Lote sa Independence Temple

Sa pagsunod sa pagpadayag (Doktrina ug mga Pakigsaad 57:1—3), walo ka elder nagpundok niadtong Agosto 3, 1831, ug si Sidney Rigdon mipahinungod sa yuta diin mobarog ang siyudad sa Zion. Dayon si Joseph Smith mibutang og usa ka bato sa amihanang silangan nga bahin sa gihunahunaan nga templo sa ngalan sa Ginoo. Pagkahuman, si Sidney Rigdon “mipahayag nga kini nga luna sa yuta sa kinatibuk-an gipahinungod ngadto sa Ginoo sa kahangtoran.” Mao kini ang unang dapit nga gipahinungod sa Simbahan alang sa usa ka templo. Alang sa mga Santos sa Ulahing mga Adlaw ug daghan pang uban kinsa nagtuo sa mapanagnaong pangalagad ni Joseph Smith, ang kaimportante sa templo nagpabilin nga dili mausab.

Ang lote sa templo kabahin sa usa ka dako, nga 63 ka ektarya nga gipalit nga yuta nga gihimo niadtong Disyembre 19, 1831.. Ang siyudad sa Independence milapad sa kasadpan ug karon naglakip sa tibuok 63 ka ektarya, apan ang mga Santos sa Ulahing mga Adlaw milayas sa Distrito sa Jackson sa wala pa sila makatukod og usa ka templo.

Ang yuta alang niining unang templo nagsukod og mga 300 ka pye por 200 ka pye (mga 90 ka metro por 60 ka metro). Ang disenyo sa Independence Temple susama sa Kirtland Temple. Ang mga plano naghulagway sa usa ka bilding nga 87 ka pye ang gitas-on ug 61 ka pye ang gilapdon (mga 28 ka metro ang gitas-on ug 19 ka metro ang gilapdon) nga adunay inskripsyon nga “Pagkabalaan ngadto sa Ginoo” sa atubangan. Ang Ginoo mipahayag niini nga usa ka “dapit nga kapasalamatan alang sa tanang santos, ug isip usa ka dapit alang sa pagpanudlo sa tanan nga gitawag ngadto sa buhat sa pangalagad” (Doktrina ug mga Pakigsaad 97:13).

Ang lote sa templo atbang sa dalan gikan sa Community of Christ Temple ug tupad sa Sentro alang sa mga Bisita sa Independence sa usa sa labing taas nga mga lugar sa dapit. Nahimutang tali sa tulo ka lain-laing simbahan, ang lote sa templo nagpabilin nga usa ka sagrado nga dapit.

Unsa ang Mapaabot

Ang lote kasamtangan nga gipanag-iya sa Church of Christ, nga nailhan sa una nga Church of Christ (Lote sa Templo) Ang ilang meetinghouse anaa tupad sa lote nga gigahin gihapon alang sa templo. Ang mga bisita mahimong mosuhid sa natabunan sa balili nga mga nataran sa gawas sa bilding ug magpalitrato. Kaparkingan ug mga kasilyas anaa sa Independence Visitors’ Center.