ʻUnu Ofi Ange kia Sīsū Kalaisi ʻo fakafou ʻi he Ako ʻo e Tohi ʻa Molomoná

Ko e Tohi ʻa Molomoná ko ha tohi ia ʻo e folofola naʻe tataki fakalaumālie ke ʻomi kiate kitautolu ʻa e fakahinohino ki heʻetau moʻuí mo fakafehokotaki kitautolu kia Sīsū. ʻOku maʻu ʻa e hingoá mei fē? ʻI he ngaahi taʻu ʻe laungeau kuohilí ʻi he ongo ʻAmelika ʻo e kuonga muʻá, naʻe fakatahaʻi ai ʻe ha palōfita ko Molomona ha lekooti ʻa hono kakaí. Naʻa nau fepaki lahi mo e ngaahi faingataʻa tatau mo kitautolú. Hangē pē ko kitautolú, naʻa nau maʻu ʻa e mālohi ʻi heʻenau tafoki kia Sīsū Kalaisí.

ʻOku fakataumuʻa ʻa e Tohi ʻa Molomoná ke lau fakataha mo e Tohi Tapú ko ha toe fakamoʻoni ʻe taha ʻo Sīsū Kalaisi mo Hono misiona fakalangi ko e Fakamoʻui mo e Huhuʻi ʻo e māmaní. ʻI hono fakatahaʻi ʻa e Tohi Tapú mo e Tohi ʻa Molomoná, ʻoku ʻomi ai ha mahino lahi ange ki he ʻofa lahi ʻa e ʻOtuá ʻiate kitautolu kotoa pea lava ʻo tokoni ke tau ʻunu ʻo ofi ange kiate Ia.

Naʻe liliu ʻe he ngaahi tefitoʻi moʻoni ʻoku lekooti ʻi he Tohi ʻa Molomoná—ʻa e tui kia Sīsū Kalaisí, fakatomalá, papitaisó, fiefiá, fakamoʻuí—ʻa e moʻui ʻo ha kakai ʻi he kuonga muʻá. ʻI hotau kuongá ni, ʻoku tākiekina ʻe he Tohi ʻa Molomoná ʻa e moʻui ʻo ha kakai ʻe laui miliona ʻi he funga ʻo e māmaní ʻaki hono ʻomi kinautolu ke nau ofi ange kia Sīsū Kalaisi.

ʻOku mahulu hake ʻa e folofolá ʻi he ngaahi lea mo e talanoa motuʻa pē. Ko ha ngaahi pōpoaki ʻaonga mo tuʻuloa ia ki he ngaahi palopalema ʻoku tau fehangahangai mo iá. ʻI hoʻo lau e Tohi ʻa Molomoná ʻaki haʻo toutou fehuʻi pē kiate koe, “Ko e hā e ʻuhinga moʻoni ʻo e meʻá ni?” te ke ʻilo ai ʻoku lahi ha ngaahi pōpoaki mahuʻinga maʻau ʻi he ʻahó ni. Naʻe hiki ʻa e tohí ke ueʻi fakalaumālie ʻa e kau laukongá ke nau fai ha ngaahi fili te ne fakatupulaki ʻenau moʻuí mo ʻomi kinautolu ke nau ofi ange ki he ʻOtuá. Naʻe fakaʻamu ʻa e kau faʻu tohí ʻe tataki ʻe heʻenau ngaahi leá ʻa e kakaí kia Sīsū Kalaisi mo liliu ʻa e ngaahi ʻulungāngá; hiki hake ʻa e loto-mamahí, taʻepaú, mo e ilifia ʻo e moʻuí; ʻoatu ha taumuʻa mo ha fakahinohino ki he fakakaukau ʻa e kakaí ki he moʻuí; pea ʻoange ki he kakaí ha fakamoʻoni ʻoku kei hoko ʻa e ʻOtuá ko “ha ʻOtua ʻo e ngaahi mana” (Molomona 9:11).

ʻE lava ke fuatautau ʻa e mahuʻinga ʻo e Tohi ʻa Molomoná ʻi he māmaní ʻaki ʻa e lahi ʻo e ngaahi tatau ʻoku tufakí pe ko e tokolahi ʻo e kakai ʻoku nau fili ke muimui ʻia Sīsū Kalaisi hili ʻenau lau e tohí. Ka neongo ia, ʻoku fakataautaha ʻa e ola mahuʻinga tahá. ʻOku tali ʻe he Tohi ʻa Molomoná ʻa e ngaahi fehuʻí, ʻomi ha ʻamanaki lelei, mo fakamālohia ʻa e ivi fakalaumālie ʻi he kakaí takitaha.

ʻE lava ke liliu ʻe he Tohi ʻa Molomoná ʻa e moʻui ʻa e kakaí ʻi he taimi ʻoku nau faiangahala pe faivelenga aí, siva e ʻamanakí pe fiefiá. ʻOku maʻu ʻe ha kakai tokolahi ha ʻuhinga ʻi he Tohi ʻa Molomoná, ko e kakai mahalo naʻa nau ako pe ʻikai ako, tuenoa pe ʻātakaiʻi ʻe he ngaahi kaungāmeʻá mo e fāmilí, tuʻumālie pe masiva. Ko ha ʻulungaanga angamaheni ʻo e kakai ʻoku uesia ʻe he tohí ni ko e holi faingofua ko ia ke ʻilo mo mahino hono moʻoní.