Ang Mga Saad sa Templo Nagbugkos Kanato ngadto sa Dios ug sa Usag Usa

Ang mga templo balaan ug sagrado nga mga dapit. Atong isipon ang mga templo nga mga balay ni Ginoong Jesukristo. Kini lahi sa lokal nga mga bilding sa simbahan diin kita magpahigayon og mga tulumanon sa pagsimba sa Dominggo ug sa ubang mga kalihokan. Ang mga templo gipahinungod ngadto sa labing sagradong buhat sa Dios.

Ang mga templo puno sa simbolismo. Pananglitan, kadtong nagtambong sa templo mosul-ob og yano nga puti nga sinina sa pagsimbolo sa kaputli ug kaangayan sa atubangan sa Dios. Ang mga templo usa ka sagrado, malinawon nga dangpanan diin ang mga sumusunod ni Jesukristo mas lawom nga makakonektar ngadto Kaniya.

Labing importante, ang mga templo mao ang mga dapit diin kita makahimo og sagrado nga mga pakigsaad ngadto sa Dios.

Kita makapalig-on sa atong relasyon sa Dios ug makadawat og espesyal nga mga panalangin gikan Kaniya pinaagi sa mga pakigsaad. Ang pakigsaad usa ka sagrado nga saad tali sa Dios ug sa Iyang mga anak. Ang Dios maghatag sa mga kondisyon alang sa pakigsaad ug dayon naghatag kanato sa pagpili sa pagdawat niini.
Gamiton nato ang bunyag isip sanglitanan.

Sa dihang gibunyagan kita, misaad kita sa Dios nga kita moserbisyo Kaniya, motuman sa Iyang mga sugo, ug modala sa ngalan ni Jesukristo ngari kanato. Kon buhaton nato kini nga mga butang, ang Dios nagsaad sa pagpasaylo sa atong mga sala, mopanalangin kanato sa Iyang Balaang Espiritu, ug mohatag kanato sa kinabuhing dayon diha sa Iyang presensya.

Kita mobag-o sa mga pakigsaad nga atong gihimo diha sa bunyag kon kita moambit sa sakramento, nga gitawag usab og kalawat, sa matag Dominggo sa simbahan. Kining sakramento gisunod sa sakramento sa Kataposan nga Panihapon nga gipaila ni Jesus ngadto sa Iyang mga Apostoles sa wala pa ang Iyang kamatayon.

Human sa bunyag, ang hamtong nga mga miyembro sa Ang Simbahan ni Jesukristo sa mga Santos sa Ulahing mga Adlaw makahimo og dugang nga mga pakigsaad sa Dios diha sa templo. Kini nga mga pakigsaad ug mga saad nagpalig-on sa ilang mga relasyon ngadto Kaniya ug magdala og mas dako pa nga mga panalangin.

Pagtuga

Ang pulong nga pagtuga  nagpasabot nga “gasa.” Diha sa pagtuga sa templo, ang hamtong nga mga miyembro sa Simbahan mohimo og ligdong nga mga pakigsaad, lakip ang mga saad sa pagsunod sa mga sugo sa Dios ug mopahinungod sa ilang panahon ug mga talento ngadto sa buhat sa Ginoo. Agig balos, makadawat sila og mga panalangin sama sa mas dako nga kahibalo sa plano sa Dios, dugang nga kalig-on sa pagsunod sa ehemplo ni Kristo, ug sa oportunidad nga magpuyo sa kahangtoran uban sa Dios.

Pagselyo

Ang usa sa dako nga mga kalipay sa ebanghelyo ni Jesukristo mao ang saad nga ang mga relasyon sa pamilya mahimong magpadayon lapas sa atong mortal nga kinabuhi. Diha sa templo, ang mga pamilya makonektar o “maselyo” alang sa kahangtoran.

Atol sa usa ka seremonya sa pagselyo sa kaminyoon, ang usa ka bana ug usa ka asawa mag-atbang sa pagpangluhod diha sa usa ka altar aron maghimo og mga pakigsaad sa usag usa ug uban sa Dios. Sila mosaad sa pagtahod ug paghigugma sa usag usa sa hingpit ug mopasalig sa pagsunod sa mga pagtulun-an ug ehemplo ni Jesukristo. Agig balos, sila gisaaran nga ang ilang kaminyoon ug pamilya molahutay sa kahangtoran.

Mobuhat alang sa kaayohan sa namatay na nga mga katigulangan

Kita nagtuo sa usa ka makiangayon ug maluluy-on nga Dios nga dili gayod mohikaw sa paghatag ngadto sa bisan kinsa sa Iyang mga anak sa mga panalangin sa kahangtoran tungod sa mga sirkumstansiya nga dili nila makontrol.

Diha sa templo, atong gipahigayon ang mga bunyag, mga pagtuga, ug mga pagselyo alang sa mga katigulangan kinsa wala nakabaton og oportunidad sa pagdawat niadtong mga ordinansa sa wala pa sila namatay. Niini nga buhat, usa ka tawo nga buhi mobarog isip puli alang sa usa ka tawo nga namatay.

Kining sagrado nga mga seremonya gipahigayon lamang diha sa mga templo. Nagtuo kita nga ang atong mga katigulangan makapili sa pagdawat o pagsalikway niini nga halad nga gihimo sa gugma alang kanila.