Luna sa Far West Temple

Ang Luna sa Far West Temple nagmarka sa sentro sa naandan nga usa ka dako nga siyudad nga dunay liboan ka residente. Ang templo, bisan tuod wala makompleto, maoy usa ka sentro sa nag-unang mga Santos. Bisan asa manimuyo ang mga Santos, ang Ginoo mopadayag pinaagi sa Iyang propeta sa lokasyon sa usa ka templo, kasagaran diha sa sentro sa siyudad. Karon, usa ka monumento ug ang upat ka batong pamag-ang sa templo ang naghandom sa mga paningkamot sa mga Santos nga magtukod og stake sa Zion ug sa mga pagpadayag nga nadawat dinhi.

Human sa kapintas sa mga manggugubot nga panon nga mibabag sa mga paningkamot sa pagtukod og mga templo sa Independence, Missouri, niadtong 1833, ang mga Santos sa Ulahing mga Adlaw mitutok sa ilang mga paningkamot sa pagtukod sa balay sa Ginoo sa Kirtland, Ohio. Ang Kirtland Temple nahuman ug gipahinungod niadtong Marso 27, 1836. Niadtong 1838, ang Ginoo misugo nga usa ka bag-ong templo ang tukoron diha sa sentro sa Far West sa Lalawigan sa Caldwell, Missouri. Pagka Hulyo 4, 1838—Independence Day sa Estados Unidos—gidumala ni Joseph Smith ang seremonya sa pagbutang sa upat ka bato sa pamag-ang diha sa publiko sa tunga-tunga sa malamboon nga siyudad. Liboan sa mga tumatan-aw ang nakasaksi sa seremonya.

Ang mga paningkamot sa pagtukod sa templo mubo lang nga panahon. Ang panagbangi sa lokal nga mga taga-Missouri maoy hinungdan nga mibiya ang mga Santos sa Ulahing mga Adlaw sa Far West niadtong Nobiyembre 1838. Mga bulan human mibiya ang dakong pundok sa mga Santos, lima ka sakop sa Korum sa Napulog Duha ka Apostoles ug ang uban mibalik ngadto sa dapit sa templo agig pagtuman sa sugo sa Ginoo (tan-awa sa Doktrina ug mga Pakigsaad 115:11; 118:5). Pagka Abril 26, 1839, ang mga Apostol mibalik sa dapit ug mi-orden ni Wilford Woodruff ug George A. Smith nga mopuli sa mga nabakante diha sa korum sa pagpaabot sa usa ka misyon sa Great Britain.

Basaha ang dugang mahitungod sa panahon sa mga Santos sa Far West sa Mga Santos, volume 1, mga kapitulo 24–33.

Unsay Malaoman

Ang Luna sa Far West Temple nagpakita sa gikoral nga dapit nga dunay monumento sa pagpahinumdom sa mga panghitabo nga nahitabo didto. Mga kasilyas, piknik nga dapit, ug umahan nga naglibot sa gikoral nga dapit. Walay sentro sa mga bisita ug mga misyonaryo, busa ang tanang kasinatian sa dapit kinaugalingon nga paggiya. Pangitaa ang upat ka bato sa pamag-ang sa templo sulod sa gikoral nga dapit. Ang mga bisita mogahin og mga 30 minutos diha sa dapit.