Ha’afātata atu ā ia Iesu Mesia nā roto i te tai’o-māite-ra’a i te Buka a Moromona

Te Buka a Moromona, e mau pāpa’ira’a fa’auruhia ïa nō te hōro’a ia tātou i te ’avei’a i roto i te orara’a ’e nō te fa’atū’ati ia tātou ia Iesu. Nō hea roa mai te i’oa ? E rave rahi hānere matahiti i ma’iri i Amerika tahito ra, ’ua ha’aputu te hō’ē peropheta, ’o Moromona te i’oa, i te pāpa’a parau nō tōna mau ta’ata. ’Ua fa’aruru rātou e rave rahi tāmatara’a tā tātou e fa’aruru nei. Mai ia tātou nei, ’ua ’itehia ia rātou te pūai i te fāriura’a i ni’a ia Iesu Mesia.

’Ua ’ōpuahia te Buka a Moromona ’ia tai’o-’āpipiti-hia ’e te Bibilia mai te tahi fa’ahou ’ite nō Iesu Mesia ’e nō tāna misiōni hanahana ’ei Fa’aora ’e ’ei Tāra’ehara nō teie nei ao. ’Āpīpiti, tē fa’afāna’o nei te Bibilia ’e te Buka a Moromona i te māramaramara’a rahi atu ā nō te here rahi a te Atua ia tātou pā’āto’a, ’e e nehenehe te reira e tauturu ia tātou ’ia ha’afātata atu ā iāna.

’Ua taui te mau parau tumu i pāpa’ihia i roto i te Buka a Moromona—te fa’aro’o ia Iesu Mesia, te tātarahapara’a, te bāpetizora’a, te ’oa’oa, te fa’aorara’a—i te orara’a o te hō’ē nūna’a tahito. I tō tātou nei ’anotau, tē fa’auru nei te Buka a Moromona i te orara’a o te mau ta’ata e rave rahi mirioni nā te ao nei nā roto i te ha’afātatara’a ia rātou ia Iesu Mesia.

’Ua hau atu te mau pāpa’ira’a mo’a i te parau ’e te ’ā’amu tahito. E mau parau tano mau te reira nō te mau fifi tā tātou e fa’aruru nei. ’Ia rave ana’e ’oe i te tai’ora’a Buka a Moromona ma te ui pinepine ia ’oe iho ē : « E aha tā teie e parau mau nei ? » e ’ite mai ’oe ē, e rave rahi parau e tano nō ’oe i teie mahana. ’Ua pāpa’ihia te buka nō te fa’auru i te feiā tai’o ’ia rave i te mau fa’aotira’a ’o tē ha’amaita’i i tō rātou orara’a ’e ’o tē ha’afātata atu ā ia rātou i te Atua. ’O te ti’aturira’a ho’i o te mau ta’ata pāpa’i ’ia arata’i tā rātou mau parau i te ta’ata ia Iesu Mesia ra ’e ’ia taui te reira i te mau peu ; ’ia ha’amāmā i te ’oto, te pāpū ’ore ’e te mata’u o te orara’a ; ’ia pūpū i te fā ’e te arata’ira’a i te hi’ora’a a te ta’ata i te orara’a ’e ’ia fa’afāna’o i te fa’a’itera’a ē e « Atua nō te mau semeio » ā te Atua (Moromona 9:11).

E nehenehe e fāitohia te aura’a o te Buka a Moromona i roto i te ao nei nā ni’a i te rahira’a buka i ’ōperehia, ’aore rā nā ni’a i te mara’ara’a i te rahira’a ta’ata tei mā’iti ’ia pe’e ia Iesu Mesia i muri a’e i te tai’ora’a i te buka. Te ’ohipa faufa’a roa a’e rā, ’o terā ïa i ni’a i te ta’ata hō’ē. E pāhono te Buka a Moromona i te mau uira’a, e hōro’a mai te reira i te tīa’ira’a, ’e e ha’apa’ari ho’i i te pūai pae vārua i roto i te ta’ata, hō’ē i muri i te tahi.

E nehenehe te Buka a Moromona e taui i te orara’a o te ta’ata i roto i te hara ’aore rā te ha’apa’o maita’i, i roto i te hanohano ’aore rā te ’oa’oa. E rave rahi ta’ata e ’ite nei i te aura’a i roto i te Buka a Moromona, te ta’ata ’ite rahi ’aore rā te ma’ua, te ta’ata mo’emo’e ’aore rā tei hā’atihia e te hoa ’e te ’utuāfare, te ta’ata moni ’aore rā tei veve. Hō’ē huru ta’a ’ē e ’itehia i roto i te mau ta’ata tei tauihia e teie buka, ’o te hia’ai ’ōhie ïa e ’ite ’e e māramarama i tō te reira parau mau.