Dapit sa Bilanggoan sa Richmond

Ang dapit sa Bilanggoan sa Richmond nahimutang pipila ka bloke amihanan sa Balay Hukuman sa Distrito sa Ray. Niadtong Nobyembre 1838, si Joseph Smith ug ang ubang lider sa Ang Simbahan ni Jesukristo sa mga Santos sa Ulahing mga Adlaw gipaatubang tungod sa mga pasangil kalabot sa mga panagsumpaki sa lokal nga mga milisya sa Missouri. Tali sa mga pag-atubang sa korte, ang mga opisyal mitanggong ni Joseph ug laing napulo nga binilanggo diha sa Bilanggoan sa Distrito sa Richmond.

Ang Richmond mao ang sentro sa gobyerno sa Distrito sa Ray. Daghang lider sa milisya sa Missouri miabot gikan sa Distrito sa Ray, ug ang Gubat sa Crooked River, usa ka sangka tali sa gamay nga grupo sa mga Santos ug sa milisya, nahitabo sa Distrito sa Ray. Tungod niini nga mga koneksyon ang Richmond mao ang lohikal nga dapit nga himoan niining legal nga mga kahimoan. Human sa hapit usa ka bulan, ang korte mimando nga si Joseph Smith ug laing lima ka binilanggo nga ibalhin gikan sa Richmond ngadto sa Bilanggoan sa Liberty aron maghulat sa husay inig tingpamulak. Si Parley P. Pratt ug ang ubang upat ka lalaki nagpabilin sa Bilanggoan sa Richmond hangtod Hulyo 1839.

Si Parley P. Pratt, usa sa mga lalaki nga gipriso uban sa propeta, nahinumdom sa reaksyon ni Joseph ngadto sa mga gwardiya nga nanghambog mahitungod sa bayolente nga mga krimen nga ilang nahimo batok sa mga Santos sa Ulahing mga Adlaw didto sa Far West, Missouri. Si Parley misugilon giunsa ni Joseph pagkasaba ang mga gwardiya ug mimando nga hunungon nila ang paggamit sa terible nga pinulongan mahitungod sa pagpasakit sa mga Santos.

Magbasa pa og dugang mahitungod sa Bilanggoan sa Richmond sa Mga Santos, Volume 1, Kapitulo 31.

Unsa ang Mapaabot

Ang BIlanggoan sa Richmond wala na magbarog. Ang Mormon Missouri Frontier Foundation mibutang og usa ka timaan ug koral nga kahoy aron sa pag-ila sa dapit sa bilanggoan sulod sa palibot sa hilit nga kasilinganan. Limitado ra ang kaparkingan sa dalan.