Digital Lamang
Ako Ba Nahimong Higala sa Manluluwas sama sa Iyang Pakighigala ngari Kanako?
Ang mga higala mahimong moabot ug mobiya, apan ang atong relasyon sa Manluluwas mahimong molungtad sa kahangtoran.
Ganahan ko og mga higala.
Ang pagkaadunay mga minahal sa kinabuhi nga makapahimo nako nga mokatawa, mopahiyom, ug gani mobakho (sa tarong nga mga paagi) usa sa akong paborito nga mga bahin sa kinabuhi.
Apan, samtang milabay ang mga tuig, akong nabantayan nga ang mga panaghigalaay dili tanan gimugna nga managsama.
Apan ang usa ka panaghigalaay mahimong hingpit, dili mapakyas, ug mahangtoron, ug kana mao ang atong relasyon ni Jesukristo.
Siya mao ang kanunay nga labing suod nga higala kanako, apan giunsa Niya sa paghangyo kanako nga mahimong mas maayo nga higala ug disipulo Niya?
Siya Nagsuporta Kanimo sa Maayo nga mga Panahon ug sa Dili Maayo
Makahinumdom pa ko og dili maihap nga mga higayon sa dihang usa ka mapinanggaon nga higala ang nakig-istorya nako aron ako dasigon atol sa lisod nga panahon. Aduna usab akoy mga higala nga naglaom nga ako mopas-an sa ilang mga alantoson apan dili andam nga motabang kanako sa akong mga alantoson.
Walay bisan kinsa nga hingpit, lakip na ko, ug adunay mga higayon nga ako o ang akong mga higala mahimo untang mas maayo pa sa pagserbisyo ug paghigugma sa usag usa.
Apan kini mao ang kasegurohan sa atong relasyon sa pakigsaad uban sa Manluluwas—samtang kita motuman sa atong mga pakigsaad nga nagbugkos kanato ngadto Kaniya, Siya mao ang atong hingpit nga higala sa maayo, sa dili maayo, ug sa tanang higayon maayo man o dili (tan-awa sa Juan 15:14).
Si Presidente Russell M. Nelson mipamatuod bahin niini sa dihang siya miingon, “Kon ang bisan unsang butang ug si bisan kinsa sa kalibotan nga inyong gisaligan mapakyas man, si Jesukristo ug ang Iyang Simbahan dili gayod mopakyas kaninyo.”
Pagkaanindot nga saad!
Ang ubang higala mohatag og labaw pa kaysa ilang nadawat. Kana ang matang sa pakighigala sa Manluluwas ngari kanato.
Siya kanunay nga mikab-ot kanako, apan kinahanglan nakong hinumdoman ang pagkab-ot og balik ngadto Kaniya. Isip Iyang disipulo, tingali ako dili kanunay nga sama ka maunongon ngadto kaniya ingon nga mao unta ang kinahanglan nakong buhaton ug kinahanglan nga mas paningkamotan. Kon kita matinud-anon sa atong relasyon ngadto Kaniya, ang atong pasalig ug koneksiyon ngadto Kaniya mahimong mapalawman.
Siya Nakaila Kanimo sa Hingpit Gayod
Kita tingali adunay bag-ong mga kaila diin kita magpanagana sa pagpakigbahin sa atong tibuok, tinuod nga kaugalingon. Ang pagpakigbahin sa akong mga pakigbisog, mga insekyuridad, ug gani ang managlahi nga mga opinyon ngadto sa mga higala lisod sa taas nga panahon. Wala ko kahibalo unsa ang reaksyon sa akong mga higala kon ilang makita ang tinuod nga ako, mga depekto ug tanan.
Apan, gusto sa Manluluwas nga kita moduol kon unsa kita. Siya nakasabot sa tanang pakigbisog nga atong giatubang, mao nga Siya nasayod unsaon sa pag-agak ug pagtabang kanato sa indibiduwal nga paagi (tan-awa sa Alma 7:11–12).
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, nagtudlo: “[Ang Manluluwas] nangandoy nga kita moduol kaniya, nga mosunod kaniya, nga mahupay niya. Dayon siya nangandoy nga kita mohatag og kahupayan sa uban. Bisan unsa pa man ka dili segurado sa atong mga lakang padulong niya—bisan kon kini dili unta kinahanglan nga dili segurado—ang iyang mga lakang segurado gayod padulong nato.”
Ang Manluluwas nakaila ug nahigugma kanato. Sama sa usa ka tinuod nga higala, Siya nagdasig nato nga molambo ug, pinaagi sa Iyang tabang, mahimong mas maayo kay sa kon unsa kita karon.
Kita mahimong makaila Niya human Siya modasig kanato pinaagi sa pagkat-on mahitungod Kaniya pinaagi sa Iyang mga pagtulun-an, pagsimba diha sa templo, paghimo ug pagtuman sa mga pakigsaad, ug pinaagi sa pag-ampo ngadto sa atong Langitnong Amahan.
Nahigugma Siya Kanimo sa Hingpit
Ang Juan 15:13 miingon, “Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala.” Ang tibuok kahulogan sa maulaong sakripisyo sa Manluluwas nakapatandog sa akong kasingkasing matag higayon nga mobasa ko niini nga kamatuoran.
Ang pagkahibalo nga si Jesukristo andam nga mag-antos ug mohatag sa iyang kinabuhi alang kanako usa ka pagpamatuod sa Iyang hingpit nga gugma alang sa matag usa kanato.
Ug alang nako, ang gugma mao ang labing mahinungdanong bahin sa matag panaghigalaay.
Ang matag gakos nga atong ihatag, katawa nga atong gipakigbahin, o luha nga atong gipatulo mao ang resulta sa gugmang putli—“ang tiunay nga gugma ni Kristo” (Moroni 7:47). Mao nga unsa ang mas maayo pa nga paagi sa paghinumdom sa Iyang gugma alang kanato ug sa pagpakita usab Kaniya og gugma kay sa pagpaningkamot nga mahimong higala sa tanan? (Tan-awa sa Juan 15:12.)
Usa ka Mahangtoron nga Relasyon
Bisan kon ang ubang mga relasyon tingali moabot ug mobiya, ang atong relasyon sa pakigsaad kauban ni Jesukristo molungtad sa kahangtoran ug molambo samtang kita mosunod Kaniya ug molahutay hangtod sa kahangtoran (tan-awa sa Doktrina ug mga Pakigsaad 14:7).
Isip usa ka tawo nga nahigugma og maayo sa akong mga higala, ug labi na sa akong Manluluwas, kini nakapalipay sa akong kalag.
Nanghinaot ko nga kita makapadayon sa pagkat-on kon unsa ka dako sa Iyang paghigugma, pagsuporta, ug paghatag og bili sa atong relasyon Kaniya ug mokonsiderar kon unsaon nga kita usab mas makapakita Niya og gugma. Sama sa bisan unsang matahom nga panaghigalaay, ang lig-on nga relasyon uban Kaniya mopuno sa atong mga kinabuhi og kamaya ug kahulogan ug makatabang nato sa pagpakigbahin niana nga kamaya ngadto sa uban.