E nehenehe te mau ’utuāfare e vai ’āmui ē a muri noa atu

Tē pūpū nei te ’Ēkālēsia i te mau pu’e parau i te ta’ata ’e i te mau ’utuāfare nō te ha’api’i i te ’evanelia a Iesu Mesia. E fa’ati’a teie mau pu’e parau ha’api’ira’a ia ’oe ’ia fa’a’ohipa i te mau mea tā ’oe i ’apo mai ’e i ha’apūai i tō ’oe fa’aro’o. E ha’apūaihia te mau parau tumu i te mau hepetoma ato’a i te fare purera’a.

Tomora’a i roto i te fa’anahora’a ha’api’ira’a, pi’ihia Mai, pe’e mai.

Tē turu nei te mau fa’anahora’a nā te feiā ’āpī a te ’Ēkālēsia i te mau metua ’ia hōro’a atu i te mau ha’api’ira’a huru Mesia i tā rātou mau tamari’i, ’e e fa’ati’a i te feiā ’āpī ’ia tīhono atu ’e te tahi mau ta’ata e ora nei i teie ā mau tumu faufa’a. Te tahi o te mau rāve’a nā te feiā ’āpī tē vai ra :

• Te mau piha ha’api’ira’a ’evanelia
• Te mau ’ohipara’a tāhepetoma a te pupu feiā ’āpī
• Te mau ’ōpuara’a tāvinira’a
• Te mau ’ori
• Te mau puhapara’a
• Te mau ’āmuira’a

Te purera’a pō ’utuāfare ’o te hō’ē ïa peu matarohia, ’o tei fa’aitoitohia i te mau ’utuāfare ’ia fa’atupu hō’ē pō i te hepetoma ’ei taime nō te ’āmui tā’āto’a mai. E nehenehe e riro ’ei taime ha’api’ira’a i te ’evanelia, te ha’utira’a i te mau ha’uti, te tāmā’ara’a ’e te ’āmuira’a mai i te tahi atu mau ’ohipara’a e ha’apūai i te hō’ēra’a. Te mau mea e au maita’i i tō ’oe ’utuāfare, e mea maita’i ïa ! Te mea faufa’a roa ’o te ravera’a ïa i te taime nō te ’āmui mai ’ei ’utuāfare. E riro ato’a te reira ’ei taime nō te putuputu mai ’e te mau hoa, te feiā fātata mai, ’e te mau melo o tā ’oe ’āmuira’a.

’Ua fa’auehia te mau melo o te ’Ēkālēsia ’ia aupuru i te tahi mau ta’ata i roto i tā rātou ’āmuira’a. ’Ia aupuru ana’e tātou ia vetahi ’ē, e tūtava tātou i te tāvini ia rātou mai tā te Fa’aora e nā reira. E ha’apāpū te reira ē te mau melo ato’a o te ’āmuira’a tē vai ra hō’ē ta’ata e ara maita’i ra ia rātou, ’e ’o vai te ta’ata tā rātou e fāriu atu e mau hina’aro āna’e tō rātou. ’Ei hi’ora’a, e nehenehe te hō’ē taea’e ’aore rā te hō’ē tuahine aupuru e pūpū atu nō te fa’ahoro ia rātou i te fare purera’a, e fa’anaho nō te ’āfa’i i te mā’a nā te hō’ē ’utuāfare e ’aiū ’āpī tō roto, ’aore rā ’ia riro noa ’ei hōho’a mata ’oa’oa i ni’a i te pārahi o te fare purera’a.

Mai te mea tē fifi nei te mau ’utuāfare ’aore rā te mau ta’ata ’ōtahi i te fa’arava’i ia rātou iho, e nehenehe te fa’anahora’a tōtauturu a te ’Ēkālesia e tauturu ia rātou ’ia ’ite mai te mau rāve’a, mai te mau mā’a. E nehenehe te piha ’imira’a ’ohipa a te ’Ēkālesia e tauturu i te mau ta’ata ’ia ’ite mai i te hō’ē ’ohipa ’āpī ’aore rā e ha’amaita’i i te mau ’aravihi nō te ’imira’a i te ’ohipa. Tē pūpū nei mātou i te mau piha ha’api’ipi’ira’a e turuhia e te ’Ēkālesia, e matara nō te tā’āto’ara’a, nō te pae faufa’a moni a te ta’ata iho, te ’āteura’a i te pae manava ’e te fa’atupura’a i te hō’ē taiete.

E tuha’a te ta’ata tāta’itahi nō te ’utuāfare ’o tō tātou nā metua i te ra’i ra. ’Aita te mau ta’ata ato’a e haere nei i te purera’a e ora mau nei ’e tō rātou ’utuāfare, e nehenehe rā te ta’ata tāta’itahi e ’ite mai i te turura’a pae vārua ’e te hō’ē orara’a huira’atira a te ’Ēkālesia. E nehenehe te feiā pa’ari ’ōtahi e mā’iti i te ha’amori i roto i te hō’ē ’āmuira’a tē vai ra i roto te mau ’utuāfare ’e te mau tamari’i—’aore rā, i roto i te tahi mau tuha’a fenua nā te ao nei, e nehenehe rātou e haere i roto i te hō’ē ’āmuira’a tei fa’ata’a-ta’a-’ē-hia nā te feiā pa’ari ’ōtahi nō tō rātou fāito matahiti. E pūpū mai te haerera’a i te mau piha ha’api’ira’a ’evanelia ’e i te mau ’ātivite tōtiare ta’a ’ē nā te feiā pa’ari ’ōtahi, i te mau rāve’a ana’e nō te fa’aau te hoara’a ’e te fa’ananeara’a i te pae vārua.