoyan nagdapit sa tanan sa pag-adto ug pagsinati niini nga dapit diin ang batan-ong si Joseph Smith nakadawat nianang mahinungdanon nga tubag sa iyang pag-ampo. Karon, ang usa ka bahin sa umahan giatiman isip usa ka himsog, natural nga lasang aron sa pagrepresentar sa hilit nga kahimtang sa lasang diin miadto si Joseph aron mag-ampo. Ang liko-liko nga dalan ngadto sa dapit sa kalasangan nakahatag og daghang mga dapit alang sa mga bisita sa pagpamalandong sa mga hitabo nga nahitabo dinhi.

Niadtong Septiyembre 21, 1823, sa ibabawng andana sa Panimalay sa Pagkabata ni Joseph Smith, ang anghel nga si Moroni mihimo sa unang pagbisita kang Joseph Smith nianang gamay nga balay sa pamilya nga hinimo sa troso. Upat ka tuig ang milabay, si Joseph ug ang iyang asawa, si Emma, mipuyo sa mas dako nga Panimalay sa Umahan sa mga Smith dihang nadawat niya ang bulawang mga palid gikan sa Bungtod sa Cumorah. Walo ka indibidwal, nga karon nailhan isip ang Walo ka Saksi sa Basahon ni Mormon, gipakita sa bulawang mga palid dihang nagsingabot ang ting-init sa 1829. Karon, mahimo kang mobisita sa Umahan sa Pamilya Smith ug sa palibot diin didto kini nahitabo. Niana nga luna anaa karon ang Welcome Center, Panimalay sa Pagkabata ni Joseph (ang Balay nga Hinimo sa Troso), ang Panimalay sa Umahan sa mga Smith, usa ka Kamalig nga Giokan, ug ang usa ka Buhatanan og mga Barel. Adunay giniyahan nga mga paglibot nga misyonaryo sa mga bilding.