Malumalu o Navu: Atinaega o Sauniga o le Malumalu

O le aso 6 o Aperila, 1841, o le tausaga lona sefulutasi o le faatulagaga o le Ekalesia, o se aso o le fiafia, faamanatuina, ma le faafetai i Navu ma le eria lata ane. Na amata le aso i se solo a fitafita a le Au Paia o Aso e Gata Ai mai nuu i itu uma e lua o le Vaitafe o Misisipi. Sa latou savavali atu i ni gaoioiga faamaopoopo i lotoa o le malumalu, lea sa latou faatasi ai ma le tusa ma le 10,000 o le Au Paia ma uo o e na faapotopoto e molimauina le faataatiaina o le maatulimanu o le malumalu. Na amata le fonotaga i le tatalo ma pesepesega, a o lei tuuina atu e Sini Rikitone se lauga faagaeetia. ¹ Sa latou faapotopoto, na fai mai Rikitone, ”ia usiusitai i le finagalo ma le poloaiga a le Alii o le mamalu” e fausia se malumalu e tusa ai ma le fuafuaga na tuuina mai e ala i faaaliga. Ina ua maea le lauga, sa faataatia maatulimanu e fa ma sa folafola atu e Iosefa Samita se faamanuiaga e mafai ona latou ”tumau ai seia maea le ie atoa [o le malumalu] . . . ina ia maua e le Au Paia se nofoaga e tapuai ai i le Atua, ma ua i ai i le Atalii o le Tagata se mea e taoto ai lona ao.” ²

O le fausiaina o se malumalu i Navu na mulimuli i le mamanu na faatuina i nuu na fausia muamua e le Au Paia i Ohaio ma Misuri. Ina ua poloaiina e le Alii le Au Paia e faapotopoto i Ohaio i le 1831, sa Ia folafola mai o le a tuuina atu ia i latou Lana tulafono ma o le a ”faaeeina i latou i le mana mai lugā” (Mataupu Faavae ma Feagaiga 38:32). A o faapotopoto le Au Paia anamua i Katelani, Ohaio, sa faatonuina i latou e le Alii e ”faatu se fale . . . o le Atua” lea e mafai ona aoaoina ai i latou i le talalelei, le mea e mafai ona tuuina atu ai le tulafono, ma le mea e mafai ona faatino ai sauniga (tagai Mataupu Faavae ma Feagaiga 88; faatusatusa i le Mataupu Faavae ma Feagaiga 109). I le va o le 1833 ma le 1836, sa galulue malosi ai le Au Paia e fausia le Maota o le Alii i Katelani ; o se galuega sa le’i i ai ia i latou le tomai po o mea tautupe e faataunuuina ai. E ui lava i lo latou mativa, ae sa latou fausia se fale matagofie lea na taliaina e le Alii ma lea na latou maua ai ki faaopoopo o le perisitua lea o le a mafai ai ona faatinoina sauniga folafolaina (tagai Mataupu Faavae ma Feagaiga 110). O nei sauniga, lea o le a faaalia uma ma faatinoina muamua i Navu, na aofia aipapatisoga mo e ua maliliu, le faaeega paia atoa, ma le sauniga o le faamauga.

Ia Ianuari 1836, a o latalata i le faamaeaina o le Malumalu o Katelani, sa faalauiloa atu ai e Iosefa Samita ni sauniga fou e ta’ua o le “mulumuluina ma le faauuina” i se vaega o taitai o le Ekalesia i le fogafale lona tolu o le malumalu. I le taimi o lenei fonotaga muamua, na maua ai e Iosefa Samita se faaaliga e faaali atu ai ia te ia o i latou o e na maliliu e aunoa ma ni avanoa e talia ai sauniga o le talalelei o le a tuuina atu i ai le avanoa e faia ai i le isi olaga. E ala i le Perofeta o Iosefa Samita, sa faaali mai ai e le Alii “o i latou uma o e na maliliu e aunoa ma se malamalama e uiga i lenei talalelei, o e semanu latou te mauaina pe ana faatagaina i latou e ola, o le a avea ma suli o le malo selesitila o le Atua” (Mataupu Faavae ma Feagaiga 137:7). Peitai, pe faapefea ona tupu lenei mea ma po o a sauniga o le a mafai ai, sa tumau pea le le manino i le taimi o lenei faaaliga.

