Maka Fakamanatu ʻo e ʻĀngelo ko Molonaí

Meimei ʻi he hili pē hono fakatau ʻe he Siasí ʻa e Moʻunga Komolá ʻi he 1928, naʻe kamata fakakaukau ʻa e tangata tā tongitongi ko Toalaifi Kanāpusi ki ha fuʻu maka fakamanatu ʻe hoko ko ha fakamoʻoni ki he ngaahi meʻa naʻe hoko ai ʻi he taʻu ʻe 100 tupu kimuʻá. ʻOku lahi hake ʻi he fute ʻe 30 (mita ʻe 10) ʻa e māʻolunga ʻo e maka fakamanatú. Ko ha ʻīmisi ʻokú ne fakafofongaʻi ʻa e ʻāngelo ko Molonaí ʻokú ne vakai atu ki māmani ʻi heʻene tuhu hake ki he langí ʻaki hono nima toʻomataʻú pea ʻokú ne pukepuke ʻa e lekooti fakakuongamuʻa naʻe hiki ʻi he ʻū lauʻi peleti koulá ʻi hono toʻohemá. ʻOkú ne tuʻu ʻi he tumutumu ʻo ha pou kalānite ʻoku māʻolunga pea mo e huelo ʻo e māmá ʻi hono fofongá. ʻOku ʻi he tapa ʻe tolu ʻo e tuʻuʻangá ʻa e ngaahi fakatātā polonise ʻo e ngaahi meʻa naʻe hokó ʻo fakafehokotaki ki he ʻū lauʻi peleti koulá. ʻOku ʻi he tafaʻaki fakatokelaú ʻa e ngaahi lea naʻiʻnaʻi ʻa Molonai ke lau ʻa e Tohi ʻa Molomoná pea fehuʻi ki he ʻOtuá pe ʻoku moʻoni ʻa e ngaahi lea ʻoku ʻi aí.

Naʻe lahi hake ʻi he taʻu ʻe nima hono faʻu ʻe Kanāpusi ʻa e maka fakamanatú mo tokangaʻi hono ngaohí. Naʻá ne fakamoʻoni ki he fāmili ofí mo e ngaahi kaungāmeʻá ko ha aʻusia fakalaumālie moʻoni ia. Naʻá ne ongoʻi naʻe tokoniʻi ia ʻe ha kau ʻāngelo ʻi heʻene ngāue ke tā tongitongi ʻa e ʻāngelo ko Molonaí. Makehe mei he ngaahi fakatātā kehe ʻo e talafekau fakalangi ko ʻení, naʻe loto ʻa Kanāpusi ke ʻasi foki mo ha taki mālohi mo fakakautau ʻaki ha fofonga molumalu mo fakangeingeia. Naʻá ne fili ʻa ʻEleuini Kalake, ko ha tokotaha tō piliki ʻi Sōleki Siti, ko ʻene sīpinga ia ki he ongo nimá mo e sinó. Naʻe hoko e tamai ʻa ʻEluini ko Toni Kālosi Kalaké ko e sīpinga ki he fofonga ʻo e ʻāngeló. Naʻe tui kotoa ʻa e kau tangata ko ʻení ko e ola ʻo e ngāué ko ha tokoni fakalangi.

Naʻe fakatapui ʻe Palesiteni Hiipa J. Kalanite ʻa e maka fakamanatú ʻi he ʻaho 21 ʻo Siulai 1935.

Ko e Meʻa ke ʻAmanaki Ki Aí

ʻOku ʻi ai ha fanga kiʻi hala ʻe tolu ʻoku lele mei he Senitā maʻá e kau ʻAʻahi ki he Moʻunga Komolá ki he Maka Fakamanatu ʻo e ʻĀngelo ko Molonaí ʻi ʻolunga ʻi he Moʻunga Komolá. ʻOku ʻi ai ha ngaahi sitepu takai ʻi he maka fakamanatú. ʻE lava ke kole ʻe he kau ʻaʻahi ʻoku ʻi ai ʻenau ngaahi palopalema he feʻaluʻakí ke ʻave kinautolu ki ʻolunga ki he moʻungá ʻi ha pasi.