’Ua ha’api’i Iesu Mesia ia tātou ’ia here i te tahi ’e te tahi

Tē ha’api’i nei Iesu Mesia ē, nā fa’auera’a rahi e piti ’o te herera’a ïa i te Atua ’e te herera’a ia vetahi ’ē.

’Ua fa’a’ite pāpū maita’i te Fa’aora ē, te herera’a i tō ta’ata tupu e ’ere noa i te hāmani-maita’i-ra’a i te feiā e ora ra i pīha’i iho ia ’oe. Hō’ē tuha’a o te hōpoi’a a tāna mau ta’ata ’āpe’e ’o te fa’a’itera’a ïa i te aroha mau—te here mau o te Mesia—i te mau ta’ata ato’a, ’e tae noa atu i te feiā tā ’oe e fa’ariro nei mai tō ’oe ’enemi.

Tē ti’aturi nei mātou ē, te ’ohipa-’āmui-ra’a nō te fa’a’ite i te aroha mau mai te Mesia te huru, ’o te hō’ē ïa o te mau ’ohipa fa’aora māuiui roa a’e ’e te ’oa’oa ’e te tāhō’ē ’o tā te hō’ē ’āmuira’a e nehenehe e rave. Teie te tahi mau rāve’a tāvinira’a tā mātou e hōro’a nei, ’e e ’oa’oa mātou ’ia ’āmui mai ’oe !

Piha tōro’a nō te ’ohipa totauturu

I roto i te ’Ēkālesia tā’āto’a, tē fa’aitoitohia nei te mau melo ’ia ha’apae i te mā’a hō’ē taime i te ’āva’e, ’oia ho’i te orera’a e ’amu i te mā’a ’e te ’inura’a i te pape i te roara’a e 24 hora (mai te mea e ti’a i tō rātou tino). E hōro’a te mau melo o te ’Ēkālesia i muri iho i te tuha’a moni e fa’a’ohipahia ’āhani ’ua tāmā’a rātou, nō te tauturu i te feiā tei hina’aro i te tauturu.

Nā roto i teie mau ō, e nehenehe te feiā fa’atere o te fenua iho e tauturu i te pae moni nō te mā’a, te nohora’a ’e te faura’o. E tauturu ato’a te feiā fa’atere o te ’Ēkālesia i te mau ta’ata tei fa’ari’i i te tauturu ’ia feruri i te hō’ē fa’anahora’a nō te ha’amaita’i i tō rātou orara’a, pinepine ma te fa’a’ohipara’a i te mau rāve’a hau atu mai te mau pū ’imira’a ’ohipa, te mau pū ’ohipa tauturura’a i te ’utuāfare, te mau ha’api’ira’a o te fa’arava’ira’a iāna iho, ’e tē vai atu ra.

Maoti teie tauturu e ti’a ai i te feiā tei hina’aro i te tauturu ’ia putapū i te here o te Fa’aora, tae noa atu i te here o tō rātou huira’atira—i te mau taime fifi iho ā ra.

Tauturu i te taime ’ati rahi

’Ia tupu ana’e te mau ’ati rahi nātura, te tama’i ’e te tahi atu mau ’ati rarahi, e ’āmuitahi te ’Ēkālesia ’e tōna mau melo nō te hōro’a i te mā’a, te mau mātēria rāpa’au ma’i, te ’ahu ’e te tahi atu mau tauiha’a e hina’arohia.

E ’āmui atu te ’Ēkālesia i te mau fa’anahora’a ti’aturihia nō te pāhono i te mau hina’aro ’ōtahi o te vaira’a tāta’itahi, ma te fa’a’ohipa i te mau ’āmuira’a i reira nō te rave i te mau ’ohipa mai te ha’aputura’a ’e te fa’ata’ara’a i te mau ō, te tāmāra’a i te mau pehu ’e te hōro’ara’a i te mā’a, te ’ahu, te ha’apūra’a ’e te pāturura’a i te pae manava mai te mea e tītauhia.

Tauturu ’ia maita’i te ta’ata

Tē tūtava nei te ’Ēkālesia i te aupuru i te feiā tei hina’aro i te tauturu ’ati a’e te ao nei, nā roto e rave rau fa’anahora’a ’e ’ōpuara’a.

E fa’atumuhia teie ’ohipa rau i ni’a i te mau hina’aro ta’a ’ē o te mau fenua ta’a ’ē. Tē rōtahi ta’a ’ē nei te ’Ēkālesia i ni’a i te ha’amaita’ira’a i te fa’afāna’ora’a i te pape mā ’e te tāmāra’a, te aupurura’a metua vāhine ’e te fānau-’āpī, te ea maita’i, te ha’api’ira’a, te rava’ira’a te mā’a ’e te tauturura’a i te mau tītīhoria.

Nā roto i te ha’ara’a ’e te mau fa’anahora’a ti’aturihia nō te fa’atupu i teie mau fa’aotira’a te ’Ēkālesia e ha’amaita’i hope ai i tāna mau tauto’ora’a nō te tāvini i te ta’ata.

Te aupurura’a

I roto i tā mātou mau ’āmuira’a, ’ua vāhihia te mau melo ’ei ’āpitira’a ’e ’ua fa’ata’ahia te tahi mau ta’ata nā rāua e « aupuru ». Te aupurura’a ’o te fa’atupura’a ïa i te auhoara’a mai te Mesia te huru. ’A feruri i te reira mai te hō’ē fa’anahora’a hoa—e rāve’a tauturura’a tō ’oe nā feiā aupuru, ’o tā ’oe e nehenehe e ’āmui atu i roto i te mau taime maitata’i ’e e fāriu atu i te mau taime fifi.

Mai te aha te huru te herera’a i tō ta’ata tupu nō ’oe iho ? Teie te tahi mau mana’o ri’i e nāhea i te here i tō ta’ata tupu :

• ’A pure nō te mau rāve’a ’ia fa’a’ite i te maita’i i te roara’a o te mahana.
• ’A rohi ’ia fa’a’ore i te hapa a te feiā tei fa’a’ino mai ia ’oe.
• ’A pāto’i i te ha’amata’ura’a, te tātī nūna’a ’e te tahi atu mau huru hi’o-’ē-ra’a.
• ’A ha’aparare i te mau parau poro’i maitata’i ’e ’a hāmani maita’i ia vetahi ’ē i ni’a i te mau rāve’a tūreiara’a.
• ’A fāfā atu i te mau hoa e fa’aruru nei i te taime fifi.
• ’A fa’a’ite i te ha’apoupoura’a ’ā’au tae.
• ’A turu i te mau tauto’ora’a ’e te mau ’āvirira’a nō te aupuru i te feiā tei hina’aro i te tauturu.

E nehenehe ato’a ’oe e ’ite mai i te mau ’ōpuara’a tāvinira’a i tō ’oe vāhi, ’aore rā te mau rāve’a nō te tāvini nā te ātea ma te haerera’a i ni’a ia JustServe.org.