Fale o Uilifoti ma Fipe Uitilafi

O le Fale o Uitilafi toefuataiina ua faatusa i le olaga o le aiga i Navu, o se taimi na tele lava ina faaaluina e Uilifoti ma lona faletua o Fipe e eseese ai le tasi ma le isi ona o lana auaunaga faafaifeautalai. O le aiga o Uilifoti, e pei o le tele o isi aiga o uluai faifeautalai, na faamalosia lo latou faatuatua a o latou faalagolago atoatoa atili i le Alii i taimi na tuueseeseina ai i latou.

Sa siitia atu Uilifoti Uitilafi i lenei fale piliki ma lona aiga i le aso 4 o Me, 1844. I le lima o aso mulimuli ane, sa alu ai o ia i se misiona e faalauiloa atu mo Iosefa Samita, o le na folafola atu lona tauva mo le Peresitene o le Iunaite Setete. E lei maea le fale—e leai ni potu na faamaeaina ma na o se vaega o le fola na faataatia—ae o se avanoa e ola ai Fipe ma le la fanau. Sa galue Uilifoti i le fale pe a mafai ina ua toe foi mai, ae sa toe valaauina o ia i ni nai masina mulimuli ane e avea ma Peresitene o le Misiona a Peretania. Sa lei maea lava le fale i le 1846 ina ua tuua e le aiga Navu e malaga agai i sisifo faatasi ma le Au Paia.

O Uilifoti ma Fipe Uitilafi o ni tagata tuuto uma o Le Ekalesia a Iesu Keriso o le Au Paia o Aso e Gata Ai. O Uilifoti, o le na mulimuli ane avea ma Peresitene lona fa o le Ekalesia, sa faauuina o se tasi o le Korama a Aposetolo e Toasefululua i Katelani, Ohaio, ia Aperila 1839 e Polika Iaga. Sa auauna atu Uilifoti i le tele o misiona, i le Iunaite Setete ma Egelani. O nei misiona sa avea o se osigataulaga tele mo Fipe e pei foi ona sa faia mo Uilifoti. I le taimi o le misiona a Uilifoti mo le lua tausaga i Egelani ae la te lei siitia atu i lenei fale, sa le gata ina fanauina e Fipe lo la atalii o Uilifoti le Itiiti, ae sa ia onosaia foi le maliu o le la tama teine e lua tausaga le matua, o Sara Ema, i le fa masina mulimuli ane. A o tausia e tuaoi le aiga o Uitilafi i le taimi na toesea ai Uilifoti, sa moomoo pea Fipe mo lona toalua i nei taimi faigata. Ae peitai, o isi misiona na tuufaatasia ai foi le ulugalii. Sa auauna atu Fipe o se faifeautalai ma lana tane a o pulefaamalumalu o ia i le Au Paia o Aso e Gata Ai i Europa.

Faitau e uiga i le misiona a Uilifoti ma Fipe Uitilafi i Egelani i le Au Paia, Voluma 1, Mataupu 45.

O Mea e Faamoemoe i ai

O le Fale o Uilifoti ma Fipe o le nofoaga faaiu lea i le malaga taamilo i Homes of the Apostles lea anata i le Maota o Orson ma Marinda. O le Fale o Uilifoti ma Fipe Uitilafi o se malaga taamilo e ono potu e taialaina o le potu i luma, umukuka, potu ai, potu faigaluega, potumoe sili, ma le potu o tamaiti. A uma le malaga taamilo i le Fale o Uitilafi, e talia oe e suesue i le vaega o totoe o Navu.

I le taimi o le taumafanafana, atonu e te fetaiai ai ma se faifeautalai o loo faasoa atili atu e uiga i le aiga o Woodruff e ala i mata o Fipe po o le tuafafine Uilifoti, o Eunice, o le sa nofo i le fale i le 1845.

360° Faasologa