Pagpaminaw sa Tingog sa Dios—Pagdawat og Personal nga Pagpadayag

“Human kita mabunyagan, [ang Manluluwas] nagsaad sa paghatag kanato sa gasa sa Espiritu Santo. Kita pagagiyahan ug mahupay, ug ang Espiritu Santo motabang kanato nga mahibalo sa kamatuoran. Mabati nato ang Espiritu Santo nga uban kanato. Makabaton kita og mga pagbati sa kalinaw, gugma, ug hingpit nga kalipay, ug kita maadunay tinguha sa pagserbisyo sa uban. Maningkamot kita sa tibuok natong kinabuhi sa pagpahimuot sa Ginoo.”

“Usa sa mga pangutana nga gipangutana sa daghang tawo sa kalibotan mao nga kon ang Dios nakaila ba gayod ug maminaw nato. Ang maayong balita mao nga ang Dios wala lamang makadungog kanato—apan ang personal nga pagpadayag anaa sa matag usa kanato samtang kita mainampoong mangita sa kabubut-on sa Ginoo alang sa atong mga kinabuhi. …

“Ang mga kasulatan miklaro niini nga ang Espiritu Santo makakomunikar sa daghang paagi. Usahay Siya mamulong og kalinaw nganha sa inyong hunahuna. Usahay moaghat Siya og mga panghunahuna o mga ideya nga mosantop sa inyong hunahuna. Usahay Siya mohatag og kahayag sa inyong hunahuna. Usahay Siya mohimo sa inyong [mga] kasingkasing nga mapuno sa hingpit nga kalipay.

“Nakadayeg ko sa mga tubag sa social media nga akong nadawat sa akong post kon sa unsang paagi nga kamo makadawat og pagpadayag. Ang usa mipasabot nga kita kinahanglan nga magpaubos ug modawat sa espirituwal nga mga pagbati nga atong nadawat. Dayon kinahanglan kita nga mopatalinghog ngadto sa mga pagbati imbes sa kalibotan.

“Si Presidente Russell M. Nelson mitudlo, ‘Dili na kamo kinahanglang maghunahuna kon unsa ang kamatuoran. Dili na kamo kinahanglang maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo og inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo.’

“Akong iseguro kaninyo nga ang mapadayagong giya mahimong madawat sa matag usa kanato samtang kita maghago diha sa ubasan sa Ginoo. Kadaghanan sa atong giya magagikan sa Espiritu Santo. Usahay ug alang sa pipila ka katuyoan direkta kining magagikan sa Ginoo. Ako personal nga mopamatuod nga tinuod kana. Ang giya alang sa Simbahan, sa kinatibuk-an, moabot lamang diha sa Presidente ug propeta sa Simbahan.”

“Sa akong propesyonal nga kinabuhi, nagtrabaho ko isip cardiologist. Kon maggamit ko og stethoscope—usa ka himan aron madungog ang pinitik sa kasingkasing sa pasyente—akong segurohon nga hilom ang lawak; akong palongon ang bisan unsa nga radyo o telebisyon nga giablihan. Akong sirad-an ang pultahan sa pasilyo ug mohangyo sa mga bisita o ubang pasyente nga likayan ang pagtabi. Motutok ko sa unsay akong nadungog ug naglikay sa paghunahuna sa uban pang kabalaka.

“Ang pagpadayag nagkinahanglan sa sama nga konsentrasyon ug pagtangtang sa mga makabalda. Aron sa pagdawat og personal nga pagpadayag, kinahanglan nga atong biyaan ang kalibotanong kasaba. Dili kita makadawat og pagpadayag kon kita nasuko, nasamok, o nasagmuyo, o bisan sa pagkalinga lang. Hinuon kita magmugna og palibot nga makapaawhag sa pagbati ug pag-ila sa Espiritu.

“Ang pagkat-on sa pagtinguha ug pagsalig sa Espiritu usa ka kahanas sa kinabuhi, dili lamang usa ka temporaryo nga paagi aron makalatas sa usa ka krisis. Samtang magtinguha kita sa Espiritu Santo, Siya mapiyalan, masaligan, ug minahal nga kauban.”

“Usahay masulod kita sa laang sa pagtuo sa sayop nga mga pagtandi sa duha ka butang ingon og managlahi.

“Pananglitan, kita tingali motuo nga ang obserbasyon o rason mao lamang ang tinuod nga mga paagi sa pagkat-on sa kamatuoran. O tingali kita magtuo nga ang obserbasyon o rason mopukan sa hugot nga pagtuo ngadto sa kalagmitan nga kini wala nay tahas sa relihiyosong kinabuhi. Kini usa ka sayop nga pagtandi sa duha ka butang ingon og managlahi tungod kay ang rason ug obserbasyon magkatambayayong sa hugot nga pagtuo. Ang ‘pagtuo dili ubanag buhat’ walay kapuslanan. Ang hugot nga pagtuo motubo lamang pinaagi sa obserbasyon ug rason, inubanan sa ubang espirituwal nga buhat. Agi og dugang, ang obserbasyon, rason, ug hugot nga pagtuo sa kanunay kinahanglanon dili lamang aron makadawat og personal nga pagpadayag apan aron makasabot niana nga pagpadayag.

“Ang obserbasyon, rason, ug hugot nga pagtuo mopasayon sa pagpadayag ug mopahimo sa Espiritu Santo nga kapiyalan, kasaligan, ug minahal nga kauban. Kini nga mga elemento mao ang nag-una nga mga butang sa pagmugna og ‘kadasig sa espirituhanong paglambo sa atong mga kinabuhi,’ magtabang nato nga ‘makapadayon sa unahan taliwala sa … kahadlok ug kawalay kaseguroan.’”

