Ko Hono Tānaki Atu ha Ngaahi Fakamatala ki he Folofolá

Fakamatalaʻi ange ko e taimi ʻoku tau lau ai ʻa e folofolá, ʻoku tau faʻa maʻu ha ngaahi fakakaukau mo ha ngaahi fehuʻi fekauʻaki mo e meʻa ʻoku tau laú, pe ʻoku tau ʻiloʻi ha meʻa kuo teʻeki ke tau sio ai kimuʻa. Ko e taimi ʻoku hoko ai ʻení, te tau lava ʻo tānaki atu ha kiʻi fakamatala ke manatuʻi ʻa e meʻa ʻoku tau akó pe ongoʻí. Te tau lava ʻo tānaki atu ha ngaahi fakamatala ʻaki haʻatau tohi ʻi he tafaʻaki ʻo e folofola kuo pākí pe fakaʻaongaʻi ʻa e konga ki he Notes ʻi he Gospel Library. Ko ha niʻihi ʻo e ngaahi sīpinga ʻo e fanga kiʻi fakamatala fakafolofolá ʻoku kau ai ʻa e:

• Ngaahi fakakaukau mo e ngaahi ongo fakafoʻituitui.

• Ngaahi fakaʻuhinga mo e ngaahi fakamatala.

• Ngaahi akonaki fakaepalōfita.

• Ngaahi fakamoʻoni fakafolofola.

• Ngaahi lisí.

• Ngaahi ʻilo naʻe maʻu mei he niʻihi kehé.

ʻE ala tokoni hono tānaki atu ha fanga kiʻi fakamatalá ke tau tokanga lolotonga ʻetau akó. ʻE lava ke ne fakatolonga mo tokoni ke tau manatuʻi ʻa e meʻa ʻoku tau akó. ʻE lava foki ke iku ia ki ha fakahā lahi ange.

Fakatokangaʻi ange: Te ke lava ʻo fakafeʻiloaki ʻa e taukei ko ʻení ʻo fehokotaki mo e ako “Ko e Hiki ʻa e Ngaahi Fakamatala ʻoku ʻUhingamālié.”

Ke fakatātaaʻi ʻa e taukei ko ʻení, te ke lava ʻo kole ki ha niʻihi ʻo e kau akó ke nau vahevahe ha ngaahi sīpinga ʻo ha fanga kiʻi fakamatala kuo nau hiki ʻi heʻenau folofolá. Fakaafeʻi ʻa e kau ako ko ʻení ke nau vahevahe nounou ʻa e founga kuo fakatupulaki ai ʻe he tānaki atu ha fanga kiʻi fakamatalá ʻa ʻenau ako ʻo e ongoongoleleí.

Fakakaukau ke fakaʻaliʻali ha ngaahi founga ʻe niʻihi ke tānaki atu ha fanga kiʻi fakamatala ʻi he ngaahi folofola kuo pākí ʻo hangē ko hano hiki kinautolu ʻi he tafaʻakí pe ʻi ha kiʻi laʻipepa ke fakapipiki pe ʻi ha pepa pea fakahū ia ʻo ofi ki he potufolofola ʻoku fekauʻaki mo iá.

Fakatātaaʻi nounou ʻa e founga ke tānaki atu ai ha kiʻi fakamatala ki he folofola fakaʻilekitulōniká ʻaki hano fakaafeʻi ʻa e kau ako ʻoku nau ʻilo ʻa e founga ke tānaki atuha kiʻi fakamatala ki ha folofola fakaʻilekitulōnika ʻi he Gospel Library ke fakatātaaʻi ʻeni ki honau kaungāakó ʻi ha fanga kiʻi kulupu tokosiʻi.

Fakatokangaʻi ange: Te ke lava ʻo maʻu ha ngaahi maʻuʻanga tokoni lahi ange, fanga kiʻi tokoni, mo ha ngaahi vitiō kehe ʻi he konga “Help” (Tokoni) ʻi he polokalama Gospel Library, kau ai ʻa e “Gospel Library User Guide (iOS)” mo e “Gospel Library User Guide (Android).”

Fili ha potufolofola mei he ako folofola ʻo e uike ní pe fakaʻaongaʻi ha taha ʻo e ngaahi sīpinga ko ʻení ke fakaafeʻi ʻa e kau akó ke nau fakaangaanga ʻa e taukei ko ʻení. Te ke lava ʻo lisi ha ngaahi sīpinga ʻo e ngaahi fakamatala fakafolofola mei he konga “Fakaʻuhingaʻi” ʻi ʻolungá ke maʻu ʻe he kau akó ha ngaahi fakakaukau. Ka hili ʻenau akoakó, fakaafeʻi ha kau ako tokosiʻi pē ke nau vahevahe ha fanga kiʻi fakamatala naʻa nau tānaki ki heʻenau folofolá.

Ngaahi potufolofola lahi ange ke fakaangaangá:

• Sēnesi 6:15. Te ke lava ʻo fakatokangaʻi ʻa e fakaʻaongaʻi ʻo ha fua he kuonga muʻá naʻe ui ko e kiupite. ʻE lava ke ʻalu ʻa e kau akó ki he fakamatala ki he “Kiupité” ʻi he Fakahinohino ki he Ngaahi Folofolá pea hiki tatau ʻa e fakamatala ko iá ki ha kiʻi fakamatala (note) he tafaʻaki ʻo e Sēnesi 6:15.

• Mātiu 11:28–30. ʻE lava ke tānaki atu ʻe he kau akó ha kiʻi tohi ʻo fakamatalaʻi ʻa e ʻuhinga kiate kinautolu ʻa e “haʻu kia Kalaisí” pe “toʻo [ʻEne] haʻamongá kiate [kinautolú].”

• ʻAlamā 32:21. ʻE lava ke kumi ʻe he kau akó ʻi he Gospel Library ʻa e ngaahi akonaki mei he kau taki ʻo e Siasí fekauʻaki mo e tuí pea fakakau ha akonaki manakoa ʻi ha kiʻi fakamatala he tafaʻaki ʻo e potufolofola ko ʻení (vakai, ngaahi ako taukei ʻi he “Ko e Kumi ʻi he Ngaahi Folofolá pea ʻi he Gospel Library” mo e “Ko Hono Fakaʻaongaʻi ʻo e Ngaahi Akonaki ʻa e Kau Taki ʻo e Siasí ke Mahino ʻa e Folofolá” ki ha tokoni ʻo ka fiemaʻu).

• Tokāteline mo e Ngaahi Fuakava 59:18–19. ʻE lava ke faʻu ʻe he kau akó ha kiʻi fakamatala ʻokú ne fakahaaʻi ʻa e fiefia ʻoku ʻomi ʻe he ngaahi fakatupu ʻa e ʻOtuá kiate kinautolú.

Poupouʻi ʻa e kau akó ke tānaki atu ha fanga kiʻi fakamatala ki heʻenau folofolá ʻi he lolotonga ʻenau ako fakafoʻituituí mo e lolotonga e fealēleaʻaki fakakalasí. Manatuʻi ke toe vakaiʻi mo ʻoange ha taimi ki he kau akó ke vahevahe ai ʻenau ngaahi aʻusiá. Fakakaukau ki ha ngaahi founga ʻe lava ke hokohoko atu ai hoʻo toe vakaiʻi mo fakaangaanga ʻa e taukei ko ʻení ʻi he kalasí.