I le aso 15 o Aokuso, 1840, na talosagaina ai Iosefa Samita e lauga i le falelauasiga o Seymour Brunson. I le taimi o lana lauga, na vaai ai Iosefa ia Sieni Neyman, o se tuafafine o lona atalii o Kuresa na maliu talu ai nei e aunoa ma le papatisoina. I le iloaina ai sa popole Sieni ia Kuresa, sa faitau ai Iosefa mai le 1 Korinito 15:29 ma aoao atu e mafai e alii ma tamaitai soifua ona auai i sauniga e fai ma sui o o latou aiga ma uo ua maliliu. E lei leva ona uma le lauga, ae alu atu Sieni i le Vaitafe o Misisipi lea na papatisoina ai o ia mo Kuresa.³

Ina ua maua e Iosefa Samita le faaaliga o loo faatonuina ai e tatau ona fausia se malumalu i Navu, sa aofia ai faatonuga faapea o sauniga o papatisoga mo e ua maliliu ”e mo lo’u fale” ma poloaiina le Au Paia e fausia se faatanoa i totonu o le malumalu mo lenei faamoemoega (tagai Mataupu Faavae ma Feagaiga 124:29–36 ). O faaaliga faaopoopo, na maua i le 1842, na faamalamalama atili ai le auala e tatau ona faatino ai ma faamaumauina ai le sauniga (Tagai Mataupu Faavae ma Feagaiga 127 ma le Mataupu Faavae ma Feagaiga 128 ).

I uluai tausaga o le Ekalesia, sa saili ai ma le filiga le Au Paia mo le faataunuuina o le folafolaga o se faaeega o le mana mai luga. E ui lava ina sa faateteleina feteenaiga ma o latou tuaoi i ni fetauaiga matautia, ae sa pipiimau pea le Au Paia i le faamoemoe e mafai ona tuuina atu le faaolataga i tagata uma e ala i sauniga o le malumalu. Sa faapaiaina nofoaga mo malumalu i Initipene, Atamu-oni-Amani, ma Sisifo Mamao, Misuri, ma le faamoemoe o le a faaalia mai sauniga faaopoopo folafolaina ma auala mo le ofoina atu o le faaolataga i tagata uma.

O le mulumuluina ma le faauuina na faaalia i le Au Paia i Katelani o le amataga lea o le faaeega paia o le mana, ae peitai, na iloa e Iosefa Samita ma le Au Paia e le atoatoa. Ina ua taunuu i Navu, sa la faamoemoe e fausia se isi malumalu e auai ai i nei sauniga ma maua ai le vaega e le’i faailoaina mai lava. Ia Ianuari 1842, e lei leva ona tatalaina e Iosefa Samita lona faleoloa, ae, ia faatonuina sui o le Korama a le Toasefululua e saunia i latou lava e maua le faaeega paia.⁴ I le aso 4 o Me, 1842, na taitai atu ai e Iosefa Samita se vaega filifilia o taitai o le Ekalesia i le potu pito i luga o lona faleoloa. O iina, i se fonotaga faapitoa, sa ia tuuina atu ai le faaeega paia o le malumalu ua maea ona faaalia talu ai nei ia te ia. Na amata le sauniga i mulumuluga ma faauuga e pei o na sa faia i Katelani ma faaauau ai i se sauniga fou lea, i le faaaogaina o tusitusiga paia, aoao atu e uiga i le faatulagaga o le lagi ma valaauina tagata auai e ulu atu i feagaiga paia e ola amiotonu ma auauna atu i le malo o le Atua.⁵

Na iu lava ina faalauteleina lenei sauniga ina ia aofia ai tagata uma o le Ekalesia—alii ma tamaitai—o e na naunau e ulu atu i feagaiga paia. O se lomiga o lenei sauniga o loo faatinoina i le asō i malumalu i le lalolagi atoa e fai ma sui o e o ola ma e ua maliliu.

I le aso 3 o Aperila, 1836, na o atu ai Iosefa Samita ma Oliva Kaotui i pulelaa o le Malumalu o Katelani lea na la punonou ai i laua lava i le ”tatalo paia ma le filemu.” Ina ua la tulai mai i le la tatalo, sa tatalaina se faaaliga vaaia o le Faaola o Iesu Keriso o le na taliaina le malumalu e avea ma Ona fale. Ona sosoo ai lea ma Keriso ma isi agelu asiasi e toatolu o e na tuuina atu ki o le perisitua ia Iosefa ma Oliva. O le lona tolu o nei tagata asiasi, o le perofeta o le Feagaiga Tuai o Elia, na tuuina mai se ki lea na aoao mulimuli ane e Iosefa Samita sa i ai le mana e tuu ai ”faamaufaailoga o le perisitua Mekisateko i luga o le aiga o Isaraelu.”⁶

Na amata mai i le 1843, na aoao mai ai Iosefa Samita e faapea, o le faaaogaina o lenei ki, e mafai ai ona faavavau le sootaga faaipoipo. O le taimi lava e ”faamauina ai,” o le a maua ai e aiga o alii ma tamaitai o e na faaipoipo i lenei auala le folafolaga e mafai ona latou faatasi e faavavau. O uluai sauniga o faamauga, e pei o le faaeega paia, sa faatinoina i le fale pito i luga o le faleoloa o Iosefa Samita. Ae peitai, i aso nei, o nei faaipoipoga e na o malumalu e faia ai mo e o ola ma e ua maliliu.