“Sa tibuok pagpadayon sa Pagpahiuli sa ebanghelyo ni Jesukristo, ang mitumaw nga mga teknolohiya nakatampo sa Iyang buluhaton nga mapadangat sa tibuok kalibotan.

“Sa usa ka panagtigom … kauban sa mga empleyado sa Ang Simbahan ni Jesukristo sa mga Santos sa Ulahing mga Adlaw, among gihisgotan ang nagpadayon nga mga paglambo, ug ang tamdanan nga mga baroganan alang sa, generative artificial intelligence (AI).

“Ako misugyot nga kita magmainampingon, balanse, ug matinuoron sa atong pagsusi sa oportunidad ug pag-amping, nagpasabot nga, dili maglibog ni maalarma.

“Alang nako, bisan kon ang generative AI abtik sa paghatag og imposmasyon, kini dili makapuli sa pagpadayag o makatigom og kamatuoran gikan sa Dios. Sa Simbahan, kita adunay mahinungdanong responsibilidad sa pagseguro nga ang Espiritu Santo sa kanunay makapamatuod sa kamatuoran ug sa katinuod sa unsay atong gisulti ug gipakigbahin diha sa porma ug sulod.

“Sa kinatibuk-an, ako masaligon mahitungod sa atong abilidad sa paggamit niining mga teknolohiya sa AI sa maalamon ug epektibo nga paagi, lakip na sa atong pagtinguha sa pagpanalipod sa mga miyembro sa Simbahan ug mga higala gikan sa grabe nga pagpanlimbong ug mga sayop.”

“Bag-ohay lang, sa usa ka buluhaton sa pagpakigpulong, usa ka babaye ang miduol kanako ug misulti nako nga iyang gibasa og balik-balik ang impormasyon sa akong kaugalingon.

“Naglibog, nangutana ko, ‘Ngano man?’

“Giingnan ko niya nga siya adunay upat ka gagmayng anak sa panimalay ug dili maayo ang iyang gibati tungod sa pagkahimong nagtrabaho nga inahan. Ang pagkabasa sa akong kaugalingong istorya nga nagtrabaho ko gawas sa panimalay naghatag kaniya og kalinaw.

“Gitan-aw nako siya sa mga mata ug nangutana,

“‘Kahibalo ka ba kon unsaon pagdawat og personal nga pagpadayag?’

“‘Oo,’ miingon siya.

“Dayon ako siyang giingnan, ‘Sa matag higayon nga adunay usa ka tawo nga mosulti og usa ka butang nga makapasakit o makapaduda nimo sa unsay imong gibuhat, pahinumdomi lang ang imong kaugalingon: Kahibalo ko unsaon sa pagdawat og personal nga pagpadayag alang sa akong kaugalingon ug alang sa akong pamilya.’

“Ang Dios nakaila kanimo. Nasayod Siya sa imong sitwasyon. Nasayod Siya sa imong kasingkasing. Salig sa Ginoo, pagkat-on sa pagpaminaw sa Iyang tingog, ug dayon pagpadayon sa unahan uban sa pagsalig ug kahupayan. Nagkinahanglan Siya nimo sa Iyang buluhaton.”

“Ila-ilaha si Anastasia, usa sa akong labing bag-o nga higala sa Primary. Atol sa bag-ohay lang nga debosyonal sa Primary sa Dallas, Texas, ang mga bata sa Primary nakat-on og mga baroganan sa ebanghelyo, mikanta og mga awit, mipamatuod kabahin sa Manluluwas ug sa Iyang ebanghelyo, ug mipakigbahin sa ilang mga talento.

“Atol sa panagtigom, nangulo ko og usa ka kalihokan aron sa pagtabang nila nga makat-on mahitungod kon giunsa sa Espiritu Santo pagpakig-istorya diri kanato. Mihatag ko og tono sa usa ka awit sa mga bata ug ang mga bata mitag-an kon unsa nga awit ang akong gihatagan og tono. Nangutana dayon ko sa mga bata unsay ilang gihimo aron mailhan ang awit.

“Usa ka bata, si Anastasia, mahinamon nga miwara-wara sa iyang kamot ug mipakigbahin sa iyang yano apan bug-os nga obserbasyon.

“Sa masaligon nga tingog, iyang gilarawan giunsa niya pagtutok sa iyang mga mata ug mga dunggan diha kanako samtang akong gihatagan og tono ang awit sa Primary, ug niana siya makaila sa awit ug makadungog sa mga pulong diha sa iyang hunahuna.

“Kon kita maglisod sa pagpaminaw sa tingog sa Ginoo, kon kinsa ang atong paminawon importante kaayo. Itutok ang inyong mga mata ug mga dunggan sa mga pulong ug gugma sa atong Manluluwas.

“Akong mga higala, ako mopamatuod nga ang gitudlo ni Anastasia tinuod. Kon kita motan-aw sa atong Manluluwas—kon kita maminaw og maayo sa Iyang tingog—kita makadawat og balaang giya nga isilsil sa atong mga hunahuna ug atong mga kasingkasing. Kita makaila sa kamatuoran ug makapalambo sa atong pagsalig ni Jesukristo. Ang direksyon diin kita gitudlo importante kaayo. Mao nga anaa ang sugo nga ‘mohangad [kita] ngadto sa Dios ug magpakabuhi’ (Alma 37:47). Pagpuyo og kinabuhi nga puno sa hugot nga pagtuo ug pagpadayag. Pagpuyo og kinabuhi nga puno sa kalinaw, kamaya, ug paglaom. Pagpuyo og kinabuhi nga puno sa Espiritu sa Dios.

Unsaon nimo sa pagpaminaw sa tingog sa Ginoo?”