Moʻunga ko Komolá

Naʻe mahuʻinga e ngaahi meʻa ne hoko ʻi he Moʻunga ko Komolá ki hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI hono fakahinohinoʻi ʻe he ʻāngelo ko Molonaí ʻa Siosefa Sāmitá, naʻá ne maʻu ʻa e ʻū lauʻi peleti koulá ʻi he moʻungá ʻi he ʻaho 22 ʻo Sepitema,1823. Naʻe fetaulaki leva ʻa Siosefa mo e ʻāngeló ʻi he ʻaho tatau ʻi he taʻu ʻe tolu hono hokó kae ʻoua kuo fakangofua ia ke ne maʻu ʻa e ʻū lauʻi peletí ʻi he ʻaho 22 ʻo Sepitema 1827. Naʻe liliu ʻe he Palōfita ko Siosefa Sāmitá ʻa e Tohi ʻa Molomoná mei he ʻū lauʻi peleti ko iá, ʻi he meʻafoaki mo e mālohi ʻo e ʻOtuá. ʻOku kau ʻi he feituʻu [fakahisitōlia ko iá] ha ngaahi hala kehekehe, ko e Maka Fakamanatu ʻo e ʻĀngelo ko Molonaí, mo ha senitā takimamata.

Neongo ʻoku ʻiloa ia ko e Moʻunga Komolá, ka naʻe ʻikai fakaʻaongaʻi e hingoá ni ʻi ha taimi hili e ngaahi meʻa mahuʻinga ne hoko ʻi he 1823–1827. ʻI he konga kimui ʻo e senituli hongofulu mā hivá, naʻe ui ia ʻe ha kakai tokolahi ʻo e vahefonua Ueini mo ʻOnateleó ko e “Moʻunga Tohi Tapu Koulá” mo e “Moʻunga Māmongá.” Ka neongo ia, naʻe tokolahi ha kāingalotu he kamataʻanga ʻo e Siasí, kau ai ha niʻihi ʻo e ngaahi kaungāmeʻa mamae ʻo Siosefa Sāmitá mo e kau mēmipa ʻo e fāmilí, naʻa nau ui ʻa e moʻungá ko “Komola” ʻi ha ngaahi taimi kehekehe ʻi he moʻui ʻa Siosefa Sāmitá. ʻOku ngali moʻoni ʻeni koeʻuhí naʻe tohi ʻe Molonai, ko e tokotaha tohi fakaʻosi ʻo e Tohi ʻa Molomoná mo e ʻāngelo naʻe fetaulaki mo Siosefa Sāmitá, te ne “hiki pea fufuuʻi ʻa e ngaahi lekōtí ʻi he kelekelé” ʻi he ʻosi pē ʻene tānaki atu ha ngaahi lea siʻi pē ʻaʻana (vakai, Molomona 8:4, 14). Koeʻuhí ʻoku ʻasi ʻi he potufolofola ko ʻení e fakamatala ʻa Molonai ki he tau fakaʻosi ʻi he vahaʻa ʻo e kau Nīfaí mo e kau Leimaná, ʻa ia naʻe hoko ʻi ha moʻunga naʻe ui ko Komolá, naʻe pehē ʻe ha tokolahi naʻe tanu ʻe Molonai ʻa e ʻū lauʻi peletí ʻi he moʻunga tatau pē (vakai, Molomona 8:2–4) pea ko e feituʻu ia naʻe maʻu ai ʻe Siosefa kimui ange ʻa e lekōtí. ʻOku ʻuhinga foki e taha ʻo e ngaahi tohi ʻa Siosefa Sāmita kimui angé ki he “ongoongo fakafiefia mei Komolá” pea mo e ʻaʻahi mai ʻa “Molonai, ko e ʻāngelo mei he langí” (Tokāteline mo e Ngaahi Fuakava 128:20). Neongo ʻoku ʻikai “ha fakamatala ʻa e Siasí ki ha feituʻu fakasiokālafi pau ʻo e ngaahi meʻa ne hoko ʻi he Tohi ʻa Molomoná ʻi he ongo ʻAmeliká he kuonga muʻá,” ka ʻoku fakamahinoʻi ʻe he ngaahi lekooti naʻe tauhi ʻe Siosefa Sāmita mo hono kaungā-ngāué ko e moʻunga ko ʻení ʻa e feituʻu naʻe fakataha ai ʻa Siosefa mo Molonaí, pea ko e feituʻu ia naʻe maʻu ai ʻe Siosefa ʻa e ʻū lauʻi peleti ʻo e Tohi ʻa Molomoná (vakai, Gospel Topics: Book of Mormon Geography).