Digital Lamang: Mga Young Adult
Dihang Nagkalisod ang Kinabuhi, Nakakaplag Ko og Kahupayan pinaagi sa Seminary ug Institute
Sukad nga nagpasakop sa Simbahan, moadto ko sa seminary ug institute sa pag-alima ug paglig-on sa akong pagtuo.
Akong nahibaloan ang gipahiuli nga ebanghelyo dihang nag-11 anyos ko.
Ang magulang nakong mga igsoong lalaki mipasakop sa Simbahan dihang mas bata pa sila apan mihunong sa pagsimba. Usa ka adlaw ang mga misyonaryo mibisita sa magulang nakong igsoong lalaki ug midapit kaniya sa pagbalik. Mibalik gyod siya, ug niana nga proseso misangpot nga miadto ko sa simbahan, midawat sa ebanghelyo, ug nabunyagan.
Ang misunod nga pipila ka tuig lisod alang sa managlahi nga mga hinungdan. Anaa ako sa daghang mga dalan nga sukwahi sa mga pagtulun-an sa ebanghelyo. Bisan og suportado kaayo ang akong mga ginikakan sa among pagsimba, dili sila mga miyembro sa Simbahan ug lahi ra ang ilang mga sumbahan. Mao nga wala akoy pundasyon sa panimalay alang sa espirituwal nga paglambo.
Atol niana nga panahon, ang pagtambong og seminary ug pagkonektar sa batan-ong mga lider nakatabang kaayo nako nga magpadayon atol sa lisod nga mga panahon ug padayong mapasaligon sa ebanghelyo. Mitubo ko sa espirtuwal nga paagi, salamat sa mga paningkamot sa mga titser ug sa ubang miyembro sa Simbahan kinsa nahigugma kanako ug nagmahunahunaon sa akong paglambo.
Sa kataposan, pinaagi sa pag-awhag gikan sa presidente sa Young Men ug sa ubang mga lider, miserbisyo ko og misyon. Kadtong duha ka tuig talagsaon kaayo nga panalangin kanako ug sa akong pagpamatuod. Akong gibuhat kining tanan nga butang nga akong nakat-onan sa seminary, ug akong gipakigbahin ang ebanghelyo ngadto sa daghang tawo.
Hinoon, dihang nauli na ko, nag-atubang ko og mas lisod nga mga pagsulay.
Pagpauli sa Panimalay ug Pagkat-on sa Pagsalig
Ang padayon nga paghupot sa imong pagtuo, imong pagpamatuod, ug imong espirituwalidad human sa misyon malisod. Apan usa ka butang nga nakatabang nako nga magpadayong lig-on human sa akong misyon mao ang institute.
Mihimo ko og usa ka tumong nga maningkamot ug motambong og institute matag semana, ug kana nga desisyon labihan ka importante sa akong kinabuhi.
Nangita pod ko og trabaho, apan walay nahitabo. Ang kahingawa tungod sa kawalay trabaho nagpalisod kanako, ug usa ka higayon ang akong higala midapit nako nga mouban kaniya sa pagtrabaho. Ang trabaho naglakip sa pag-imbentaryo sa ilimnong makahubog ug sa pagtrabaho matag-Sabado sa gabii—sa samang gabii nga duna koy institute, maong nagduhaduha ko sa pagdawat niini.
Gibalibaran nako ang akong higala, apan padayon siyang midapit nako nga motrabaho uban niya. Nagkaanam na og kahurot ang akong kwarta, ug ang trabaho nga iyang gitanyag mao ra gyod ang anaa kanako. Mao nga gisugdan nako ang pagkonsiderar sa maong trabaho.
Mihukom ko nga mangutana sa Langitnong Amahan unsay akong buhaton. Mibati ko nga ang Espiritu mipamatuod ngari nako nga kon dili ko moadto sa institute, posibleng mohuyang ang akong pagpamtuod. Mibati ko sa Espiritu nga mikompirma ngari nako nga dili dawaton ang trabaho, ug gibalibaran na usab nako ang pagdapit sa akong higala.
Dili ko segurado unsay akong buhaton kon dili dayon ko makatrabaho, apan gibutang nako ang akong pagsalig diha sa dalan nga gusto sa Langitnong Amahan nga akong ipadayon sa pagsubay.
Pagka-sunod nga semana sa institute, akong nahibaloan ang mahitungod sa usa ka opening sa trabaho isip koordinitor sa self-reliance. Miaplay ko, giinterbiyo, ug nakatrabaho. Nasayod ko nga gipahimutang sa Ginoo kadto nga oporutnidad sa akong dalan.
Diin Didto Akong Nakaplagan ang Kahupayan ug Kalig-on
Ang naagian nakong mga kasinatian samtang nagtambong og seminary ug institute nakapalig-on sa akong pagtuo kang Jesukristo ug nakapausab sa akong kinabuhi, sama sa gisaad ni Presidente Russel M. Nelson ngadto sa kabatan-onan ug sa mga young adult sa Simbahan: “Unsa, diay kaha, ang makatabang nimo aron mahimong ingon niana ka matinud-anong disipulo ni Jesukristo? Ang usa ka tubag mao ang seminary ug institute—dili lang ang pagtambong apan aktibong pagsalmot sa klase ug matinud-anong pagbuhat sa bisan unsang buluhaton nga gihatag.”
Sukad nga nakatrabaho, ang kinabuhi dili gihapon sayon. Apan akong giseguro ang pagprayoridad sa Ginoo ug pagtambong sa simbahan, paghupot sa Basahon ni Mormon, pagtuman sa akong calling, pag-ambit sa sakramento, ug pagtambong ug institute. Kining mga butanga nakatabang nako sa pagkaplag og kahupayan, bisan ug komplikado ang kinabuhi. Mapasalamaton kaayo ko sa tanang kapanguhaan nga naa kanato dinhi sa ebanghelyo ni Jesukristo!
Manghinaot ko nga ang institute makatabang nimo sa pagkaplag og kahupayan ug paglaom diha sa Manluluwas sama sa nahatag niini ngari nako.