បុណ្យអ៊ីស្ទើរ
បុណ្យអ៊ីស្ទើរ
សេចក្ដីសង្ឃឹម និងសេចក្ដីសុខសាន្ដតាមរយៈព្រះអង្គសង្គ្រោះ និងដង្វាយធួនរបស់ទ្រង់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះអង្គសង្គ្រោះព្រះយេស៊ូវគ្រីស្ទបាននាំមកនូវសេចក្ដីសង្ឃឹម និងសេចក្ដីសុខសាន្ដ តាមរបៀបនានាដែលអ្នកដទៃទំនងជាគិតថាវាមិនអាចទៅរួចទេ ។ ទ្រង់បានព្យាបាលមនុស្សដែលពិការភ្នែក អ្នកឈឺ និងមនុស្សខ្វិន ។ ទ្រង់បានប្រោសមនុស្សដែលបានស្លាប់ឲ្យរស់ឡើងវិញ ។ នៅទីបំផុត តាមរយៈការរងទុក្ខ ការសុគត និងការរស់ឡើងវិញរបស់ទ្រង់ ទ្រង់បានយកឈ្នះលើអំពើបាប និងការស្លាប់សម្រាប់បុត្រាបុត្រីទាំងអស់របស់ព្រះ ។ យើងអបអរសាទរ និងចងចាំព្រះអង្គសង្គ្រោះនៅថ្ងៃបុណ្យអ៊ីស្ទើរ ។ មេរៀននេះអាចជួយអ្នកឲ្យពិចារណាអំពីសេចក្ដីសុខសាន្ដ និងសេចក្ដីសង្ឃឹមដែលព្រះយេស៊ូវគ្រីស្ទប្រទានដល់អ្នក ។
សិក្សាព្រះគម្ពីរ
ពិភពលោករបស់យើងពោរពេញទៅដោយរឿងរ៉ាវនានា ដែលអាចធ្វើឲ្យមនុស្សបាត់បង់សេចក្ដីសង្ឃឹម ។ តើមានហេតុផលអ្វីខ្លះ ដែលអាចល្បួងឲ្យមនុស្សបាត់បង់សេចក្ដីសង្ឃឹមនៅសព្វថ្ងៃនេះ ?
សូមចំណាយពេលបន្តិច ដើម្បីពិចារណាពីរបៀបដែលព្រះអង្គសង្គ្រោះនាំសេចក្ដីសង្ឃឹម និងសេចក្ដីសុខសាន្ដមកឲ្យអ្នក ។ សូមគិតផងដែរពីគ្រាទាំងឡាយ ដែលអ្នកអាចមានអារម្មណ៍ថាមិនសូវមានសេចក្ដីសង្ឃឹម ឬសេចក្ដីសុខសាន្ដ ។ សូមពិចារណាពីមូលហេតុដែលអ្នកអាចត្រូវការសេចក្ដីសង្ឃឹម ឬសេចក្ដីសុខសាន្ដបន្ថែមទៀតនៅក្នុងជីវិតរបស់អ្នក ។
ពេញមួយមេរៀននេះ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកឲ្យពិចារណាពីសេចក្ដីសុខសាន្ដ និងសេចក្ដីសង្ឃឹម ដែលព្រះយេស៊ូវគ្រីស្ទប្រទានដល់អ្នក និងបុត្រាបុត្រីទាំងអស់របស់ព្រះ ។
នៅបុណ្យអ៊ីស្ទើរ យើងអបអរសាទរដល់ការរស់ឡើងវិញរបស់ព្រះយេស៊ូវគ្រីស្ទ ជាការបញ្ចប់ពលិកម្មដ៏ធួនរបស់ទ្រង់សម្រាប់ពួកយើង ។ នៅពេលអ្នកសិក្សាសេចក្តីថ្លែងការណ៍ខាងក្រោមដោយប្រធាន រ័សុល អិម ណិលសុន សូមរកមើលសេចក្តីសង្ឃឹមដែលព្រះអង្គសង្គ្រោះអាចនាំមកក្នុងជីវិតរបស់យើង ។
