Far West

Ang dapit sa siyudad sa Far West nahimutang usa ka oras nga pagbiyahe sa amihanang-silangan sa Independence, Missouri. Bisan ang mga bilding ug mga estruktura sa pamuy-anan dugay nang gitangtang, ang Luna sa Far West Temple nagmarka nga sentro sa unsay gilaoman sa mga Santos nga mahimong talagsaon nga stake sa Zion. Ang hilom nga talan-awon sa gitamnan nga mga umahan nga naglibot sa dapit naghatag og usa ka malinawon nga kahimtang
sa pagpamalandong sa ilang mga sakripisyo sa pagtukod og Zion.

Human sa ilang pagpalagpot gikan sa Lalawigan sa Jackson, Missouri, ang mga Santos nagkinahanglan og bag-ong dapit nga pundokanan. Bisan nagkatibulaag sa silingang mga lalawigan, naglaom gihapon sila ug nagtinguha sa pagtukod og Zion. Hinoon, ang ilang mga silingan sa Missouri, nagpakabana gihapon sa mga Santos sa Ulahing mga Adlaw. Sa unsang paagi ang ilang mga pagtuo ug mga tradisyon nakaapekto sa lokal nga komunidad? Duna bay solusyon sa duha ka partido?

Niadtong 1836, gimugna sa magbabalaod sa estado sa Missouri ang Lalawigan sa Caldwell ug mihimo niini nga usa ka dapit nga kapuy-an sa mga Santos sa Ulahing mga Adlaw. Ang Far West mao ang labing dako nga pamuy-anan ug aduna sa tanang gikinahanglan sa lalawigan. Pagka 1838, ang Far West mitubo lapas pa sa orihinal niini nga 2.50 kilometro kwadrado nga luna nga naglakip sa 5.0 ka kilometro kwadrado, nga dunay 5,000 ka lumulupyo.

Si Joseph Smith mibalhin sa Far West niadtong Marso 1838. Sa misunod nga walo ka bulan, ang punoang buhatan sa Simbahan mibalhin gikan sa Ohio ngadto sa Missouri. Ang Ginoo mipadayag kang Joseph Smith og pito ka pagpadayag sa Far West nga sa kadugayan nahimong mga seksiyon sa Doktrina ug mga Pakigsaad. Kini nga mga pagpadayag naglakip sa direksiyon sa ngalan sa Simbahan (Doktrina ug mga Pakigsaad 115), ang katuyoan sa mga stake (Doktrina ug mga Pakigsaad 115), ang balaod sa ikapulo (Doktrina ug mga Pakigsaad 119), ug usa ka sugo sa Korum sa Napulog Duha sa pagsangyaw sa ebanghelyo didto sa Europe (Doktrina ug mga Pakigsaad 118). Agig dugang, ang Ginoo misugo sa mga Santos sa pagtukod og templo sa Far West. Niadtong Hulyo 4, 1838, sa pagtuman sa sugo sa Ginoo, ang mga Santos mibutang sa mga bato nga pamag-ang para sa templo diha sa sentro sa siyudad.

Ang mga relasyon tali sa mga Santos sa Ulahing mga Adlaw ug sa ilang kasilinganan mikunhod panahon sa ting-init ug sa tinglarag sa 1838, nga miresulta sa pag-isyu ni Governor Bogg og “mando sa pagpuo.” Niadtong Oktubre 31, 1838, gidakop sa mga militia sa Missouri ang mga lider sa Simbahan, lakip nila ni Joseph ug Hyrum Smith. Pagkasunod adlaw, ang siyudad misurender, ug mga pwersa sa militia milungkab sa mga butang, mga panimalay, ug kabtangan. Sa tunga-tunga niini nga kagubot, si Mary Fielding Smith, asawa ni Hyrum, nanganak kang Joseph F. Smith, ang ika-unom nga presidente sa Simbahan, sa iyang panimalay sa Far West.

Tungod niini nga pagpanglutos, kadaghanan sa mga Santos sa Ulahing mga Adlaw miabandonar sa Far West pagka Abril 1839 ug mibiya sa siyudad nga mamingawon. Ang upat ka bato sa pamag-ang lamang ang timailhan sa dapit sa templo. Agig katumanan sa sugo sa Ginoo, pito ka Apostoles mibalik sa Far West niadtong Abril 25, 1839, ug mipahinungod sa dapit sa wala pa mobiya alang sa ilang misyon ngadto sa Europe.

Niadtong 1840, si John Whitmer mibalik sa Far West ug mipalit sa yuta nga naglakip sa lote sa templo. Mipuyo siya didto sulod sa 38 ka tuig ug gilubong duol sa Kingston. Ang Simbahan nakaangkon sa propiyedad gikan sa pamilya Whitmer niadtong 1909. Niadtong 1968, usa ka monumento ang gipahinungod didto sa lote sa templo. Adunay magamit nga mga lamesa nga alang sa piknik ug mga kasilyas niini nga dapit.

Basaha ang dugang mahitungod sa Far West ug sa mga tawo nga nagpuyo didto sa Mga Santos Volume 1, Mga Kapitulo 24-33.