Dapit sa Buhatan sa Imprintahanan sa Independence

Niadtong Hunyo 1831, Ang Ginoo mipadayag ngadto ni Propeta Joseph Smith nga si William W. Phelps, usa ka bag-o nga kinabig sa Kirtland, kinahanglan nga mobalhin ngadto sa Distrito sa Jackson, Missouri:

“Sa pagtabang sa akong sulugoon nga si Oliver Cowdery sa paghimo sa buluhaton sa pag-imprinta, ug sa pagpili ug pagsulat og mga basahon alang sa mga tulunghaan niini nga simbahan, nga ang gagmay nga mga bata usab makadawat og mga panudlo sa akong atubangan nga makapahimuot kanako.” (Doktrina ug mga Pakigsaad 55:4).

Nagsunod sa sugo sa Ginoo, si Phelps mibiyahe ngadto sa Cincinnati, Ohio, diin siya mipalit og imprintahanan ug dayon midala niini ngadto sa Missouri. Niadtong Hunyo 1832, gimantala niya ang unang isyu sa The Evening and the Morning Star Niini nga isyu, si Phelps mipahayag sa katuyoan sa papel isip “ang higala sa tawo, sa pagdani kaniya sa pagduol ngadto sa Dios ug mabuhi, sa dili pa ang mahinungdanon ug makahahadlok nga adlaw sa Ginoo nga mosilhig sa yuta pagkadaotan niini.” Ang bugtong relihiyoso nga pamantalaan sa Distrito sa Jackson, The Star, mihatag sa Simbahan og tingog ngadto sa publiko.

Ang mga Artikulo nga namantala sa The Star nakapaalarma sa lokal nga mga nanimuyo kinsa nahadlok sa nagtubo nga presensya sa mga Santos sa Ulahing mga Adlaw sa Distrito sa Jackson. Niadtong Hulyo 20, 1833, pipila niini nga mga nanimuyo milungkab sa bilding, milabay sa imprintahan ug sa gipang-imprinta ngadto sa dalan.

Nianang higayona, nahuman si Phelps sa pag-imprinta sa pipila sa Basahon sa mga Sugo, apan ang basahon wala pa makompleto. Ang pipila ka miyembro sa Simbahan mirisgo sa bayolente nga pagbalos gikan sa ilang mga silingan sa pagluwas sa mga pahina sa Basahon sa mga Sugo. Kauban nila mao ang managsoong babaye nga sila si Mary Elizabeth ug Caroline Rollins. Gipanguha nila ang nagkatag nga mga pahina sa Basahon sa mga Sugo ug mitago uban niini duol nga kamaisan. Kini nga mga pahina sa wala madugay giapil ngadto sa 1835 nga Doktrina ug mga Pakigsaad.

Samtang milayas ang mga santos gikan sa Distrito sa Jackson, ang pamilyang Phelps mibalik ngadto sa Ohio, diin si William mipadayon sa pagmantala alang sa Simbahan.

Magbasa og dugang mahitungod sa buhatan sa imprintahan diha sa Mga Santos, Volume 1, Kapitulo 14, 16.

Unsa ang Mapaabot

Bisan og ang opisina sa imprintahan wala na, usa ka bronse nga plake nagtimaan sa lugar. Dinhi kadto nga ang mga tawo misugod sa pagmantala og mga kopya sa mga pagpadayag ni Joseph Smith isip ang Basahon sa mga Sugo.