នៅពេលទ្រង់បានរងទុក្ខសម្រាប់អំពើបាប និងភាពទន់ខ្សោយរបស់យើង បានសុគតនៅលើឈើឆ្កាង និងបានរស់ឡើងវិញម្តងទៀត នោះព្រះអង្គសង្គ្រោះបានសរសេរឡើងវិញនូវដំណើររឿងរបស់មនុស្សជាតិ ។ ដោយសារតែទ្រង់ នោះយើងមិនចាំបាច់ត្រូវប្រឈមមុខនឹងភាពទន់ខ្សោយពេលចាស់ទៅ អំពើបាប និងការភ័យខ្លាចរបស់យើងតែម្នាក់ឯងឡើយ ។ ដោយសារតែទ្រង់ សេចក្ដីស្លាប់មិនមែនជាទីបញ្ចប់នោះទេ ។ ការរស់ឡើងវិញនឹងកើតមានសម្រាប់មនុស្សទាំងអស់ដែលធ្លាប់បានរស់នៅ ។ ដោយសារតែទ្រង់ ក្រុមគ្រួសារអាចរស់នៅជាមួយគ្នាជារៀងរហូត ។ ដោយសារតែព្រះយេស៊ូវគ្រីស្ទ ទើបយើងប្រារព្ធអបអរពិធីបុណ្យអ៊ីស្ទើរ ។ ហើយបុណ្យអ៊ីស្ទើរគឺអំពីសេចក្ដីសុខសាន្ដ និងសេចក្ដីសង្ឃឹម ។ …
… នៅរដូវបុណ្យអ៊ីស្ទើរនេះ សូមយើងថ្វាយបង្គំ និងសរសើរទ្រង់សម្រាប់សេចក្ដីសុខសាន្ដ សេចក្ដីសង្ឃឹម ពន្លឺ និងសេចក្តីពិតដែលទ្រង់បាននាំមកឲ្យយើង ។ ( « The Peace and Hope of Easter » [ វីដេអូ ] នៅក្នុងបណ្ណាល័យដំណឹងល្អ )
ការរស់ឡើងវិញ បុណ្យអ៊ីស្ទើរ សេចក្ដីសុខសាន្ដ
សូមអានយ៉ាងហោចណាស់បទគម្ពីរចំនួនបួន ក្នុងចំណោមបទគម្ពីរខាងក្រោមនេះ ហើយរកមើលឃ្លាដែលពិពណ៌នាពីអ្វីដែលព្រះអង្គសង្គ្រោះអាចធ្វើសម្រាប់អ្នកបាន ។ សូមដាក់ស្លាកវគ្គបទគម្ពីរទាំងនេះថា « សេចក្ដីសង្ឃឹម » « សេចក្ដីសុខសាន្ដ » ឬ « បុណ្យអ៊ីស្ទើរ » ។
-
យ៉ូប ១៩:២៥–២៦
-
ទំនុកដំកើង ១៦:៨–១១
-
ទំនុកដំកើង ៣០:២–៥
-
ទំនុកដំកើង ៣៣:១៨–២២
-
អេសាយ ១:១៨
-
អេសាយ ១២:២
-
អេសាយ ២៥:៨–៩
-
អេសាយ ៤០:២៨–៣១
-
យេរេមា ១៧:៧–៨
សូមពិចារណាចែកចាយវគ្គបទគម្ពីរមួយ ដែលអ្នកបានរកឃើញថា វាពោរពេញដោយអត្ថន័យ ជាមួយនឹងនរណាម្នាក់ដែលអ្នកស្រឡាញ់ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
ព្រះគ្រីស្ទដ៏មានព្រះជន្មរស់
សូមសិក្សា « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ដែលបានសរសេរដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។ សូមគូសសម្គាល់ឃ្លាដែលថ្លែងទីបន្ទាល់អំពីសេចក្ដីសុខសាន្ដ និងសេចក្ដីសង្ឃឹមដែលព្រះអង្គសង្គ្រោះបានប្រទានឲ្យ ។
តើអ្នកទទួលបានអារម្មណ៍នៃសេចក្ដីសុខសាន្ដ និងសេចក្ដីសង្ឃឹមតាមរយៈព្រះយេស៊ូវគ្រីស្ទនៅពេលណាដែរ ?
