’O vai mātou
Te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei, e pupu orara’a ’āmui ïa ’ua rau te huru ta’ata ’ati a’e i te ao nei, ma te fa’aro’o ’āmui i te Atua ’e tāna Tamaiti Iesu Mesia.
E fa’aro’o ’ohipa
Te mau hoa ’e te ta’ata tupu
E ’ite ’outou ia mātou i te orara’a, i te ’ohipara’a ’e i te ha’amaura’a i te ’utuāfare ’ati a’e i te ao nei. Nō mātou nei, te ’ohipara’a i roto i tō mātou pupu orara’a ’āmui, ’o te hō’ē ïa rāve’a e nehenehe ai mātou e here i tō mātou ta’ata tupu mai tā Iesu i ha’api’i.
E mau ’āmuira’a ta’ata rave
’Aita tā mātou e au’orometua ’aufauhia, mātou pauroa tē rave i te hō’ē tuha’a i roto i tā mātou nei ’āmuira’a maoti te mau ti’ara’a fa’atere, te mau fa’auera’a hōro’a i te a’ora’a, ’e te tahi atu mau ’ohipa e hōro’a i tōna taime.
E ’ere i te sābati noa
Nō mātou nei, ’ua hau atu te ’ēkālesia i te ha’amori-noa-ra’a i te sābati—e vāhi ato’a rā nō te ’ite i te tauturu nā roto i te mau hoa ’e te mau ’ohipa tupu e ha’apūai i te fa’aro’o ’e e pūpū i te tauturu fa’a’ōhie nō te mau fifi o te orara’a.
E ’ohipa ’āmui mātou ’ei feiā ’āpe’e ia Iesu Mesia
Ha’amaita’i i te orara’a ’e ha’amau i te mau pupu orara’a ’āmui pūai
E ha’amori ’āmui mātou
’Ua hau i te 30 000 ’āmuira’a i terā vāhi ’e terā vāhi nā te ao, e tū’ati te ta’ata i te tahi ’e te tahi i roto i tō rātou pupu orara’a ’āmui nō te ha’amori, nō te pure, nō te hīmene i te hīmene purera’a ’e nō te ha’api’i i te ’evanelia a Iesu Mesia.
E ha’api’i ’āmui mātou
I roto i te hepetoma, e putuputu te mau ta’ata nō te fāito matahiti rau i roto i te mau piha ha’api’ira’a, mai te séminaire nō te feiā ’āpī ’aore rā te institut nā te feiā ’āpī pa’ari, nō te ha’api’i ’āmui i te mau ha’api’ira’a a Iesu.
E tāvini mātou ia vetahi ’ē
E tuha’a tāmau te ’ohipa tāvinira’a nō te ’ohipa a te ’ēkālesia, ’e e rāve’a tumu ho’i nō te ha’apa’o i te fa’auera’a a te Atua ’ia here i tō tātou ta’ata tupu.
E patu mātou i te mau tā’amura’a
E tuha’a tā mātou mau ’āmuira’a nō te va’ata’ata i reira mātou e ora ra, ’e tē ha’a rahi nei mātou ’ia riro ’ei ta’ata tupu ’e ’ei hoa maita’i. E tuha’a ’ārearea ’e te faufa’a rahi te ’ātivite sōtiare nō te ha’amaura’a i te hō’ē pupu orara’a ’āmui o te ’ēkālesia.
E ha’apūai mātou i te mau ’utuāfare
E fa’ariro te mau tā’amura’a ’utuāfare pūai i teie orara’a ’ei orara’a ’oa’oa ma te tauturu ia tātou ’ia patu i te huru ao tā tātou e hina’aro nei. E turu hōhonu a’e ’e ma te here rahi a’e tā mātou ’ohipa ’e te tāvinira’a i roto i te ’ēkālesia i te mau tā’amura’a ’utuāfare.
