Naʻe Akoʻi Kitautolu ʻe Sīsū Kalaisi ke Tau Feʻofaʻaki

Naʻe akoʻi ʻe Sīsū Kalaisi ko e ongo fekau lahi tahá ko e ʻofa ki he ʻOtuá mo e ʻofa ki he niʻihi kehé.

Naʻe fakamahinoʻi ʻe he Fakamoʻuí ko e ʻofa ho kaungāʻapí ʻoku ope atu ia ʻi hoʻo angalelei pē ki he kakai ʻoku nofo ofi atú. Ko e konga ʻo e fatongia ʻo ʻEne kau muimuí ke fakahaaʻi ʻa e manavaʻofá—ʻa e ʻofa haohaoa ʻa Kalaisí—ki he tokotaha kotoa pē, kau ai ʻa kinautolu te ke ala lau ko hoʻo filí.

ʻOku mau tui ko e ngāue fakataha ko ia ke fakahaaʻi ʻa e manavaʻofa faka-Kalaisí, ko e taha ia ʻo e ngaahi meʻa faifakamoʻui, fakafiefia, mo uouangataha ʻe lava ke fai ʻe ha haʻofangá. Ko ha ngaahi founga ʻeni ʻe niʻihi ʻoku mau fai ai ha ngāue tokoni, pea te mau fiefia ke ke kau mai!

Ngaahi Tokoni Uelofeá

ʻOku poupouʻi ʻa e kāingalotú ʻi he Siasí kotoa ke nau ʻaukai fakamāhina, ʻo ʻikai kai pe inu ʻi ha houa nai ʻe 24 (kapau ʻoku nau malava fakatuʻasino). ʻOku foaki leva ʻe he kāingalotu ʻo e Siasí ʻa e paʻanga naʻe mei fakaʻaongaʻi ki he ngaahi houa kai ko iá ke tokoniʻi ʻaki ʻa kinautolu ʻoku faingataʻaʻiá.

ʻI he ngaahi foaki ko ʻení, ʻe lava ai ʻa e kau taki fakalotofonuá ʻo fai ha tokoni fakapaʻanga ki he meʻakaí, fale nofoʻangá, mo e fefonongaʻakí. ʻOku toe tokoni foki ʻa e kau taki ʻo e Siasí ki he niʻihi fakafoʻituitui ʻoku nau maʻu ha tokoní ke nau faʻu ha palani ke fakaleleiʻi honau tūkungá, ʻo faʻa fakaʻaongaʻi ha ngaahi maʻuʻanga tokoni kehe hangē ko e ngaahi ngāue maʻuʻanga moʻuí, faleʻi ʻo fakafou ʻi he Tafaʻaki Tokoni ʻa e Fāmilí, ngaahi kalasi moʻui fakafalala pē kiate kitá, mo ha ngaahi meʻa lahi ange.

ʻOku fakaʻatā ʻe he tokoni ko ʻení ʻa kinautolu ʻoku faingataʻaʻiá ke nau ongoʻi e ʻofa ʻa e Fakamoʻuí, pea pehē ki he ʻofa ʻa honau koló—tautautefito ki he taimi faingataʻá.

Tokoni ki he Fakatamakí

ʻI he taimi ʻoku hoko ai e ngaahi fakatamaki fakanatulá, taú, mo e ngaahi faingataʻa kehé, ʻoku fakatahataha ʻa e Siasí mo hono kāingalotú ke foaki ha meʻakai, ʻū naunau fakafaitoʻo, vala, mo ha ngaahi meʻa mahuʻinga kehe.

ʻOku fengāueʻaki fakataha ʻa e Siasí mo ha ngaahi kautaha falalaʻanga ke tokangaʻi e ngaahi fiemaʻu makehe ʻoku maʻu mei he tūkunga takitaha, fakaʻaongaʻi e ngaahi haʻofanga lotu fakalotofonuá ke fai ha ngaahi meʻa hangē ko e tānaki mo fokotuʻutuʻu e ngaahi foakí, fakamaʻa e vevé, mo ʻoatu ha meʻakai, vala, nofoʻanga, mo ha poupou fakaeloto ʻo ka fiemaʻu.

Tokoni ʻOfa Fakaetangatá

ʻOku ngāue ʻa e Siasí ke tokangaʻi ʻa kinautolu ʻoku faingataʻaʻia ʻi he funga ʻo e māmaní ʻo fakafou ʻi ha ngaahi polokalama mo ha ngaahi ngāue kehekehe.

ʻOku kehekehe pē ʻa e ngāué ni ʻo fakatatau mo e ngaahi fiemaʻu pau ʻa e ngaahi feituʻu kehekehé. ʻOku tokanga taha ʻa e Siasí ki hono fakaleleiʻi ʻo e malava ke maʻu ha vai maʻá mo e naunau fakahaisiní, tokangaekina ʻa e faʻeé mo e pēpē toki fāʻeleʻí, tokangaʻi ʻo e moʻui leleí, akó, malu ʻo e meʻakaí, mo e tokoni ki he kau kumi hūfangá.

ʻOku tokoni ʻa e ngāue mo e ngaahi kautaha falalaʻangá ke fakahoko ai ʻa e ngaahi polokalama ko ʻení, ke fakatupulaki ʻe he Siasí ʻa e ngaahi feinga ke tokoní.

Ngāue Fakaetauhí

ʻOku vahevahe ʻa e kāingalotú ʻi homau ngaahi haʻofangá ki ha ngaahi hoa pea vahe ha niʻihi tokosiʻi ke nau “ngāue fakaetauhi” ki ai. Ko e ngāue fakaetauhí ʻoku fekauʻaki ia mo hono faʻu ha ngaahi feohi fakakaungāmeʻa faka-Kalaisi. Fakakaukau ki ai ʻo hangē ha hoa ngāue poupoú—ko hoʻo kau ngāue fakaetauhí ko ha founga tokoni ia te ke lava ʻo feohi mo ia ʻi he taimi leleí pea tafoki ki ai ʻi he taimi ʻo e faingataʻá.

ʻOku fōtunga fēfē nai ʻa e ʻofa ki ho kaungāʻapí kiate koe fakatāutahá? Ko ha ngaahi fakakaukau ʻeni ʻe niʻihi ki he founga ke ke ʻofa ai ki ho kaungāʻapí:

• Lotua ha ngaahi faingamālie ke fakahaaʻi ai ʻa e angaʻofá ʻi he lolotonga ʻo e ʻahó.
• Ngāue ke fakamolemoleʻi ʻa kinautolu ʻokú ke ongoʻi naʻe faihala atu kiate koé.
• Fakafepakiʻi ʻa e houtamakí, laulanú, mo e ngaahi founga kehe ʻo e filifilimānakó
• Tufaki e ngaahi pōpoaki ʻoku leleí pea angaʻofa ki he niʻihi kehé ʻi he mītia fakasōsialé.
• Vakaiʻi ʻa e ngaahi kaungāmeʻa ʻoku nau foua ha taimi faingataʻá.
• Fai ha fakahīkihiki ʻi he loto-fakamātoato.
• Poupouʻi e ngaahi ngāué mo e ngaahi kautahá ke tokangaʻi ʻa kinautolu ʻoku faingataʻaʻiá.

Te ke lava foki ʻo maʻu ha ngaahi ngāue tokoni ʻi homou feituʻú pe ngaahi founga ke ke ngāue ai ʻi ha feituʻu mamaʻo ʻaki haʻo ʻaʻahi ki he JustServe.org.