Sa Unsang Paagi ang Pag-usab sa Akong mga Hunahuna Makausab sa Akong Kinabuhi

Importante ang pagklaro nga ang positibong panghunahuna wala magpasabot nga magpakabuhi nga ilimod ang mga butang nga lisod o ang lisod nga mga emosyon. Ang pagbalewala sa mga problema dili makasulbad niini.

Ang positibong paghunahuna mas labaw pa kay sa unsay atong pilion nga tutokan, bisan unsa pang mga panglimbasog ang atong gisagubang.

Sama sa gitudlo ni Presidente Russell M. Nelson:

“Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.

“… Ang kalipay moabot gikan ug tungod [ni Jesukristo]. Siya ang tinubdan sa tanang kalipay.”

Tungod kay ang akong mga hunahuna nakatutok kaayo kasagaran sa akong mga kahadlok ug mga kawalay kaseguroan, wala kaayo ko mobati og kalipay sa akong kinabuhi. Nag-ampo ko sa Langitnong Amahan ug ni Jesukristo nga wagtangon ang akong mga problema. Apan akong nakalimtan nga, sumala sa plano sa Langitnong Amahan, protektahan usab ni Kristo ang akong katakos sa paghimo og mga pagpili.

Usa ka paagi nga mabalhin ang akong panghunahuna ug aron mas momaayo ang pagbati mao ang pagpili nga magpakabuhi nga mapasalamaton.

Imbis malulong sa negatibong pagpakig-istorya sa kaugalingon, gisugdan nako ang aktibong pagpangita sa maayong mga butang sa akong adlaw. Usahay usa kini ka mabinationg komento gikan sa classmate. Sa ubang panahon mao kini ang paglakaw pauli sa matahom nga gabii sa tingpamulak o sa pagkaon og lamiang pagkaon.

Sa wala madugay akong naamgohan nga ang pagkaanad sa pagpasalamat mipalambo sa akong pagkalingaw sa kinabuhi. Sulayi kini! Ang pagkamahunahunaon sa bisan unsang kamaayo nga atong masinati mopilopilo sa epekto niini (tan-awa sa Doktrina ug mga Pakigsaad 78:19).

Gikolekta nako ang maayong mga gutlo sama sa mga piraso sa bahandi, ug sa pagtapos sa adlaw, kanunay akong nasurprisa kon unsa kabulahan ug kamapasalamaton ang akong gibati. Ang mga lisod nga bahin sa akong kinabuhi wala mawagtang, apan ang kahapdos niini nagsugod sa pagkawagtang.

Kasagaran kitang nakatutok sa mga butang nga dili nato makontrola nga hikalimtan na hinoon nato ang tanang butang nga atong makontrola.

Sa Doktrina ug mga Pakigsaad 58:27–28, gipahinumdoman sa Ginoo ang mga Santos nga ang “mga tawo kinahanglan … mobuhat sa daghang mga butang sa ilang kaugalingon nga gawasnong kabubut-on, ug magpahinabo sa daghan nga pagkamatarong;

“Kay ang gahom anaa kanila, diin sila mga tinugyanan sa ilang mga kaugalingon”.

Samtang akong gipili ang pagtutok sa mga gutlo sa kalipay, katawa, kalinaw, ug inspirasyon, akong naamgohan nga ako makapili sa pagmugna og mas daghan pa niini. Ang gahom ania kanako!

Pwedeng sama kini sa:

• Pag-apil ug pagplano og makalingaw nga mga kalihokan.

• Pagdawat og panalangin sa pagkapari.

• Paggahin og panahon diha sa kinaiyahan.

• Pagbarog sa balaang mga dapit.

• Pagpalambo og bag-ong kahanas o ganahang buhaton.

• Pagbasa og maayo nga libro.

• Pagserbisyo sa uban.

• Paggahin og panahon kauban ang mga tawo nga modasig kanimo.

• Pag-ehersisyo.

• Pagpaminaw ug pagtan-aw og positibo nga media.

Akong namatikdan nga ang mga hagit sa pisikal ug mental nga kahimsog posibleng mahimong mga babag sa kon unsaon nato paggamit ang atong kabubut-on. Niini nga mga higayon, makapadayon kita sa matarong nga paggamit sa atong kabubut-on pinaagi sa pagpili nga mangita og medikal ug propesyonal nga tabang.

Ang terapiya, pagpamalandong, kausaban sa estilo sa kinabuhi, ug medikasyon, kon ubanan og sinserong pag-ampo, pagtuon sa kasulatan, ug pagsimba sa simbahan ug sa templo, makahimo og dako nga kalainan kon maglisod kita. Pwede ra kitang mohinayhinay kon mabug-atan kita o maluya, ug mangayo og tabang gikan sa mga tawo nga atong kasaligan, ug mangayo og direksiyon ug kahupayan gikan sa Langitnong Amahan.

Ang Langitnong Amahan gusto nga kita malipay—kalipay nga makaplagan diha kang Kristo. Mao gayod kana ang rason nga ania kita dinhi! Ang 2 Nephi 2:25–26 nagpahinumdom kanato:

“Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.

“… Ug tungod kay sila natubos gikan sa pagkapukan sila nahimo nga gawasnon [pinaagi ni Jesukristo] nahimo silang gawasnon sa kahangtoran, nasayod sa maayo gikan sa daotan; sa pagbuhat sa ilang kaugalingon ug dili kay palihokon”.

Gihimong posible ni Jesukristo kanato ang pag-ugmad og kalipay pinaagi sa atong kabubut-on. Samtang maghinulsol kita, magkat-on gikan sa atong mga sayop, ug maningkamot sa paghimo sa maayong mga butang, nagtuman kita sa hinungdan sa atong pagkalalang. Nagpili kita sa kalipay.

Kon hunahunaon gayod nimo kini, ang pagbaton niini nga gahom usa ka katingalahang panalangin.

Si Elder Dieter F.Uchdorf sa Korum sa Napulg Duha ka Apostoles mitambag: Dili kita magpaabot nga malipay kon moabot na ta sa atong kapaingnan, sa pagdiskobre lang nga anaa ra diay ang kalipay—kanunay! Ang kinabuhi dili ingon nga modayeg lang sa paghunahuna sa nangagi. “Kini mao ang adlaw nga gibuhat sa Ginoo … ,’ misulat ang Salmista. “Managmaya ug managlipay kita’ [Salmo 118:24].”

Nausab ang akong kinabuhi sa dihang akong gipili ang pag-usab sa akong panghunahuna. Mas masaligon ko, mabination, ug malipayon. Mas bukas na ako alang sa pagsulay og bag-ong mga butang ug pagdawat og mga oportunidad. Ug mas namaayo na ako sa pagmatikod sa kamot sa Ginoo sa akong kinabuhi.

Pinaagi sa tabang sa Langitnong Amahan ug ni Jesukristo, nahimo akong mas maayo sa paghimo og mga desisyon nga nagdala kanako og tinuod nga kalipay ug kalinaw.

Kon kamo magtinguha sa Ilang direksiyon, nasayod ko nga Sila mogiya usab kaninyo.