Niadtong 1831, ang mga Santos sa Ulahing mga Adlaw nagsugod sa pagbalhin ngadto sa Missouri. Sulod sa sunod nga walo ka tuig, ilang gisunod ang balaanong pagpadayag sa pag-establisar og komunidad sa mga tumutuo nga gisunod sa karaang siyudad sa Enoch. Samtang nagtrabaho sila, ilang nakaplagan ang ilang kaugalingon nga nag-atubang og pagpanggukod gikan sa ilang mga silingan. Ang kabayolente sa mga dili miyembro ug panagsumpaki diha sa sulod sa Simbahan mipugos sa mga tawo sa pagbalhin gikan sa usa ka lalawigan ngadto sa lain ug sa pagsugod pag-usab. Sa kadugayan, ang gobernador mimando sa tanang Santos sa pagbiya sa Missouri. Tungod niining pagpapahawa, diyotay ra sa mga panimalay, mga umahan, ug mga negosyo nga ilang gitukod ang nagpabilin pa hangtod karon. Apan ang proseso sa pagpalambo sa pagtuo bisan pa sa oposisyon nakamugna og lawom nga pagtuo kang Jesukristo ug nakaaghat og dugang nga pagpadayag kabahin sa unsay gipasabot niini nga pag-establisar og Zion sa atong panahon.

Sa pagsugod sa ika-baynte ka siglo, ang Simbahan mihimo og mga eksibit ug mga monumento sa Independence, Far West, Adam-ondi-Ahman, Richmond, ug Liberty. Ang uban nakig-alayon sa Simbahan sa paghimo og mga monumento ug pagmarka sa mga lubnganan sa ubang dapit. Nag-uban, kining makasaysayanong mga dapit naghatag og ebidensiya sa hugot nga pagtuo, kaisog, ug sakripisyo nga gipakita sa nag-unang mga Santos sa Ulahing mga Adlaw sa pagkinabuhi sa ebanghelyo ni Jesukristo. Ang mga bisita niining sagrado nga mga dapit makakat-on og dugang sa mga istorya sa hugot nga pagtuo, paglahutay, ug paglaom nga nagpabiling sentro sa kasaysayan sa Simbahan ni Jesukristo sa mga Santos sa Ulahing mga Adlaw.