Fale a le Au Aposetolo

I le tautotogo o le 1837, na faamalamalama atu ai e Iosefa Samita ia Heber C. Kimball e faapea, na valaauina o ia e taitai le vaega muamua o faifeautalai i Egelani. Sa ō faatasi atu le au uso Aposetolo o Orson Hyde ma Heber. Ina ua mavae se uunaiga faaleagaga, sa la talai atu ma a laua soa i Preston ma le vanu o le Vaitafe o Ribble i Lancashire. O lenei taumafaiga muamua na faatulagaina ai le tulaga mo le tele o galuega faafaifeautalai a o siitia atu le Ekalesia i Navu, Ilinoi.

A o i ai Heber Kimball ma Orson Hyde i Egelani, sa sosolo atu i Amerika se faafitauli tau tupe a le atunuu, ma sa le manuia le faletupe na lagolagoina e le Ekalesia i Katelani. E toatele tagata, e aofia ai tagata o le aiga o Marinda Hyde, na tuua le Ekalesia i le le fiafia. Sa tusi atu Marinda i lona toalua e uiga i le vevesi ma le fenumiai o na taimi ona faasoa atu lea o lana lava molimau:

”La’u Pele Orson, ou te le iloa le mea e tusi pe ana i ai so’u taimi ma le avanoa, aua o taimi faapenei i Katelani e te le’i molimauina lava e pei ona matou molimauina nei. Ae, ua ou aoaoina mai aafiaga e tatau ona tatou mataala ma tatalo ma iloa mo i tatou lava, aua e foliga mai ua leai se talitonuga o le tasi i le isi.”¹

O le misiona lona lua a Heber C. Kimball i atunuu mamao na toe tofia e ala i faaaliga.² O le taimi lea, na malaga faatasi ai ma ia isi Aposetolo e toaono mai Sisifo Mamao, Misuri, i Liverpool ma amata ona faasalalau atu le talalelei i Atumotu o Peretania atoa. I lenei vaega sa i ai Polika Iaga, Ioane Teila, Pale ma Orson Pratt, Siaosi A. Samita, ma Uilifoti Uitilafi, ae leai Orson Hyde. Na sau Orson i Egelani mulimuli ane, ia Aperila 1841. O le masina lena, i se konafesi a le Ekalesia i Manaseta, na iloa ai e Orson ua valaauina Uiliata Risati i le Korama a le Toasefululua, e silia ma le 7,000 tagata ua papatisoina, ma e toatele aiga ua faia ni fuafuaga e faapotopoto i Navu.

Sa moomoo Vilate Kimball mo se tala e uiga i lana tane i Egelani. Ia Tesema 1840, sa ia feiloai ai i nisi o tuafafine Peretania o e na faatoa taunuu i Navu. Sa ia tusia e faapea ”e lei sili atu lava lona fiafia i se isi asiasiga. … Sa latou foliga fiafia e vaai mai ia te au e pei lava na matou masani i taimi uma.”³ Sa faatagaina e Vilate ia Elizabeth Ravenscroft e 21 tausaga le matua e nofo i le fale o Kimball, ma sa ”matuai faamafanafanaina faatasi” nei tamaitai e toalua a o faatalitali Vilate mo le toe foi mai o Heber.

Ina ua maea le konafesi ia Aperila, a o sauni Heber Kimball, Uilifoti Uitilafi, ma isi Aposetolo e toe foi atu i aiga, sa malaga na o Orson Hyde i Europa i Palesitina. I le ala, sa feiloai ai o ia ma taitai faalelotu ma faasoa atu le faamoemoega o lana misiona. I le aso 24 o Oketopa, 1841, sa ia a’e ai i le Mauga o Olive ma faataunuuina lona valaauga e faapaia Ierusalema mo le faapotopotoina o Isaraelu i aso e gata ai, e pei ona valoia e perofeta anamua ma aso nei.

Ua Saunia Mo le Aiga

A o toesea Orson, sa auai Marinda i le Aualofa a Tamaitai Navu ma auai i taumafaiga e tausia i latou sa manaomia le fesoasoani. I le talisapaia o le misiona a Orson i Palesitina, na foai atu ai e le Au Paia o Aso e Gata Ai o Navu galuega ma sapalai e fausia ai se fale mo le aiga o Hyde.

O se misiona mulimuli i atunuu i fafo na oo mai i tausaga mulimuli ane, ina ua mavae le maliu o Iosefa Samita. A o faapotopoto le Korama a Aposetolo e Toasefululua i Navu, sa latou talanoaina ni auala e fesoasoani ai i tagata o le Ekalesia o e sa nonofo mamao ese mai le laumua ia tumau i le tuuto atu i le talalelei. Sa latou malilie e tatau ona alu se tasi o i latou i Europa e pulefaamalumalu i paranesi ua faatupulaia iina. Sa filifilia Uilifoti Uitilafi e auauna atu. Sa valaauina foi lona faletua o Fipe e o faatasi ma lana tane o se faifeautalai, ma faatuina ai se faataitaiga mo le taitaiga i le lumanai o misiona i le Ekalesia.

Ua Saunia Mo le Aiga

Sa tausia e tagata o le aiga i Connecticut ma tagata fou liliu mai i Egelani le fanau a Woodruff a o o ese o latou matua mai le fale. O le tuafafine o Uilifoti o Eunice Webster ma lona aiga sa nonofo i le fale o Woodruff e lei maea i Navu. A o avea ai ma soa misiona a lana tane, sa fanauina ai e Fipe Uitilafi se atalii e igoa ia Iosefa.

O fale o Orson Hyde, Heber C. Kimball, ma Uilifoti Uitilafi ua faaalia ai na o ni nai faataitaiga o auala na galulue ai le Korama a le Toasefululua e faataunuu le poloaiga a le Atua e fai Navu o se maatulimanu o Siona ma fesoasoani e faapotopoto mai Isaraelu ua faataapeapeina. O le faatuatua, lototele, ma le ositaulaga na faaalia e nei Aposetolo e malaga atu ai i atunuu mamao sa tutusa lava ma tuaoi ma tagata o le aiga o e sa ola i la latou tapuaiga i le aiga.