Nofoaga o le Malumalu i Sisifo Mamao

O le Nofoaga o le Malumalu o Sisifo Mamao ua faailoga ai le mea na avea muamua ma aai tele ma e faitau afe o ona tagata. O le malumalu, e ui lava e le’i maea, o se taulaiga tupito lea mo uluai Au Paia. Soo se mea lava e faamautu i ai le Au Paia sa faaalia i ai e le Alii e ala i Lana perofeta le nofoaga o se malumalu, e masani lava o le totonugalemu o le aai. I le aso, o se maafaamanatu ma maatulimanu e fa o le malumalu o loo faamanatu ai taumafaiga a le Au Paia e fau se siteki o Siona ma faaaliga na maua ai iinei.

I le mavae ai o le faalavelaveina e tagata leaga o taumafaiga e fau malumalu i Initipene, Misuri, i le 1833, sa taulai atu taumafaiga faufale a tagata o le Au Paia o Aso e Gata Ai i le fauina o le fale o Ieova i Katelani, Ohaio.. Na maea ma faapaiaina le Malumalu o Katelani i le aso 27 o Mati, 1836. I le 1838, sa poloaaina ai e le Alii ia fau se malumalu fou i le ogatotonu o Sisifo Mamao i le Itumalo o Caldwell, Misuri. I le aso 4 Iulai, 1838—le aso o le Tutoatasi i le Iunaite Setete—na vaaavaaia ai e Iosefa Samita le sauniga o le faataatitiaina o maatulimanu e fa i le faatafafa lautele i le totonugalemu o le aai ua faatupulaia. E faitau afe ma afe tagata sa molimauina le sauniga.

E lei umi ae mou atu taumafaiga e fau le malumalu. O feeseeseaiga ma tagata o Misuri na afua ai ona tuua e le Au Paia ia Sisifo Mamao ia Novema 1838. I le faitau masina talu ona tuua e le tino autu o le Au Paia, sa toe foi ane uso e toalima o le Korama o Aposetolo e Toasefululua ma isi i le nofoaga o le malumalu i le usiusitai i le poloaiga mai le Alii (tagai Mataupu Faavae ma Feagaiga 115:11; 118:5). I le aso 26 Aperila, 1839, sa toe foi ai Aposetolo i le nofoaga ma faauuina ai Uilifoti Uitilafi ma Siaosi A. Samita e faatumu avanoa o le korama ma le faamoemoe mo se misiona i Peletania Tele.

Faitau atili e uiga i le taimi o le Au Paia i Sisifo Mamao i le Au Paia, voluma 1, mataupu 24–33.

O Mea e Faamoemoe i ai

O le nofoaga o le Malumalu o Sisifo Mamao o loo i ai se vaega ua fai le pa ma se maafaamanatu e faamanatu ai mea na tutupu iina. O i ai falelēta’ua, o se vaega e tafafao ai, ma faatoaga o loo siomia ai le vaega ua pāina. E leai se nofoaga autu mo tagata asiasi mai o i ai ni faifeautalai, o le mea lea, o aafiaga uma i le nofoaga e taiala e le tagata lava ia. Vaavaai mo matulimanu e fa o le malumalu i totonu o le eria o loo sio e le pa. E faaalu e tagata asiasi le 30 minute i le nofoaga.