Mas Magpaduol ngadto ni Jesukristo pinaagi sa Pagtuon sa Basahon ni Mormon

Ang Basahon ni Mormon usa ka basahon sa dinasig nga kasulatan nga anaa aron sa paghatag kanato og direksiyon sa atong mga kinabuhi ug sa pagkonektar kanato ngadto ni Jesus. Diin man gikan ang ngalan? Gatosan ka tuig ang milabay sa karaang Amerika, usa ka propeta nga ginganlan og Mormon mitipon og rekord sa iyang katawhan. Sila miatubang og daghang mga hagit nga susama sa atoa. Ug sama kanato, sila nakakaplag og kalig-on sa dihang sila midangop kang Jesukristo.

Ang Basahon ni Mormon gituyo nga basahon uban sa Biblia isip laing tugon ni Jesukristo ug sa Iyang balaang misyon isip Manluluwas ug Manunubos sa kalibotan. Magkauban, ang Biblia ug ang Basahon ni Mormon naghatag og dugang nga panabot sa dakong gugma sa Dios alang kanatong tanan ug makatabang kanato nga mas maduol ngadto Kaniya.

Ang mga baroganan nga nakarekord sa Basahon ni Mormon—hugot nga pagtuo diha ni Jesukristo, paghinulsol, bunyag, hingpit nga kalipay, kaluwasan—miusab sa mga kinabuhi sa usa ka karaan nga katawhan. Sa atong panahon, ang Basahon ni Mormon nag-impluwensiya sa mga kinabuhi sa minilyon ka tawo sa tibuok kalibotan pinaagi sa pagdala kanila nga mas duol ngadto ni Jesukristo.

Ang mga kasulatan labaw pa kay sa karaan nga mga pulong ug mga istorya. Kini mahinungdanon, tukma sa panahon nga mga mensahe alang sa mga problema nga atong giatubang. Kon ang paagi nga basahon nimo ang Basahon ni Mormon mao ang kanunay nga pagpangutana sa imong kaugalingon, “Unsa man gayod ang gisulti niini?” imong makita didto nga adunay daghan nga mahinungdanon nga mga mensahe alang kanimo karon. Ang basahon gisulat aron sa pagdasig sa mga magbabasa sa paghimo og mga desisyon nga makapalambo sa ilang mga kinabuhi ug modala kanila nga mas duol ngadto sa Dios. Kini mao ang paglaom sa mga tagsulat nga ang ilang mga pulong modala sa mga tawo ngadto ni Jesukristo ug mousab sa mga kinaiya; mowala sa kasubo sa kinabuhi, kawalay kasiguroan, ug kahadlok; motanyag og katuyoan ug direksyon sa panglantaw sa mga tawo sa kinabuhi; ug mohatag sa mga tawo og ebidensiya nga ang Dios gihapon “usa ka Dios sa mga milagro” (Mormon 9:11).

Ang kamahinungdanon sa Basahon ni Mormon sa kalibotan mahimong masukod pinaagi sa gidaghanon sa mga kopya nga naapod-apod o sa pagdugang sa gidaghanon sa mga tawo kinsa mopili sa pagsunod ni Jesukristo human sa pagbasa sa basahon. Ang labing importante nga epekto, hinuon, mao ang personal. Ang Basahon ni Mormon motubag sa mga pangutana, mohatag og paglaom, ug molig-on sa espirituhanon nga kusog diha sa mga tawo, sa tinagsa-tagsa.

Ang Basahon ni Mormon makausab sa mga kinabuhi sa mga tawo kon sila makasasala o matinud-anon, walay paglaom o malipayon. Daghang mga tawo ang nakakaplag og kahulogan sa Basahon ni Mormon, mga tawo nga mahimong edukado o dili edukado, nag-inusara o gilibotan sa mga higala ug pamilya, adunahan o kabos. Usa ka komon nga kinaiya sa mga tawo nga naapektohan niini nga basahon mao ang yano nga tinguha nga masayod ug makasabot sa kamatuoran niini.