Riro mātou ’ei ta’ata maita’i a’e
Te rirora’a i te huru ta’ata tā tātou e tīa’i nei, e tuha’a faufa’a rahi ïa nō tō mātou orara’a ’ēkālesia. E tauturu te mau fa’anahora’a a te ’Ēkālesia i te ta’ata ’ia ha’api’i ’e ’ia tupu i te rahi i te pae vārua ’e ma te au, nā roto i te ’evanelia a Iesu Mesia.
’Imi mai i tā mātou fare purera’a piri ia ’outou
’Ua hina’aro ’oe ’ia hi’o e aha te maita’i nō ’oe te hō’ē pupu orara’a ’āmui a te ’ēkālesia ? ’A haere mai ’outou iho e hi’o maoti te fārereira’a i te hō’ē ’āmuira’a a Te ’Ēkālesia a Iesu Mesia i te Feiā Mo’a i te mau Mahana Hope’a nei nō tō ’outou vāhi.
Fa’aterera’a o te ’Ēkālesia
« E hōro’a te ta’ata ato’a i te maita’i nō te tahi mai tei noa’a mai iāna ra, mai te ti’a’au maita’i i te maita’i huru rau a te Atua ra » –
Tē ti’aturi nei mātou i te mau peropheta ’e te mau ’āpōsetolo
Mai te hōho’a tā Iesu Mesia i ha’amau nō te arata’i i tōna mau ta’ata i te tau nō te Bibilia, tē arata’ihia nei te ’Ēkālesia e te hō’ē peropheta ’e te mau ’āpōsetolo i teie mahana. Tē tāvini nei ’e tē ’ohipa nei teie feiā fa’atere i raro a’e i tāna arata’ira’a fa’auru. E ’apo rahi ’outou nō ni’a ia rātou i’ō nei .
Mai te mau vāhi ’ati a’e te ao te feiā fa’atere
Nā te mau tāne ’e te mau vahine nō te mau huru orara’a ato’a e tauturu i te fa’atere i te ’ohipa a te ’Ēkālesia i te fāito o te ao tā’āto’a ’e i te fāito o te hō’ē rētioni. Te hō’ē hi’ora’a nō te reira, ’o te mau vahine ïa e fa’atere i te Sōtaiete Tauturu .
E mau ta’ata noa nō terā vāhi te feiā fa’atere
’Aita tā mātou e au’orometua ’aufauhia, tē arata’ihia nei rā te mau ’āmuira’a i terā vāhi ’e terā vāhi ’e te mau melo o te ’Ēkālesia e hōro’a i tō rātou taime. Tē pāturuhia nei rātou e te tahi atu mau melo noa iho o te ’Ēkālesia nō taua vāhi ra, mai te ha’api’ira’a i te mau piha i te sābati i te tāmāra’a i te fare purera’a.
E ha’api’i mātou te tahi i te tahi
’Ia haere mai ’outou i tā mātou mau ’āmuira’a, e ’ite ’outou ē, e ha’api’i mātou te tahi i te tahi ’e e ha’api’i ’āmui mātou i roto i te mau pāpa’ira’a mo’a. Tē ti’aturi nei mātou ē, e ’ohipa faufa’a tā te mau ta’ata ato’a e nehenehe e hōro’a, ’e nō reira, e ani te feiā fa’atere i te mau ta’ata huru rau ’ia a’o i te terono, ’ia pure ’e ’ia ha’api’i i te mau piha ha’api’ira’a.
Tītau i te hō’ē fārereira’a ta’a ’ē
Mai te mea e hina’aro ’outou e hi’o i te ’āmuira’a o tō ’outou vāhi, ’ua hina’aro mātou ’ia tupu au maita’i te reira. E nehenehe te mau misiōnare i reira e fārerei ia ’outou nā mua, ’ia ’ite ’outou i te fa’anahora’a, nō te pāhono i tā ’outou mau uira’a ’e tae noa atu nō te fa’aherehere i te hō’ē pārahira’a ’ia ineine ’outou ’ia haere mai.
Parau fa’auru nō tā ’oe ’āfata rata uira
Tītau i te mau video ’e te mau parau ve’a fa’auru ’e hau atu nā roto i te hō’ē rata uira tāhepetoma.