Pag-establisar sa Sentro nga Dapit sa Zion

Sa pipila sa labing unang narekord nga mga pagpadayag ni Joseph Smith, ang Ginoo mitudlo sa mga Santos sa Ulahing mga Adlaw sa “[pag]tinguha [sa] pagpatungha ug sa pagtukod sa kawsa sa Zion” (Doktrina ug mga Pakigsaad 12:6). Zion ang ngalan sa siyudad ni propeta Enoch. Gipasabot sa Daang Tugon nga “Si Enoch naglakaw uban sa Dios” ug nga “gikuha siya sa Dios” ug ang iyahang tibuok siyudad uban Kaniya ngadto sa langit (Genesis 5:24). Sa pagpadayag nga karon kabahin na sa Basahon ni Moises, ang Ginoo mitudlo pa og dugang ni Joseph Smith bahin ni Enoch ug sa iyahang siyudad. Ang Ginoo mitawag sa siyudad nga Zion tungod kay ang mga katawhan niini “usa sa kasingkasing ug usa sa hunahuna, ug nagpuyo diha sa pagkamatarong; ug walay kabos taliwala kanila” (Moises 7:18). Samtang sagopon sa mga disipulo ni Jesukristo ang mga baroganan gikan sa karaang siyudad sa Zion ni Enoch, nagtabang sila sa pag-andam sa kalibotan alang sa pagbalik sa Manluluwas.¹

Kini nga mga pagpadayag nag-aghat ni Joseph Smith ug sa ubang nag-unang mga miyembro sa Simbahan sa paghangyo sa Ginoo kon unsaon pag-establisar ang siyudad nga parehas sa siyudad ni Enoch. Sa pagtubag sa ilang mga pangutana, ang Ginoo mihatag og piho nga mga instruksiyon mahitungod sa kon asa ug unsaon sa pagtukod ang Zion. Siya usab mipasabot sa mga sangpotanan sa pagsupak sa Iyang mga pulong.

Usa sa unang mga direksiyon mao ang pagpakigbahin sa ebanghelyo ngadto sa Lumad nga mga tawo nga nanimuyo sa kasadpang bahin sa Suba sa Missouri. Kini nga dapit kabahin sa teritoryo sa Estados Unidos apan dili pa sakop sa bisan unsang estado. Si Oliver Cowdery ug upat sa ubang mga misyonaryo midawat sa buluhaton. Kini nga misyon mao ang unang giorganisar nga pagsulay sa Simbahan sa pagpakigbahin sa ebanghelyo ngadto sa mga tawo kansang mga pinulongan ug kultura nga gituhoan lahi kaysa mga misyonaryo.

Niadtong Hulyo 1831, si Joseph Smith ug ang ubang mga miyembro sa Simbahan mibisita sa mga misyonaryo sa Missouri. Ang labing duol nga siyudad mao ang Independence, sa Lalawigan sa Jackson. Samtang didto, ang Ginoo miila sa lokasyon sa dapit nga sentro sa Zion sa Independence (Doktrina ug mga Pakigsaad 57:2). Gisugo sa Ginoo ang Iyang katawhan sa pagpundok didto. Gitawag niya si Bishop Edward Partridge nga mopalit sa propiyedad sa kasadpang bahin sa balay hukmanan. Ang yuta alang sa pagtukod og 24 ka templo—sagrado nga mga bilding alang sa pagpahigayon sa buhat sa Simbahan ni Jesukristo sa Zion.

Ang una niining 24 ka templo natudlo isip ang balay sa Ginoo. Si Joseph Smith nakadawat og dugang pagpadayag nga nagtudlo sa lokasyon niini nga templo. Niadtong Agosto 3, 1831, mibutang si Joseph sa unang bato sa bag-ong templo. Sa ulahi, ang Propeta nag-andam og mapa alang sa siyudad. Siya usab mipasabot nga ang Zion labaw pa sa sentro nga dapit. “Kon kini nga kwadrado [o plat] masukod ug mapuno,” siya misulat sa ngilit sa dokumento sa mapa, “sukdon ang lain sa samang paagi, ug busa pun-on ang kalibotan niining kataposang mga adlaw … kay kini mao ang Siyudad sa Zion” (Joseph Smith Papers).

