Mau uira’a mātauhia nō ni’a i te ’Ēkālesia
Tītauhia ānei iā’u ’ia rave ato’a ?
E fa’ari’i-poupou-hia te mau rātere ’ia rave mai, ’aita rā i tītauhia. ’Ia ’ōpere-ana’e-hia te faraoa ’e te pape o te ’ōro’a mo’a (mai te komunio) i te ’āmuira’a, mai te mea ’aita ’oe e hina’aro i te rave i te reira, ’a hōro’a noa atu i te fāri’i i te ta’ata nō muri iho. ’Aita ana’e, e nehenehe ’oe e pārahi noa ma te ’oa’oa i te purera’a.
E nehenehe ānei tā’u e rave mai te mea e ’ere au i te melo ?
’Ē ! Tē anihia nei ’oe ’ia ’āmui mai nō te mau ’ātivite tāhepetoma, te mau ’ohipa sōtiare ’e nō te mau purera’a. ’Ua hina’aro roa mātou e ha’amātau ia ’oe ’e e ’oa’oa mātou ’ia ’āmui mai ’oe.
E aha te ’ahu e ’ō’omo ?
E fa’ari’i-poupou-hia ’oe noa atu te huru ’ahu tā ’oe ē ’ō’omo mai. Mai te mea tē ha’ape’ape’a ra ’oe e aha te ’ahu tano, nō mātou nei, e tāmata mātou i te ’ō’omo i te ’ahu maita’i a’e i te ’ahu o te hepetoma, ’ei fa’a’itera’a i tō mātou mana’o tura nō te Atua. Te ’ahu mātarohia i te fare purera’a, ’oia ho’i te ’ahu ’uo’uo ’e te tā’amu ’arapo’a nō te tāne, ’e te piritoti ’aore rā te ’ahu roa nō te vahine.
E aha te maoro o te mau purera’a a te ’Ēkālesia ?
Pau roa te mau ’āmuira’a nā te ao nei e pe’e i te hō’ē ā fa’anahora’a e piti hora te maoro, nō te mau purera’a i te sābati. E piti rurura’a, ’e hō’ē hora te maoro te rurura’a tāta’itahi.
I roto i te rurura’a tā mātou e parau nei te « purera’a ’ōro’a », e ’āmui mai te mau melo ato’a o te ’āmuira’a. Teie rurura’a, e mau hīmene ïa, e mau pure ’e e mau ’ōrero ’evanelia (’aore rā, « mau a’ora’a ») tei hōro’ahia mai e te mau melo o te ’āmuira’a i te mau hepetoma ato’a. Te tuha’a faufa’a roa a’e rā o te rurura’a, ’o te ravera’a ïa mātou i te ’ōro’a mo’a (mai te komunio) nō te ha’amana’o i te Fa’aora.
Ta’a ’ē noa atu te purera’a ’ōro’a, e anihia te mau ta’ata ’ia fa’aea mai i te piti o te hora nō te ha’api’i i roto i te mau pupu na’ina’i a’e nō te mau tāne, te mau vahine, te feiā ’āpī ’e te mau tamari’i.
E aha te hō’ē pāroita ’aore rā, te hō’ē ’āma’a ?
E mau pupu melo o te ’Ēkālesia te mau pāroita ’e te mau ’āma’a, ’o tē ora i te hō’ē vāhi ta’a ’ē o te fenua. I roto i te hō’ē pāroita, e nehenehe ’oe e fa’ahoa, e fa’ari’i i te mana’o tā’amura’a, ’e e patu i te hō’ē natira’a pāturu ’e vetahi ’ē i roto i tō ’oe ’oire. Tei te huru tō ’oe vāhi nohora’a, e mau pāroita ’e te mau ’āma’a huru ta’a ’ē paha.
Te mau pāroita nō te tā’āto’ara’a
E fāri’i-poupou-hia te mau ta’ata ato’a ’ia haere mai i te hō’ē ’āmuira’a nō te tā’āto’ara’a. I roto i te hō’ē ’āmuira’a nō te tā’āto’ara’a, e tāvini ’āmui te mau ta’ata nō te mau fāito matahiti ato’a i roto i te pupu orara’a ’āmui o te ’Ēkālesia. E ha’amori ’āmui te mau ’utuāfare, te feiā pa’ari ’ōtahi, te mau tamari’i, te vahine ’ivi ’e te feiā fa’aipoipo ’āpī, i roto i te hō’ē ā rurura’a.
Te mau pāroita reo
I te tahi mau vāhi, e ’ite paha ’oe i te mau pāroita ’aore rā te mau ’āma’a e tāpurahia ’e te hō’ē reo i pīha’i iho. E mau ’āmuira’a teie e fa’atupu i te mau rurura’a nā roto i te hō’ē reo ’ē atu i te reo mātarohia i te vāhi tā ’oe e ’imi ra.
Te mau pāroita feiā ’āpī pa’ari ’ōtahi
Te mau pāroita feiā ’āpī pa’ari ’ōtahi, nō te mau ta’ata ’ōtahi ïa mai te 18-35 matahiti. Pinepine teie mau ’āmuira’a i te ’itehia i pīha’i iho i te mau pūhapara’a fare ha’api’ira’a tuatoru ’e e fa’atupu rātou i te mau ’ātivite i te roara’a o te hepetoma, ta’a ’ē atu i te mau purera’a ha’amorira’a i te sābati.
Te mau pāroita te feiā pa’ari ’ōtahi
Te mau ’āmuira’a feiā pa’ari ’ōtahi, nō te mau ta’ata ’ōtahi ïa mai te 36-45 matahiti. E tauturu teie mau ’āmuira’a i te mau ta’ata ’ia ha’amori ’e ’ia tāvini ’āmui, rātou hō’ē ā vaira’a ’e te ’ohipa ’ana’anatae.
E nehenehe ānei tā’u e hi’o i te hōho’a fenua ’e te mau fare a te ’Ēkālesia ?
’Ē. Tē fa’a’ohipa nei te Meetinghouse Locator i te hōho’a fenua e fa’a’ite i te mau hora ato’a ’e te mau vāhi ’oe e nehenehe ai e ha’amori ’ati a’e te ao nei.