ជម្រើស ខ
ទំនុកតម្កើង
ទំនុកតម្កើងអាចលើកស្ទួយដល់វិញ្ញាណរបស់យើង ផ្តល់ភាពក្លាហានដល់យើង ហើយនាំឲ្យយើងឈានទៅរកទង្វើដែលសុចរិត ។ វាអាចបំពេញដល់ព្រលឹងយើងនូវគំនិតសួគ៌ា និងនាំមកនូវវិញ្ញាណនៃសេចក្ដីសុខសាន្ត ។ ( « បុព្វកថារបស់គណៈប្រធានទីមួយ » ទំនុកតម្កើង ទំព័រ ix )
សូមជ្រើសរើសបទចម្រៀងទំនុកតម្កើង ឬបទចម្រៀងផ្សេងទៀតដែលបង្រៀនអំពីសេចក្ដីសុខសាន្ដ និងសេចក្ដីសង្ឃឹមដែលព្រះអង្គសង្គ្រោះប្រទានឲ្យ ។ សូមអាន ឬស្តាប់ពាក្យទាំងនេះ ។ សូមដាក់ស្លាកទំនុកតម្កើងទាំងនេះថា « សេចក្ដីសង្ឃឹម » ឬ « សេចក្ដីសុខសាន្ដ » ។
ទាំងនេះ គឺជាឧទាហរណ៍មួយចំនួន ៖
-
« ខ្ញុំរកក្ដីសុខឯណា ? » ទំនុកតម្កើង ល.រ. ៦៩
-
« ព្រះប្រោសលោះខ្ញុំនៅរស់ » ទំនុកតម្កើង ល.រ. ៧៧
-
« ខ្ញុំស្គាល់ក្តីស្នេហ៍ព្រះសង្រ្គោះ » សៀវភៅចម្រៀងកុមារ ទំព័រ ៤២–៤៣
ឥឡូវត្រូវធ្វើដូចម្តេចទៀត? ?
វីដេអូ « The Prince of Peace » ( ២:៣២ ) បង្រៀនថា ដង្វាយធួនរបស់ព្រះយេស៊ូវគ្រីស្ទផ្តល់នូវសេចក្ដីសុខសាន្ដ និងសេចក្ដីសង្ឃឹម ។
នៅក្នុងសៀវភៅកត់ចំណាំរបស់អ្នក សូមសរសេរមូលហេតុដែលអ្នកត្រូវការសេចក្ដីសង្ឃឹម និងសេចក្ដីសុខសាន្ដរបស់ព្រះអង្គសង្គ្រោះ ។ បន្ទាប់មក សូមកត់ត្រារឿងមួយចំនួនដែលអ្នកអាចធ្វើបានដើម្បីផ្តោតលើព្រះអង្គសង្គ្រោះ ព្រមទាំងសេចក្ដីសង្ឃឹម និងសេចក្ដីសុខសាន្ដរបស់ទ្រង់ នៅពេលអ្នកប្រារព្ធអបអរបុណ្យអ៊ីស្ទើរ ។ គំនិតនានាអាចរួមមានការចងចាំបទគម្ពីរ ឃ្លាមកពី « ព្រះគ្រីស្ទដ៏មានព្រះជន្មរស់ » ឬឃ្លាមកពីបទចម្រៀងទំនុកតម្កើងដែលអ្នកបានសិក្សា ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យពិចារណាអំពីសេចក្ដីសុខសាន្ដ និងសេចក្ដីសង្ឃឹមដែលព្រះយេស៊ូវគ្រីស្ទប្រទានដល់អ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អ្វីដែលអ្នកបានរៀនអំពីព្រះអង្គសង្គ្រោះ ចេញពីវគ្គបទគម្ពីរដែលអ្នកបានសិក្សា និងដាក់ស្លាកនេះ ។
-
ឃ្លាមកពី « ព្រះគ្រីស្ទដ៏មានព្រះជន្មរស់ » ឬមកពីបទចម្រៀងទំនុកតម្កើងដែលនាំសេចក្ដីសង្ឃឹម និងសេចក្ដីសុខសាន្ដដល់អ្នក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?
អញ្ជើញឲ្យចែកចាយការបំផុសគំនិត
-
តើព្រះអង្គសង្គ្រោះអាចនាំមកសេចក្ដីសង្ឃឹមមកដល់អ្នកដោយរបៀបណា ?
-
នៅអំឡុងរដូវបុណ្យអ៊ីស្ទើរនេះ តើអ្នកចងចាំព្រះយេស៊ូវគ្រីស្ទដោយរបៀបណា ?
ការសម្របខ្លួនទៅនឹងការជួបជុំពីចម្ងាយ
ដោយប្រើមុខងារពិសេសចំណារពន្យល់ សូមរៀបចំ « ព្រះគ្រីស្ទដ៏មានព្រះជន្មរស់ » ដើម្បីឲ្យសិស្សអាចសរសេរចំណារពន្យល់លើវាបាន ។ សូមសិក្សាវាជាមួយគ្នា ។ សូមឲ្យសិស្សគូសសម្គាល់ឃ្លាដែលពួកគេចូលចិត្ត ឬឃ្លាមួយដែលមានអត្ថន័យចំពោះពួកគេ ។