Fale o Heber ma Vilate Kimball

I lo la fale, sa faaalia ai e Heber ma Vilate Kimball le faatuatua e manaomia e mulimuli ai i le Perofeta o Iosefa Samita. Sa galulue Heber ma Vilate i faaaliga ma galulue faatasi e fausia le malo o le Atua, e tusa lava pe manaomia ai ni osigataulaga taua mo i laua ma lo la aiga.

Na faamaeaina le fale o kimball i le aso 12 o Novema, 1845, ina ua mavae le ono masina o fausiaina. O lenei fale piliki tele na suia ai se fale laupapa sa nonofo ai le aiga talu mai le 1841. Peita’i, e le’i umi se taimi na fiafia ai le ’au Kimball i lo latou fale fou. E na o le tolu masina mulimuli ane, ia Fepuari 1846, na latou tuua ai Navu faatasi ma le toatele o isi Au Paia o e na malaga atu mo sisifo.

O Heber C. Kimball o se tasi o le uluai Korama a Aposetolo e Toasefululua a le Ekalesia toefuataiina, na faauuina i Katelani, Ohaio, i le 1835 e le Perofeta o Iosefa Samita. O Kimball o se tagata lototoa o le Ekalesia ma o se soo o le perofeta. O lona faletua o Vilate , sa faapena foi ona avea ma se tagata tuuto o le Au Paia o Aso e Gata Ai, o lē sa tumau malosi e ui lava i tofotofoga. Sa auai o ia i le Aualofa a Tamaitai o Navu i le vaiaso talu ona faatulagaina ma o se tasi o tamaitai muamua na faatinoina sauniga i le Malumalu o Navu. A o aluese atu Heber mai le aiga o loo auauna atu o se faifeautalai mo le Ekalesia, sa tausia e Vilate lo latou aiga.

Faitau e uiga i se osigataulaga na faia e Heber ma Vilate ina ua alu atu o ia mo se misiona i Egelani i le Au Paia, Voluma 1, Mataupu 34.

O Mea e Faamoemoe i ai

O le Fale o Heber ma Vilate Kimball o se vaega o le malaga maimoa o Fale o Aposetolo, lea e amata i le Fale o Orson ma Marinda Hyde ma faaiuina i le Fale o Uilifoti ma Fipe Uitilafi . O lenei fale o se malaga maimoa e tolu potu e taialaina e aofia ai le potu malolo masani, potu o suesuega, ma le potu ai. O le fogafale pito i luga ua tapunia i le taimi nei mo tagata lautele.

360° Faasologa