Sa Missouri, ang mga Santos nakat-on usab unsaon sa pag-atiman sa matag usa ug sa kalibotan mismo pinaagi sa pag-ampo, pagpuasa, ug sa pagtahod sa Igpapahulay. Ang Ginoo mitudlo nga kini makahiusa ug makaandam nila alang sa umaabot nga mga panalangin, lakip ang kalinaw ug kinabuhing dayon (Doktrina ug mga Pakigsaad 59:23).

Daghan ang misunod niini nga tambag ug nagtinguha nga mahimong putli sa kasingkasing samtang sila miserbisyo niadtong anaa sa ilang palibot. Apan samtang nagkadaghan ang mga miyembro nga namuyo sa dapit, nagkagrabe ang tensiyon sa mga silingan. Ang nag-unang mga lumulupyo nahadlok nga ang mga Santos sa Ulahing mga Adlaw nga sa kadugayan mas modaghan pa nila. Ilang gibati nga ang relihiyon mitanyag sa katawhan niini og usa ka lahi nga panglantaw sa demokrasiya, ug ilabi na silang nabalaka nga ang mga Santos mousab sa anaa na nga mga balaod sa pagpanalipod sa pag-ulipon diha sa estado.

Sa ulahing bahin sa 1833, mga grupo sa armadong mga Santos ug ilang mga silingan bangis nga nagkabingkil. Kini nga pag-atake mipugos sa mga Santos sa pag-abandona sa ilang mga yuta ug personal nga mga propiyedad sa Lalawigan sa Jackson. Samtang kini nga mga lihok mga ilegal ug dili makataronganon, ang Ginoo mipasabot usab nga Siya “mitugot sa kasakit nga moabot sa [mga Santos]. . . . agig sangputanan sa ilang mga pagpakasala,” lakip ang “mga pagtay-og ug mga panagbingkil, ug mga kasina, ug mga panagbangi, ug kahigal, ug maibogon nga mga tinguha,” diin “[nakahugaw] nila ang ilang mga kabilin” sa Zion (Doktrina ug mga Pakigsad 101:2, 6). Ang ilang mga kinaiya layo ra kaayo sa sumbanan sa pagkahimong “putli og kasingkasing.”

Ang kapintas sa manggugubot nga panon nagpadayon ug ang mga Santos nag-antos sa pagpadayon, ang Ginoo mipasalig kanila nga ang ilang mga paningkamot sa pag-establisar sa Zion, bisan unsa pa ka dili hingpit, dili kini kawang. “Ang Zion,” Siya mipahayag, “dili pagakuhaon sa iyang dapit, bisan pa og ang iyang mga anak nagkatibulaag” (Doktrina ug mga Pakigsaad 101:17).

Dili makatukod og dapit sa sentro sa Zion sa Independence, gitutokan ni Joseph ang pag-etablisar sa mga stake sa Zion ug pagtukod og mga templo bisan asa. Iyang gisugdan sa Kirtland, Ohio, ug dayon mikatag ngadto sa Caldwell ug Daviess nga mga Lalawigan sa Missouri.

Ang buhat sa pagtukod sa Zion nagpadayon karon sa gatosan ka templo ug liboan ka mga stake sa tibuok kalibotan. Bisan asa ang mga Santos sa Ulahing mga Adlaw magpundok ubos sa direksiyon sa buhing mga propeta sa paghimo ug paghupot sa sagradong mga pakigsaad, sila nag-andam sa ilang kaugalingon alang sa Ikaduhang Pag-anhi ni Jesukristo, ang Hari sa Zion.